akshaya janmapatriyan brahmana nirmita svayam. grah rekhaprada yasyan yavavajjivan vyavasthita.. arthat manushya ka hath aisi janmapatri hai jo kabhi nasht nahin hoti. svayan brahma ji ne ise banaya hai. nasti hastatparan gyanan trelokye sachrachre. yadabrahma pustakan haste dhrit bodhay janminay.. tinon lokon men hast gyan sabse barhakar hai. iski rachna svayan brahma ji ne ki hai. vastav men yah manushya ka margadarshan karti rahegi. bhartiya jyotish vigyan ke antargat ang lakshan vigyan ka adhyayan kiya jata hai aur manushya ki sharirik sanrchna evan gun-avgun ka kathan kiya jata hai. samudrik shastra men bhi lakshan shastra ki tarah chalne, uthne-baithne aur ang par til, masson ko dekhakar vyakti ke vicharon ka gyat kiya jata hai. manushya ke samast angon ki bajay keval hath se hi gun, dharm, svabhav aur bhagya ko janne-samjhne ki taknik ko apnaya ja raha hai. isi taknik ko hastarekha vigyan ka nam diya. sanjivni rekha: jivan rekha ek mahatvapurn rekha hai. jivan rekha se jivan pravah dekha jata hai. yah lanbi, tang v gahri honi chahie. jivan rekha anguthe aur tarjani ke bich se aranbh hoti hai aur golai lie hue shukra kshetra ko gherti hui manibandh ya uske samip tak ati hai. ise gurur puran men kul rekha bhi kahte hain. kul rekha tu prathma angushthadnuvartate. bhartiya mat ke anusar jivan rekha ko bahut namon se jana jata hai:-
1. pitri rekha,
2. gotra rekha,
3. bal rekha,
4. mul rekha,
5. vriksh rekha,
6. dharm rekha,
7. dhriti rekha isi jivan rekha ko pashchatya mat ke anusar spami spadam athva tapjans spadam kahte hain.
pratyek hath men iski lanbai kam ya jyada ho sakti hai. kisi ke hath men yah rekha sidhi age ko barhti hai jisse iska shukra kshetra chota ho jata hai. ek achche pamist ko yah sab dhyan men rakhna chahie. ise hamne sanjivni rekha ka nam diya hai. prakriti ne jis prakar hamare chehre par nak, kan ke sthan nirdisht kie hain usi prakar hath men jivan rekha, shirsh rekha tatha anya chinhon ke sthan bhi nirdisht kie hain. islie agar koi rekha apne prakritik sthan se hatakar asadharan sthiti ko grahan kar le to asadharan parinamon ki asha karna yuktisangat hoga. agar manushya ke svabhavik gunon men is prakar parivartanon ka prabhav par sakta hai to uske svasthya par kyon nahin parega. hast vigyan ya samudrik vigyan rekhaon dvara rog aur mrityu ke sanbandh men bhavishyavani kar sakta hai. is bat ko ham sabhi svikar karte hain ki pratyek manushya ke sharir men kitanu snayuon ke talmel ko dushit karte hain. uska prabhav snayu ke madhyam se hath par parta hai. is rekha par jivan ki avdhi, rog aur mrityu ankit hoti hai aur anya jin ghatnaon ka purvabhas karati hain unki pushti jivan rekha karti hai. sanjivni rekha kaisi honi chahie jivan rekha lanbi, tang v gahri honi chahie, chairi kadapi nahin honi chahie. yah bhi dekha jata hai ki prayah komal hath vale vyakti rog adi se larne ki kam kshamata rakhte hain.
thulthul hath vale kuch aramatalab hote hain jabki gathile hath vale shaktishali hote hain. sanjivni rekha ke gun-dosh jivan rekha men kuch achchai hoti hai aur kahin kharab hone se usmen dosh a jata hai. islie jivan rekha ke gun-doshon ka sanbandh samjhna avashyak hai.
1. gahri aur achchi jivan rekha pranashakti aur takat ko barhati hai.
2. chairi aur halki jivan rekha men uprokt donon gunon ka hi abhav hota hai. jivan rekha ke chairi v halki hone par jatak sharirik rup se itna shaktishali nahin hota hai ki usmen uprokt gun paryapt matra men vidyaman hon aur jab jivan pravah durbal hota hai to bauddhik vikas bhi purn nahin ho sakta.
3. balvan gahri aur spasht jivan rekha achchi hoti hai. ismen achchi pranashakti v takat hoti hai kintu aise hath men yadi shukra parvat bahut unnat ho to jatak atyadhik kam vasna men lipt rahakar apna jivan nasht kar dete hain. balvan jivan rekha se achchi pachan shakti bhi prapt hoti hai kintu anguliyon ke tisre por mote v lanbe hon to use raktachap ki shikayat rahti hai.
4. yadi kisi ki hatheli ka rang gulabi ho aur brihaspati ki anguli ka tisra por majbut ho to vah bahut jyada khane-pine ka shaukin hota hai. vah mirgi ke rog ka shikar bhi ho sakta hai. parantu uska upri mangal kshetra bahut unnat ho tab aisa hota hai.
5. tang aur patli jivan rekha se bhi jivan pravah shakti samanya se kam prakat hoti hai. aise vyakti sharirik parishram nahin kar sakte. unmen dhairya ki kami hoti hai. ye jaldi bimar ho jate hain aur sust bhi rahte hain.
6. kabhi-kabhi jivan rekha choti-choti rekhaon men banti hoti hai tab bhi jivan pravah ki kami prakat hoti hai. yah jatak men samanya durbalata, gira hua svasthya aur snayvik kamjori prakat karti hai. aisi rekha vala vyakti udas hota hai.
7. shrrinkhlakar jivan rekha bhi doshpurn mani jati hai. rekha men jahan bhi shrrinkhla hogi jatak us samay bimar hoga. jo vyakti bachapan men jyada bimar rahta hai uski jivan rekha aranbh men kisi anya rekha ki tarah ya shrrinkhlabaddh ya doshpurn hoti hai. yadi jivan rekha kuch duri tak hi shrrinkhlabaddh hai aur age achchi v doshrhit hai to jatak usi avdhi tak asvasth rahta hai jahan tak rekha shrrinkhlabaddh hai.
8. yadi yah rekha shrrinkhlabaddh hi nahin apitu chairi v halki bhi ho to aur bhi kharab hoti hai kyonki aisi jagah do hanikarak karan ekatrit hote hain.
9. sirhinuma rekha - yah rekha chote-chote khandon ke rup men hoti hai. jivan rekha ka aranbh: jivan rekha sadharntya brihaspati parvat ke niche se shuru hokar shukra parvat ko gherti hui manibandh ya uske samip tak jati hai. agar rekha brihaspati parvat se aranbh ho to isse abhiman v mahatvakanksha prakat hoti hai. jivan rekha ka sanbandh shirsh rekha aur hriday rekha se yadi jivan rekha shirsh rekha se juri ho to iska tatparya yah hai ki jatak kafi buddhiman hoga aur tark v karan sahit nishkarsh nikalta hai. lekin vyakti ko bhavuk bhi banata hai.
ismen svatantra vichar ki kami ho sakti hai. jivan rekha se vansh vriddhi: jivan rekha ko bhartiya mat ke anusar gotra rekha ya kul rekha kahte hain. donon ka arth hai vansh vriddhi. iska arth hua ki jiski jivan rekha sundar aur balvan hogi tatha jivan rekha se ghira hua bhag gunyukt hoga usi ke kul ki vriddhi hogi. putra, pautra, prapautra adi ki vriddhi bhi isi se dekhi jati hai. agar santan svasth hoti hai to kul ya gotra ki vriddhi sanbhav hai. islie bhartiya maharshiyon ne kul vriddhi ya gotra vriddhi ka arth keval putra tak hi simit nahin rakha hai. yadi kisi ko nirbal avastha men nirbal putra ho gaya aur age uski vansh vriddhi nahin hui to gotra vriddhi nahin mani jaegi. purushon tatha striyon donon ki santanotpadak shakti, shukra kshetra tatha jivan rekha par bahut adhik matra men avlanbit hai. isi karan angushth ke niche ke bhag par karprishth ki or nikli hui rekhaon se santan ka vichar kiya jata hai. bhavishya puran men likha hai: angushth mul rekhaah putraah syurdarikaah sukshma. prayog parijat men likha hai- mulangushthasya nrinan sthul rekha bhavint yavatyah. tadantah patraah sya sukshmabhiah patrikastabhi..
arthat anguthe ke mul men jo sthul rekhaen hon unhen putra rekha tatha jo sukshm rekhaen hon unhen kanya rekha samjhna chahie. striyon ke hath men bhi inhin rekhaon ko santan rekha mana jata hai. moti rekhaen hon utne putra aur jitni kati hui rekhaen hon utni kanya santanen hongi. jivan rekha ya ayu rekha dvara samay ka nirdharn: manushya ki ayu praman sau varsh hi varnit kiya gaya hai jo ki rishiyon dvara ved mantron men kiya gaya hai. kintu is vartaman yug men manushya ki ayu ka praman nirdharit nahin ho sakta hai kyonki ham yahi dekhte hain ki bachcha man ke pet se lekar 100 varsh ki avastha tak kisi samay bhi mrityu ko prapt ho sakta hai. islie shat pratishat thik bat to ishvar ke atirikt koi nahin janta hai. fir bhi shvason ki ginti ke anusar sundar, saf aur spasht jivan rekha ko dekhakar yah anuman lagaya ja sakta hai ki amuk vyakti varshon ki ganna ke anusar varshon ki amuk sankhya tak jivit rah sakta hai. fir bhi jin manushyon ki avastha 100 se adhik hoti hai unki ayu ya jivan rekha manibandh se kalai tak pahunch jati hai. fir choti ayu vale vyakti ki jivan rekha choti aur bari ayu ki jivan rekha bari hoti hai. adhunik aur prachin sabhi hast visheshagyaon men apni-apni ganna ke anusar is ayu vibhag ganit men kuch antar tatha matbhed avashya hi raha hai. dekhne men abhi tak yahi aya hai ki yurop nivasiyon se karib-karib sabhi ne saptavarshiya niyam ko apna hai aur bhartiya prachin ganrathon ne panchavarshiya niyam ko apnakar apna nirnay liya hai. rekhaon ke adhar par ghatnaon ka nishchit samay tay kiya ja sakta hai.
samay nirdharan mukhyatah jivan rekha ke adhar par kiya jata hai. kuch log shani rekha ka bhi prayog karte hain niche kuch ritiyan is prakar hain- manushsh ko yah manna hoga ki duahkhamay jivan se chutkara hamen ishvar hi de sakta hai usi par bharosa kare. agar koi duahkh hai to use svikar karke tan-man arpan karke ishvar se prarthana kare ki is kasht ko bhogne ki shakti de. ishvar achche sukh ke din layega vishvas kare. jo ishvar ke bhakt hain vah kahte hain- 1. bhagvan ne jo paristhiti di vah sadhan rup hai. vishvas karke use barto, fal mahan anup hai. 2. shviashin manushya ko sarvatra andha kup hai. vishvas se hi milte hari vishvas prabhu ka rup hai. atah manushya ko sukh ke lie nitya prayatn karte rahna chahie yahi jyotish shastra ke gyan ke uddeshya hain.