aj ka manav arth ke piche daur raha hai evan bhautik sukhon ki prapti ke lie prayatnashil hai. pashchatya sanskriti anusar sanskaron men parivartan ke sath-sath nivasa/vyavsaya/sthal men bhi vastu niyamon ki avhelna ki ja rahi hai jisse parivar simit hota ja raha hai evan parivar men sas, bahu, bhai, bahan, bhabhi, mata, pita men takrav v algav ki paristhitiyan hoti ja rahi hain, purva men parivar sanyukt rahta tha v sanbandh madhur rahte the.
parivar men sas, bahu v parivar ke sadasyon ke rishton men madhurta, sneh, prem vastu shastriya niyamon ka sadharan sa prayog kar lai ja sakti hai. yadi vastu shastriya niyamon ka sadharan sa prayog nivas men kiya jay to sas-bahu ke rishton ko madhur banaya ja sakta hai. jyotish shastra anusar yuvak v yuvti ki janmakundli ke anusar rashi, lagn, nakshatra v gan milan kiye jate hain kintu parivar ke kisi bhi sadasya se unka milan nahin kiya jata hai jiske viprit parinamasvarup parivar se anaban ki sthiti ke sath-sath patni men bhi takrav ho jata hai.
vastu shastra anusar parivar men kis stri-purush, sas-bahu ko kis bhag men sona baithna chahiye jisse unmen madhur sanbandh ho, parivar ka mukhiya dakshin disha men shayan karta hai to uski patni grih svamini bhi dakshin disha men shayan karegi. dakshin disha men sir evan uttar disha men pair karke sona shubh mana gaya hai, kyonki manav ka sharir bhi ek chote chunbak ki tarah karya karta hai, sharir ka uttari dhruv bhaugolik dakshin aur sharir ke dakshin dhruv ka bhaugolik uttar ki or hona manushya ki chintan pranali ko niyantrit karta hai, mastishk ki evan sharir ki bahut sari rashmiyan vidyut chunbkiya prabhav se niyantrit hoti hain, atah dakshin men sir karke sona prithvi ke vidyut chunbkiya prabhav se samanvay baithana hai.
isse svabhav men ganbhirta ati hai evan vyakti men sthit buddhi v vikas sanbandhi vikas ki yojnayen paida hoti hain, sath hi dakshin disha atmavishvas men vriddhi karta hai, dakshin disha men sthit vyakti netritva kshamata se yukt ho jata hai. yadi dakshin men sir karke sone ki suvidha nahin ho to purva men sir karke tatha pashchim men pair karke shayan kiya ja sakta hai.
grih svami/grih svamini ya koi anya stri yadi dakshin disha men shayn/nivas karti hai to vah prabhavshali ho jati hai. atah spasht hai ki parivar ke mukhiya stri ko dakshin disha men shayn/nivas karna chahiye. kanishth striyan devrani ya bahu ko dakshin-pashchim men shayan nahin karna chahie. jo striyan agni kon men shayn/nivas karti hain unka dakshin disha men shayan karne vali striyon se matbhed rahta hai, agni kon men yuvak v yuvti alp samay ke lie shayan kar sakte hain. yah kon adhyayan v shodh ke liye shubh hai.
bhavan ke vayavya kon men jo striyan shayn/nivas karti hain unke man men uchchatan ka bhav ane lagta hai evan vo apne alag se ghar basane ke sapne dekhne lagti hain, atah is sthan par avivahit kanyaon ka shayan karna shubh hota hai kyonki unko sasural ka ghar sanvarna hai.
nai dulhan ya bahu ko yah sthan shayan hetu kadapi upyog men nahin lene dena chahiye. yadi purush vayavya kon men adhik samay shayan karta hai to uska man parivar se uchat jata hai v alag hone ki sochta hai. yadi parivar men do ya do se adhik bahuen hon to vastu shastra ke niyamon ke anusar shayn/nivas ka chayan kar sneh, prem v talmel banaye rakha ja sakta hai. dakshin-pashchim bhag men sas ko sona chahiye, agar sas nahin ho to parivar ki bari bahu ko sona chahiye.
grihastha-sansarik mamlon men patni ko pati ki bayin or sona chahiye. parivar ki mukhiya sas ya bari bahu ko purva ya ishan kon men shayan nahin karna chahiye, vriddh avastha-ashakt ho jane ki sthiti men ishan kon men shayan kiya ja sakta hai.
kintu vriddhavastha-ashakt ho jane par agnikon men shayan nahin karna chahiye. agnikon men agni karya se striyon ki urja ka sahi paripak ho jata hai, agni hotra karm bhi shubh hai. agnikon men yadi striyan tin ghanta vyatit kar pak karm kare to unka jivan unnat hota hai evan vyanjan svadisht hote hain.
shayanakaksh ka bistar agar dabal bed ho evan usmen gadde alg-alag hon tatha pati-patni alg-alag gadde par sote hon to unke bich tanav ki sthiti paida ho jati hai evan age chalakar alag ho jate hain, atah shayanakaksh men aisa bistar hona chahiye jismen gadda ek ho. grih/nivas uttarabhimukh makanon men uttar disha se ishan kon paryant, purvabhimukh makanon men purva disha madhya se vayavya kon paryant, yadi bahya dvar n rakha jaye to striyon men adhik samanvay v prem hota hai.
jivan men jarurat hai jyotishiya margadarshan ki? abhi bat karen fyuchar point jyotishiyon se!