shardiya navratra vrat (8 aktubar 2010 ) pan. brajkishor sharma brajvasi adgivan mas ke shukla paksh ki pratipda se navmi paryant shardiya navratra hota hai. yah navratra vrat stri-purush donon kar sakte hain. yadi svayan n kar sake to pati, patni, putra ya brahman ko pratinidhi banakar vrat purn karaya ja sakta hai. sarvapratham pratah kal svayan snanadi kriyaon se nivritt ho nishkamaparak ya kamnaparak sankalp kar puja sthan ko gomutra se lipakar pavitra kar lena chahie. fir sundar vedi ki rachna kar ganeshambika, varun, shodshmatrika, saptaghrit matrika, navagrahadi devon evan sinhasnarurh jagajjanani man bhagvti adya shakti ka vidhivat svasti vachan, sankalp, punyahvachan purvak shodshopchar pujan karen. svayan n kar saken, to vidvan brahman se sabhi kritya purn karaen. man bhagvti ke sundar charit (devi bhagvtantargata) evan divya mantron ka jap karen. nitya hom evan shri durgasaptashati ka sanputpath (kamna purti hetu) karen. navratra mahapuja vaigyanikta se paripurn hai. kaha gaya hai- sharadvasantanamanau danvau dvau bhayankrau. tayorupadravshamyarth mitran puja dvidha mata॥ arthat sharad evan vasant nam ke do bhayankar danav vibhinn rogon ke karan hain. in rituon ke parivartan ke samay mahamari, jvar, shitla (bari-choti), kaf, khansi adi vibhinn rogon ke nivarnarth shardiya tatha vasanti do navratra durga pujaon ka prachalan adi kal se hi hai.
rudrayamal tantra men kaha gaya hai- navashakti samayuktan navratran taduchyate. nau shaktiyon se yukt hone ke karan ise navratra kaha gaya hai. navabhiah navratribheah sampadyate yah s navratrah. navdha bhakti, navagrah, ramnvmi, sitanvmi ye sabhi nau shabdon ki mahatta ke dyotak hain. navratra prasang men shri ramchrit manas ka bara hi divya varnan hai. is sandarbh men janmejay evan vedavyas ka kathopakathan shravan yogya evan anukrniya hai. ukt kathopakathan men jigyasavash janmejay ne mahatma vedavyas se pucha ki bhagvan ram ne navratra vrat kyon kiya tha? unhen vanvas kyon diya gaya? sita ji ka haran ho jane par unhen prapt karne ke lie unhonne kya kiya? vyas ji ne kaha-''sita haran ke samay ki bat hai. bhagvan shri ram sita virah se atyant vyakul the. unhonne bhrata lakshman se kaha-'saumitre! janki ka kuch bhi pata n chala. uske bina meri mrityu bilkul nishchit hai. janki ke bina ayodhya men main pair hi n rakh sakunga. rajya hath se chala gaya. banvasi jivan vyatit karna para. pitaji surdham sidhare. stri hari gai. pata nahin, daiv age kya karega. manuke uttam vansh men hamara janm hua.
rajkumar hone ki suvidha hamen nishchit sulabh thi. fir bhi van men ham asim dukh bhog rahe hain. saumitre! tum bhi rajsi bhog ka parityag karke durdaiv ki prerna se mere sath nikal pare. lo, ab yah kathin kasht bhogo. lakshmana! janak suta sita bachapan ke svabhavavash hamare sath chal pari. duratma daiv ne us sundri ko bhi aise gurutar dukh dene vali dasha men la patka. ravan ke ghar men vah sundri sita kaise dukhdayi samay vyatit karegi? us sadhvi ke sabhi achar bare pavitra hain. mujh par vah apar prem rakhti hai. lakshmana! sita ravan ke vash men kabhi bhi nahin ho sakti. bhala janak ke ghar utpann hui vah sundri kisi duracharini stri ki bhanti kaise rah sakti hai. bhartanuj! yadi ravan ka ghor niyantran hua to janki apne pranon ko tyag degi; kintu uske adhin nahin hogi - yah bilkul nishchit bat hai. vir lakshmana! kadachit janki ka jivan samapt ho gaya to mere bhi pran sharir se bahar nikal jaenge - yah dhurav satya hai.' is prakar kamllochan bhagvan ram vilap kar rahe the. tab dharmatma lakshman ne unhen ashvasan dete hue satyatapurvak kaha- 'mahabaho! sanprati is dainyabhav ka parityag karke dhairya rakhie.
main us nich rakshas ravan ko marakar mata janki ko le aunga. jo sukhamay aur dukhamay donon sthitiyon men dhairya dharan kar ke ek saman rahte hain, ve hi buddhiman hain. kasht aur vaibhav prapt hone par usmen rache-pache rahna, yah mandbuddhi manvon ka kam hai. sanyog aur viyog to hote hi rahte hain. ismen shok kyon karna chahie. jaise pratikul samay ane par rajya se vanchit hokar vanvas hua hai, mata sita hari gai hain, vaise hi anukul samay ane par sanyog bhi ho jaega. bhagavan ! ismen kuch bhi anyatha vichar karne ki avashyakta nahin hai. atah ab ap shok ka parityag kijie. bahut- se vanar hain.
mata janki ko khojne ke lie ve charon dishaon men jaenge. unke prayas se mata sita avashya a jayengi, kyonki raste ke vishay men jankari prapt ho jane par main vahan jaunga aur puri shakti lagakar us nich ravan ko marne ke pashchat janki ko le aunga. athva bhaiya! sena aur shatrughnasahit bharat ji ko bulakar ham tinon ek sath ho shatru ravan ko mar dalenge. atah ap shok n karen. raghv! prachin samay ki bat hai. maharaj raghu ek hi rath par baithe aur unhonne sanpurn dishaon par vijay prapt kar li. unhin ke kuldipak ap hain, atah apka shok karna kisi prakar shobha nahin deta. main akele hi akhil devtaon aur danvon ko jitne ki shakti rakhta hun. fir mere sahayak bhi hain, tab kuladham ravan ko marne men kya sandeh hai? main jankji ko bhi sahaykrup men bula lunga. raghunandan ! mere is prayas se devtaon ka kantak durachari vah ravan avashya hi pranon se hath dho baithega. raghv! sukh ke bad duahkh aur duahkh ke bad sukh chakke ki bhanti nirantar ate-jate rahte hain. sada koi ek sthiti nahin rah sakti. jiska atyant durbal man sukh aur duahkh ki paristhiti men tadnukul ho jata hai, vah shok ke athah samudra men duba rahta hai. use kabhi bhi sukh nahin mil sakta. ap to inse pare hain. 'raghunandan ! bahut pahle ki bat hai. indra ko bhi dukh bhogna para tha. sanpurn devtaon ne milakar unke sthan par nahush ki niyukti kar di thi.
ve apne pad se vanchit hokar dare hue kamal ke kosh men baithe rahe. bahut varshon tak unka agyatvas chalta raha. par samay badlte hi indra ko fir apna sthan prapt ho gaya. muni ke shap se nahush ki akriti ajagar ke saman ho gai aur use dharatal par gir jana para. jab us naresh ke man men indrani ko pane ki prabal ichcha jag uthi aur vah brahmanon ka apman karne laga, tab agastya ji kupit ho gae . iske parinamasvarup nahush ko sarpayoni mili. ataev raghav ! dukh ki ghari samne ane par shok karna uchit nahin hai. vigya purush ko chahie, is sthiti men man ko udyamshil banakar savdhan rahe. mahabhag ! apse koi bat chipi nahin hai. jagatprabho ! ap sab kuch karne men samarth hain, fir sadharan manushya ki bhanti man men kyon itna gurutar shok kar rahe hain?' vyasji ne kaha-lakshman ke uparyukt vachan se bhagvan ram ka vivek viksit ho utha. ab ve shok se rahit hokar nishchint ho gae. is prakar bhagvan ram aur lakshman paraspar vichar karke maun baithe the. itne men hi mahabhag narad rishi akash se utar ae. us samay unki svar gram se vibhushit vishal vina baj rahi thi. ve rathantar sam ko uchch svar se ga rahe the. muniji bhagvan ram ke pas pahunch gae. unhen dekhakar amit tejasvi shriram uth khare hue. unhonne muni ko shreshth pavitra asan diya. padya aur arghya ki vyavastha ki.
bhalibhanti puja karne ke uprant hath jorakar khare ho gae. fir muni ki agya se unke pas hi bhagvan baith gae. us samay chote bhai lakshman bhi unke pas the. unhen mansik kasht to tha hi. munivar narad ne pritipurvak unse kushal puchi. sath hi kaha- 'raghv! tum sadharan janon ki bhanti kyon itne dukhi ho? duratma ravan ne sita ko har liya hai- yah bat to mujhe gyat hai. main devlok gaya tha. vahin mujhe yah samachar mila. apne mastak par mandrati hui mrityu ko n janne se hi mohavash uski is kukarya men pravritti hui hai. ravan ka nidhan hi tumhare avtar ka prayojan hai. isilie sita ka haran hua hai. 'janki purvajanm men muni ki putri thi. tap karna uska svabhavik gun tha. vah sadhvi van men tapasya kar rahi thi. use ravan ne dekh liya. raghav ! us dusht ne munikanya se prarthana ki- 'tum meri bharya ban jao.' munikanya dvara ghor apmanit hone par duratma ravan ne us tapsi ka jura balpurvak pakar liya. ab to tapasvini ki krodhagni bharak uthi. man men aya, iske sparsh kie hue sharir ko chor dena hi uttam hai. ram! usi samay us tapsi ne ravan ko shap diya.
'duratmana! tera sanhar karne ke lie main dharatal par ek uttam stri ke rup men prakat houngi. mere avtar men mata ke garbh se koi sanbandh nahin rahega.' is prakar kahakar us tapsi ne sharir tyag diya. vahi yah sita hain, jo lakshmi ke ansh se prakat hui hain. bhramavash sarp ko mala samajhakar apnane vale vyakti ki bhanti apne vansh ka uchched karane ke lie hi ravan ne inko hara hai. raghv! devtaon ne ravn-vadh ke lie sanatan bhagvan shrihri se prarthana ki thi. parinamasvarup raghukul men tumhare rup men shrihri ka prakatya hua hai. mahabaho! dhairya rakho. sada dharm men tatpar rahne vali sadhvi sita kisi ke vash men nahin ho saktin. unka man nirantar tumhare dhyan men lin rahta hai. sita ke pine ke lie svayan indra ek patra men kamdhenu ka dudh rakhakar bhejte hain aur us amrit ke saman madhur dudh ko vah piti hain. kamalapatra ke saman vishal netravali sita ko svargiya surbhi gau ka dugdhapan karne se bhukh aur pyas ka kinchit bhi kasht nahin hai - yah svayan mainne dekha hai.' 'raghv! ab main ravanaravadh ka upay batata hun. is ashvin mahine men tum shraddhapurvak navratra ka anushthan karne men lag jao. ram! navratra men upvas, bhagvti ka aradhan tatha savidhi jap aur hom sanpurn siddhiyon ka dan karne vale hain. bahut pahle brahma, vishnu, mahesh aur svargavasi indra tak is navratra ka anushthan kar chuke hain.
ram! tum sukhpurvak yah pavitra navratra vrat karo. kisi kathin paristhiti men parne par purush ko yah vrat avashya karna chahie. raghv! vishvamitra, bhrigu, vasishth aur kashyap bhi is vrat ka anushthan kar chuke hain. ataev rajendra! tum ravanavadh ke nimitt is vrat ka anushthan avashya karo. vritrasur ka vadh karne ke lie indra tatha tripurasur vadh ke lie bhagvan shankar bhi is sarvotkrisht vrat ka anushthan kar chuke hain. mahamte. madhu ko marne ke lie bhagvan shrihri ne sumeru giri par yah vrat kiya tha. ataev raghv! savdhanipurvak tumhen bhi savidhi yah vrat avashya karna chahie.' bhagvan ram ne pucha- 'dayanidhe! ap sarvagyansanpann hain. vidhipurvak yah batane ki kripa karen ki ve kaun devi hain, unka kya prabhav hai, ve kahan se avtrit hui hain tatha unhen kis nam se sanbodhit kiya jata hai?' nardji bole - 'ram! suno, vah devi adya shakti hain. sada-sarvada virajman rahti hain. unki kripa se sanpurn kamnaen siddh ho jati hain. aradhna karne par dukhon ko dur karna unka svabhavik gun hai. raghunandn! brahma prabhriti sabhi praniyon ki nimitt karan vahi hain. unke bina koi bhi hil-dul tak nahin sakta. mere pita brahma srishti karte hain, vishnu palan karte hain aur shankar sanhar karte hain. inmen jo manglmyi shakti bhasit hoti hai, vahi yah devi hain. triloki men jo sat-asat kahin koi bhi vastu sattatmak rup se virajman hai, uski utpatti men nimitt karan is devi ke atirikt aur kaun ho sakta hai. jis samay kisi ki bhi satta nahin thi, us samay bhi in prakriti-shakti devi ka paripurn vigrah virajman tha. inhin ki shakti se ek purush prakat hota hai aur uske sath yah anand men nimagn rahti hain.
yah yug ke aranbh ki bat hai. us samay yah kalyani nirgun kahlati hain. iske bad yah devi sagunrup se virajman hokar tinon lokon ki srishti karti hain. inke dvara sarvapratham brahma adi devtaon ka srijan aur unmen shakti ka adhan hota hai. in devi ke vishay men jankari prapt ho jane par prani janm maran rupi sansar-bandhan se mukt ho jata hai. in devi ko janna param avashyak hai. ved iske bad prakat hue hain, arthat vedon ki rachna karne ka shrey inhin ko hai. brahma adi mahanubhavon ne gun aur karm ke bhed se in devi ke anant nam batlae hain aur vaise hi kalpana bhi ki hai. main kahan tak varnan karun. raghunandn! 'a'kar se 'ksha'karaparyant jitne varn aur svar prayukt hue hain, unke dvara bhagvti ke asankhay namon ka hi sankalan hota hai.' bhagvan ram ne kaha-'vipravr! ap is vrat ki sankshipt vidhi batlane ki kripa karen, kyonki ab main pritipurvak shridevi ki upasna karna chahta hun. shri narad ji bole- 'ram! samatal bhumi par ek sinhasan rakhakar us par bhagvti jagdanba ko sthapit karo aur nau raton tak upvas karte hue unki aradhna karo. puja savidhi honi chahie.' 'rajn! main is karya men acharya ka kam karunga; kyonki devtaon ka karya shighra siddh ho, iske lie mere man men prabal utsah hai.' vyas ji kahte hain-'param pratapi bhagvan ram ne munivar nardji ke kathan ko sunakar use satya mana.
ek uttam sinhasan banvane ki vyavastha ki aur us par kalyanmyi bhagvti jagdanba ke vigrah ko sthapit kiya. vrati rahakar bhagvan ne vidhi-vidhan ke sath devi-pujan kiya. us samay ashvin mas a gaya tha. uttam kishkindha parvat par yah vyavastha hui thi. nau dinon tak upvas karte hue bhagvan ram is shreshth vrat ko sanpann karne men sanlagn rahe. vidhivat hom, pujan adi ki vidhi bhi puri ki gai. narad ji ke batlae hue is vrat ko ram aur lakshman donon bhai prempurvak karte rahe. ashtami tithi ko adhi rat ke samay bhagvti prakat huin. puja ke uprant bhagvti sinh par baithi hui padharin aur unhonne shriram aur lakshman ko darshan die. parvat ke unche shikhar par virajman hokar bhagvan ram aur lakshman donon bhaiyon ke prati megh ke saman ganbhir vani men ve kahne lagin. bhakti ki bhavna ne bhagvti ko param prasann kar diya tha. devi ne kaha-'vishal bhuja se shobha panevale shriram! ab main tumhare vrat se atyant santusht hun. jo tumhare man men ho, vah abhilshit var mujhse mang lo. tum bhagvan narayan ke ansh se prakat hue ho. manu ke pavan vansh men tumhara avtar hua hai. ravanavadh ke lie devtaon ke prarthana karne par hi tum avtrit hue ho. iske purva bhi matsyavtar dharan karke tumne bhayankar rakshas ka sanhar kiya tha. us samay devtaon ka hit karne ki ichcha se tumne vedon ki raksha ki thi.
fir kachchaparup men prakat hokar mandrachal ko pith par dharan kiya. is tarah samudra ka manthan karke devtaon ko amrit dvara shaktisanpann banaya. ram! tum varahrup se bhi prakat ho chuke ho. us samay tumne prithvi ko dant ke agrabhag par utha rakha tha. tumhare hathon hiranyaksh ki jivn-lila samapt hui thi. raghukul men prakat hone vale shri ram! tumne nrisinhavtar lekar prahlad ki raksha ki aur hiranyakshipu ko mara. prachin samay men vaman ka vigrah dharakar tumne bali ko chala. us samay devtaon ka karya sadhan karne ko tum indra ke chote bhai hokar virajman the. bhagvan vishnu ke ansh se sanpann hokar jamadagni ke putra hone ka avasar tumhen prapt hua. us avtar men kshatriyon ko marakar tumne prithvi brahmanon ko dan kar di. raghunandn! usi prakar is samay tum raja dasharath ke yahan putra rup se prakat hue ho. tumhen avtar lene ke lie sabhi devtaon ne prarthana ki thi; kyonki unhen ravan mahan kasht de raha tha. rajan! atyant balshali ye sabhi vanar devtaon ke hi ansh hain, ye tumhare sahayak honge. in sab men meri shakti nihit hai. angh! tumhara yah chota bhai lakshman sheshnag ka avtar hai.
ravan ke putra meghnad ko yah avashya mar dalega, is vishay men tumhen kuch bhi sandeh nahin karna chahie. ab tumhara param kartavya hai, is vasant ritu ke navratra men asim shraddha ke sath upvas men tatpar ho jao. tadnantar papi ravan ko marakar sukhpurvak rajya bhogo. gyarah hajar varshon tak dharatal par tumhara rajya sthir rahega. raghvendra! rajya bhogne ke pashchat punah tum apne parmdham ko sidharoge.'' vyas ji ne kaha-''is prakar kahakar bhagvti antardhan ho gain. bhagvan ram ke man men prasannata ki sima n rahi. navratra-vrat samapt karke dashmi ke din bhagvan ram ne prasthan kiya. prasthan ke purva vijyadshmi ki puja ka karya sanpann kiya. janki vallabh bhagvan shri ram ki kirti jagatprasiddh hai. ve purnakam hain. prakat hokar paramashakti ki prerna par sugriv ke sath shriram samudra ke tat par gae. sath men lakshman ji the.
fir samudra men pul bandhne ki vyavastha kar dev-shatru ravan ka vadh kiya. jo manushya bhaktipurvak devi ke is uttam charitra ka shravan karta hai, use prachur bhog bhogne ke pashchat paramapad ki upalabdhi hoti hai.' is prakar is navratra vrat ka apna vishesh mahatva hai. sarvapratham bhagvan shri ram ne is shardiya navratra puja ka praranbh samudra tat par kiya tha. isilie yah rajas puja hai. adya shakti ki vishesh kripa prapti hetu ravivar ko khir, somvar ko dudh, manglvar ko kela, budhvar ko makkhan, brihaspativar ko khand, shukravar ko chini tatha shanivar ko gay ka ghrit naivedya ke rup men arpan kar shreshth brahman ko dan kar dena chahie. isse sabhi manorath siddh ho jate hain.