yu. pi. e. sarkar aj samy-samay par vivadon se ghiri hui hai. bhrashtachar tatha mahangai desh ke lie mukhya mudda bana hua hai. atah aj ke samay men sarkar ko apni shak bachani mushkil ho rahi hai. aise sthiti men yu. pi. e. sarkar ka bhavishya kya hai. isko dekhte hain jyotish ke najar se. sanyukt pragtishil gathbandhan sarkar (dvitiya pari) 22 mai 2009 jab se astitva men ayi tab se vivadon men ghiri rahi, jabki sanyukt pragtishil gathbandhan jab pahli bar 22 mai 2004 men kendra men astitva men ayi thi us par bhi tin varsh chah mah bad sahyogi parti dvara prashn chihn lagne lage the
fir bhi us sarkar ne sansad men mat vibhajan men jit hasil kar li thi bhale hi us sarkar ko bachane ka tarika bahut hi galat tha. maanniya manmohan sinh ji ne apna karyakal purn kiya, aprail mai 2009 men fir lok sabha chunav, manniya sinh ji ki adhyakshata men hi lade gaye aur unhen fir dubara sattasin hone men saflta bhi mili chunav prachar ke samay unhen manniya lalkrishn advani ji dvara bar-bar kamjor pradhanmantri kahne par bhi janta ne un par aur unki imandar chavi par bharosa jataya aur unhen dobara pradhanmantri banaya, lekin age grah gochar aur varsh badlne par unki sthiti, kendriya sarkar aur manniya manmohan sinh ji ki grah sthiti bahut kamjor hone vali hai.
22 mai 2009 ko rashtrapti bhavan ka etihasik ashoka hael men 6 bajakar 30 minat sayan, trayodshi tithi shukravar ashvin nakshatra saubhagya yog, sath men us din bhadra bhi thi. atah is din ka chayan jyotishiya adhar par galat tha. dasha vinshottari men ketu aur yogini men bhramri ki thi. shapath grahan kundli ke anusar lagnesh shashthesh mangal pancham men vyayesh saptamesh shukra ke sath min rashi men achcha nahin jo is sarkar ko apna karyakal purn nahin karne dega is sarkar par gathbandhan ke sathiyon dvara bhinna-bhinn prakar ke dabav rahenge jo is samay dikh bhi rahe hain. sarkar ke sahyogi partiyon dvara anavashyak hastakshep dabav, karyon ke karan yah kendriya sarkar buri tarah badnam ho chuki hai iska panch sal chalna asanbhav hai.
dvitiyesh panchmesh vrihaspati chaturth sthan men kamjor tatha ‘‘sthan hani karo jivah’’ jis karan vikas dar barhi bhi thi lekin shani ki purn drishti ke karan fir vikas dar giregi mahangai sarkar ke kuprabandhan ke karan sarkar ke lie asadhya ashay bimari ban gayi hai. yah mahangai, parakram sthan ke rahu dvara satta ka durupyog apsi kalah, galat bayanbaji ke karan kendriya sarkar ki sakh din dugni rat chaigni gir rahi hai.
aur janta ise arajak, aloktantrik man rahi hai iske sabhi karya evan nirnay vivadit mane ja rahe hain. shapath grahan kundli ka bhagyesh chandrama chathe ghar men shatru sthan men hone se janta ka kendriya sarkar se dhire-dhire moh bhang ho raha hai, tatha is par age bhi prashn chihn lagte rahenge. jis karan navanbr-disanbar 2011 men manniya dae. manmohan sinh ji par pad tyagne ka dabav barh jaega ve mansik v sharirik rup se ahat najar aenge. saptam sthan men budh surya jismen ki budh ashtamesh labhesh dashmesh surya ke sath achcha nahin hai, navanbar 2011 se jun 2012 tak sanyukt pragtishil gathbandhan ke sahyogi kendriya sarkar se apna samarthan vapas le lenge.
sarkar gir jaegi bhagya sthan ka ketu aur bhagyesh chathen ghar men, mangal surya ke bich man pratishtha ke lie achcha nahin kaha ja sakta hai. islie jab se yah kendriya sarkar astitva men ayi yah vivadon, aropon men ghiri rahi jo bhavishya ki drishti se achcha nahin ka ja sakta hai. dasham sthan ka shani jo ki vakri hai, sath hi apne se saptam men sthit hai jo yah suchit kar raha hai. is sarkar ke lie shitkalin satra achcha nahin, ek do naye bhrashtachar ke mudde vipaksh aur utha sakta hai.
jo manniya soniya gandhi evan rahul gandhi ji ko bhi prabhavit karenge. manniya rahul gandhi ko 2012 men pradhanmantri banaya ja sakta hai. jo parti ke lie achcha nahin hoga. navanbar disanbar 2011 ko manniya manmohan sinh ji par aur arop lagenge 2012 men ve pradhanmantri ka pad chor denge. san 2012-2013 men madhyavdhi chunav honge, jo kangres parti ke lie achche nahin honge.