jab hanuman ne rin chukaya rin vibhinn hain. inse manushya to kya devi devta bhi prabhavit hote hain aur unhen bhi inse mukt hona parta hai. mahabli hanuman ko bhi mata anjni ki agya se ye rin chukane pare the. hanuman ka yah prasang bhi unke anya prasangon ki bhanti hi prernadayi hai. katha hai ki sanjivni buti lane ke kram men bhagvan ardhanarishvar ke updesh sunne ke bad mahabli hanuman jab thora subhyast hue ki sahsa unhen ek mridu svar sunai diya, “he mahavir! avasar a gaya hai, jab tumhen apne kuch rinon se mukt ho jana chahie.” pavnputra ne netra uthae to dekha ki mata anjni prasann mudra men samne khari thin. unki drishti se vatsalya umar raha tha. unhonne apne putra ko god men lene ke lie apne hath barhaen aur hanuman ek nanhe balak ki bhanti unmen sama gae. mata ne bare sneh aur dular se putra ke mathe par tin bar hath firaya jiske falasvarup unke hanuman ke tin kesh unke hath men a gae. un keshon ko yatnapurvak sanbhale rahin. balak hunman ko kuch kshanon ke pashchat apne kartavya ka dhyan aya aur shishu ki bhav-bhumi se bajar akar unhonne atyant vinit bhav se mata ke charnon men shish navaya.
bhav-vihval anjni ke munh se bol nahin fut rahe the, par unka hriday putra ko ashirvad de raha tha. anjni putra ki ichcha hui ki mata ko kuch arpit karen. ichcha hote hi sanjivni pavart ki sari dishaon se rangbirange aur sugandh vale divya pushp jhar-jhar kar hanumanji ki dain or ekatra hone lage aur dekhte dekhte vahan dichya pushpon ka ek dher sa lag gaya. us dher se hanuman ji ne anjuli bhar kar ful uthae aur mata ke charnon men arpit karne ki cheshta ki, kintu mata ne age barhakar sare pushpon ko apne anchal men grahan kar liya. yah dekhakar hanuman ji ne do aur pushpanjliyan mata ke anchal men dal din. fir vah chaithi pushpanjli dalne hi ja rahe the ki mata bolin, “bas putra! mujhe aur nahin chahie. tum matri rin se mukt hue. in tinon pushpanjliyon ke fulon ko, jinmen se pratyek men tumhara ek-ek kesh bhi rahega, main tin alg-alag sthanon shri salasar bala ji, shri mahandipur balaji aur varala bala ji par sthapit karungi. in tinon hi sthanon par tumhen anant kal tak vidyaman rahakar bhakton ki manokamnaen purn karni hongi. ab ek adesh hai vatsa!” natamastak hanuman ne kaha, “agya mata ji! apke adesh ka palan karke main kritkritya ho jaunga.”
mata bolin, “vatsa! ab in shesh fulon se apne pita ke unchas svarupon ko, grahon ko, sabhi devi devtaon ko yaksha-gandharva-kinnaron ko, sabhi shaktiyon ko, sabhi rishi-muniyon ko, dason mahavidyaon aur shastron ko, sabhi indriyon ko aur sabhi jivon ke atmasvarupon ko pushpanjli arpit karon. is satkarm se tumhen sabhi ke rin se mukti mil jaegi or tum sarvashaktisanpann, sarvasamarth tatha sarvashaktidayak ban jaoge. tum jaisa putra pakar mera jivan dhanya ho gaya. ab men jaungi, tum apna shesh karya pura karo.” putra hanuman ne punah mata ke charnon men shish navaya aur mata snehmyi drishti se putra ko dekhti hui vahan se chali gain. fir hanuman ji ne mata ke adeshanusar shraddha bhaktipurvak apne pita ke unchas rupon arthat maruton ko divyapushp arpit kie jinhen unhonne saharsh apne apne uttariya pat men grahan kar liya. punah usi shraddhabhav se tinon lokon ke sabhi praniyon, prakriti tatvon tatha sabhi mahavidyaon aur shastron ko pushpanjli arpit ki. pushpanjli kriya samapt hote hi divya vadya-dhvani ke sath sanjivni parvat ke ek bhag men ram, sita, lakshman aur unhen vandan karne ki mudra men svayan hanuman bhi prakat hue. yah dekhakar vah kuch chainke, kintu fir sahaj ho gae.
unhonne apne aradhya shri ram se pucha, “prabho! ab mere lie kya adesh hai?” anjni putra ke prashn ka koi uttar shriram ne nahin diya. kintu un charon ke sthan par ek adbhut vigrah prakat hua. hanuman ji ne dekha ki apne chaturbhuj rup men svayan shrikrishn samne khare mand-mand muskara rahe the. unke do hathon men bansuri, aur ek men divya pushp tha jabki chaitha hath var mudra men utha hua tha. prabhu ki jhanki vichitra thi. vah ek or se golokeshvari shriradha aur dusri or se sakshat shyamsundar dikhai de rahe the. unka yah rup dekhakar hanuman chakit rah gae. unhen chakit dekhakar bhagvan shriradhakrishn bole, “anjni putra! main hi ram hun, main hi hanuman hun, main hi ardhanarishvar hun, main hi yogishvar hun. he hanuman! in divya pushpon ki ek anjli mujhe bhi do.” mahavir hanuman ne unhen ek pushpanjli arpit ki. tab keshav ne unhen kuch shastriya siddhanton se avagat karane ke uddeshya se kaha, ‘‘dekho pavnsut! yah sanpurn vishva prakriti-purushatmak hai. yah charachar jagat inhin donon ke sanyog aur sanyojan ka parinam hai tatha inhin par tika hai. srishti ke panch tatvon men vayu pramukh tatha mahatvapurn hai. jal tatva bhav banakar bhav banakar aur agni tatva tej rup hokar vayu men mil jata hai.
akash bhi vayu ke parthiv ya pranvayu ke rup men sadapurn rahta hai. prithvi tatva tinras renuon men bikharakar vayu men vilin ho jata hai. is prakar shabd, rup, ras, gandh aur gun vayu ke sparsh se gun men sama jate hain. kabhi-kabhi srishti men vichitrata bhi ghatit ho jati hai, jaise tumhare putra ka janm. ashcharya mat karo vatsa! kyonki tum apne bal-brahmachari samjhte ho aur sansar bhi tumhen aisa hi janta hai. kintu sach bat to yah hai ki sitaji ki khoj ke kram men jab urte hue samudra ke upar se ur rahe the, tab tumhare kuch sved-bindu niche gire the, jinhen ek makri ne bhakshan kar liya tha. uske prabhav se usne ek putra ko janm diya. vah makaradhvaj kahlaya aur is samay ahiravan ka sevak banakar vah patal ka dvar-rakshak hai. vah kamrup hai, kyonki kamdev bhi makaradhvaj kahlate hain. dvapar men main bhi makaradhvaj ke nam se pujit hota hun. kalantar men makaradh vaj namak siddhidayak maharsayan hoga. he pavnsut! tumne jin devi devtaon ko pushpanjli di hai, ve sab ahobhav se tumhen dekh rahe hain. ab inhen apne-apne sthan par jane ko kaho. tumhara sada mangal hoga.’’ itna kahakar bhagvan antardhan ho gae. tab hanumanji ne sab se pahle hath jorakar pita vayu dev ki aur divya shaktiyon ki parikrama ki, fir sabko sanbodhit karte hue kaha, ‘‘he divya shaktiyon! meri pushpanjli grahan karne ke lie ap sabhi ne yahan padharne ki kripa ki.
atah main sada apka rini rahunga. ab ap sab apne-apne sthanon par jaen.’’ pavnsut ke aisa kahne par sadhuvad ki dhvani se akash gunj utha. vayu devta ki shreshthata ko svikar karte hue sabhi shaktiyon ne apne-apne pushp unhen dekar kaha ki jagat ke kalyan ke lie ap inhen sarvatra bikher den. kintu ranbha, urvashi, grahon adi ne apne pushp vayu devta ko nahin die. bhavishya men avtrit hone vale grah harshal, nepchyun aur pluto brahma,vishnu aur mahesh ke rup men vahan upasthit the. in grahon ki puja bhi vartaman samay men ki jati hai. surya grahon ke raja hain. vah hanuman ji ke is divya karm se atyant prabhavit evan prasann hue. kuch age barhakar unhonne kaha, ‘‘priya hanuman! main sabhi grahon ka svami hone ke nate tumhen vardan deta hun ki jis prani par tumhari kripadrishti hogi, koi bhi grah uske pratikul nahin hoga.’’ is tarah mahavir hanuman ki namrata se prabhavit bhagvan shrikrishn aur anya devtagan ne unhen vardan die. yahi karan hai ki hanuman ki nishthapurvak puja aradhna karne valon ka grah adi bhi kuch bigar nahin pate. tatparya yah ki rin manushya, devta, ishvar sab ko prabhavit karte hain. inhen chukana sab ka kartavya hai. prastut prasang men hamne dekha ki param balshali mahavir hanuman ko bhi inhen chukana para. atah inse mukti ke har sanbhav upay karne chahie. anyatha ye manushya ke ihlok tatha parlok donon ko bigar dete hain, use sharirik tatha mansik kashton ka samna karna parta hai.