kismat kisko kab kya degi-farsh se arsh par le jaegi ya raja se rank banaegi ye koi nahin janta. jiro se hiro banne ke sitare virle hi kundliyon men falibhut hote hain aur aisa hi chamatkar hamen modi sarkar ki manav sansadhan vikas mantri ki kundli men dekhne ko mila. panjabi pita aur bangali asmi man ki beti smriti ka janm dilli ke nimn madhyamavargiya parivar men hua. smriti ka bachapan dilli men hi bita. smriti tin bahnon men sabse bari thi. dilli holi chaild skul se inhonne 12vin ki pariksha pas ki. lekin 10 vin ke bad se hi inhonne kamana shuru kar diya tha. ek byuti prodakt ke prachar ke lie inhen har din 200/- mila karte the.
12vin ki pariksha ke bad inhonne bi. e. men pravesh to le liya par parivar ko arthik rup se madad karne ke uddeshya se apni manjil talashne munbai pahunch gain. 1998 men smriti ne femina mis indiya saundarya pratiyogita men bhag liya. ye fainal tak bhi pahunchin par kismat ne vijeta nahin banaya. smriti ne is pratiyogita men shamil hone ke lie apne mata-pita se paise mangvae the aur ve use lautana chahti thin islie inhonne munbai men hi naukri dhunrhni shuru ki. jet eyar vej men flait atendent pad ke lie aplai kiya par selekshan nahin hua aur naukri mili maikdonaldas restaran men. vahan inhonne akaunt sanbhalne se lekar farsh saf karne tak ka kam kiya.
gaukrne ki bat yah hai ki ye apni jimmedari se piche nahin hatin n hi ghabrain balki paristhitiyon ke anusar khud ko dhala aur har hal men jindgi men age barhti rahin. munbai men smriti ki takdir badlni shuru ho gai. 2000 men apni avaj ki badaulat ‘au la la la’ episod men ektres nilam kothari ko bedakhal karne men kamyab rahin aur yahin se ye ekta kapur ki najron men ain aur ‘sas bhi kabhi bahu thi’ dharavahik ki tulsi virani ban gain. tulsi virani ke rup men ye chote parde ki sabse chaheti bahu ban gain aur yah siriyal tivi siriyal ke itihas men mil ka patthar sabit hua. iske bad smriti ne piche murakar nahin dekha aur ab kismat un par mehrban ho rahi thi. smriti sarvashreshth abhinetri ke lie panch bhartiya telivijan ekadmi avard, char indiyan teli avard aur ath star parivar puraskar jit chuki hain aur inhonne anya siriyalon men bhi bataur ektres v sah nideshak ki tarah kam kiya. 2001 men smriti ne shadishuda jubin irani (parsi) se vivah kar liya aur ye tin bachchon ki man hain.
smriti ka rajnaitik jivan 2003 men tab shuru hua jab inhonne bhartiya janta parti ki sadasyata grahan ki aur dilli ke chandni chaik lok sabha nirvachan kshetra se chunav lara halanki ye kangres ke ummidvar kapil sibbal se har gain lekin 2004 men inhen maharashtra yuth ving ka upadhyaksh banaya gaya. inhen parti dvara panch bar kendriya samiti ke karyakari sadasya ke rup men manonit kiya gaya aur 2010 men inhen bhajpa mahila morcha ki kaman saunpi gai aur 2011 men ye gujrat se rajyasbha ki sansad ban gain. isi varsh inko himachal pradesh men mahila morcha ki kaman bhi saunp di gai aur bharat ke am chunav 2014 men smriti ne kangres upadhyaksh rahul gandhi aur am admi parti neta kumar vishvas ko kari chunauti dete hue amethi sansdiya sit se chunav lara. yadyapi ye chunav har gain parantu rajya sabha ka sadasya hone ke nate bharat sarkar ne smriti ko manav sansadhan vikas mantri bana diya. kismat ne inhen bulandiyon tak pahuncha diya. smriti vastav men apni kismat aur purusharth ke bal par is mukam par pahunchi hain
. ek nirdhan parivar men janm lene ke bad bhi apne sapnon ko sakar karne ke lie kabhi piche nahin hatin aur puri mehanat se chote bare sabhi kam kie tabhi yah mukam hasil hua. ajakal kangres ke kai varishth neta smriti ki shiksha ko lekar kai vivad utha rahe hain par smriti ne thik hi kaha ki mujhe kam ke adhar par parkhna chahie. bharat ki rajniti men kitne hi neta ashikshit se lekar keval dasvin ya barhvin pas milanege jinhonne bare mahatvapurn padon par bakhubi karya kiya. isi tarah smriti bhi chahe jyada parhi likhi nahin hain par pichle das varshon ki rajniti ki parakh aur unki mehanat ke bal par inhen ankna chahie. aiye karen inki janmapatri men baithe grahon ka akalan jinhonne inhen farsh se arsh tak pahunchaya. smriti ka bilkul sahi samay n mil pane ke karan ham chandra kundli se kundli ki vyakhya karenge, lekin unke jivan men ghati ghatnaon ke adhar par chandra lagn hi sarthak lagta hai. vaise bhi jatak granthon men kaha hi gaya hai
ki janm lagn v chandra lagn men se jo bali ho usi se faladesh karna chahie. grah yogon ke adhar par smriti ki chandra kundli vishesh balvan hai. aiye dekhen- smriti ki kundli ke anusar chandra dhanu rashi men sthit hone ke karan inka vyaktitva akarshak hai. chandra lagnesh v surya lagnesh guru hone se tatha chandra lagn evan navam bhav par chandrama se panchamasth guru ki drishti hone se smriti sabhya, shalin v shreshth gunon se yukt vinyshil tatha ashavadi mahila hain. chandra lagn, panchanm v navam par guru ka prabhav hone ke atirikt chandra lagnesh v surya lagnesh bhi guru hi hai. inke jivan par guru grah ka prabhav vishesh hone se ye adhik shikshit n hone ke bavjud bhi dharapravah bhashan kala sanpann hain sath hi apni bat ko prabhavshali tarike se rakhne men saksham, sabki unnati chahne vali, dayavan pravritti ki tatha duradarshi hain. tritiya parakram bhav men labhesh shukra aur karmesh budh ki yuti hai tatha donon grahon ki bhagya bhav par purn drishti parne se inhen abhinay tatha kala ke kshetra men bari saflta mili aur usi saflta ke bal par aj ye rajniti ke kshetra men bhi vijyi hui hain.
chaturth bhav men uchchabhilashi bhagyesh surya ki sthiti svadesh men bhagyoday tatha uchch pad prapti ke lie v raj vidya ke lie shreshth hai kyonki trikonesh ka kendrasth hona shubh faldayi hota hai. pancham sthan men brihaspati aur ketu ki yuti ban rahi hai. pancham bhav ke guru par ‘karak bhav nashay’ ki yukti charitarth hoti hai. isilie smriti ne samanya shiksha to grahan ki par pancham bhav par guru ki sthiti tatha us par do-do pap grah rahu evan shani ki drishti ne inhen age parhne men sahyog nahin diya aur smriti apni parhai ko age barhane ki bajae apne parivar ki arthik sthiti ko sudharne men jut gain. saptam bhav men mangal ki sthiti evan ashtam bhav par shani ki sthiti tatha rahu ki purn drishti hone se inka vivah pahle se vivahit purush se hua aur inhen apne vaivahik jivan men samjhauta karna para.
rajniti ke karak rahu ki ekadash bhav men sthiti tatha kendra bhav (arthat chaturth evan saptama) men do yog karak grahon ki sthiti se kundli atyant balshali ho gai hai isilie rajniti ke kshetra men inhen uncha pad prapt hua. dhanu rashi hone se smriti ganbhir vyaktitva ki mallika hain tatha apne kam ke prati puri karÿavyanishth hain aur apne lakshya ko prapt karne ke lie ye puri tanmayata aur lagn se lag jati hanai isilie inhonne apne pita ko rupye lautane ke lie maikdonald men atendent ka kam karne se bhi parhej nahin kiya aur yahi inki saflta ka raj hai. lagnesh guru ki pancham bhav men sthiti nishchit rup se inki lakshya prapti men madad karti hai.
smriti ki kundli men kemadrum yog bhi ban raha hai. parantu guru ki drishti se bhang bhi ho raha hai isilie inka nirdhan parivar men janm to hua parantu age chalakar inhen dhan, man-samman sabhi ki prapti ho rahi hai. kutunb sthan ka svami shani ashtam bhav men sthit hai jiske karan parivar se bahut sahyog nahin mil paya aur parakram bhav men shukra budh ki sthiti v ekadash men rahu ke prabhav se apne balbute par apni jindgi men age barhin. mangal trikon ka svami hokar kendra men sthit hai tatha shubh grah chandra ki drishti se yukt hai jiske karan inhen lok sabha chunav ka tikat bhi prapt hua aur inhonne kangres ke sabse lokapriya neta tatha pradhanmantri pad ke davedar rahul gandhi ko kari takkar dene ka sahas kiya aur bahut bari sankhya men vot batore.
rahul ke khilaf inki har inke lie koi mayne nahin rakhti kyonki inhonne is chunav men apni yogyata, vani tatha buddhimatta ke jhande gar diye. ajakal inki shiksha ko lekar kafi kuch bola ja raha hai parantu rajniti men yogyata sirf uchch shiksha se nahin anki jati . karya ke prati lagan, imanadi v sikhne ka jajba vyakti ko farsh se arsh tak pahuncha sakta hai ismen koi sandeh nahin hai. vyakti ke hausle buland hon to vah kuch bhi pane men saksham hota hai. smriti ke karm sthan par bhagyesh surya, panchmesh mangal aur parakramesh v dhanesh shani ki purn drishti hai aur karm sthan ke svami budh svayan labhesh shukra ke sath parakram bhav men baithakar bhagya bhav ko dekh rahe hain. chandra v mangal ke paraspar drishti yog evan ekadashasth rahu v panchamasth guru ke ashirvad se smriti avashya hi pichli pari ki tarah is bar bhi apne karmik kshetra men avashya hi nam kamaengi aur janta ke bich lokapriyata hasil karengi aur apni rajnitik aur prashasnik kshamataen siddh karengi.
varsh 2002 v 2003 men guru ki kark rashi men sthiti ke samay smriti irani ka nam bharat ke rajnaitik patal par ubhra tha. is bar jab fir se guru ka kark rashi men pravesh hone vala hai to inhen dobara rajnitik kshetra men bulandiyan prapt hui hain aur kendriya mantri ka pad prapt hua hai. jyotish men rahu akasmik v ashcharyajanak parinam dene ke lie vikhyat hai. rahu rajniti ka vishesh karak hota hai. inka rahu ekadashasth to hai hi tatha gochriya rahu, guru v shani in tinon ka prabhav bhi is par a jane ke karan shreshth pad prapt karne ke lie varsh 2014 labhaprad siddh hua. age bhavishya men ye apni jimmedariyon ka dakshata se nirvahan karengi. inka kark rashisth shani vargottami hai
jiske upar se uchch rashisth guru ka gochar hone vala hai tatha navanbar se shani ki sarhesati bhi aranbh hone vali hai. yah yogayog inke rajnitik jivan men akasmik labh v shreshthastariya saflta ka suchak hai. ishvar inke nek iradon v buland hauslon ko nai uran den.