1. jin vyaktiyon ki hath ki rekhaen spasht, patli, gahri hon aur hath par bahut adhik choti-bari rekhaen nahin hon, aise vyaktiyon ka ajivika kshetra achcha rahta hai tatha har paristhiti men ve apne jivan men unnati karte hain.
2. yadi hatheli ki tvacha snigdh, chamkili aur lalima yukt ho aur dabane par hath mansal aur gaddedar pratit hon aur anguliyon ke niche sthit parvat ubhre hue hon to aise vyakti ka kairiyar samanyatah uttam rahta hai.
3. yadi hatheli men mastishk rekha mangal ke praranbh tak gai hui ho, ant men nukili ho aur bhagya rekha manibandh se praranbh hokar guru, shani ya budh parvat tak gai hui ho, bich men kahin bhi khandit n ho aur n is par koi kras ka nishan ho to aise vyakti ko kairiyar men uchch sthan ki prapti hoti hai.
4. jin vyaktiyon ke hath men anguliyan terhi-merhi hon aur nakhun bhi dharidar ya vikrit hon to aise vyakti apne kairiyar men bahut adhik saflta prapt nahin kar pate hain aur is sanbandh men unhen anek badhaon ka samna karna parta hai.
5. yadi dayen hath ki apeksha bayen hath ki rekhaen bahut adhik achchi hon aur bayen hath men trikon, varg adi shubh chinhon ki adhikta ho to aisa vyakti karm ki apeksha apne bhagya ki sahayta se kairiyar men unnati ki prapti karta hai.
yadi ye shubh chinh shukra parvat par adhik hon, to yah bhi dekha gaya hai ki aise vyakti vivah ke bad adhik unnati karte hain. hastarekha lakshan aur vibhinn kairiyar kshetra safal vyapari hetu
1. yadi angushth evan kanishthika lanbi ho, budh kshetra ubhra hua aur us par trikon bana ho iske atirikt bhagya rekha evan surya rekha ki sthiti bhi hath men achchi ho to aisa jatak ek safal vyapari banta hai. nyayadhish hetu: yadi hatheli men hriday rekha evan mastishk rekha ke bich ka bhag bara ho, tarjani anguli bari ho, kanishthika ka pratham por aur adhik bara ho, surya parvat unnat ho, to aisi sthiti evan madhyama anguli bhi lanbi ho to aisa jatak safal nyayadhish banne ki yogyata rakhta hai.
uchchadhikari hetu
1. yadi hatheli men guru parvat unnat ho, surya rekha spasht evan sidhi ho aur bhagya rekha purn ho to aisa vyakti rajkiya seva men uchch prashasnik adhikari banta hai.
2. yadi kisi jatak ke dayen hath ki tarjani evan kanishthika anguliyan bayen hath ki tarjani aur kanishthika anguliyon ki apeksha adhik lanbi evan pusht hon, pratham mangal evan surya ke kshetra unnat hon to aisa jatak uchch pad prapt karta hai. chikitsak banne ke lakshana: anguliyan lanbi hon, budh kshetra ubhra hua aur us par tin khari rekhaen hon, surya rekha patli evan gahri ho, hriday rekha evan mastishk rekha spasht hon aur shukra evan chandra parvat par koi ashubh chinh n ho to vah vyakti safal evan yashasvi chikitsak banta hai. chitrakar (kalakar) banne ke lakshana: yadi hatheli bari ho, anguliyan nukili evan patli hon, anamika anguli ka pratham por bara ho aur shukra parvat unnat ho to aisa vyakti achcha chitrakar banta hai. abhineta ke lakshana
1. anguliyan chaikor hon, mastishk rekha do munhi ho, uska ek bhag budh parvat tak gaya ho aur shukra kshetra unnat ho to abhinay ke kshetra men uchchastariya saflta prapt karta hai.
2. yadi mastishk rekha budh kshetra par jakar samapt ho, chandra parvat unnat ho aur shukra kshetra par trikon ka chinh ban raha ho to aisa vyakti abhinay kshetra men safal hota hai.
lekhak, patrakar evan sanpadak ke yog
1. hatheli men budh kshetra unnat ho, kanishthika anguli anamika ke antim kshetra ke madhya tak gai ho, chandra parvat unnat ho aur mastishk rekha niche jhukakar chandra parvat tak a gai ho, to aise vyakti ki kalpana shakti bahut achchi hoti hai aur vah achcha lekhak, patrakar ya sanpadak ban sakta hai.
2. guru parvat unnat ho us par svastik ya chaturbhuj ka chinh bana ho, mastishk rekha budh ya chandra kshetra tak gayi hui ho aur surya rekha par sitara ka chinh ho, to kavi, lekhak ya prakashak ke kshetra men uchch saflta prapt hoti hai.
shikshak banne ke yog
1. yadi hathon ki anguliyan chaikor hon, guru parvat ubhra hua ho, aur us par kraes ya chatushkon ka chinh ho, surya rekha spasht evan nirdosh ho to aisa vyakti shikshak banta hai aur shikshan kshetra men uchch pad prapt karta hai.
2. yadi budh kshetra unnat, tarjani anguli madhyama ki or jhuki hui ho aur guru parvat par svastik ya varg ka chinh ho to aisa vyakti shiksha ke kshetra men uchch pad prapt karta hai.
injiniyar banne ke lakshana
1. yadi hatheli men anguliyan age se golai liye hue hon, chandra evan mangal kshetra unnat hon aur angutha chota ho to aisa vyakti ek safal injiniyar banta hai.
2. anguliyan nokdar evan motai lie hue aur hatheli chairi evan chairas ho, sabhi grah kshetra faile hue hon aur angutha chota evan majbut ho to vyakti safal injiniyar ban sakta hai.
jyotishi ke hast lakshana
1. yadi kanishthika anguli ke antim parva tak gai hui ho, guru parvat unnat ho us par svastik, valay, chatushkon athva trikon ka chinh ho aur mastishk rekha mangal kshetra tak gai ho to aisa vyakti safal jyotishi banta hai aur use is kshetra men dhan evan yash donon ki prapti hoti hai.
2. yadi chandra kshetra par khari rekha bani hui ho aur mastishk rekha isse akar mile, mastishk rekha athva bhagya rekha ke samip trikon ka chinh ho aur madhyama anguli lanbi ho, to aise vyakti ka antarman shighra jagrit ho jata hai. is prakar ke vyaktiyon ki bhavishyavaniyan sach hoti hai. inhen vak siddhi bhi prapt ho sakti hai. prabandhak banne ke yog: yadi tarjani anguli lanbi ho, guru parvat ubhar lie hue ho, mastishk rekha budh kshetra ki or jhukav lie hue ho aur nirdosh surya rekha hath men vidyaman ho, to aisa vyakti safal prabandhak banta hai aur prashasnik karya sucharu rup se chalata hai.
khilari ke yog
1. yadi donon mangal kshetra unnat hon, mastishk rekha aur hriday rekha ke bich adhik antar n ho, shani parvat unnat ho to aisa vyakti achcha khilari ban sakta hai.
2. yadi mangal kshetra par chatushkon ka chinh ho, mastishk rekha moti ho, madhyama anguli lanbi ho aur hath dekhne men thora sakht pratit ho to aisa vyakti safal khilari ban sakta hai. use is kshetra men dhan evan yash donon ki prapti hoti hai.
sheyar vyapari ke yog
1. yadi budh kshetra par do ya tin khari rekhaen hon, kanishthika anguli lanbi evan nukili ho aur bhagya rekha budh parvat ki or gai hui ho to aise vyakti ko sheyar ke karya men atyadhik labh hota hai.
2. yadi bhagya rekha budh parvat par jakar samapt ho, budh kshetra unnat ho aur hatheli ke madhya bhag men trikon ka chinh ho to aise vyakti ko apne jivan men akasmik rup se dhan ki prapti hoti hai.
uske lie sheyar satte adi ka karya bhi labhdayak siddh hota hai. gyatavya tathya: hastarekhaon se kairiyar nirdharan karne men tarjani, madhyama, anamika evan kanishthika anguliyon aur inke niche kramshah sthit guru, shani, surya evan budh parvaton ka vichar vishesh rup se kiya jata hai. in parvaton par sthit chinh evan inki sthiti adi ke anusar fal prapt hote hain. hast rekhaon se kairiyar nirdharan men sarvapratham prashn yah uthta hai ki kaun se hath ka nirikshan karna chahie. samanya rup se purushon ka dayan aur striyon ka bayan hath dekhne ke nirdesh shastron men prapt hote hain. dayan hath karm ka aur bayan hath bhagya ka parichayak hota hai. samanya rup se parivar men purush ajivika chalata hai aur stri ghar ki antrik vyavastha ko dekhti hai. vartaman samay men stri-purush donon hi purusharth karte hain aur ajivika arjan men tatpar rahte hain. islie ajivika ke sanbandh men vichar karte samay stri ke dayen hath ko hi adhik prathmikta deni chahie. chunki bayan hath bhagyafal ka pratik hota hai aur bhagya ki sahayta ke bagair koi bhi vyakti uchch sthiti ko prapt nahin kar sakta hai islie bayen hath ko bhi is sanbandh men avashya dekhna chahie. hastarekha yog v lakshanadi kisi bhi manushya ke lie vah khuli kitab hai, jismen uska sanpurn jivan vritant, shubhashubh samay aur shubhashubh kshetradi ka anuman lagaya ja sakta hai. bhavishya kathan men janmakundli ke saman hi hastarekhaon ka bhi atyadhik mahatva hota hai. jiske madhyam se jivan ke kisi bhi kshetra men jankari prapt ki ja sakti hai. atah yah sunishchit hai ki jo fal hastarekhaon dvara parilakshit hote hain, ve nishchit rup se prapt hote hain.