sammohan upchar  

tratak men pathkon ki ruchi dekhte huye is ank men tratak ki kuch pramukh v bahucharchit vidhiyon ke bare men kuch vistar se jankari di ja rahi hai. tratak se sanbhavit labh v haniyan tatha savdhaniyane ke bare men bhi kuch charcha ki gai hai taki is vishay par vyapak bhramak gyan ya agyan ko thik kiya ja sake. yah jankari matra samjhne hetu hai; praranbh karne se purva kisi jankar se madad avashya len. tratak purva taiyari tratak ek dhyan lagane ki kriya hai. atah tratak shuru karne se purva vo sabhi karya ya baten jo dhyan lagane men badhak ho sakti hain unse chutkara pa lijie jaise bhukh, pyas ityadi. atyant jaruri karya avashya pahle pura kar len taki bich-bich men udhar dhyan n bhage. ati avashyak karya vyakti dar vyakti bhinna-bhinn ho sakte hain atah karyon ki suchi banana sanbhav nahin hai. agar sharir men pasine se ya garmi se bechaini ho rahi ho to snan kar lena thik rahega ya hath, panv, munh thik se dhokar shant ho jana chahiye. har bar tratak se purva snan karna avashyak nahin hai. yah to matra safai aur svayan ko achcha mahsus hone ke liye maddgar hota hai. tratak karne ka samay tratak svayan dhyan men jane ka rasta hai atah samay ki bandish bahut mahatvapurn nahin hai. han kuch karyakal dhyan ke liye sahayak hote hain jaise rat ko sone se purva ya subah uthne ke bad. ye donon kal avchetan man ki avastha se jude hote hain tatha tratak jaisi kriyaon ka prabhav bahut shighra hota hai. kuch logon ka manna hai ki adhi rat ke bad ka samay uttam hai, koi kahta hai subah brahmamuhurt ka karyakal uttam hai. lekin is vishay par bandish nahin honi chahie. adhi rat ya uske bad ka samay isliye mahatvapurn kaha gaya hai kyonki us vakt vatavaran men vighn kam se kam hota hai. lekin agar ap nind se pareshan hain to us vakt tratak karne ka koi bhi fayda nahin hoga. isi prakar brahmamuhurt ka samay bhi vighn kam hone tatha prakritik rup se avchetan man ke karib hone ke karan achcha mante hain. yah achcha samay jarur hai lekin sayankal nind purva ka samay bhi itna hi ya isse kahin jyada mahatvapurn hai. us kal men agar nind pareshan kare to mahatva ghat jata hai. tratak ke samay ko tratak ki vidhi se jodakar dekhna chahie. agar koi vyakti ghane andhere ko dhyan ka kendra banata hai to vah andheri rat ya andhere kamre men hi kar sakta hai. taron par bhi tratak rat ke samay hi ho sakta hai. suraj par tratak subah din niklne ke vakt ho sakta hai. gahre pani ya nile akash par tratak din men hi ho sakta hai. atah tratak ka samay kya ho multah is bat par nirbhar karta hai ki tratak ki vidhi kaun si hai. kripa kar samay ki sima se apni manodsha n joden. tratak kaise karen kis sharirik avastha men tratak kiya jaye yah saval bhi bahut mahatvapurn hai. kuch vyakti kahte hain baithakar chaikdi marakar tratak karna chahiye tatha kuch kahte hain khade ho kar tatha kuch ka mat hai ki ardh let kar tratak karna chahiye. is prashn ka javab bhi vidhi se jyada juda hai. kuch vidhiyan hanai jo matra khade hokar ya matra baithakar ya matra letakar hi ki ja sakti hain jabki kuch vidhiyan kai prakar ke asnon men ki ja sakti hai. jaise chand ya taron ya gahre akash men dhyan letakar achchi tarah se lagaya ja sakta hai. bindu, shakti chakra, dipak, agarabatti ityadi par tratak baithakar ya khade ho kar kisi bhi rup men kiya ja sakta hai. chaya par tratak khade hokar hi kiya ja sakta hai. isi prakar apne pratibinb par bhi tratak multah khade hokar hi karna jyada asan hota hai. holografik chitra par tratak baithakar adhik sucharu rup se kiya ja sakta hai. isi prakar trikaladarshi shishe par tatha kristal bael par bhi tratak baithakar jyada aram se kiya ja sakta hai. in sabhi baton se aisa pratit hota hai ki tratak karne ka asan se koi vishesh sanbandh nahin hai. iska vishesh sanbandh arampurvak karne se jyada juda hai. jis asan men jo vidhi jyada aram de vahi apnayen. sath-sath is bat ka bhi dhyan rakhen ki apka svasthya kya kahta hai. kai log jyada samay tak baith nahin pate hain tatha kai log adhik samay tak khade nahin rah pate. atah apne sharir ko aram, sharir ki kshamata aur tratak ki vidhi ko dhyan men rakhakar hi tratak ko karne ka asan ap chunen. kisi bhi mithya bhram men pad kar apne ap ko kasht n pahunchayen. tratak ki vidhiyon ka prayog tratak ki anek vidhiyan kafi lanbe kal se vishva bhar men prachlit hain. inki sankhya atyadhik hai. kisi bhi vidhi ko achcha ya bura kahna sahi bat nahin hai. pichle ank men hamne kuch vidhiyon ki charcha ki thi jo ki matra unki jankari tak hi simit thi. kuch vidhiyon ko karne ke dhang par kuch avashyak jankari har vidhi ke age di gai hai. holografik chitra apne aise chitra aksar dekhe honge jo ek dharatal men chupe rahte hain tatha kuch samay dharatal par dhyan dene ke pashchat vah tin ayamon vale chitra dikhai dena praranbh kar dete hain inhen holografik chitra kahte hain. is prakar ke chitron ka prayog puratan kal men mahatvapurn suchna rakhne ke liye kiya jata tha, jaise khajane ka pata ityadi aisi hi ek manyata hai. in chitron ko multah baithakar dekhna chahiye. aram se ek kursi ya jamin par baith jaiye. chitra ko apne ek hath ya donon hathon men pakdiye. donon hathon se pakdna jyada labhkari hota hai. chitra par is prakar dekhiye jaise ap ek ayna dekhte hain. arthat dharatal ke pare dekhiye. aisa karne ke liye ap kisi ek bindu ya usmen apke chehre ke aks par gaur se dekhte rahiye. dekhte-dekhte kho jaiye. ap ko tabhi ek tin ayamon ka chitra dikhai dena aranbh kar dega. chitra ke frem ko dhire-dhire dayen, bayen, upar aur niche tak ghumayen tatha aram se dekhte rahen tatha chitra ko adarshit n hone den. is vidhi se hamari divya drishti badhti hai tatha ekagrata to badhti hi hai. agar ap us chitra par gaur se ekatak dekhte rahenge to kuch hi der men vah chitra bhi gayab sa ho jaega tatha hamare avchetan man ki kalpana shakti us sthan par a jaegi tatha vichitra anubhav hone praranbh ho jayenge. yahi uttam vakt hai apne man ki shakti badhane ka. ap apne liye purva niyojit sujhav ka kalpanatmak prayog karke man ko labhanvit kar sakte hain. chitra ko apni ankhon ke bahut karib n le jayen tatha bahut dur bhi n le jayen. ayna dekhte vakt jitni duri rakhi jati hai vah paryapt hai. dekhne ke liye bahut jor n lagayen bas dhyan den. shakti chakra shakti chakra se sammohan aur tratak ka bahut purana sanbandh hai. shakti chakra kai akar ka ho sakta hai. agar yah chat ke niche ya fir divar par lagana ho to akar bada hona chahiye. agar ankhon ke samne hath men ya divar ya mej par rakhna ho to akar chota hona chahiye. dhyan rahe shakti chakra ke madhya bindu ki duri itni ho ki apko bindu thik se dikhai de sake. arthat ankhon par adhik dabav n pade. madhya bindu ankh ke samanantar ya thoda upar hona chahie. shakti chakra ko kursi par baithakar, aram kursi par let kar ya khade ho kar kiya jata hai. dhyan madhya bindu par lagaen aur lagatar dekhte rahen. kam se kam palak band karen. kuch logon ki manyata hai ki palken band nahin karni chahiye lekin yah sahi nahin hai. apni ankhon par adhik dabav dalna gair jaruri hai. dekhne ka samay arthat kitni der dekhna hai, apne as-pas ke anusar rakhen. praranbh men yah chand minat hi hoga jo dhire-dhire badhta jaega. kuch hi der bad shakti chakra men apko gatishilta anubhav hogi jaise ki yah ghum raha ho aur ap us chakra ke andar ja rahe hon. yah matra ek manovaigyanik anubhav hai. kuch aur samay hone par shakti chakra dikhai dena band ho sakta hai aur uski jagah apke man ki kalpana shakti le sakti hai. aisi avastha ane par ap apne man ko aur apne jivan ko aur behetar banane ke liye apne sujhav v kalpanashakti ka prayog kar sakte hain. shakti chakra dekhte samay hamesha apni ankhon ki roshni ko majbut hota hua anubhav karen. jaisa ap sochenge vaisa hi prabhav ap ki ankhon par padega. bich-bich mane palak band karne se apke dhyan par bahut adhik fark nahin padega. ap apni ankhon ko adha band karke bhi apni palkon aur ankhon ko aram de sakte hain. shakti chakra ke chakron ka rang kaisa ho. amtaur par shaktichakra kale rang ke bane hote hain jinka dharatal safed hota hai. lekin har shaktichakra ka rang yahi ho yah avashyak nahin hai. yah matra spasht rup se dikhai dene ke liye hi aisa kiya jata hai. kisi bhi safrup se dikhai dene vale rangon men yah chakra banaya ja sakta hai. agar apko bana-banaya shakti chakra nahin mil pata hai to iski rachna ap khud bhi kar sakte hain. shakti chakra ki rachna karte samay yah dhyan rakhen ki upar ki or se ane vali rekhayen moti aur niche jati hui rekhayen barik honi chahiye. rekhaon ki motai men ghatti hui motai ghumne ka aur iske andar jane ka bhram utpann karti hai tatha hamare mastishk ki tarangon ko prabhavit karne men maddgar rahti hai. bindu tratak yah bhi ek atyant prachlit vidhi hai. yah vidhi vidyarthi adhik prayog karte paye jate hain. yah vidhi am taur par baithakar ya khade hokar ki jati hai. is vidhi ke liye bahut hi asan aur har jagah milne vali samagri prayog ki jati hai. arthat ek gatta, ek safed kagaj, ek kala kagaj ya kali syahi tatha gond ya anya chipkane ka padarth. ek varg fut ke lagabhag vargakar ya vrittakar gatta len. us par ek or safed kagaj chipka den. us kagaj ke bich men ek gola ya vritt banaen jiska rang kala ya asani se dikhai dene vala ho. bas apka bindu tratak ka saman taiyar ho gaya. is gatte ko divar par latka den ya chipka den. dhyan rakhen ki vah hilta n ho. gatte ki unchai is prakar rakhen ki bich ke vritt ki unchai kam se kam ap ki ankh ki unchai ke barabar ho ya thoda adhik bhi ho sakti hai. vritt ka akar lagabhag ek inch hona chahiye. ankhon se bindu ki duri apni suvidha ke anusar rakhen arthat ap aram se dekh payen. kursi ya aram kursi par baithakar ya khade hokar madhya men bane vritt par dhyan lagaen. dhyan lagane ka samay apni suvidhanusar rakhen. yah samay dhire-dhiere badhta jayega. kuch antral ke bad bich ka vritt kabhi-kabhi dikhai dena band ho sakta hai tatha uski jagah man ki kalpana ka chitran hona praranbh ho sakta hai. yah ek prakritik prakriya hai. ismen apne ap ko chamatkari n manen. bich men banaye gaye vritt ko kuch din bad, jaise 15 din bad aur chota kar den arthat adha inch ke lagabhag kar dena chahiye. kuch aur din ke abhyas ke bad akar ghatate jaiye jab tak akar ek bindu ke saman n ho jaye. praranbh men akar bada isliye rakha jata hai taki vah saf rup se dikhai de tatha dhire-dhire uske akar ko ghataya jana chahiye. jab bhi ekagrata itni badh jaye ki bich ka vritt ya bindu lupt hona shuru ho jata hai to ap apne man ki shakti ya jivan karyon men jo sudhar karna chahte hain usse sanbandhit sujhav v kalpana ka prayog kar sakte hain. tratak ki is prakar anek vidhiyan hain in sabhi vidhiyon ke bare men charcha karna na to sanbhav hai aur na hi munasib hai. agle ank men mukhya rup se tratak karte samay savdhaniyan par charcha ki jayegi.