hamare janmang chakra men vibhinn bhavon ko dharm, arth, kam v moksh char bhagon meen banta jata hai. 1, 5, 9 dharm bhav, 2, 6, 10 arth bhav, 3, 7, 11 kam bhav aur 4, 8, 12 moksh bhav hai. pratyek vyakti ko apna jivan nirvah karne ke lie dhan ki avashyakta hoti hai. 2, 6, 10 arth bhav hone se vyakti ki dhan sanbandhi avashyakta ko pura karte hain. dusra bhav hamare kutunb v sanchit dhan ko darshata hai. chatha bhav hamari naukri v rin ko darshata hai. dasvan bhav hamare vyavsay ko darshata hai. kisi vyakti ka dusra bhav balvan ho to uski dhan sanbandhi avashyaktaen kutunb se mili hui sanpatti v dhan se puri hoti rahti hai. sari umar vah koi naukri ya vyavsay nahin karte jaise mahajni ka karya. aise karya jo pirhi dar pirhi dhan upalabdh karvate rahte hain. kisi vyakti ka chatha bhav balvan ho to vyakti naukri dvara sara jivan gujar deta hai. kuch log jivan bhar udhar hi mangte rah jate hain aur unke karya chalte rahte hain. dasham bhav balvan hone se vyakti apne svayan ke karm se dhan kamata hai. vyakti kis tarah ke vyavsay ya naukri men adhik saflta prapt karega iska nirdharan karne ke lie sabse pahle yah nirdharit karna parta hai ki vyakti ki lagn kundli, chandra kundli v surya kundli men se sabse balvan kundli kaun si hai. surya, chandra aur lagn se dasham bhav ke svamiyon men se jo sabse balvan ho vah navansh kundli men jis rashi par sthit ho, us rashi ke svami dvara vyakti ke vyavsay evan naukri ki jankari milti hai. rashiyon ke svami sirf sat grah hi hote hain ismen rahu-ketu ko mahatva nahin diya jata.
surya se sanbandhit vyavsay: sarkari naukri, rajdut, updeshak, mantra karya, fal vikreta, vastra, un, trin, tanba, svarn, manik, sing ya haddi ke bane saman, kheti bari, dhan viniyog, bima ejent, sarkari mukhbir, pret karya. chandra se sanbandhit vyavsay: jal se uparatn vastuen, jal, moti, munga, shankh, kraekri, jansanpark adhikari, jadugar, fotografiks v vidiyo miksing, vastra vyavsay, videshi karya, dudh, sabji, ayurvedik davaen, manovinod ke karya. mangal se sanbandhit vyavsay: dhatu karya, pulis v sena ki naukri, agni karya, sahsik karya, sarkas, vakalat, gavah, byuti parlar, naukri dilvane ke karya, arjinvis, shaktivardhak karya, agnibima, bijli, chulha, indhan, para, patthar, khun bechna, shalya karya, nai, kemist, makenik, chori ka karya, bhumi ke karya, mitti ka saman. budh se sanbandhit vyavsay: vyapar karya, vedon ka adhyapan, lekhan karya, jyotish karya, prakashan ka karya, shilpakala, kavya rachna, gayan vidya, vaidya, vanaspati, bijon v paudhon ka karya, byaj, batta, punji nivesh, samachar patra, dalali ke karya. brihaspati se sanbandhit vyavsay: brahman ka karya, dharmopdesh ka karya, bainking karya, rajniti, arthashastra, puran, grih nirman, uttam farnichar, shayan upakaran, garbh sanbandhit karya, manglik karya, adhyapan karya, vyaj karya, khane pine ki vastuen, svarn karya.
shukra se sanbandhit vyavsay: sona, chandi, hira, restorent, hotal, vivah se sanbandhit karya, mahilaon se sanbandhit karya, uttam vastra, sangit, ekting, veshyavriti, dahi, sent, pashu chikitsa, sachiv, mantri, shastrakar, kam kala. shani se sanbandhit vyavsay: dastakari, marammat ke karya, lakri ka karya, mota anaj, koyla, loha, vaigyanik karya, anusandhan karya, jyotish karya, jaj, thekedari, bhikshavriti, mashinri ke karya. in vyavsayon ke atirikt kuch vyavsay aise hote hain jinke lie ek se adhik grahon ka balvan hona avashyak ho jata hai. jaise drai frutas ka karya. drai frutas men kishmish ka sanbandh surya se, pista ka sanbandh mangal se, akhrot ka sanbandh guru se, kaju ka sanbandh shukra se v badam ka sanbandh shani se hai. in panchon ko panchmeva kaha jata hai. ye panch tatvon ke bhi karak hai. jaise - surya agni tatva, mangal bhumi tatva, guru akash tatva, shukra jal tatva v shani vayu tatva ka karak hai. kuch vyaktiyon ki kundli men vyavsay ka nirdharan atmakarak grah dvara bhi hota hai. surya atmakarak ho to jatak men atmik bal bahut hota hai vah har karya apni atma ki avaj sun kar karta hai. chandra balvan ho to mansik santulan deta hai.
mangal parakrami banata hai. budh buddhi ka karak hai. guru gyan v vivek deta hai. shukra bhautik aishvarya pradan karta hai. shani gyan v vairagya barhata hai. rahu ahankar v ketu moksh ka karak hai. is prakar sabhi grahon v bhavon ka balabal vichar karne ke bad hi vyavsay ka nirdharan karna chahie. yah bat dhyan dene yogya hai ki vyavsay evan ay ke sanbandh men prachin jyotish granthon men varnit yogon ka adhunikikaran karne ki avashyakta hai. prachin kal men vyavsay evan ajivika ke kshetra atyant simit hote the. kyonki adhikansh log krishi ya usse sanbandhit vyavsay se jure hote the. atah yahan vyavsayon ke adhunik vibhinn svarup evan vividhtaon ko dhyan men rakh kar grahon evan bhavon ka vivechan kiya gaya hai.
vibhinn vyavsayon se sanbandhit kuch yogon ko yahan diya ja raha hai: raj yog
1. yadi janmapatrika men vrish rashi ka chandra guru se drisht ho to jatak prithvipti hota hai evan samast bhumandal par shasan karta hai aur uske suyash charon dishaon men sushobhit karne vala hota hai.
2. yadi janmapatrika men kendra 1, 4, 7, 10 bhav men surya sthit ho, kendra tatha trikon 1, 4, 5, 6, 7, 9, 10 sthan men chandra ho tatha lagn tatha sukh 1, 4 bhav men guru ho to rajyog hota hai.
3. yadi janmakundli men guru budh se nirikshit ho ya budh guru sath-sath ho to us jatak ka adesh raja log bhi shirodharya karte hain. rajrajeshvar rajyog yadi janmapatrika men budh, guru se dekha jata ho to jatak raja hota hai tatha uske shasan prabandhan ko log shirodharya karte hain. chakravarti rajyog: yadi koi bhi grah kundli men apne panchmansh men sthit ho to jatak raja hota hai aur purnabali ho to chakravarti raja hota hai. bahukarmi dhani yog: yadi janmakundli men lagn ya chandra se 10ven bhav men guru ho to jatak anek vyapar se dhan prapt kar dhani hota hai. ajivika yog û yadi janmapatrika men lagn se dashmesh ke navmanshpti surya ho to mantra, fal, vastra, dava, dhatu adi se ajivika prapt hota hai. û yadi janmapatrika men lagn se dashmesh jis navansh men ho uske svami surya ho to aushdhi, un, trin aur svarnadi ke vyapar se ajivika hoti hai. û yadi janmapatrika men lagna/chandra se dasham sthan ka svami surya ke navansh men ho to aushdhi, sona, moti adi se ajivika ki prapti hoti hai. û yadi janmapatrika men lagn ya chandra se dasham (karma) bhav ka svami brihaspati ke navansh men ho to dev brahman ke pujan se, vidyadan se, dharmopdesh se aur byaj se ajivika hoti hai.
yadi janmakundli men lagn se dashmesh ke navmansh pati shukra ho to jatak kavya, dudh, pashu, nrityadi karm se jivikoparjan karta hai. û yadi janmapatrika men lagn se dashmesh jis navmansh men ho uske svami yadi shukra ho to bhains adi pashu, ratn adi se ajivika hoti hai. û yadi janmapatrika men lagn ya chandra se dasham ke navansh ka svami budh ho to shilp karya se, chitra, pustak adi ke lekhan se, vastra nirman se, kavya se, agam shastra marg se, jyotish se, paurohitya karm se, ved mantron ke jap se, ved ke adhyayan se jatak dhanoparjan evan ajivika prapt karta hai. û yadi janmapatrika men lagn ya chandra se dashven bhav ka svami shukra se navansh men ho to jatak svarn, mukta manik ratnadi ke vyavsay se, gur chini se, dahi dugdh se, pashuon ke vyavsay se, manoranjan karya se tatha striyon ke pralobhan se ajivika hoti hai. jyotishi yog 1. yadi janmapatrika men budh 1, 4, 5, 7, 9, 10 sthanon men sthit ho to jatak jyotishi hoti hai. 2. yadi janmapatrika men brihaspati 1, 4, 5, 7, 9, 10 sthanon men sthit ho to jatak jyotishi hoti hai. 3. lagn bhav se ya lagnesh se guru v budh ka sanbandh hone se vyakti jyotishi hota hai. prastut kundli men lagnesh budh hai aur lagn par guru ki drishti hai. lagnesh aur guru ka drishti sanbandh bhi hai. yah kundli ek prasiddh jyotish vidvan ki hai jisne is kshetra men vishesh khyati prapt ki hai v anek pustaken likhi hai.
4. guru kendra men ho ya pap grah ke sath trikon men ho, mangal pap grah ke sath kendra ya trikon men ho to jatak jyotish ke sath-sath tantrashastra ka bhi jankar hota hai. ganitagya yog: yadi janmapatrika men guru 1, 4, 5, 7, 9 evan 10 ven bhav men ho to jatak ganitagya hota hai. vyapari yog: dasham bhav par shubh grahon ki drishti ho, to manushya vyapari hota hai athva (1) dashmesh aur lagnesh ek hi rashi men ho ya (2) dashmesh 1, 4, 5, 7, 9, 10 ya 11ven bhavon men ho tatha shubh grahon se drisht ho evan (3) dashmesh grah apni rashi men ho tatha shubh grahon se drisht ho evan (4) dashmesh grah apni rashi men ho tatha shubh grah ki drishti parti ho, to bhi jatak vyapari hota hai. pustak vikreta yog: surya, guru athva shukra ka sanbandh lagn bhav se hone par pustak vyavsay men saflta milti hai. prastut kundli men lagnesh surya shukra ke sath hai aur guru ki drishti bhi lagn par par rahi hai isi karan se is jatak ko pustak vikreta ke vyavsay men saflta mili. pustak prakashak yog: surya ka sanbandh lagn ya lagnesh se ho, guru athva shukra se drisht ho to pustak vikreta yog hota hai. sath hi mangal se bhi drisht ho jae to prakashak yog ban jata hai. prastut kundli men surya shukra ke sath hai aur guru aur mangal ki drishti un par par rahi hai isi karan se is jatak ko pustak vikreta ke sath-sath prakashak ke karya men ana para.
chitrakar yog: chandra aur mangal donon ka sanbandh lagn bhav se ho to chitrakla ke karya men saflta v prasiddhi milti hai. prastut kundli men chandra lagnesh hai aur mangal ki chaturth drishti lagn par hai. prastut kundli ek fotografar v chitrakar ki hai. abhineta yog: pratham bhav se chandra, mangal aur shukra ka sanbandh ho to abhineta yog banta hai. prastut kundli men lagnesh mangal lagn bhav ko dekh raha hai. shukra lagn men hi hai. uchch ka chandra lagn ko dekh raha hai. is prakar chandra mangal aur shukra tinon ka sanbandh lagn se hone ke karan jatak ek safal abhineta hai. kavi yog: lagn se guru aur chandra ka sanbandh vyakti ko kavi banata hai. lagnesh guru uchch ka hokar lagn ko dekh raha hai. chandra lagn men hi hai. prastut kundli vishva prasiddh kavi shri ravindra nath taigor ki hai. guru kendra ka svami hokar trikon bhav men baithne se rajyog karak bhi ho gaya hai. thekedar yog: lagn bhav se ya lagnesh se mangal aur shani ka sanbandh ho to thekedar yog banta hai.
prastut kundli men lagnesh mangal aur shani ki yuti hai aur budh lagn men hi baitha hai. is jatak ne thekedari ke kam se achchi sanpatti arjit ki hai. daektar yog: lagn bhav se v chathe bhav se mangal ka sanbandh ho to daektar yog banta hai. prastut kundli men uchch ka mangal chathe bhav men baithakar lagn ko dekh raha hai. yah kundli ek suprasiddh evan vishesh khyati prapt daektar ki hai. injiniyar yog: lagn bhav se mangal v shani ka sanbandh hone par injiniyar yog banta hai. prastut kundli men lagnesh shani lagn men hi baitha hai aur mangal ki drishti lagn bhav par hai. yah jatak chif injiniyar ke pad par karyarat hai. vaidya yog: panchven bhav men surya mangal ki yuti ho to jatak vaidya hota hai. vividh vidya yog: kendra men guru aur shukra baithe ho to jatak chahon shastron ka gyata hota hai. dharmadhyaksh yog: guru ya shukra apni uchch rashi men ho, shubh grah mitra ke navansh men ho tatha navmesh bali ho to jatak dharmadhikari hota hai. bhaskar yog: surya se dusre bhav men budh, budh se gyarhven bhav men chandra, chandra se panchven bhav men guru ho to bhaskar yog banta hai. aisa jatak dhani, parakrami, shastron ka vidvan, jyotish ka vidvan, sangitagya tatha uttam vyaktitva vala hota hai.