janm samay ka sahi gyan n hone par kai bar janmakundli nahin banai ja sakti, aur vyakti ke svasthya v sanbhvit rogon ka purva akalan nahin ho sakta. aisi sthiti men ishvar pradatt hatheli men pai jane vali rekhaen v chihn is sanbandh men hamara purn margadarshan karte hain. iske lie bayin aur dahini donon hatheliyon ka akalan kiya jata hai. hriday hamare sharir ka sarvashreshth ang hai.
yah shuddh rakt ko sharir ke vibhinn angon ki avashyakta anusar uchit veg v matra men pahunchata hai aur unhen urja pradan karta hai. hriday ke svasthya v rogon ka gyan hatheli ki hriday rekha ke akalan dvara kiya jata hai. bhartiya vidvanon ne hriday rekha ko ‘ayu rekha’ kaha hai, kyonki hriday dharkne tak hi ayu rahti hai. atah jis samay par jivan rekha par kraes hota hai, us samay hriday rekha par bhi koi ashubh chihn avashya hota hai.
achche svasthya ke lie spasht manibandh rekhaen tatha jivan, mastak, hriday v svasthya rekhaon ka dosh rahit hona avashyak hota hai. svasthya rekha ki anupasthiti pachan kriya ko svasth rakhakar achche svasthya ke lie ‘raksha kavch’ ka karya karta hai. patli, gahri, gulabi rang ki dosh rahit rekhayen bali v shubh faldayi hoti hain.
unse brihaspati, surya v budh parvaton ki or jane vali shakhayen shubh falon men vriddhi karti hain. apne nam ke anusar jivan rekha hamare svasthya aur bimariyon ke bare men purn margadarshan karti hain. jivan rekha ke aranbh men ‘dvip’ vyakti ko vanshanugat bimariyan hona darshata hai. nirbal ya choti jivan rekha ko bal pradan karne ke lie svasth hriday rekha aur anguthe ke ichcha khand ko balvan hona chahie. hriday rekha hatheli men sabse upar budh parvat ke niche se nikal kar parvaton ke niche chalti hui shani-brihaspati ke bich ya brihaspati parvat tak pahunchti hai. yah rekha hriday ki bhavnaon, prem tatha hriday ke svasthya ko darshati hai. hriday rekha dushit hone par mastak, jivan v svasthya rekhayen bhi dushit pai jati hain.
svasthya rekha budh parvat ke kisi sthan se nikalakar jivan rekha ki or jati hai. dosh rahit svasthya rekha achchi sehat v vyapar men saflta deti hai. us par bindu dvip v kraes rog darshate hain. jab hriday rekha ke marg ko choti-choti khari rekhaen katti hain, usmen se upr-niche shakhayen niklti hain tatha us par bindu, dvip v vritt uski shakti kam karte hain. hriday rekha par kala bindu, kraes ya nakshatra ki upasthiti us ayu men hriday ghat ki sanbhavnaen darshata hai. yadi is sthan par hriday rekha samapt ho jaye to hriday gati avruddh ho jane ke karan akasmik mrityu bhi ho sakti hai. in chihnon ke bad yadi rekha nirbal chalti hai to vyakti ko jivanaparyant hriday rogon ka samna karna parta hai. uprokt doshon par skvayar hone se jivan raksha hoti hai.
uprokt sutron ko bhali prakar darshati dushit jivan, mastak, hriday rekha aur svasthya (budh) rekha ka chitra sanlagn hai ismen:-
1. hriday rekha men dvip v bindu hain aur usmen se upar v niche choti rekhaen nikal rahi hain jo hriday rog tatha ankhon ki roshni kam hone ka suchak hain. svasthya rekha dvara hriday rekha katne ke sthan par gahra bindu hridyaghat darshata hai.
2. mastak rekha par nakshatra, bindu, dvip aur choti khari katti rekhayen sir par chot, mansik chinta v rog ki suchak hain.
3. svasthya rekha ka terha v dvip sahit hona pachan kriya ke rog, pitt v livar ka thik se kam n karna darshata hai.
4. chandra parvat par jal, kidni v mutra pranali ke rog darshata hai. aurten stri rogon se pirit rahti hain.
5. angutha nirbal hai.
6. dushit v nirbal jivan rekha par dvip, bindu aur niche niklti rekhaen, vibhinn bimariyon ke karan nirbal svasthya ko satyapit karti hain.
hriday rog sanbandhi kuch anya sutra is prakar hain:
1. lanbe, chaire aur nilima lie hue nakhun dushit rakt pravah darshate hain. aisi hatheli men hriday rekha ka kantihin v chichli hona hriday rog darshata hai.
2. bina chandrama ke chote nakhun hriday ki kamjori darshate hain. bare chandrama tivra rakt sanchar darshate hanai parantu umra barhne par hriday rog ka karan bante hain.
3. chote chaikor nakhun hriday ki kamjori darshate hain.
4. yadi hriday rekha shani parvat ke niche bhang ho jaye to tivra hriday aghat ka khatra rahta hai. us sthan par varg ho to upchar safal rahta hai.
5. surya rekha par dvip tatha jivan rekha par bimariyon ke lakshan hriday rog ki sanbhavna darshate hanai.
6. yadi budh (svasthya) rekha ke aranbh men lali ya lal bindu ho to hriday rog ki sanbhavna hoti hai.
7. shrinkhlakar (janjir ki tarh) hriday rekha dil ka akar barhne ka rog darshata hai.
8. hriday rekha ka brihaspati parvat par jal men milna hriday barhne se hriday aghat deta hai.
9. jivan aur mastak rekha ke aranbh men juri hriday rekha tatha manas rekha par kraes donon hathon men paye jane par akasmik mrityu hoti hai.
10 hriday rekha ka manas rekha men milakar ek ho jane par vyakti men manviyata ke gun nahin hote.
vah apne nirnay ko drirhtapurvak purn karta hai aur svechchachari hota hai. manas rekha shani rekha ko par karne se pahle samapt ho jay aur us par kraes ho to asamyik mrityu ka lakshan hai. jyotishiya vivechan bhavishya kathan ki prakriya men hast rekha vigyan tatha jyotish shastra paraspar sahyogi v purak vidhayen hain. atah bina jyotishiya vivechan kiye yah lekh adhura rahega. janm vivaran anusar bani kundli men 12 rashi, navagrahon tatha 27 nakshatron ke vishleshan dvara bhavishya kathan kiya jata hai. lagn janmakundli ka pahla bhav hota hai, aur usi se bhavon ki ganna aranbh hoti hai, jaisa ki sanlagn chitra men darshaya gaya hai.
sabhi angon ko 12 bhavon men banta gaya hai. jivan men sukh duahkh ka anubhav vyakti multah apni deh se karta hai. atah daivagyaon ne lagn ko kundli ka adhar mana hai. grahon men surya ka vyakti ke atmabal aur hriday se sidha sanbandh hota hai. sadharntya sharir men rog ka vichar lagn aur kundli ke chathe bhav ke balabal anusar kiya jata hai. mukhyatya lagna-lagnesh, chandra, chandra rashi v rashish, shashth bhav v shashthesh, ekadash bhav (chathe se chatha) v ekadshesh ka nirbal (nich, ast, vakri) hokar trik (6, 8, 12) bhav men sthit hone se ya trikesh ka in bhavon ko dushit karne par sanbandhit grahon ki dasha-bhukti, gochar, vishesh rup se sarhe-sati aur dhaiyya ke samay vibhinn rog hote hain. pratikul dasha rahte jatak rogi rahta hai.
janmakundli ka chaturth bhav v kark rashi sthit ‘ashlesha’ nakshatra (svami budh) ke grast hone par hriday, rakt, chati v fefre ke rog hote hain. pancham bhav v sinh rashi sthit magha nakshatra svami ketu grast hone par hriday rog v pith dard hota hai. sinh rashi men hi sthit ‘purvafalguni’ nakshatra (svami shukra) pirit hone par raktchap, hriday rog v enimiya hota hai. atah hriday rog ka sanbandh aur sinh rashi se hota hai aur janmakundli ke dvadash bhavon men se chaturth v pancham bhav se hota hai.
grahon men mukhyatah surya tatha chandrama ka sanbandh hriday se hota hai. kisi bhi janmakundli men surya, chandra, chaturth v pancham bhav v unke svami (chaturthesh v panchmesh) yadi nirbal ya pirit hane to jatak ko hridyaghat ho sakta hai, jise am bhasha men ‘dil ka daura’ kahte hain.
vibhinn lagnon men hriday rog ki sanbhavna is prakar hoti hai:-
1. mesh lagna: lagnesh mangal shashth ya ashtam bhav men shani se yukt ya drisht ho, panchmesh surya rahu ya ketu se yukt ya drisht ho, chaturthesh chandra, budh (tritiyesh v shashthesh) se yukt chaturth ya pancham bhav men ho to hriday rog ki sanbhavna hoti hai.
2. vrish lagna: brihaspati (ashtamesh) chaturth bhav (sinh rashi) men rahu/ketu se yukt ya drisht ho, chaturthesh surya shashth ya ashtam bhav men evan lagnesh shukra vakri ya ast ho to jatak ko hriday rog ho sakta hai.
3. mithun lagna: lagnesh v chaturthesh budh ast ho aur mangal, rahu ya ketu se yukt ya drisht hokar chaturth bhav men sthit ho ya drishti sanbandh ho to jatak ko hriday rog ho sakta hai.
4. kark lagna: shani (saptamesh v ashtamesh) chaturth ho ya vahan drishtipat kare, mangl-shukra shashth ya ashtam bhav men ho, chandrama ast ho aur rahu-ketu se yukt ya drisht ho to jatak ko hriday rog hota hai.
5. sinh lagna: mangal surya se ast hokar rahu-ketu se yukt ya drisht ho, guru-chandra chaturth bhav men sthit hokar shani se drisht ho, to jatak ko hriday rog hota hai.
6. kanya lagna: lagnesh budh ast hokar chaturth bhav men sthit ho aur mangal se drisht ho, chaturthesh shashth ya ashtam bhav men chandra se yukt ho, to jatak hriday rogi hota hai.
7. tula lagna: chaturthesh shani shashth, ashtam ya dvadash bhav men, shashthesh brihaspati chaturth bhav men (nichastha) ho, surya v chandra rahu-ketu se yukt ya drisht ho, to jatak hriday rogi hota hai.
8. vrishchik lagna: lagnesh mangal lagn men rahu-ketu se yukt ho, chaturth bhav ka svami shani shashth ya ashtam bhav men ho, surya-budh chaturth bhav men ho, to jatak hriday rogi hota hai.
9. dhanu lagna: surya v guru tritiya, shashth ya ashtam bhav men ho, chandra-shukra (ashtamesh v shashthesh) chaturth bhav men rahu-ketu se yukt ya drisht ho, shani chaturth bhav par drishtipat kare to jatak hriday rog se grast hota hai.
10. makar lagna: guru chaturth bhav men ho ya vahan drishtipat kare, surya rahu ketu se yukt ho, shani surya ke nakshatra men ho to jatak hriday rogi hota hai.
11. kunbh lagna: brihaspati rahu-ketu se yukt hokar ashtam ya dvadash bhav men ho, mangal v surya chaturth ya dasham bhav men ho, shani-chandra shashth bhav men yukt hon, to hriday rog hota hai.
12. min lagna: shani v shukra chaturth, saptam ya dasham bhav men yut hokar rahu-ketu ke sath ho, brihaspati ast hokar shashth ya ashtam bhav men ho, to jatak ko hriday rog hota hai.