mata-pita apni kanya ka vivah karne ke lie var ki kundli ka gun milan karte hain. kanya ke bhavishya ke prati chintit mata-pita ka yah kadam uchit hai. kintu, iske purva unhen yah dekhna chahie ki larki ka vivah kis umra men, kis disha men tatha kaise ghar men hoga? uska pati kis varn ka, kis samajik star ka tatha kitne bhai-bahnon vala hoga? larki ki janm lagn kundli se uske hone vale pati evan sasural ke vishay men sab kuch spashtatah pata chal sakta hai. jyotish vigyan men falit shastra ke anusar larki ki janm lagn kundli men lagn se saptam bhav uske jivan, pati, dampatya jivan tatha vaivahik sanbandhon ka bhav hai. is bhav se uske hone vale pati ka kad, rang, rup, charitra, svabhav, arthik sthiti, vyavsay ya karyakshetra, parivar se sanbandh ki adi ki jankari prapt ki ja sakti hai. yahan saptam bhav ke adhar par kanya ke vivah se sanbandhit vibhinn tathyon ka vishleshan prastut hai.
sasural ki duri:
saptam bhav men agar vrish, sinh, vrishchik ya kunbh rashi sthit ho, to larki ki shadi uske janm sthan se 90 kilomitar ke andar hi hogi. yadi saptam bhav men chandra, shukra tatha guru hon, to larki ki shadi janm sthan ke samip hogi. yadi saptam bhav men char rashi mesh, kark, tula ya makar ho, to vivah uske janm sthan se 200 kilomitar ke andar hoga. agar saptam bhav men dvisvabhav rashi mithun, kanya, dhanu ya min rashi sthit ho, to vivah janm sthan se 80 se 100 kilomitar ki duri par hoga. yadi saptamesh saptam bhav se dvadash bhav ke madhya ho, to vivah videsh men hoga ya larka shadi karke larki ko apne sath lekar videsh chala jaega.
shadi ki ayu:
yadi jatak ya jatka ki janm lagn kundli men saptam bhav men saptamesh budh ho aur vah pap grah se prabhavit n ho, to shadi 13 se 18 varsh ki ayu sima men hota hai. saptam bhav men saptamesh mangal papi grah se prabhavit ho, to shadi 18 varsh ke andar hogi. shukra grah yuva avastha ka dyotak hai. saptamesh shukra papi grah se prabhavit ho, to 25 varsh ki ayu men vivah hoga. chandrama saptamesh hokar papi grah se prabhavit ho, to vivah 22 varsh ki ayu men hoga. brihaspati saptam bhav men saptamesh hokar papi grahon se prabhavit n ho, to shadi 27-28 ven varsh men hogi. saptam bhav ko sabhi grah purn drishti se dekhte hain tatha saptam bhav men shubh grah se yukt ho kar char rashi ho, to jatika ka vivah di gai ayu men sanpann ho jata hai. yadi kisi larki ya larke ki janmakundli men budh svarashi mithun ya kanya ka hokar saptam bhav men baitha ho, to vivah balyavastha men hoga.
vivah varsh gyat karne ki jyotishiya vidhi:
ayu ke jis varsh men gocharasth guru lagn, tritiya, pancham, navam ya ekadash bhav men ata hai, us varsh shadi hona nishchit samjhna chahie. parantu shani ki drishti saptam bhav ya lagn par nahin honi chahie. anubhav men dekha gaya hai ki lagn ya saptam men brihaspati ki sthiti hone par us varsh shadi hui hai.
vivah kab hoga yah janne ki do vidhiyan yahan prastut hain. janm lagn kundli men saptam bhav men sthit rashi ank men 10 jor den. yogafal vivah ka varsh hoga. saptam bhav par jitne papi grahon ki drishti ho, unmen pratyek ki drishti ke lie 4-4 varsh jor yogafal vivah ka varsh hoga.
jahan tak vivah ki disha ka prashn hai, jyotish ke anusar ganit karke iski jankari prapt ki ja sakti hai. janmang men saptam bhav men sthit rashi ke adhar par shadi ki disha gyat ki jati hai. ukt bhav men mesh, sinh ya dhanu rashi evan surya aur shukra grah hone par purva disha, vrish, kanya ya makar rashi aur chandra, shani grah hone par dakshin disha, mithun, tula ya kunbh rashi aur mangal, rahu, ketu grah hone par pashchim disha, kark, vrishchik, min ya rashi aur budh aur guru grah hone par uttar disha ki taraf shadi hogi. agar janm lagn kundli men saptam bhav men koi grah n ho aur us bhav par anya grah ki drishti n ho, to balvan grah ki sthiti rashi men shadi ki disha samjhni chahie. ek anya niyam ke anusar shukra janm lagn kanudli men jahan kahin bhi ho, vahan se saptam bhav tak ginen. us saptam bhav ki rashi svami ki disha men shadi honi chahie. jaise agar kisi kundli men shukra navam bhav men sthit hai, to us navam bhav se saptam bhav tak ginen to vahan se saptam bhav vrishchik rashi hui. is rashi ka svami mangal hua. mangal grah ki disha dakshin hai. atah shadi dakshin disha men karni chahie.
pati kaisa milega:
jyotish vigyan men saptamesh agar shubh grah (chandrama, budh, guru ya shukra) ho ya saptam bhav men sthit ho ya saptam bhav ko dekh raha ho, to larki ka pati sam ayu ya do-char varsh ke antar ka, gaurang aur sundar hona chahie. agar saptam bhav par ya saptam bhav men papi grah surya, mangal, shani, rahu ya ketu ka prabhav ho, to bari ayu vala arthat larki ki umra se 5 varsh bari ayu ka hoga. surya ka prabhav ho, to gaurang, akarshak chehre vala, mangal ka prabhav ho, to lal chehre vala hoga. shani agar apni rashi ka uchch n ho, to var kala ya kurup tatha larki ki umra se kafi bari ayu vala hoga. agar shani uchch rashi ka ho, to, patle sharir vala gora tatha umra men larki se 12 varsh bara hoga.
saptamesh agar surya ho, to pati gol mukh tatha tej lalat vala, akarshak, gora sundar, yashasvi evan rajakarmachari hoga. chandrama agar saptamesh ho, to pati shant chitt vala gaur varn ka, madhyam kad tatha, sudaul sharir vala hoga. mangal saptamesh ho, to pati ka sharir balvan hoga. vah krodhi svabhav vala, niyam ka palan karne vala, satyavadi, chote kad vala, shurvir, vidvan tatha bhratri-premi hoga tatha sena, pulis ya sarkari seva men karyarat hoga.
pati kitne bhai-bahnon vala hoga:
larki ki janm lagn kundli men saptam bhav se tritiya bhav arthat navam bhav uske pati ke bhai-bahan ka sthan hota hai. ukt bhav men sthit grah tatha us par drishti dalne vale grah ki sankhya se 2 bahan, mangal se 1 bhai v 2 bahan, budh se 2 bhai 2 bahan vala kahna chahie. larki ki janmakundli men pancham bhav uske pati ke bare bhai-bahan ka sthan hai. pancham bhav men sthit grah tatha drishti dalne vale grahon ki kul sankhya uske pati ke bare bhai-bahan ki sankhya hogi. purush grah se bhai tatha stri grah se bahan samjhna chahie.
pati ka makan kahan evan kaisa hoga:
larki ki janm lagn kundli men uske lagn bhav se tritiya bhav pati ka bhagya sthan hota hai. iske svami ke svakshetri ya mitrakshetri hone se pancham aur rashi vriddhi se ya tritiyesh se pancham jo rashi ho, usi rashi ka shvasur ka ganv ya nagar hoga. pratyek rashi men 9 akshar hote hain. rashi svami yadi shatrukshetri ho, to pratham, dvitiya akshar, sam rashi ka ho, to tritiya, chaturth akshar mitrakshetri ho, to pancham, shashtham akshar, apni hi rashi ka ho to saptam, ashtam akshar, uchch kshetri ho, to navam akshar prasiddh nam hoga. tritiyesh ke shatrukshetri hone se jis rashi m e nha e usas e chatu rth rashi sasu ral ya bhavan ki hogi. yadi tritiya se shatru rashi men ho aur tritiya bhav men shatru rashi m e npar aho ,ta e dasvi n rashi sasu rake ganv ki hogi. larki ki kundli men dasvan bhav uske pati ka bhav hota hai. dasham bhav agar shubh grahon se yukt ya drisht ho, ya dashmesh se yukt ya drisht ho, to pati ka apna makan hota hai. rahu, ketu, shani, se bhavan bahut purana hoga. mangal grah men makan tuta hoga. surya, chandrama, budh, guru evan shukra se bhavan sundar, siment ka do manjila hoga. agar dasham sthan men shani balvan ho, to makan bahut vishal hoga.
pati ki naukri:
larki ki janm lagn kundli men chaturth bhav pati ka rajya bhav hota hai. agar chaturth bhav balyukt ho aur chaturthesh ki sthiti ya drishti se yukt surya, mangal, guru, shukra ki sthiti ya chandrama ki sthiti uttam ho, to naukri ka yog banta hai.
pati ki ayu:
larki ke janm lagn men dvitiya bhav uske pati ki ayu bhav hai. agar dvitiyesh shubh sthiti men ho ya apne sthan se dvitiya sthan ko dekh raha ho, to pati dirghayu hota hai. agar dvitiya bhav men shani sthit ho ya guru saptam bhav, dvitiya bhav ko dekh raha ho, to bhi pati ki ayu 75 varsh ki hoti hai.