chote-chote upay har ghar men log jante hain, par unki vidhivat jankari ke abhav men ve unke labh se vanchit rah jate hain. is lokapriya stanbh men ek upyogi sadhna ki vidhivat jankari di ja rahi hai.
shri bajrang ban
hanuman chalisa ki tarah hi shri bajrang ban bhi ek siddh stotra hai. is siddh shaktishali ban ko vidhi purvak prayog karne se sadhak ke samast kashton ka nivaran ho jata hai. is ban ki siddhi karne se sadhak ke sharir men hanuman ji ki shakti pravesh kar jati hai.
kriya ek hi hai ki apne samne hanuman ji ka chitra rakhakar shraddha aur vishvas ke sath unka dhyan karna chahie. man ki ekagrata ka abhyas karte hue man svatah hi kabu men ho jata hai. hanuman ji ke chitra ki bhali bhanti puja archana karke shraddhayukt pranam kar yah stuti karni chahie.
atulit baldhaman hemshailabh dehan danujavan krishanun gyaninamagraganyam, sakal gunnidhanan vanranamdhishan, raghupti priya bhaktan vatjatan namami.
yah stuti karke sadhak ko chahie ki vah pas hi dahini or ek asan aur bicha de jaise ki shastra men iska varnan ata hai ki jab bhi bajrang ban ka path kiya jay to svayan hanuman ji asan par akar virajte hain.
bajrang ban ka jab bhi path karen, uni vastra ke asan par hi baithakar karen. jise hanuman ji varan kar lete hain. tab sadhak ke andar ek nai sfurti evan shakti ka sanchar ho jata hai. man men ek nai chetna ek naye josh ka sfuran hone par vah apne ko balvan samjhne lagta hai, nirbhik v nirbhay ho jata hai tatha samast pret badhaen tatha asuri shaktiyan aise bhajan ko dekhte hi bhag khari hoti hain. yah hajaron- hajaron ka anubhav hai unhonne kaha hai ki bajrang ban ka niyamit path badhaon aur ane vali kathinaiyon se raksha karta hai.
bare-bare yogi, sant mahatma, tantrik, yantrik bhi sada is ban ko japte rahte hain. ise kanthasth kar lena chahie. yah svayan hi mantramay hai. iska nitya path apne ap men ashcharyajanak saflta dene vala hai. rog-vyadhi- tantra, mantra se jo hani pahunchate hain uska prabhav svatah hi nishkriya ho jata hai. jis ghar men pratidin bajrang ban ka path hota hai, vahan svayan hanuman ji virajman rahte hain aur sabhi prakar ki badhaon se ghar mukt rahta hai. main yah apne anubhav se kah raha hun ki jo bhakt ramlilaon men dhan adi dekar bhagvan ram ke charitra ka varnan am jan tak pahunchane ka karya karte hain ve arthik drishti se sanpann to ho hi jate hain apitu dharm, arth, kam, moksh ki siddhi bhi unhen mil jati hai. ramayan ka akhand path v sundar kand ka path jan-jan men ek navin chetna ka is kalikal men sanchar kar raha hai. un gharon men unnati v vikas ki dhara sada bahti hai.
badha se bachne ke upay
sabse pahle jo bhi sadhak hanuman ji ki sadhna karna chahta hai ya kisi bhi anya devi devtaon ki sadhna men baithne ja raha hai use kisi shubh muhurt men asan par purva ya uttarabhimukh hokar ratri men 108 mantron ka jap v ashtang samagri dvara havan karna chahie. sadhak ko raksha rekha mantra ko siddh kar lena chahie jisse sadhna kal men koi bhi badha utpann n ho.