bachchon ki achchi parvrish aur unke jivan ko sukhamay banana har mata-pita ka kartavya hota hai aur is kartavya ka palan karne men ve piche bhi nahin rahte. kintu aj ke is badlte mahaul men jab bhautiktavad aur pashchimi sabhyata ka aektopas hamare samaj men apne pair pasar chuka hai, bachche apni mahatvakanksha ke samne apne mata-pita ki bhavnaon ko koi tarjih nahin dete, halanki iska khamiyaja unhen svayan bhugtna hota hai.
nina ke sath bhi kuch aisa hi hua. jab uski ayu vivah ke yogya thi tab usne apne mata-pita ki ichcha ke bavjud rishton ko thukra diya aur jab ayu nikal gai, to cheshta karti rah gai, uska vivah nahin ho paya. kyon hua aisa? kya rahe iske jyotishiya karn? aie, janen... aj ke samaj men jahan mata pita bete aur beti ko barabar ka darja dete hain aur unki saman rup se shiksha ka prabandh karte hanai, vahin jab unke vivah ka samay ata hai to beti ke vivah ko lekar aksar chintit ho jate hain.
yah bat thik bhi hai. ham saman adhikaron ki baten chahe jitni bhi karen, parantu beti ke mata pita uski suraksha v vaivahik jivan ko lekar chintit sadaiv rahte hain. unki koshish yahi rahti hai ki ve jaldi se jaldi uska vivah kar apni jimmedari se mukt ho jaen. vahin agar larkiyon ki soch ko dekhen to ve bhi apni parhai puri kar apna kairiyar banana chahti hain, apne var ka chunav apni pasand se karna chahti hain
aur aisa jivnsathi chahti hain jo sharirik, arthik v mansik rup se unki pasand ke anukul ho. yahin par mata-pita aur bachchon ki ichchaon ke bich takrav utpann hone lagta hai. bachche apne mata-pita ki jimmedari aur unki mansik vyatha ko nahin samajh pate aur unki jimmedari ko gaun kar apni mahatvakanksha ko prathmikta dete hain aur mata-pita apni bachchon ki ichchaon aur sapnon ko apni jimmedariyon ke tale pura karne men asamarth sa mahsus karte hain. aj ke tutte parivaron ka ek bahut bara karan pashchatya sabhyata ka anukaran hai. prachin bhartiya sanskriti men to kanya ka vivah 16-17 sal men kar diya jata tha.
us samay vah mansik rup se bahut paripakva nahin hoti thi aur sasural men sabke sath samanjasya bithane men use koi taklif nahin hoti thi. use svayan ko unke taur tarikon aur rahn-sahan men dhalne men koi dikkat nahin hoti thi. par aj ke yug men jab beti ke kairiyar ko pura mahatva diya jata hai, to vivah ke bad use sasural men samanjasya sthapit karne men thori taklif mahsus hoti hai.
uska paripakva man achchi-buri baton ko jyada achche se samjhta hai aur vah ankush aur jimmedariyon ki bajay svatantrata chahti hai. isi uhapoh aur kashamakash men fanse the meri pyari saheli mina ke mata-pita. mina ki choti bahan nina kafi sundar thi aur bachapan se use larkon ki tarah apni har bat manvane ki bahut buri adat thi. vah har kam apni marji se hi karti. vivah ki umra hone par uske lie bahut se achche-achche rishte ae par usne har rishte par kisi n kisi prakar ka aib nikal kar unheen thukra diya. mata-pita ne samjhane ki bahut koshish ki par vah bahut jiddi thi aur kisi bhi prakar ka samjhauta nahin karna chahti thi.
vah ek bahurashtriya kanpni men unche pad par karyarat thi. vivah ki apeksha use apne kairiyar men adhik dilachaspi thi. jab uske mata-pita uske layak var nahin dhundh pae to unhonne dusri betiyon ka vivah kar diya. pahle nina to sabhi rishte thukra rahi thi aur jab bad men kuch larke use pasand ae, to unhonne use thukra diya kyonki tab tak uski umar nikal chuki thi aur jahir hai ki koi bhi larka apne se bari larki se vivah karna pasand nahin karta. ek umra ke bad kunare larke milne bhi band ho gae (rishte ane bhi band ho gae) aur vah aj tak avivahit hai
aur chah kar bhi apne lie achcha var nahin dhundh pa rahi hai. aie, karen nina ki kundli ka vishleshan kyonki yah to uski kundli men baithe grahon ka asar hi hai jiski vajah se usmen aise gun ae aur uske vivah men badha ai. nina ka janm surya grahan men hua tha. uska lagn pap grahon se buri tarah se pirit hai.
lagn men surya ke sath shani, ketu tatha ast chandra bhi hai. man ka karak chandra apne bhav se dvadash bhav men sthit hai, ast hai tatha shani, ketu aur surya tin pap grahon se yukt v akarak mangal se drisht hai. in sare yogon ke falasvarup nina svabhav se kafi jiddi hai aur usmen manobal ki kami hai. manobal ki is kami ke karan usmen sahi samay par sahi nirnay lene ki kshamata bhi nahin hai. chanuki surya bhi pap grahon ke sath hai islie nina apne ahankar ke age kisi ki nahin sunti. surya ki isi sthiti ke falasvarup usne apne mata-pita ki bat ko bhi koi mahatva nahin diya. tritiyesh surya ke lagn men hone ke karan vah nirbhik aur sahsi aur sada larkon jaisa akkharapan ka vartav karti hai. nina ki kundli ke dvitiya bhav men saumya grah budh aur shukra ki yuti bahut shubh hai. lagnesh aur dvitiyesh ka sthan parivartan yog bhi ho raha hai.
sath hi budh aur shukra par ashtam bhav men sthit guru ki drishti bhi par rahi hai. in sare yogon ne nina ko atyant rupvan aur sundar banaya. lagnesh budh navansh men bhi apni rashi men sthit hai iske karan bhi nina atyant buddhiman aur sundar hai. nina ke vaivahik jivan ka vichar karne ke lie saptam bhav dekhen, to is bhav par grahon ki drishti tatha ismen unki sthiti kafi ashubh hai. saptamesh guru vakri hokar ashtam bhav men sthit hai. saptam bhav men sthit rahu par tin pap grahon surya, shani tatha ketu ki drishti hai aur chunki mangal bhi lagn ko dekh raha hai, islie mangal aur shani ke paraspar drishti yog ka bhi apratyaksh rup se is bhav par prabhav hai.
saptam bhav ki sthiti janm lagn, chandra lagn, surya lagn, upapad lagn v karkansh lagn ityadi sabhi mahatvapurn lagnon se atyant kharab hai. is prakar ka grah yog dampatya sukh men prabal badha utpann kar deta hai. lagnasth shani, dhan bhav ki shreshth sthiti tatha labhesh mangal ke dasham bhav men hone ke falasvarup nina ek bahurashtriya kanpni men karyarat hai aur apne kairiyar men bahut pragti kar rahi hai, par jahan tak vaivahik jivan ki bat hai, to uska sukh use nasib nahin hua. budh aur shukra ki kutunb bhav men yuti ne use ek bahut achcha parivar diya aur arthik rup se sanpann banaya. saptamesh guru ki drishti ke karan praranbh men uske lie ek se ek achche-achche rishte bhi ae, par apne ahankar aur ashubh saptam bhav ke karan usne sabko thukra diya aur uska vivah nahin ho paya. saptam bhav ki sthiti atyant kharab hai.
saptam bhav par samast pap grahon surya, shani, ketu v rahu ka prabhav hai. mangal v shani ke paraspar drishti yog ka prabhav apratyaksh rup se is bhav par par raha hai. saptamesh guru bhi ashtamasth hai. is prakar se saptam bhav ko prabhavit karne vale sabhi paksh kshin hain. chandrama bhi kshin hai. isse spasht hai ki saptam bhav par keval pap grahon ka kuprabhav hai aur shubh grahon ke shubh prabhav se yah bhav purnataya vanchit hai. surya, shani v rahu yah tinon prithktavadi grah hai inka saptam bhav par sidha aur spasht prabhav tatha saptamesh ka nichasth aur ashtamasth hona v is bhav ka shubh prabhav se hin hona yah bhi sanket deta hai ki yadi inka vivah ho jata to bhi nishchit rup se asafal rahta.
parantu shukra ki uttam sthiti v saptam bhav v saptamesh ki kharab sthiti bari umra men vivah ki saflta ka suchak hai. navanbar 2011 ke bad vivah ki kshin sanbhavna hai. guruvar ka vrat karna shreshth rahega. ant men main yahi kahna chahungi ki har karya upyukt umra men hi karna chahie. nina ki kundli men vivah ka yog kshin tha. uski kundli ke anusar guru ki dasha men kai rishte ae par falibhut nahin hue.
jab bhi kundli men aise yog hon, to chahe jo bhi karan ho, vivah men vilanb nahin karna chahie aur jab bhi yog bane, to use falibhut karne men koi kasar nahin chorni chahie. kuch bhi ho satya yahi hai ki samay se pahle aur kismat se jyada kuch bhi nahin milta . kisi ne sahi kaha hai- samay bara balvan. shesh, mahesh, ganesh, dinesh yah sabhi samay ke chakra men chahtee hain.