bachche sukhi grihasth jivan ki majbut ninv ki tarah hote hain. vivah ke pashchat pati-patni ka rishta bachche ke janm ke bad aur ghanishth ho jata hai. apni santan ki chah sabhi ko hoti hai. pahle jamane men mata-pita putra ki abhilasha adhik rakhte the par aj ke yug men putra aur putri har tarah se saman karya kar sakne men saksham hain, mata-pita bas ek svasth santan ki kamna karte hain.
har vyakti yahi chahta hai ki chahe putra ho ya putri vah svasth, sundar v buddhiman ho kyonki yah santan yadi viklang ho ya fir mansik rup se kamjor ho to mata-pita apne dil ke tukre ke duahkh ko sahan nahin kar pate aur ve uske svasthya ke lie sab kuch lutane ko taiyar rahte hain.
unki jindgi uske duahkh-dard ko dur karne v uske lie khushi jutane ke prayas men simat ke rah jati hai... gitika bachapan se bahut chulbuli, natakhat aur batuni hai use bachchon ke sath khelna, ghumna v batiyana bahut pasand tha. kalej ki parhai khatm hote hi uske mata-pita ne uska vivah dhiren se kar diya. atyant akarshak dhiren ek bahurashtriya kanpni men uchch pad par karyarat tha.
gitika aur dhiren vivah ke bad bahut khush the. ek do varsh to ghumne firne men nikal gaye. gitika ke sas sasur v uski mammi ab apne nati ka intjar karne lage the. gitika aur dhiren ne bhi apne dayitva ko samjhte hue apne parivar ko pura karne ka faisla kiya aur gitika shighra hi garbhavati ho gai. dhiren ne shahar ki sabse achchi daektar se uska ilaj karaya aur nau mahine bad unke yahan ek atyant pyari si guriya aina ne janm liya. pure ghar men khushi ki lahar daur gai.
aina ko dekh kar uske dada, dadi v nana-nani bar-bar uski najar utarte aur use god men khilate. dhire-dhire aina bari hone lagi. aina lagabhag sat ath mahine ki ho gai thi par gitika ko uski ek bat khatkti thi ki vah bulane par javab nahin deti thi. n hi usne kabhi karavat lene ki koshish ki. uske barabar ke bachche to ghutnon ke bal bhi chalne lagte the.
vah aina ke sath sara din lagi rahti uski achchi tarah se malish karti. uske khane ka pura khyal rakhti taki usko kisi tarah ki kami n rahe. uska daektar barabar yahi kahta tha ki kuch din men yah sab karegi lekin aina men koi fark nahin aya. ab to uski mammi v rishtedaron ne bhi kahna shuru kar diya ki are yah to abhi tak nahin baithti, falane ka bachcha to chalne bhi laga. ek din aina ne rona shuru kiya to rukne ka nam hi nahin liya vah karib do ghnate tak roti rahi.
use uske daektar ke pas turant le gaye par daktar ko kuch samajh men nahin aya usne dilli ke sabse varishth daektar ke pas bhej diya. jab unhonen aina ko dikhaya to unhonne bahut janch ki aur aina ki riport ko yu. es. bhi bheja. dhire-dhire samay bitta raha par aina ki samasya jyon ki tyon hi bani rahi. puri janch hone ke bad daektar ne bataya ki uski rirh ki haddi men kuch samasya hai jiske karan vah baith nahin pa rahi hai.
usko ilaj ke lie fijiyothairepist ke pas le jane ki salah di gai. gitika use kitne hi fijiyothairepist ke pas lekar gai aur ghar men bhi usko sikhane aur etend karne ke lie roj ek nars rakhi. dhire-dhire aina ne khiskna aur thora pratikriya dena sikh liya lekin khare hokar chalna uske lie sanbhav nahin tha.
gitika v dhiren ke lie yah bahut bara sadma tha. aj sab kuch hote hue bhi unhen lagta tha ki jaise kuch bhi nahin hai. unhonne logon ke savalon se bachne ke lie kahin ana-jana bhi kam kar diya. aj aina lagabhag panch varsh ki ho gai hai lanbai men apne papa par gai hai. apni umra ke bachchon se jyada hi lanbi hai. vah spasht rup se bol nahin sakti n hi khud kha sakti hai. sab kuch likvid faerm men hi pilana parta hai par bhavnaon ko vah khub samjhti hai.
gussa dikhana, pyar dikhana, nakhre dikhana use khub ata hai. gitika uski har bat isharon men bhi samajh leti hai. dhiren ki to vah jan hai. sham ko dhiren ko afis se ane men jara si der ho jae to aina ro rokar asman sir par utha leti hai aur dhiren ke ate hi uska chehra khil jata hai. dhiren aur gitika aina ko ek guriya ki tarah rakhte hain aur ji jan se uski seva kar rahe hain.
kitni bar uski mammi v sas ne dusre bachche ki bat ki par gitika nahin chahti ki aina ko jara sa bhi najrandaj kare. use lagta hai ki shayad dusre bachche ke ane ki taiyari se hi kahin aina ki timardari men koi kami kar degi to apne ko kabhi maf nahin karegi.
pahle to gitika ke man men aur bachchon ko khelte hue, daurte hue dekhakar ek tis si hoti thi aur vah yahi sochti thi ki bhagvan ne mere sath aisa kyon kiya par ab aina unki ek khubsurat chahat v adat ban gai hai aur use vah apne se bhi jyada pyar karti hai. use bhagvan se bhi koi shikayat nahin. vah yahi prarthana karti hai ki bhagvan use itni shakti de aur vah uski itni seva kare ki bas apne ko sanbhalne layak ho jae.
gitika, dhiren aur aina tinon apne parivar men behad khush hain aur yahi dua karte hain ki ishvar bhi unki aina par mehrban ho jae. gitika ko pura vishvas hai ki aina par bhagvan ki kripa avashya hogi aur vah der se hi sahi par jald hi atmanirbhar ho jaegi. aiye karen aina, gitika aur dhiren ki kundliyon ka avlokan aina ki kundli men janm ke samay budh ki mahadsha chal rahi thi.
budh pancham bhav, kanya rashi arthat mul trikon v uchch rashi men ketu, surya aur ashtamesh guru ke sath sthit hai tatha rahu, chandra aur shani se purn drishti men hai. budh apni uchch rashi men hote hue purn ast avastha men hai. kal purush ki kundli men kanya rashi chathe bhav ko darshati hai jiska svami budh aina ki kundli men atyant kamjor hai.
kanya rashi aur budh, kamar aur rirh ki haddi se sanbandh rakhte hain. kanya rashi aur ast budh par bahut se grahon ka prabhav hone se rirh ki haddi behad sanvednshil ho gai hai. iske alava lagnesh shukra bhi rog sthan men mangal se drisht hokar baithe hain. arthat budh aur shukra donon par pap grahon ki purn drishti se aina bachapan se rirh ki haddi ke rog se pirit hai.
chalit kundli men akarak grah guru evan ketu shukra ke sath rog sthan men baithe hain. varsh 2010 aur 2011 men shani aur guru ka kanya rashi v budh par gochriya prabhav rirh ki haddi ke ilaj men kuch asha ki kiran utpann kar sakta hai. yahan par budh dvitiyesh hokar vani v vidya ka karak bhi hai. lekin purn ast aur pap grahon ke prabhav ke karan aina ki vani bhi spasht nahin hai. man ka karak chandrama rahu ke sath grahan dosh men pirit hai.
mangal aur shani ki paraspar drishti se atyadhik vyay bhi ho raha hai. is kundli men shadabal men budh, surya, guru v shani sabhi grah kamjor sthiti men hain. koi bhi grah manovanchit labh dene men asamarth dikhai de raha hai. aina ki kundli ke anusar budh ki dasha navanbar 2012 ko khatm ho rahi hai. iske bad ketu ki dasha men shukra ki antardasha men kuch sudhar sanbhav lagta hai. 2018 ke bad shukra ki dasha men aina ke svasthya men sudhar ki sanbhavna dikhati hai.
ham gitika ki kundli par najar dalte hain gitika ki kundli men kai rajyog hain jaise lagnesh aur bhagyesh ka parivartan yog, panchmesh v lagnesh ki bhagya sthan men yuti. pancham bhav (santan) par lagnesh guru ki purn drishti hai. chandra lagn se panchmesh shukra saptamesh chandra ke sath lagn men baithe hain jo shubh nahin hai kyonki lagn kundli ka ashtamesh chandrama shashthesh v ekadshesh shukra ke sath dhan sthan men pap kartari dosh se pirit hai aur guru, mangal rahu bhi chandra kundli se ashtam men v kalasarp dosh se pirit hai.
jatika ki janmapatri men panchmesh v pancham ke karak guru donon hi is kalasarp yog se grasit ho rahe hain. dhiren ki janmapatri men panchmesh papakartari men hai. pancham ke karak ki sthiti bhi shubh nahin hai. yahan pancham bhav se navam bhav ka svami shani arthat santan ka bhagyesh lagn kundli ke ashtam bhav men balya avastha men 00 men sthit hai arthat dhiren ki kundli se bhi santan sukh men badha hai. dhiren v gitika in donon ki janmapatriyon men kalasarp yog karak rahu santan bhav par drishti dal raha hai tatha pancham se pancham men sthit hai.
gitika aur dhiren ne bhagvan ke puja-path men bhi koi kasar nahin chori. ve apni santan ke svasth jivan ke lie nirantar bhagvan ki aradhna men lage rahte hain. kalasarp yog ki shanti hetu bhagvan shiv ki upasna karne se bhi shubhafal ki prapti avashya hogi aur guruvar ka vrat v dan bhi shubh hoga. pathkon se anurodh hain ki ve apne vichar is kundli ke vishay men hamen preshit karen aur unke sujhav bhi sadar amantrit hain.