til manav sharir par ubhre kale rang ke chote dhabbenuma dag ya nishan hote hain. tilon ke adhyayan ke dvara ham sharir ke vibhinn bhagon men sthit tilon ke bare men samajh pate hain. kai til to sharir men janmajat hote hain lekin kai til aise bhi hote hain jo ki hamare jivan kal men utpann hote hain aur adrishya bhi ho jate hain tatha inka rang v akar bhi badlta rahta hai.
yah bhagya men badlav ka sanket dete hain. samudrik shastra ke anusar yah til manav jivan ke kai rahasyon se parda uthate hain. manav sharir par bane til sirf saundarya ki hi vastu nahin hoti varan iske dvara manav vyavhar ke kai rahasya jane ja sakte hain jaise mathe par til ka hona manushya ko bhagyavan banata hai jabki hothon par til kamukta ko darshata hai. samudrik shastra men til aur masson adi ke bare men vistar se bataya gaya hai .
ek ubhre hue til ko masse ke rup men jana jata hai. til stri ke sharir par bayane bhag men tatha purush ke sharir par dayen bhag men shubh jane jate hain. shahad jaise bhure, panna ki tarah hare evan lal rang ke tilon ko kale tilon ki apeksha adhik shubh mana jata hai. bhartiya aur chini jyotish men tilon ko jatak ke bhagya ke suchak ke rup men jana jata hai. jatak ke upar grahon ka prabhav man ke garbh men bhrun ke nirman ke sath hi arambh ho jata hai. kuch grah bhrun par adhik prabhav dalte hain tatha kuch grah kam prabhav dalte hain. grahon ka ye prabhav tilon ke nirman ke rup men samne ata hai joki sharir ki satah par dikhai dete hain. jyotish ke anusar tilon ka mahatva unke akar ke sath barhta jata hai .
tilon tatha janmachihnon ka spashtikaran do tatvon par nirbhar karta hai- pratham unka bhautik banavat tatha dvitiya jatak ke sharir ka vah bhag jahan vah sthit hote hain. sanket nidhi spasht rup se yah ingit karte hain ki tilon ka ek nishchit prabhav hota hai. sharir ke vibhinn bhagon men sthit til rashi chakra ko suchit karte hain jiske dvara jatak ka jivan vishesh rup se prabhavit hota hai. jyotish men pratyek rashi chakra sharir ke vishesh bhag par prabhutva rakhta hai. jaise ki mesh rashi - mastak, vrish rashi - chehra, gardan, gala, dayan netra tatha nak, mithun rashi - banhen, kandhe, dayan kan, pasli ka upri bhag tatha daya hath, kark rashi -chati, stan, pet, kuhni, fefde, sinh rashi - hriday adi .
tilon men akar ka mahatva
chote til-vah til jo ki itne chote hote hain ki unko sadharntya dekha nahin ja sakta, jyada prabhav nahin dalte hain .
bade til-bade til jatak ke jivan ko vishesh rup se prabhavit karte hain.
lambe til-lambe til prayah achche parinam dete hain.
rang ke adhar par tilon ka mahatva
halke rang ke til-halke rang ke til prayah shubh hote hain. lal rang ke til ya shahad ke rang ke ya hare rang ke til samanyatah bhagya men shubhta ke suchak hote hain .
kale til-prayah achche nahin mane jate hain. ichchit parinam ke raste men badhak hote hain.
manav sharir men sthiti ke adhar par tilon ka mahatva
mastak ya lalat ke dayin or til vyakti ko aishvaryashali evan bhagyashali banata hai jabki bayin or til sadharan fal hi dete hain. lekin striyon men bayin or ka chihn shubh fal deta hai.
dayin kanpti par til shighra vivah ka suchak hota hai. sundar patni, achanak dhan labh bhi deta hai. bayin kanpti ka til achanak vivah ke yog banata hai sath hi dhanaprapti bhi deta hai lekin vah dhan shighra nasht hone vala hota hai.
striyon ke bayane gal par sthit til putra dayak hota hai tatha burhape men santan sukh bhi milta hai. yadi til bhauhon ki nok ya mathe par hota hai to stri ko rajapad ki prapti hoti hai. nak ke agrabhag men sthit til stri ko param sukh ki bhagi banata hai.
bhauhon ke madhya rikt sthan par sthit til ati shubh hote hain. dahini bhaunh par til sukhamay danpatya jivan ka sanket hai jabki bayin bhaunh par til viprit fal deta hai. palkon par til shubh nahin mane jate tatha bhavishya men kisi kasht ke ane ka sanket dete hain. kanpti par til jatak ko vairagi ya sannyasi banate hain. nak ke agrabhag par til vyakti ko vilasi banata hai. gal par til putra prapti ka suchak hai. upri honth par sthit til dhanvan aur pratishthavan banata hai jabki niche ke honth par til jatak ke kanjus hone ka sanket deta hai .
nak ki tip par til jatak ke lie shubh hota hai. nak ke dahini taraf til kam prayatn ke sath adhik labh deta hai jabki bayin taraf ka til ashubh prabhav deta hai. thori par til ka hona bhi shubh hota hai. vyakti ke pas hamesha dhan prapti ka sadhan rahta hai tatha vah abhavon men nahin rahta hai. gale men sthit til vyakti ke dirghayu hone ka sanket deta hai tatha vyakti ko aishoaram ke sadhan bari sugmta se milte rahte hain .
gale par til vala jatak aramatalab hota hai. gale ke age ke bhag men til vale jatak ke mitra bahut hote hain jabki gale par piche til hona jatak ke karmath hone ka suchak hai. gale ke piche sthit til vyakti ko saubhagyashali banate hain lekin kandhe aur gardan ke jor par sthit til ka fal shubh nahin hota hai. kanon par sthit til vidya v dhandayak hote hain .
hath ki ungliyon ke madhya sthit til jatak ko saubhagyashali banate hain. anguthe par til jatak ko karyakushal, vyavhar kushal tatha nyayapriya banata hai. tarjani par til jatak ko vidyavan, gunvan, dhanvan lekin shatru se pirit banata hai. madhyama par til shubh faldayi hota hai. jatak ka jivan sukhi v shantipurn hota hai. anamika par til jatak ko vidvan, yashasvi, dhani aur parakrami banata hai jabki kanishtha par til jatak ko sampattivan to banata hai lekin jivan men shanti ki kami rahti hai. hatheli ke madhya men til dhan prapt karate hain. banh men kohni ke niche sthit til shubh hota hai. yah shatru nashak hota hai. parantu kalai par sthit til ashubh hota hai. bhavishya men jel ki saja ho sakti hai. hath ki tvacha par sthit til shubhfldayi hote hain.
hriday par sthit til putra prapti ka suchak hota hai. aisi stri saubhagyavti hoti hai. vakshon ke as-pas sthit til bhi aisa hi fal deta hai. pet aur kamar ke jor ke pas ke til ashubh faldayi hote hain jabki sine par sthit til vale jatak ki manokamnaen svayan purn ho jati hanai. yadi til donon kandhon par sthit hain to jatak ka jivan sangharshapurn hota hai. dayen kandhe par til jatak ki tej buddhi tatha viksit gyan ko ingit karta hai. kankh par sthit til dhanhani ka suchak hai. kamar par til shubh faldayi hota hai.
pet par sthit til shubh nahin mane jate. yah vyakti ke durbhagya ke suchak hain. aise jatak bhojan ke shaukin hote hain. lekin nabhi ke aspas sthit til jatak ko dhan-samriddhi dilate hain. yadi til nabhi se thora niche hai to jatak ko kabhi bhi dhan ka abhav nahin hota hai. pith par til jatak ko mahatvakankshi, bhautikvadi pravritti deta hai. jatak romantik svabhav ka tatha bhramnshil hota hai. aise jatak dhan khub kamate hain tatha kharcha bhi khub karte hain .
ghutnon par sthit til shatruon ke nash ko suchit karte hain. pindli par til shubh nahin mane jate hain. takhnon par bhi til shubh fal nahin dete hain. kulhon ke upar sthit til dhan ka nash karte hain. eri men sthit til bhi dhan tatha man-samman kam karte hain. pairon par sthit til vala jatak yatraon ka shaukin hota hai. lekin pairon ki ungliyon ke til jatak ko bandhanamay jivan dete hain. pair ke anguthe ka til vyakti ko samaj men pratishtha prapt karvata hai.