krur nahin nyayapriya hain shani vinay garg shani ek aise grah hanai jinke karan adhikatar log bhaybhit ho jate hain. yah dar shani ki dasha ya unki gochravastha ke falasvarup unki sarhesati athva dhaiya ke karan hota hai. parantu bhaybhit vahi log hote hain, jinhen apne karmon ke bare men sandeh rahta hai. shani ke karan aise logon ko bhaybhit hone ki avashyakta bilkul nahin hai, jinhen apne karmon ke bare men koi sandeh nahin hota, kyonki shani krur v sakht avashya hain parantu anyayi nahin hain. shani ko nyayadhish ke rup men karya karne ka vardan bhagvan shiv se mila hai. yah bat nirvivad hai ki shani ke grahon ke raja surya ka putra hone ke bavjud koi bhi am admi sukh samriddhi hetu nahin, balki dar ke karan unki aradhna, puja evan upasna karta hai. isi bat ko lekar shani ke man men hin bhavna rahti hai. tiraskar ki isi bhavna se udvelit shani ne bhagvan shiv ki kathor tapasya ki aur jab bhagvan shiv, unki tapasya se prasann hue to unhonne unse var mangne ke lie kaha. shani bhagvan ne sarvapratham yahi nivedan kiya ki main raja surya ka putra shani hun . sabhi log anya grahon aur devtaon ki puja-archana karte hain, lekin meri puja-archana koi nahin karta. koi aisa var den, jisse log meri puja bhi karen. tab bhagvan shiv ne shani dev ko yah vardan diya ki aj se mrityulok par logon ke karmon ke fal ke nirnay ka adhikar apko diya jata hai. aj se apko prithvi lok men logon ke galat karmon ka dand dene ka adhikar hai. yahi karan hai ki shani pradhan log kabhi bhi n to svayan koi galat karya karte hain aur n hi kisi ke galat karya ko bardasht karte hain. ve galat karya karne valon ka virodh karte hain tatha dand dene ka prayas karte hain. isilie shani pradhan logon ko krur aur kattar mana jata hai. ramayan kal men ravan ne apne tapobal aur gyan se sabhi grahon ko ekadash bhav men ekatra kar unse anukul fal prapt karna chaha tha. uske manobhav ko bhanp kar shani bhagvan ne apne sthan se bhagne ka prayas kiya, to ravan ne unhen bandhan men dalakar ek hi sthan par sthir rahne ke lie majbur kar diya. tab hanuman ji ne unhen bandhan mukt karaya tha. is par shani dev ne hanuman ji ko vachan diya tha ki aj ke bad se jo bhi apki puja-aradhna karega, use main kisi bhi prakar ka dand nahin dunga. yahi karan hai ki jab koi vyakti shani ki dasha, dhaiya ya sarhesati ke anisht prabhav se pirit hota hai, to use hanuman ji ki upasna jaise unki puja karne, unhen prasad charhane aur hanuman chalisa, bajrang ban adi ka path karne ki salah di jati hai. sath hi hanuman ji ko chola charhane ka upay bhi bataya jata hai. hanuman ji ke sabse priya aradhya dev bhagvan shri ram hain. isilie shani ki sarhesati se grast vyakti ko pratyek shanivar ki sham ramchrit manas ke sundrkand ka path karne ka paramarsh bhi diya jata hai. shanidev ko ek sevak ke rup men bhi mana jata hai aur sevak ko prasann karke vyakti achche se achche shubh fal ki prapti kar sakta hai. sevak hi aisa prani hai jise vyakti asani se prasann kar sarvadhik sukhon ki prapti kar sakta hai. atah shani jitne kathor v raudra hain, utne hi dayalu v kshamashil bhi hain. shani dev ki prasannata, unke dand se mukti evan unse kshama prapti hetu unke nimn mantra ka nishtha aur vishvaspurvak jap karen, shani dev apke galat karmon ko kshama karte hue dand se mukti pradan karenge aur ap chinta, bhay v tanav se mukti pakar anand, svasth tatha prasannachitt anubhav karenge. yadi ap shani chalisa ka path bhi pratyek shanivar ki sham karen, to apko aur bhi adhik labh ki prapti hogi.
Kya aapko lekh pasand aaya?
Subscribe