ham bhartiya, vishva ki prachinatam sanskriti ke sanvahak hain jo adi se hai aur ant tak rahegi. sanatan sanskriti men jahan dharm aur adhyatm brihad rup men vidyaman hai vahin bina parvon ke hamari sanskriti purn nahin hoti hai. bhartiya sanskriti ko virat evan vishesh rup dene men aur ise jivant rakhne men parvon ki bahut badi bhumika hai. bharat ke parva n keval dharm balki hamare samajik jivan ka bhi vishisht ang hain. varsh bhar men shayad hi koi aisa din ho jab yahan parva n ho. yahan to pratidin parva hain. ye parva hamare achar-vichar, rahn-sahan, khan-pan, veshbhusha adi ko to dikhate hi hain sath hi itne vishal rashtra men ek mat se miljul kar parvon ko manana bharat ki ekta aur akhandta ko bhi darshata hai. hamare parvon ke udbhav ya vikas ko yadi dekhen to pratyek parva ke piche ek pauranik akhyan avashya hota hai arthat yahan koi bhi parva mangdhant ya kisi ke man ki utpatti nahin hai. satyug se lekar vartaman tak jo bhi daivik, dharmik ya adhyatmik ghatnayen pratyaksh huin unhin se hamare parvon ka janm hua hai jisse pratyek parva men ek vishishtata chipi hoti hai jaise dipavli ke piche lakshmi mata ka prakatya aur shriram ka vanvas uprant lautna, holi ke piche hiranyakashyap ki bahan holika ka dahan, prahlad ki jay, basant panchmi ko man sarasvati ka prakatya aur dashhra ko vishay parva ke rup men manaya jata hai. is prakar kuch parva to sarvadeshik hain jo pure rashtra men ek sath manaye jate hain aur kuch pradeshik hain jaise lohdi panjab men adhik prachlit hai pongal dakshin bharat men dhum-dham se manaya jata hai. vastav men bharat ke parvon ki suchi itni virat hai ki unka ek sath varnan nahin kiya ja sakta. atah jo parva vishesh rup se manaye jate hain unhin ka varnan evan mahatva yahan prastut hai. nav-samvatsar yah divas bhartiya sanskriti men bada mahatva rakhta hai. vartaman men bhale hi pashchatya sabhyata ke karan ham is parva ko bhul gaye hain. bhartiya panchang ke anusar chaitra mas ke shukla paksh ki pratipda tithi ko nav-sanvat ka aranbh hota hai aur yahi bharat ka vastavik naya varsh hota hai. iske alava is din ka dharmik mahatva bhi kam nahin hai kyonki isi din brahmaji ne sanpurn srishti ki rachna ki aur bhagvan ka pratham avtar matsya avtar bhi isi din hua tha aur isi din se vasantik navratra ka aranbh bhi iske mahatva ko kai guna badha deta hai. navratra navratra varsh bhar men do bar hote hain. chaitra shukla pratipda se navmi tak jinhen vasantik navratra aur ashvin shukla pratipda se navmi tak jinhen shardiya navratra kahte hain. navratra hamare liye shakti pujan, shakti sanvardhan evan shakti sanchay ke din hain. sanpurn brahmand ke sanchalan ke piche adi shakti ka hi vastavik svarup hai, yah navratra hamen batate hain. ramnvmi sachchidanand bhagvan ne apne sat svarup men svayan ko jis din prakat kiya vahi din ram navmi hai. lakhon varsh purva isi din bhagvan ram ne bharat bhu par avtrit hokar apni adarsh lilaon ke dvara sansar ke samaksh sachchi manvta ke adarshon ko prastut kiya atah is parva ka dharmik mahatva to bada hai hi iske atirikt bhagvan ram ke adarshon ka smaran karte hue nayi pidhi tak pahunchane ka bhi yah vishesh parva hai. raksha bandhan bhartiya parvon men rakshabandhan ek mahatvapurn v aitihasik parva mana jata hai parantu iska itihas koi sau, do sau ya hajar varsh ka nahin hai balki lakhon karodane varsh purva ka hai aur vartaman men kam hi log iski prakatya katha se parichit hain. pauranik kathaon ke anusar ek bar dev aur danvon ka yuddh hua jismen dev harne lage aur devraj indra ke pran sankat men a gaye tab koi marg n milne par unki patni maharani shachi ne vaidik mantron se abhimantrit ek raksha sutra indra ki kalai par bandh diya aur isi raksha sutra ke bal par indra ne danvon ko parast kiya. kalantar men is pratha ka rup badlte hue bhai aur bahnon ke pavitra prem ka pratik ban gaya. vastav men mantron se yukt rakshasutra vyakti ko purn atmavishvas se bhar deta hai aur vah bhi apne kartavya ke liye sadaiv tatpar ho jata hai. janmashtami bhadrapad krishn paksh ashtami tithi aur rohini nakshatra ardharatri ke samay parmatma ne apne anand svarup ko bharat bhumi par prakat kiya. bharat ke sabhi pranton men jis shraddha aur utsah se log shrikrishn ka jayanti utsav manate hain vah sachmuch darshaniya hai. bhagvan shrikrishn ne sanpurn jivan dharm aur satya ki raksha ki. dushton ka nash kiya aur is manv-jivan ko charam vikas v purnata dene ke liye do amulya ratn diye gau aur gita. atah yah virat parva shri krishn ke prem aur anand svarup ke sath unke adarshon ko bhi sadaiv sanchalit rakhta hai. holi bharat men holi ka parva bahut prasiddh aur mahatvapurn hai falgun shukla purnima v chaitra krishn pratipda ka yah do divsiya parva bhale hi hansi-khel ya vibhinn rangon ka pratik ho parantu vastav men iska mahatva kahin adhik hai. iske pauranik akhyan holika aur prahlad ki katha se sabhi parichit hain. atah yah adharm par dharm ki vijay ka pratik to hai hi sath hi samajik drishti se bahut mahatvapurn hai. varsh bhar ke man mutav ko bhulakar sabhi man ki kalikhane par rang-birange rangon ki bauchar kar dete hain aur samaj men bandhutva ki vriddhi hoti hai. sath hi vaigyanik drishti se bhi yah ritu parivartan ka samay hai. atah anek sthanon par holika ke dahan se as-pas ke jivanu-kitanu nasht hote hain. dipavli dipavli bharat ka sabse pramukh evan virat svarup vala parva hai. kartik amavasya ko manaya jane vala yah parva vaise to panch parva hai. dhanteras, choti dipavli, govardhan v bhaiyaduj parantu visheshtah badi dipavli hi pramukh hai. man lakshmi ke prakatya se is din ko mahatva mila hai. sath hi bhagvan ram ke ayodhya agaman ka divas bhi hai. yah parva visheshtah adhyatmik jagriti ka hai. yah siddh ratri hai. dipon ko prajjvalit karna bhi ek nayi urja, asha v shanti pradayak hai. dipavli ka svarup bharat ke parvon men sabse virat hai. sath hi arthik drishtikon se bhi yah vishesh hai kyonki vibhinn saj-sajja aur patakhon, mithaiyon men sabhi vyakti dhan ko sanchalit karte hain jisse rashtra men arthik samriddhi badhti hai. atah bharat men parvon aur unke gudh rahasyon men anmol ratn aur gyan ka bhandar hai. sath hi ye parva hamari dharmik aur adhyatmik chetna ko to jagrit karte hi hain, samajik aur vaigyanik rup se bhi bahut mahatva rakhte hain.
Kya aapko lekh pasand aaya?
Subscribe