shrinath mandir men sudarshan chakra, jagannathpuri men bhairvi, tirupti balaji evan shringeri men shriyantra tatha mahakaleshvar ujjain men mahamrityunjay yantra ka prabhav evan chamatkar shraddhaluon ko sarvavidit hai. mandal evan yantra ko dev dvar bhi kaha jata hai. sarvatobhadra mandal mangalaprad evan kalyankari mana jata hai. yagya yagadik, dev pratishtha, manglik puja mahotsav, anushthan ityadi dev karyon men sarvatobhadra mandal ka sarvavidh upyog kiya jata hai. ganesh, ambika, kalash, matrika, vastu mandal, yogini, kshetrapal, navagrah mandal, varun mandal adi ke sath pramukhta se sarvatobhadra mandal ke madhya pramukh devta ko sthapit evan pratishthit kar unki vibhinn puja upcharon se puja karne ka vidhan dharm granthon men upalabdh hai. sarvatobhadra mandal ke samanyatah kai arth prapt hote hain. mangalaprad evan kalyankari sarvatobhadra mandal evan chakra men sabhi or ‘bhadra’ namak koshthak samuh hote hain jo sarvatobhadra mandal athva chakra ke nam se jane jate hain. is mandal men pratyek disha men do-do bhadra bane hote hain is prakar yah manglkari vigrah apne nam ko sarvatha sarthak karta hai. sanrchna: sarvatobhadra mandal ki rachna adbhut hai.
sarvapratham mandal nirman hetu ek chaikor rekhakriti banayi jati hai. is chaikor rekha men dakshin se uttar tatha pashchim se purva ki or barabr-barabar do rekhaen khinchne ka vidhan hai. is prakar sarvatobhadra mandal men 19 khari evan 19 ari lainon se kul milakar 324 chaikor bante hain. inmen 12 khandendu (safed), 20 krishn shrinkhla (kali), 88 valli (hare), 72 bhadra (lal), 96 vapi (safed), 20 paridhi (pila) tatha 16 madhya (lal) ke koshthak hote hain. in koshthakon men indradi devtaon, matrishaktiyon tatha arundhati sahit saptarishi adi ka sthapan evan pujan kiya jata hai. bhadra mandal ke bahar tin paridhiyan hoti hain jinmen safed saptagun ki, lal rajo gun ki aur kali tamo gun ki pratik hai jo bhagvan ki prasannata hetu nirmit ki jati hain. khandendu: tin-tin koshthakon ka ek-ek khandendu charon konon par banaya jata hai.
pure bhadra mandal men khandendu men 12 koshthak hote hain. ishan kon se praranbh kar pratyek kon men tin-tin koshthakon ka ek-ek khandendu banaya jata hai, jismen safed rang ki akriti dene hetu chaval ka prayog kiya jata hai. krishn shrinkhla: panch-panch koshthakon ki ek-ek krishn shrrinkhla men kul 20 koshthak hote hain. valli: khandendu ke bagal vale koshthak ke niche do koshthakon men hare rang ka prayog kiya jata hai. krishn shrinkhla ke dayin evan bayin (gyarh-gyarh) or charon konon men kul 88 valliyan taiyar ki jati hain. bhadra: valli se sate charon konon evan athon dishaon men nau-nau koshthakon ka ek-ek bhadra hota hai jo lal rang ke dhanya se bhara jata hai. ath bhadron men kul 72 koshthak banaye jate hain. vapi: purva, pashchim, uttar, dakshin charon dishaon men 24-24 koshthakon ki ek-ek vapi taiyar kar usmen safed rang ke dhanya ka prayog kiya jata hai. char vapiyon men 96 koshthak hote hain. madhya: bhadra mandal ke shesh bache 16 koshthakon ko madhya kaha jata hai jiska vastushastriya mahatva hai. madhya men karnikayukt ashtadal kamal banaya jata hai jismen lal rang ke dhanya ka prayog kiya jata hai. isi ashtadal kamal men yagya karm ke pradhan devta ki sthapna kar unki vividh puja upcharon se puja-archana ki jati hai.
paridhi: paridhi men 20 koshthak hote hain. bahya paridhi: bahya paridhi men 3 paridhiyan satva, rajo aur tamo gun ki hoti hain.
sarvatobhadramandal ke devta: sarvatobhadramandal ke 324 koshthakon men nimnalikhit 57 devtaon ki sthapna ki jati hai:
1. brahma
2. som
3. ishan
4. indra
5. agni
6. yam
7. nirriti
8. varun
9. vayu
10. ashtavasu
11. ekadash rudra
12. dvadash aditya
13. ashvidvay
14. sapaitrik-vishvedev
15. saptayaksha- manibhadra, siddharth, suryateja, sumna, nandan, manimant aur chandraprabh. ye sabhi devta yajman ka kalyan karne vale bataye gaye hain.
16. ashtakulnag
17. gandharvapsaras - gandharva $ apsara devta ki ek jati ka nam gandharva hai. daksh suta pradha ne prajapti kashyap ke dvara agralikhit das dev gandharva ko utpann kiya tha- siddh, purn, barhi, purnayu, brahmachari, ratigun, suparn, vishvavsu, bhanu aur suchandra. apsara- kuch apsarayen samudra manthan ke avasar par jal se nikli thin. jal se niklne ke karan inhen apsara kaha jata hai evan kuch apsarayen kashyap prajapti ki patni pradha se utpann hui hain. alambusha, mishrakeshi, vidyutparna, tilottama, aruna, rakshita, rambha, manorma, keshini, subahu, surta, surja aur supriya hain.
18. skand
19. nandi
20 shul
21. mahakal - ye sabhi devtaon men shreshth mahakaleshvar jyotirling ke rup men svayanbhu rup se avtirn hain.
22. dakshadi saptagan - bhagvan shankar ke mukhya gan kirtimukh, shrringi, bhringi, riti, ban tatha chandish ye sat mukhya gan hain.
23. durga
24. vishnu
25. svadha
26. mrityu rog
27. ganpti
28. ap
29. marudgn
30 prithvi
31. gangadi nandi- yagya yagadik karm men dev karm prapti ki yogyata prapt karne hetu shuddhata evan pavitrata hetu gangadi nadiyon ka avahan kiya jata hai. saptaganga men pramukh hain- ganga, yamuna, godavri, sarasvati, narmada, sindhu aur kaveri.
32. saptasagr
33. meru
34. gada
35. trishul
36. vajra
37. shakti
38. danda
39. khadga
40. pash
41. ankush- ye asht ayush dev svarup hai aur manav ke kalyan ke lie vividh devtaon ke hathon men ayudh ke rup men sushobhit hote hain. uttar, ishan, purva adi ath dishaon ke som, ishan, indradi adhishthata dev hain ye asht ayudh.
42. gautm
43. bharadvaj
44. vishvamitra
45. kashyap
46. jamadagni
47. vasishtha
48. atri - ye sat rishi hain. bhadramandal men matrikaon ki tarah in rishiyon ki bhi puja hoti hai.
49. arundhati- mahashakti arundhati saumya svarupa hokar vandniya hai. pahle ye brahma ki manas putri thin. solah sanskaron men pramukh vivah ke avasar par kanyaon ko inka darshan karaya jata hai.
50. aindri
51. kaumari
52. brahmi
53. varahi
54. chamunda
55. vaishnavi
56. maheshvari tatha
57. vainayki - devasthan, yagyabhag ki raksha hetu asht matrikaon ka prardubhav hua. bhadra mandal paridhi men in mataon ki sthapna ka vidhan hai.
yagya evan manglik karyon men upyogita: yagya yagadik karm, manglik puja mahotsavon, pratishtha karm, adi shubhakarmon men vibhinn mandlon ke sath sarvatobhadra mandal pramukhta se banaya jata hai. mandal ki sthapna ke sath hi ismen uparyukt devtaon ki vaidik mantron se pratishtha tatha puja-archana ki jati hai. isse sadhak, upasak evan pujak ka sarvavidh kalyan evan mangal hota hai. bhadra martandadi granthon men sarvatobhadra mandal ki hi pramukhta hai jo sabhi devtaon ke lie upyog men ata hai. sarvatobhadra mandal devtaon ka dvar hai, islie ise devadvar ki sangya di gai hai. prachinkal se lekar aj tak ganesh yagya, lakshmi yagya, yadra yagya, surya yagya, grah shanti karm, putrareshti yagya, shatrunjay yagya, gayatri yagya, shrimadbhagavat mahayagya, chandi, navachandi, shatachandi, sahasra chandi, lakshachandi, ayut chandi, kotichandi adi yagyaon men bhadra mandal ka prayog pramukhta se karne ke piche sabhi ke kalyan ki bhavna chipi hui hai, isilie ise bhadra mandal kaha jata hai. sanatan sanskriti men janm se mrityuparyant shodash sanskar yagya se praranbh hote hain aur yagya se hi samapt. atah bina bhadra mandal ke yagya karm adhura hai. bharat bhumi men yagya ki bari mahima hai, islie ise shreshth karm kaha gaya hai- yagyaovai shreshthakarmah. praniyon ki utpatti ann se hoti hai aur ann samay par vrishti hone se utpann hota hai. samyik vrishti yagya se hoti hai. yagyakarm, yajman aur acharya ke dvara dharmashastra vihit karmakand karne se hota hai aur bhadramandladi devta iske pradhan adhar hanai. bhadramandal ka upyog yagya karm men devta vishesh ki puja ke sath yajman ke kalyan hetu kiya jata hai.