prachinkal se hindu samaj men sat vachnon ka bahut adhik prabhav raha hai. ye sat vachan var evan vadhu ko sukhi danpatya jivan ki or prerit karte hain. chunki vivah sanpann hone ke sath hi kanya apne pita ka ghar chorakar apne pati ke yahan jati hai is karan vah apne achche evan surakshit bhavishya ke liye pati se sat vachan mangti hai. aisa samjha jata hai ki agni ke samaksh tatha samast devon ki upasthiti men patni dvara mange gaye tatha pati dvara diye gaye vachnon ka bahut adhik mahattva hai.
sankshipt rup mane saptapadi ke saton vachnon ki vyakhya is prakar ki ja sakti hai:- pahla vachan kanya var se kahti hai ki yadi ap kabhi tirthayatra ko jao to mujhe bhi sath lekar jana. kisi vrat ka udyapan athva anya dharm karya yadi ap karen to aj ke saman mujhe bhi apne vam bhag men avashya sthan den. yadi ap ise svikar karte hain to main apke vam ang men ana svikar karti hun. dusra vachan kanya var se dusra var mangti hai ki jis prakar ap apne mata-pita ka samman karte hain, usi prakar mere mata-pita ka bhi samman karen tatha kutunb ki maryada ke anusar dharmik karyon ko karte hue ishvar ke bhakt bane rahen to main apke vam ang men ana svikar karti hun.
tisra vachan tisre vachan men kanya desh ki bhalai ka vachan mangti hai. vartaman men log apni sabhyata-sanskriti tatha veshbhusha ka tyag kar pashchatya shaili ko apnane lage hain. isliye kanya vachan mangti hai ki ap chahe kitni hi angreji parh jayen parantu bhartiya sabhyata evan sanskriti ko kabhi n choren. yadi ap is vachan ko svikar karen to main apke vam ang men ana svikar karti hun. chaitha vachan kanya var se chaitha vachan mangti hai ki ab tak ap ghar-parivar ki chinta se puri tarah mukt the. ab jabki apka vivah ho gaya hai to bhavishya men parivar ki samast avashyaktaon ki purti karne ka dayitva apko hi sanbhalna hai. yadi ap is bhar ko vahan karne ki pratigya karte hain to main apke vam ang men ana svikar karti hun. panchvan vachan panchven var men kanya jo vachan pati se mangti hai vah aj ke pariperakshya men atyant mahattva rakhta hai. kanya var se kahti hai ki apne ghar ke karyon men, vivah men, len-den athva anya kisi prakar ke shubh karyon men athva sagai evan vivah ke karyon men, kharch karte samay yadi ap meri bhi mantrana liya karen to main apke vam ang men ana svikar karti hun.
chatha vachan chathe vachan men kanya var se vachan mangti hai ki yadi main meri sakhiyon men athva anya striyon ke bich men baithi hun tab ap vahan akar kisi bhi karan se mera apman nahin karenge tatha yadi ap jua athva kisi bhi prakar ke duvryasan se apne apko dur rakhenge to main apke vam ang men ana svikar karti hun. satvan vachan kanya antim tatha satven vachan ke rup men var se vachan mangti hai ki ap parai-striyon ko mata ke saman samjhenge aur apna sanpurn pyar sada mujh par rakhenge. mujh par kabhi bhi krodh nahin karenge. yadi ap yah vachan dete hain to main apke vam ang men ana svikar karti hun. patni dvara mange gaye in sat vachnon ko sunakar pati apni patni se vachan mangta hai aur kahta hai ki yadi tumhen mera vachan svikar hai to main bhi tumhare vachnon ko svikar karne ka vachan deta hun. yadi tum bag-bagiche men, van men tatha paraye gharon men akeli n jao aur dusre purushon ke sath ekant men vartalap n karo tatha purushon ke samne maryadahin hokar n hanso, in baton ke sath-sath sushil tatha mithi bhasha se apne sas-sasur ko samman do aur pativrata dharm ka palan karo, dharm hit evan ishvar bhaktiprayan rahte hue agya ka palan karo to main tumhara svagat karta hun.