nilkanth ne saikron varsh purva jyotish men varshafal banane aur usse fal kahne ka siddhant diya. ajakal kanpyutar ke dvara ganna asan hone ke karan yah paddhati kafi prachlit ho gayi hai. is paddhati men varsh ke pravesh ki tarikh aur samay nikal kar us samay ki kundli bana li jati hai. ek grah ko jo varsh lagn par sabse adhik asar rakhta hai, varsheshvar ka shirshak de diya jata hai.
muntha ek chaya grah hai, jo prativarsh ek rashi chalti hai, varsh kundli men iski bhumika mahattvapurn hai. ismen ek varsh avdhi ki mudda evan patyansh dasha ki ganna bhi ki jati hai. is paddhati men grahon ki drishtiyan janmakundli jaisi nahin hoti hain. yogon men ismen keval shodash yog hi prachlit hai. ghatna ghatne ka samay nikalne ke lie saham ki ganna di gayi hai. grahon ke apsi bhed dekhne ke lie triptaki chakra banaya jata hai.
is paddhati men ganna kafi vistar se ki gayi hai. lekin iski mul ganna - varsh pravesh ganna men kai matbhed hai. varshaman kya lena chahie? prachin paddhati men yah man 1 varsh 15 ghati 31 pal 30 vipal arthat 365 din 6 ghante 12 minat 36 sekend, ya 365.25875 liya gaya hai. sayan surya 365.242193 din arthat 365 din, 5 ghante 48 minat 45.5 sekend men apna chakkar pura kar leta hai aur nirayan surya ko 365.256363 din arthat 365 din 6 ghante 9 minat 9.8 sekend lagte hain. hamen kaun sa varshaman lena chahie?
dusri samasya sthan ki ati hai. kya hamen janm sthan ko hi varsh sthan ke rup men lena chahie ya vyakti vishesh varsh pravesh ke samay jis sthan par ho, us sthan ko lena chahie?
in samasyaon ke samadhan se pahle varsh ki paribhasha ko samjhna avashyak hai. prithvi ke surya ke charon or chakkar laga kar usi sthan par a jane ko varsh kahte hain. jyotish men ham prithvi ki sthiti taron ke sapeksh men dekhte hain, n ki surya ke sapeksh men. atah hamen nirayan varshaman ko hi manna hoga. atah varsh ke lie varshaman 365.256363 din hota hai. itne samay men nirayan surya lagabhag unhi ansh, kala, vikla par a jata hai.
janie apki kundli par grahon ke gochar ki stithi aur unka prabhav, abhi fyuchar point ke prasiddh jyotishacharyo se paramarsh karen.
yadi kala-vikla men kuch fark ata hai, to vah keval prithvi ke udvelit hone ke karan. yah varshaman ka upyog lahiri ne apne panchang men bhi kiya hai. raman ne bhi isi varshaman ko liya hai. lekin isko purn rup men thik se n le kar kuch sekend ki galti kar di hai, jiske karan 100 varsh men kuch minton ka antar a jata hai.
ab prashn hai varsh sthan ka. yah sunne men bahut tarkik lagta hai ki varsh pravesh ke samay vyakti jahan par ho, vahi varsh sthan lena chahie. lekin varsh pravesh ganna ek khagoliya ganna hai aur yah hamen khagaol shastra ke adhar par hi karni chahie. varsh ki paribhasha ke anusar yah vah man hai, jismen prithvi ghum kar usi sthan par a jati hai. varshaman ke lie sthan ka mahatva nahin hai, kyonki prithvi ko ek bindu man kar yah ganna ki ja rahi hai.
varsh purn puri prithvi ke lie, janm sthan kisi ke bhi lie, usi samay hota hai. jaise man lijie kisi bachche ka janm 1 janvri 1999 ko 5.30 baje pratah dilli men hua. anya shishuon ka janm usi samay kalakatta men, landan men 0 baje pratah evan nyuyaerk men 31 disanbar 1998 sayan 7 baje hua. in charon samay men antar najar ate hain. lekin prithvi par yah ek hi kshan hoga. un sabka agle varsh ka pravesh bhi ek hi kshan par hoga; arthat 1 janvri 2000 ko 11 ghante 39 minat 9.8 sekend par bharat men (dilli aur kalakatta men) pratah 6 ghante 9 minat 9.8 sekend par landan men evan pratah 1 ghante 9 minat 9.8 sekend par nyuyaerk men. ye tinon samay bhi prithvi par ek hi kshan ko darshate hain.
yadi dilli vala bachcha nyuyaerk chala jata hai, to uska varsh pravesh 11 ghante 39 minat 9.8 sekend nyuyaerk men manna thik nahin hoga, kyonki yah samay keval bharat ka varsh pravesh darsha raha hai. sath hi varsh pravesh samay 1 ghanta 9 minat 9.8 sekend nyuyaerk samay par nyuyaerk men hua, aisa manna bhi thik nahin hoga, kyonki keval uska janm hi uski jivan evan uski janmapatri ka dyotak hai. tajak paddhati ke rachyita nilkanth ne yah kahin nahin mana, ya sanket diya hai ki vyakti ke varsh pravesh ke sthan ko varsh sthan manna chahie. koi bhi paddhati tabhi tak thik fal deti hai, jab tak us paddhati men mane gaye niyam pure hon. yadi kisi niyam ko badal diya jae, to paddhati ka purn fal dena avashyak nahin.
apni kundli men sabhi dosh ki jankari paen kampalit dosh riport men
atah hamen varsh pravesh keval nirayan varsh pravesh lena chahie evan sthan janm sthan hi lena chahie. varsh pravesh ke samy-sthan parivartan kara kar, varsh lagn badal kar, varsh ka bhavishya badal dena vaigyanik nahin hai.
varsh sthan ko badlte samay ek bhul am taur par dekhi gayi hai. varsh pravesh samay ko, bina manak samay ke sanshodhan kiye, le lete hain. jaise uparyukt udaharan men dilli men janma balak yadi pratham janm divas par nyuyaerk men hai, to uska varsh pravesh samay aur sthan kramshah 1 janvri 2000, 11 ghante 39 minat 9.8 sekend nyuyaerk samay tatha nyuyaerk le lete hain.
is prakar yah ganna samay evan sthan donon men hi galat ho jati hai. lekin donon galtiyon ke bavjud varshapatri karib-karib sahi a jati hai, kyonki vishva men ek hi sthaniya samay par lagn karib-karib ek hi hota hai, jaise har sthan par madhyahn men surya dasham bhav men hi hota hai. chandrama ke anshon men kuch fark avashya ata hai, jo do sthanon ke manak samay men antar ke barabar hota hai. jo jyotirvid yah mahsus karte hain ki hamare varsh sthan ko badalakar falit thik a rahe hain, ve bhul se vahi varsh patri dekh rahe hote hain jo varsh sthan bina badle ati hai.
apki kundli ke anusar kaun si puja apke lie labhkari hai janne ke lie prasiddh jyotishacharyo se paramarsh karen