sankranti vrat pan. brajkishor sharma brajvasi bhartiya sanskriti men pratidin koi n koi vrat-parva hota hi hai, parantu sankranti vrat ka apna ek vidgosh mahatva hai. varsh men mesh, vrish ke kram se ane vali pratyek sankranti men kalyan chahne vale stri-purushon ko nishchay hi sankranti vrat ka palan karna chahie. sankranti ka abhipray bhagvan surya narayan ke ek rashi se dusri rashi men pravesh ke samay se hai. us pravesh-samay ko sankranti kaha jata hai tatha jis rashi men bhagvan surya dev ka pravesh hota hai use usi rashi vali sankranti ka nam diya jata hai, jaise jyeshth mas men surya vrish rashi se mithun rashi men pravesh kar rahe hain to yah sankranti mithun sankranti ke nam se prasiddh hai. is prakar pratyek sankranti ka namollekh hai.
is sankraman samay par puja, path, danadi ka vishesh mahatva shastron men varnit hai. danadi ke lie punyakal bhi niche di gayi sarini ke anusar nishchit hai. vishesh : uprokt kathan kamlakar bhatt sangrahit shlonko ka bhav hai. vishesh men bataya gaya hai ki uprokt ke alava yadi sankranti (sayankal) suryast ke jitne samay pahle ho utna hi pahle (purva) ghari tak punyakal hota hai. jis sankranti ka punyakal pahle (purva) ho vah yadi suryoday ke samay ho to utni ghari punyakal bad men hota hai. ratrikal men sankranti janit punya ka nishedh kaha hai. yadi adhi rat ke purva sankranti ho to pahle roj ke do prahar (do yam) men punyakal hota hai. yadi adhi ratri ke madhya men (par) sankranti ho to bad vale din ke pahle do prahar men punya kal hota hai. isi prakar kark sankranti tatha min sankranti men janna chahie. yah hemadri aur aprark ne kaha hai. yadi min sankranti pradosh samay men ya adhi rat ke samay ho to dusre din men punyakal hota hai. yadi kark sankranti pratah kal men ya adhi rat men ho to purva din men punyakal hota hai- yah madhvacharya ka mat hai.
parantu sabhi vidvanon ne sankranti ke purva aur bad men solh-solah ghari punyakal samanya riti se bataya hai. sankranti vrat men pratahkal snanadi se nivritt hokar chauki par navin vastra bichakar akshaton se ashtadal kamal banakar usmen bhagvan bhuvan bhaskar ki murti sthapit karke ganesh-gauryadi devtaon ka pujan karke surya narayan bhagvan ka shodshopchar pujan,svastivachan, sankalpadi krityon ke sath punyahvachan karna chahie. svayan n kar saken to vidvan brahmanon ke sanidhya men sanpann karen. aisa karne se sanpurn patkon ka nash ho jata hai. sukh-sanpatti, arogya, bal, tej, gyanadi ki prapti hoti hai. man-samman, pratishtha, kirti men vriddhi hoti hai. shatruon ka man-mardan hota hai. vani ki prakhrta v ayushya labh hota hai. yadi kisi mah ki sankranti shukla paksh ki saptami aur ravivar ko ho to use 'mahajya sankranti' kahte hain.
us din upvas, jap, tap, devpuja, pitri-tarpan tatha brahmanon ko bhojan karane se ashvamedh yagya ke saman fal prapt hota hai. vrati ko svarg lok ki prapti hoti hai. pratyek sankranti men vrati jagaran karne par svarg ko jata hai. jab sankranti amavasya tithi men ho to shiv aur surya ka pujan karne se svarg ki prapti hoti hai. uttarayan sanbandhi makar sankranti men pratahkal snan karke bhagvan shri keshav ki archana karni chahie. udyapan men battis pal svarn ka dan dekar vah sanpurn papon se mukt ho jata hai. dakshinayan aur uttarayan men tatha mesh aur tula sankranti men jo prani tin rat upvas tatha snanakar shri surya ka pujan karta hai, uske sanpurn manorath purn ho jate hain. vriddh vashishth ne kaha hai ki ayan ki sankrantiyon men upvas tatha snan karne matra se vrati prani sanpurn papon se chutkara pa leta hai.
surya ki sankranti men shraddh karna prashast hai. vrish, sinh, vrishchik aur kunbh sankranti ko vishnupad, kanya, min, dhanu aur mithun sankranti ko 'shadshityayn', tula aur mesh ki sankranti ko 'vishuv' tatha makar sankranti ko 'uttarayn' evan kark sankranti ko 'dakshinayn' kaha jata hai. sankranti vrat men vrati purush ko aditya hriday stotra, suryashtakam, surya pratah smaran stotram, surya mangal stotram, surya janmadi katha evan surya mantra adi ka path v jap avashya karna chahie. sankranti ke svami ke mantron ka jap v puja bhi sankranti anusar abhisht fal ko dene vali hai.
sankranti men ki gayi surya puja se anisht, ast, vakri, papi v nich surya ka dosh bhi shant ho jata hai. sankranti vrat men bhagvan vishnu v unke avtaron ka chintn-mann- shravn-darshan bhi abhisht fal pradata hai. sankranti vrat ka niyamanusar barah varshon tak palan karne vala vyakti nishchay hi vilakshan pratibha v ihlaukik sukhon ka labh prapt karta hua parlaukik sukhon ka bhi labh prapt karta hai. prativarsh v pratimas ki sankranti par udyapan karane vala vrati vrat ka sanpurn fal usi prakar prapt kar leta hai jis prakar kisan ritu anusar fasal ka labh prapt karta rahta hai. sankranti vrat pratyek varn, jati ke stri-purush, bal-vriddh sabhi ke lie labhkari hai atah avashya hi karna chahie. surya stuti v surya arti tatha kshamayachnadi karyon ko purn kar anand se paripurn ho sanymit vicharon ke sath bhagavat stavan men hi din v jagaran ke sath ratri ko vyatit karen.