pratham adhyay (46 shlok): dhritrashtra ne sanjay se pucha ki dharmabhumi svarup kurukshetra men mere putron aur pandu putron ne ekatra hokar kya kiya? sanjay ne yuddhakshetra ke drishya ka varnan karte hue kaha ki duryodhan, guru dronacharya ko apni advitiya vyuh rachna, virat sena, shurviron, mahadhanardhariyon aur astron-shastron adi ke bare men bata rahe hain. ve kah rahe hain ki unke paksh men svayan dronacharya, ajey bhishm pitamah aur mahan dhanurdhari karn bhi hain. vijay se purn ashvast hote hue unhonne guru dronacharya ko kaha ki pratipaksh men bhim ka sainyabal bhi paryapt hai. tabhi yuddh ki ghoshna karte hue sabhi yoddhaon ne shankh dhvani se akash aur prithvi ko pratidhvanit kar diya. pandvon ki or se, shrikrishn dvara sanchalit shvet ghoron se yukt rath par baithe arjun ne kaurvon ki sena men jaise hi apne pitamhon, acharyon evan anya parivarjnon ko dekha to yuddh ke parinam ki kalpana matra se hi uska sharir kanpne laga aur uska man vishad men dub gaya.
man ki is dayniya avastha men usne ban sahit apne gandiv dhanush ka parityag karke yuddh n karne ka nishchay kar liya. dvitiya adhyay (72 shlok) ah vishadagrast aur man ki bhramit avastha men arjun ne svayan ko shrikrishn ke sharnagat karte hue unse sahi shiksha dene ka nivedan kiya. shrikrishn, donon senaon ke madhya, shokatur arjun ko mano hanste hue samjhate hain ki buddhiman vyakti ko n to pranhin vastu aur n hi pranvan vyakti ke lie shok karna chahie kyonki atma ajanma, nitya, shashvat aur prachin hone par bhi nitya navin hai. sharir ka kshay hone ke pashchat atma navin sharir ko dharan karti hai isilie buddhi man vyakti ko bina kisi asakti ke apne katrtavyon ka palan karna chahie. manushya ka adhikar keval karm karna matra hai aur fal par uska koi adhikar nahin hai. n to manushya ko svayan ko karm ka katrta manna chahiye aur n hi karm n karne ke lie asakt hona chahiye. tumhara kshatriya dharm yuddh karna hai isilie utho aur yuddh karo. tritiya adhyay (43 shlok): gyaniyon aur yogiyon ke antar ko spasht karte hue shrikrishn kahte hain ki fal ki ichcha ke bina kiye gae karmon ko ‘karmayog’ kahte hain. vishy-bhog ki kamna ke sath kiye gae karmon se keval vishy-sukh hi prapt ho sakta hai. karmayog bandhan men nahin bandhta aur yagya ke saman hota hai isilie vah nishchit hi shreyaskar hai.
chaturth adhyay (43 shlok): shrikrishn ne punarjanm ke siddhant ko samjhaya hai aur apne ajanme, avinashi evan samast jivon ke ishvar hone ke svarup ka parichay dete hue kaha ki ve adharm ke vinash aur dharm ki sansthapna ke lie yug-yug men prakat hote hain. sampurn srishti ka katrta hone ke bavjud bhi karmon men lipt n hone ke karan ve karmon ke katrta nahin bante. isilie karmon ke bhed ko samjho aur tatva gyan ko jano jisse janma-bandhan se mukt ho sako. pancham adhyay (29 shlok): karm karne ke prakaron par prakash dalte hue shrikrishn kahte hain ki karmasannyas aur karmayog donon hi sahi hain parantu unmen se karmayog shreyaskar hai. karmayog rahit karmasannyas dukhdayi hai aur nishkam karmayogi gyan prapt karke shighra hi brahm ko prapt hote hain. is tathya ko bhi samjhaya hai ki atma aur sharir alg-alag hain. karm ki utpatti manushya ki kamna se hoti hai aur karm hamare sharir dvara kiya jata hai n ki atma dvara.
vishy-bhog hi samast dukhon ka karan hai jiska koi adi aur ant nahin hai. gyani log vishyon men asakt nahin hote aur nirantar brahm men avasthit rahte hue moksh prapt karte hain. shashtham adhyay (47 shlok): shrikrishn ne matra daihik karm ka tyag karne valon ki apeksha un manushyon ko sannyasi aur yogi kaha hai jo karmafal ki ichcha ke bina karm karte hain. taduprant, jo man aur indriyon ko vash men karke shrikrishn svarup men hi dhyan lagate hain, ve sarvashreshth yogi hain. arjun ne kaha ki man to chanchal hai use vash men karna to vayu ko vash men karne ke saman kathin hai to shrikrishn samjhate hain ki man mitra bhi hai aur shatru bhi.
abhyas aur vairagya dvara vah mitra hokar vash men ho jata hai. saptam adhyay (30 shlok): shrikrishn ne arjun ko bataya ki unki do prakriti hain, ek bahya jiske ath bhag (bhumi, jal, pavan, agni, akash, man, buddhi aur ahankar) hain aur dusri jiv-svarup. shrikrishn ne kaha ki samast jiv evan vastu meri inhin donon prakritiyon se utpann hue hain aur main svayan hi jagat ka srijanakarta evan sanharak hun. karan bhi main hun aur sar bhi main hi hun. ek dhage men maniyon ki tarah hi sampurn jagat mujhmen piroya hua jano. satvik, rajsik aur tamsik gunon se hi sampurn jagat mohit hai parantu mera ashray grahan karke, is maya rupi bhavsagar ko par kiya ja sakta hai. ashtam adhyay (28 shlok): shrikrishn ne brahm, adhyatm, karm, adhidev, adhibhut adi ka arth samjhaya aur kaha ki jo mrityu ke samay bhi mujhmen rah pata hai use param gati prapt hoti hai kyonki jo manushya ki ant kal men manah sthiti hoti hai vahi use prapt hota hai. jo nirantar mujhe hi smaran karte rahte hain unke lie main sulabh hun.
shrikrishn punah arjun ko kahte hain ki man aur buddhi ko param tatva ko samarpit karte hue utho aur yuddh karo. navam adhyay (34 shlok): shrikrishn kahte hain ki sampurn jagat mujhmen samaya hua hai kintu main unmen avasthit nahin hun. jis prakar vayu sadaiv akash men sthit rahti hai usi prakar samast jiv-vastu mujhmen sthit hain. jo log yatharth mahatma hote hain ve ananya bhav se sadaiv mujhe bhajte hain aur unki dekhbhal main svayan hi karta hun. tum jo bhi karm karte ho, bhojan karte ho, dan karte ho, tap adi karte ho, sab kuch mujhe samarpan karo. arthat, deh aur chitt ko mujhmen hi rakho to mujhe hi prapt hoge. dasham adhyay (42 shlok): shrikrishn ne arjun ko sakha aur bhakt hone ke karan apne avarnaniya rup, anant svarup, vibhutiyon aur aishvarya ke bare men sankshep men bataya aur kaha ki sampurn char-achar jagat evan unke sabhi gun adi ki utpatti, sthiti aur pralay ka karan ve svayan hi hain aur unhonne bina parishram ke apne ekansh men sampurn jagat ko dharan kiya hua hai.
ekadash adhyay (55 shlok): arjun ne shrikrishn ke is aishvaryamay rup ko dekhne ki ichcha ki to shrikrishn ne arjun ko divya netra pradan kiye kyonki prakritik netron se unka divya rup dekh pana asanbhav tha. divya netron se arjun ne us virat rup ko dekha jiska koi adi, madhya aur ant nahin tha aur usmen sampurn jiv, vastu, dishaen, lok adi samaye hue the. arjun ne usmen bhut, vartaman evan bhavishya sabhi kuch dekha. yah sab dekh kar arjun atyant romanchit evan vismit hokar natamastak ho gaya. shrikrishn ne kaha ki main lokon ka sanhar karne ke lie abhi pravritt hua hun aur pratipaksh men jo yoddh a hain vah tumhare dvara hat hue bina bhi jivit nahin rahenge. atah tum nimitt matra ban jao aur yuddh karo. yah kahakar shrikrishn punah apne manohar purush rup men a gae aur arjun se kaha ki tumne jis rup men mujhe abhi dekha tha, is rup men main n to ved, n tapasya, n dan aur n hi yagya ke dvara darshaniya hun. dvadash adhyay (20-shlok): shrikrishn ne kaha ki jo log samast karm meri prapti ke lie karte hain, mujhe hi arpit karte hue karte hain aur mujhe hi bhajte hain unko main sansar-sagar se par kar deta hun.
agar tum chitt ko sthir karne men asamarth ho to abhyas yog dvara prayas karo, usmen bhi asamarth ho to mere shravn-kirtan adi se siddhi prapt karo, usmen bhi asaksham ho to sanyat chitt se samast karmon ke fal ka tyag karo. mujhmen man aur buddhi arpan karne vale aur udasin bhav se rahne vale bhakt mujhe priya hain. trayodash adhyay (35-shlok): shrikrishn ne arjun ko bataya ki karmon ka kshetra yah sharir hai aur jo ise janta hai vah kshetragya hai. samast kshetron ka kshetragya shri krishn svayan hi hain. shrikrishn ne kshetra ke vikaron ke bare men sankshep men batate hue kaha hai ki kshetra aur kshetragya ke antar ko janna hi gyan hai. isko janne ke pashchat vishay men lipt n hona aur sambhav se rahna bhi gyan hai. jo is pranali se jiv-tatva aur parm-tatva ko samajh jate hain ve punarjanm prapt nahin karte. chaturdash adhyay (32 shlok): shrikrishn ne arjun ko samjhaya ki satvik, rajsik aur tamsik gunon se hi sansar ka vistar hota hai.
jo vyakti inse bandh jate hain ve karm bandhan rupi chakra men fanse rahte hain. satvik gun gyan evan sukh se, rajsik gun ichchaon evan apekshaon se aur tamsik gun bhog evan alasya se bandhte hain. uske viprit bhakti yog men sanlagn manushya in trigunon ko par kar moksh ko prapt hota hai. pa×chadash adhyay (20 shlok)ah shrikrishn ne kaha hai ki sansar ashvatth vriksh ke saman hai parantu jaren upar aur shakhaen niche ki or hain. shakhaen nimn (manushya, pashu adi) aur uchch yoniyon (devta adi) ka pratinidhitva kar rahi hain. bhog-vasna rupi jataen niche ki or viksit hoti rahti hain aur prakri tijanya gunon dvara poshit hain. manushya isse pare hat kar hi adhyatmik rup se tatva gyan ko pa sakta hai anyatha, jiv ek sharir se dusre sharir men apne-apne karmon ke anurup vibhinn yoniyon men vicharan karte rahte hain. shrikrishn kahte hain ki main hi kshar se atit aur akshar se shreshth hokar purushottam hun. jo log, moh shunya hokar mera bhajan karte hain ve sarvavid hokar sansar ko anayas hi par kar jate hain.
shodash adhyay (24-shlok): shrikrishn ne daivi aur asuri prakriti ka prithk-prithak varnan kiya hai aur kaha hai ki kam, krodh evan moh asuri prakriti hain aur ye narak ke dvar hain. daivi prakriti ka ashray lene par manushya moksh ki or agrasar hota hai aur asuri prakriti ka ashray lene par bhagvan ka dveshi banta hai. saptadash adhyay (28 shlok): shrikrishn ne tin prakar ki shraddha kahi hai - satvik, rajsik aur tamsik. vyakti, kis tatva ke prati shraddhalu hota hai yah use purva-sanskar se, manushya sang se aur svabhav se prapt hota hai. manushya kis prakriti ke adhin hai yah uske bhojan, yagya, tapasya aur dan se pratibinbit ho jata hai. yagya, tap, dan adi karm shastra sammat vidhi dvara hi karne chahie. un ke uchcharan se yagya, tap, dan adi anushthit hote hain, tat ke uchcharan se fal ki kamna ka tyag hota hai aur sat ka uchcharan brahm men sthit hone ke lie hota hai.
ashtadash adhyay (78 shlok): is adhyay men gita ka upsanhar hai. shrikrishn, arambh men karmayog ka sar kahte hue tyag (karmon ke fal ko tyagne vale) aur sannyas ka antar spasht karte hain. ve kahte hain ki chitt ko shuddh karne vale yagya, dan aur tapasya adi manushya ke katrtavya karm hain. parantu, inhen katrtapan ke abhiman aur fal ki ichcha ke bina karna manushya ka kartavya hai. shrikrishn ne karmon ki siddhi ke liye panch karan kahe hain jinmen pratham char hain: deh, katrta, indriyan aur vividh cheshtaen. shrikrishn kahte hain ki pancham karan main svayan hi hun aur meri marji ke bina kuch bhi sanbhav nahin hai. jo vyakti karmayog se purnatah sanymit hai unhen apne man aur indriyon ko niyantrit karte hue vyavhar karna hoga jisse use moksh ki prapti ho sake. shrikrishn kahte hain ki mujhe apne bhakt priya hain, main unki raksha karta hun, unhen apne dham ane men unki madad karta hun.
atah sadaiv mere vishay men socho aur meri bhakti men sanlagn raho jisse tum mujhe hi prapt ho. shrikrishn ne arjun ko, purvokt kahe gae ki apeksha, atyant gopniya vakya ka punah shravan karne ko kaha, tum mere priya ho isilie main tumhen kahta hun ki tum mujhe apna chitt samarpan karo aur mere parayan hokar meri bhakti karo isse tum mujhe hi prapt karoge. is prakar, prabhu kripa prapt karke arjun ne shrikrishn se kaha ki ab mera moh nishchit rup se nasht ho gaya hai aur mainne atmasmriti prapt ki hai.
atah ab main apki agya ka palan karunga. ant men, sanjay ne param vismit, harshit aur romanchit hote hue dhritrashtra se kaha ki use guru kripa se sakshat shrikrishn ko sunne ka avasar mila aur ab uska yah nishchit mat hai ki jahan yogeshvar krishn hain, dhanurdhari arjun hain, vahin shri, vijay, aishvarya-vriddhi aur nyay-paraynta hai.