shani ko langra grah bhi kahte hain kyonki yah bahut hi dhimi gati se chalta hai. iske piche ek pauranik katha hai ki indrajit ke janm ke samay men ravan ne har grah ko adesh diya tha ki ve sabke sab ekadash bhav men rahen. isse jatak ki har ichcha ki purti hoti hai. shani bhi ekadash bhav men bahut barhiya prabhav deta hai; utna hi bura prabhav dvadash men deta hai. shani moksh ka karak grah, mokshakarak dvadash men ho to isse bura fal aur kya ho sakta hai? devtaon ke ishare par shani ne indrajit ke janm samay men apna ek pair dvadash bhav men barha diya, jise dekh ravan ka krodh sima ko par kar gaya evan shani ke ek pair ko kat kar usko langra grah bana diya. shani ka surya evan chandra ke prati mitrata ka bhav nahin hota hai. shani ka acharan surya-chandra ke acharan ke viruddh hota hai. yahi vajah hai ki surya-chandra ki rashiyon-sinh evan kark ke viprit iski rashiyan makar evan kunbh hain.
chandra kisi kam ko jaldi men anjam dena chahta hai, par shani aur chandra ka kisi tarah ka sanbandh ho gaya, to ek to kam jaldi nahin hoga, dusre kai bar prayas karna hoga. surya hriday ka karak grah kahlata hai. agar shani evan surya ka sanbandh hota hai to khun ko le jane vali nalikaon ke ched ko sankirn bana kar hriday rog picha karta hai. shani ke ye sab avgun spasht nazar ate hain, kintu ismen gunon ki bhi kami nahin hai. shani jantantra ka karak grah kahlata hai. rajniti men shani vishvas ka pratik mana jata hai. agar kisi rajnitigya ki kundli men shani ki sthiti thik nahin hoti to janta ko us rajneta ki baton ka vishvas nahin hota hai. shani shushk, rikt, niyam palan karne vala, ekantapriya, rahasyon ko apne andar chipane vala grah hai.
yah ekantapriya hota hai, atah puja, sadhna adi ke lie shubh grah mana jata hai. yah man ko shant rakhta hai aur agar puja ke samay man shant ho gaya to sadhna men man bhi lagega evan siddhi bhi jaldi hogi. pancham bhav ko puja se sanbandhit bhav mana jata hai. agar kisi jatak ke pancham bhav ka upasvami chandra hai to us admi ka man puja men kabhi bhi nahin lagega. puja ke samay man idhr-udhar khub bhatkega evan har bat ki chinta us admi ko usi samay hogi. par agar shani pancham ka upasvami hai, to puja ke samay man ekadam shant rahega. shani ke dost grahon men budh evan shukra ke nam ate hain. par shani vrish evan tula lagn valon ke lie hamesha hi labhdayak hoga. par yah bat mithun evan kanya lagn valon par lagu nahin hogi. uttar kalamrit ke anusar shani agar apni rashi men sthit ho ya guru ki rashi par sthit ho ya uchch ka ho, to shubh hota hai. par shani ke bare men ek vishesh bat yah kahi gayi hai
ki shani agar apni bhav sthiti ke anusar shubh hai, to use svayan ki rashi par, uchch rashi men, ya vargottam nahin hona chahie. agar aisa hua to yogkarak shani ki dasha ke samay raja bhi bhikhari ban jaega. shani agar ashubh ho, to kam men deri ho sakti hai, nirasha mil sakti hai, jhagra ho sakta hai, shanti badhit ho sakti hai, jatak ka niradar ho sakta hai, use avhlena ka shikar hona par sakta hai. par agar shani shubh ho, to shanti se kam karne, dhan ki bachat ka upay karne, mehanat karne, jivan men saflta prapt karne evan apne andar bahut sare rahasyon ko daba rakhne ki kshamata milti hai. shani ayushkarak grah kahlata hai evan agar yah ayu sthan, yani ashtam bhav men ho, to umra ko barhata hai.
guru men jahan vriddhi ki bat hoti hai, vahin shani men katauti ki. guru jahan santan vriddhi men karak grah hota hai, vahin shani ko, parivar niyojan ke dvara, santan vriddhi ko rokne ki kshamata prapt hai. guru evan shani men ek aur khas bhed hai. guru jahan purohit ka kam, dharm ke pracharak ka kam karta hai, vahan shani maun rah kar sadhna karta hai. use bhoj khane ke sthan par upvas karna hi bhata hai. shani ka rang baingni hai. iska ratn nilam hota hai. ankon men sankhya 8 hoti hai. shani ke prabhav ki vajah se hi 8 ank ko chipe rahasyon ka ank kaha jata hai. shani se sanbandhit vishay itihas, bhugarbh shastra, chikitsa ki purani paddhatiyan adi hain.
shani evan mangal donon ko hi jamin se vasta hota hai, par mangal jamin ki upri satah se sanbandhit hota hai, jabki shani bhitri satah se. shani agar shubh sthiti men n ho, to tarh-tarah ki bimariyan de sakta hai. sharir se us gandgi ko bahar ane se rok deta hai, jise bahar niklna chahie tha. payriya ho jata hai, jhilli kari ho jati hai, sharir men khun adi ka pravah avruddh ho jata hai. yah sab us sthiti men hota hai jab shani chandra ko pradushit karta hai. agar is pradushan men mangal bhi ata hai to chechak ki sanbhavna banti hai evan sharir men mavad jam jata hai.
shani agar sirf mangal ko dushit kar raha ho, to rirh ki haddi ka terha hona, gir kar chot lagna, pitt ki thaili men pathri ka hona ityadi bimariyan hoti hain. isi tarah se shani agar surya evan guru ko pradushit karta hai to, sharir men kolestrol ki vriddhi ke karan rakt vahak nalikaon men avrodh paida hota hai evan hridyaghat ki sanbhavna paida hoti hai. is tarah se alg-alag grahon ke sath alg-alag rog ho sakte hanai. shani ke dvara di gayi bimari jyada samay ke lie hoti hai.