purn vidhan se shri yantra ka pujan jo ek bar bhi kar le, vah divya dehdhari ho jata hai. dattatrey rishi evan durvasa rishi ne bhi shri yantra ko mokshadata mana hai. iska mukhya karan yah hai ki manushya sharir ki bhanti, shri yantra men bhi 9 chakra hote hain. pahla chakra manushya sharir men muladhar chakra hota hai. sharir men yah ridh ki haddi ke sabse niche ke bhag men, guda aur ling ke madhya men hai. shri yantra men yah asht dal hota hai. yah rakt varn prithvi tatva ka dyotak hai. iske dev brahma hain aur yah ling sthan ke samne hai. shri yantra men iski sthiti chaturdashar chakra men bani hoti hai. yah jal tatva ka dyotak hai. iske dev vishnu bhagvan hain. tisra chakra meru dand ke andar hota hai. yah dash dal ka hota hai. shri yantra men yah trikon hai aur agni tatva ka dyotak hota hai. yantra ke dev buddh rudra mane gaye hain. chaitha chakra anahat chakra hota hai.
manushya sharir men yah hriday ke samne hota hai. yah dvadash dal ka hai. shri yantra men yah antardashar chakra kaha jata hai. yah vayu tatva ka dyotak mana jata hai. iske dev ishan rudra mane gaye hain. panchvan chakra vishuddh chakra hota hai. manushya sharir men yah kanth men hota hai. yah 16 dal ka hai. shri yantra men yah ashtakon hota hai. yah akash tatva ka dyotak mana gaya hai. iske dev bhagvan shiv mane jate hain. chatha chakra agya chakra hota hai. manushya sharir men yah merudand ke andar brahm nadi men mana gaya hai. yah 2 dalon ka hai. shri yantra men iski sthiti bindu ki mani jati hai. satvan chakra indra yoni, jo sharir men lanbika sthan men aur shri yantra men trikon rup men hai. athvan kul chakra aur navam akul chakra mana jata hai. shri yantra men yah nupur ke rup men ankit hota hai.
shri yantra ke pujan aur use jagrit karte samay dash mudraen hoti hain. inmen sankshobhini mudra, dravni mudra, akarshini mudra, vashya unmad mudra, mahangasha mudra, khechri mudra, bij mudra, yoni mudra, trikhanda mudra hain. mudraon ke prayog ka ek karan yah hai ki mudraon se sabhi nadiyon men pran ka sahaj gati se pravesh, virya ki sthirta, kashayon aur patkon ka nash, sarvarogon ka upashaman, jathragni ki vriddhi, sharir ki nirmal kanti, jara ka nash, panch tatvon par vijay evan nana prakar ki yog siddhiyon ki prapti inka mukhya karya mana gaya hai. kundlini shakti ka udbodhan, mudrabhyas se brahm dvar, ya sushumna mukh se nidrita kul kanudlini jagrit ho kar upar ki or uthane ka karya mudraon se hota hai. isi karan shri yantra ko jagritkrne men khechri mudra ko shamil kiya gaya hai.
datt rishi ne jamdagni putra parsram ji se kaha ki yantra ke pujan se lakh guna fal adhik hota hai. isi karan yantron ko vishesh sthan prapt hai. sath hi shri vidya ko das mahavidyaon men sarvashreshth, keval moksh pradan karne ke karan hi, mana gaya hai. isi karan shri yantra ko yantraraj ki upadhi di gayi hai. is vidya ko ati gopniya rakha gaya hai aur bina patrata ke shri vidya ki diksha nahin di jati hai. yahi karan hai ki shri yantra ko jagrit karne vale vidvan bahut hi kam hain. yadi am jan shri yantra vidya ke sadhak ko sadhak ke rup men pahchan len, to vah samay uski mrityu ka mana jata hai, kyonki am jan ke janne se use yash prapt hota hai, jo moksh aur siddhi men badhak hai.
shri yantra men udhrvamukhi 5 trikon, 5 pran, 5 gyanendriyan, 5 tanmatra aur 5 maya bhuton ke pratik hain. manushya sharir men ye asthi, meda, mans, avrik aur tvak ke rup men vidyaman hain. 4 trikon sharir men pran, shukra, majja, jine ke dyotak hain aur brahmand men man, buddhi, chitt, ahankar ke pratik hain. shri yantra men trikon, asht kon, antardashar, bahirdashar aur chaturasva, ye 5 shakti chakra hote hain aur bindu, asht dal, shodash dal aur chaturastra, ye 4 shiv chakra hote hain. shri yantra men kul 43 trikon hote hain. ye trikonon ke manthan aur yog se bane shatkon yantra hain.