vakri shani, ashubh hi nahin sudhanshu nirbhay shan ka nam ane ka matalab hai ek vistrit bhay- asuraksha-kufal ka vatavaran. samajh se pare hai ki bina kisi gahan gyan ke itni nakaratmak soch rakhna. uttaradayi nishchit hi sanpurn jyotish jagat hi hai. prayah shani ke vakratva kal ko atyadhik ashubh parinamdayak bataya jata hai, jabki paya gaya hai ki vakri hone par shani ke prabhavon ka shubhatva aur adhik barh jata hai. is avdhi men jatak ko vahi fal prapt hote hain jinka vah adhikari hota hai. faldipika ke anusar vakri grah nich ya shatru rashisth ho to bhi uchch grah ke anusar hi fal karta hai. isi tarah shani vargottam ya navmansh men ho to svakshetri sthiti ke anusar hi fal karta hai. faldipika ke 20ven adhyay mane rachnakar spasht karta hai ki vinshottari dasha- antardasha ke shubh fal tabhi prapt hote hain jab dasha ya antardasha ka svami grah shubh bhavesh hokar sva ya uchch rashi men vidyaman ho athva vakri ho. jyotish vidvan shri satyacharya ne bhi uchch svarashisth ya vakri grah ko hi shreshth mana hai. dakshin bharat ke vidvan shri mantreshvar bhi vakri grahon ko param shubh fal pradata kahte hain. ukt maton ke anusar shani ke vakra kal ko ashubh man lena uchit nahin hai. pashchatya vidvan bhi vakri shani ko shani pirit logon ke lie shubh mante hain. apni is avastha men shani vyakti ke jivan ko sukhamay bhavishya ki or le jata hai. shani ke vakratva kal men hi vyakti atm vishleshan ke daur se gujrta hai aur apne bhavishya ko sukhamay banane ka prayas karta hai. nirutsahit logon men utsah ka sanchar vakri shani hi karta hai. shani ke vakri hone par sanbaddh logon ko apni apekshaon par niyantran rakhna chahie, anyatha vah aina bhi dikha sakta hai. is avdhi men santosh, vivek v dhairya ka sahara lena chahie, taki kisi viprit paristhiti ka samna n karna par jae. vakri shani ke kalansh men paida hone vale jatak purnatah adhyatmik hote hain. aise adhikansh jatak ishvariya satta ko manne vale hote hain. ve sthir prakriti vale hote hain aur chote-bare parivartanon se prabhavit hote hai. bahar se majbut dikhne vale aise jatak andar se bahut kamjor hote hain. unhen ekant priya hota hai aur ve dimag se behatar karya karte hain. chunki unka adhyatm paksh drirh hota hain, islie ve achche updeshak athva salahkar siddh hote hain. yah tay hai ki vakri shani jatak ki pragti ko sunishchit karta hai, kintu purn sangharsh ke uprant. yadi shubh grahon ka prabhav kundli ke pramukh bhavon, bhaveshon evan shani v shani adhishthit rashi par ho to sangharsh kuch kam ho sakta hai. shani ka vakra gati ka prabhav vyapak hota hai. yadi janm lagn men shani vakri hokar sthit ho aur gochar men vakri ho to yah samay kisi vishesh fal ka suchak hota hai. kintu yah fal kaisa hoga iska pata vyakti vishesh ki kundli dekhakar hi kiya ja sakta hai. rashtriya- antarrashtriya star ke safalatam vyaktiyon ki kundli men koi n koi grah vakri jarur hota hai. is tarah, mesh men shani nichasth evan sinh men shatru rashisth kaha gaya hai, lekin mesh, mithun, kark, sinh, vrishchik, dhanu ya min rashi ka vakri shani ashubh sthiti men hokar bhi ashubh fal nahin deta. agar vyakti apne acharan ko pavitra rakhe to use shani ke shubh prabhav atishighra prapt ho sakte hain.
Kya aapko lekh pasand aaya?
Subscribe