sankat mochak ka pradurbhav  

bhakt shiromni hunman ka nam lene se hi sare sankat dur ho jate hain. unki janm katha kai rahasyon se bhari hai. bhukh lagi to surya ko niglne daud pade, sanjivni buti n mili to parvat hi pura ukhad liya, aie janen, aise tejasvi aur balshali hanuman ka janm kis prakar hua ... shri hanumanji ke avataran ki puranan me kai kathaen milti hain, parantu sarvamanyata hai ki ye bhagvan shivji ke 11ven rudravtar hain. ‘vayu puran’ men bataya gaya hai: ‘‘anjnigarbh sambhuto hanuman pavnatmajah. yada jato mahadevo hanuman satya vikramah..’’ ‘skandpuran men hanumanji ko sakshat shiv ji ka avtar mana gaya hai: ‘‘yo vai chaikadsho rudro hanuman sah mahakviah. avtirnah sahaytarth vishnormit tejsah..’’ gosvami tulsidas ji ne bhi dohavli men kaha hai: ‘‘janehi sharir rati ram saun soi adrhi sujan. rudradeh taji nehabas banar bhe hanuman.. vayu puran ke anusar tretayug men ramavtar ke purva ek bar samadhi tutne par shivji ko ati prasann dekhakar mata parvati ne karan janne ki jigyasa prakat ki. shivji ne bataya ki unke isht shriram, ravan sanhar ke lie prithvi par avtar lene vale hain. apne isht ki sashrir seva karne ka unke lie yah shreshth avasar hai. parvati ji duvidha men bolin- ‘‘svami isse to mera apse bichoh ho jaega. dusre, ravan apka param bhakt hai. uske vinash men ap kaise sahayak ho sakte hain?’’ parvatiji ki shanka ka samadhan karte hue shivji ne kaha ki ‘nissandeh ravan mera param bhakt hai, parantu vah achrnhin ho gaya hai. usne apne das sir kat kar mere das rupon ki seva ki hai. parantu mera ekadash rup apujit hai. atah main das rupon men tumhare pas rahunga aur ekadash rudra ke anshavtar rup men anjna ke garbh se janm lekar apne isht shri ram dvara ravan ke vinash men sahayak banunga.’ anjna devraj indra ki sabha men punchikasthala nam ki apsara thi jisko rishi shrap ke karan prithvi par vanri banna pada. bahut anunay vinay karne par rishi ne shapanugrah karte hue use rup badlne ki chut di, ki vah jab chahe vanar aur jab chahe manushya rup dharan kar sakti hai. prithvi par vah vanar rajkesri ki patni bani. donon men bada prem tha. apne sankalp ke anusar shivji ne pavndev ko yad kiya tatha unse apna divya punj anjna ke garbh men sthapit karne ko kaha. ek din jab kesri aur anjna manushya rup men udyan men vicharan kar rahe the us samay ek tej hava ke jhonke ne uska anchal sir se hata diya aur use laga ki koi uska sparsh kar raha hai. usi samay pavndev ne shivji ke divya punj ko kan dvara anjna ke garbh men sthapit karte hue kaha, ‘devi! mainne tumhara pativrat bhang nahin kiya hai. tumhen ek aisa putra ratn prapt hoga jo bal aur buddhi men vilakshan hoga, tatha koi uski samanta nahin kar sakega. main uski raksha karunga aur vah bhi ram ka param priya banega.’ apna karya sanpurn kar pavndev jab shivji ke samne upasthit hue tab unhonne prasann hokar unse var mangne ko kaha. pavndev ne svayan ko anjna ke putra ka pita kahlane ka saubhagya manga aur shivji ne tathastu kah diya. is prakar hanumanji ‘shankar suvan kesri nandn’ tatha ‘anjni putra pavnsut nama’ kahlae. chaitra shukla purnima manglvar ko ramnvmi ke turant bad anjna ke garbh se bhagvan shiv vanar rup men avtrit hue. shivji ka ansh hone ke karan vanar balak ati tejasvi tha aur use pavndev ne udne ki shakti pradan ki thi. atah vah shighra hi apne mata-pita ko apni adbhut lilaon se ashcharyachkit karne laga. ek din mata anjna balak ko akela chodakar fal-ful lane gai. pita kesri bhi ghar par nahin the. bhukh lagne par balak ne idhr-udhar khane ki vastu dhundhi. ant men uski drishti pratah kal ke lal surya par padi aur vah use ek svadisht fal samajhakar khane ke liye akash men udne laga. devta, danav, yaksh sabhi use dekhakar vismit hue. pavndev bhi apne putra ke piche-piche chalne lage aur himalay ki shital vayu chodte rahe. surya ne dekha ki svayan bhagvan shiv vanar balak ke rup men a rahe hain to unhonne bhi apni kirnane shital kar din. balak surya ke rath par pahunch gaya aur unke sath khelne laga. us din grahan lagna tha. rahu bhi surya ko grasne ke liye aya. vanar balak ko rath par dekhakar use ashcharya hua parantu uski parvah nahin ki. surya ko grasit karne ka prayas karne par balak ne rahu ko pakad liya. tab usne kisi prakar apne ko chuda kar sidhe indra se shikayat ki kya apne surya ko grasne ka adhikar kisi aur ko de diya hai?’ indra ne rahu ko fatkar kar punah surya ke pas bhej diya. dobara rahu ko dekhakar vanar balak ko apni bhukh yad a gai aur vah rahu par tut pada. rahu dar kar indra ko pukarne laga. indra ko ata dekh balak rahu ko chodakar, indra ko pakdne dauda. indra ne ghabra kar apne vajra se prahar kiya jisse balak ki bayin hanu (thuddhi) tut gai aur vah ghayal hokar pahad par gir pada. pavndev balak ko uthakar gufa men le gae. unhen indra par bada krodh aya aur unhonne apni gati band kar di. sabki sans ghutne lagi. devta bhi ghabrae aur indra brahma ji ke pas pahunche. brahmaji ne vrittant sunakar gufa ko prasthan kiya aur balak par apna hath fer kar use svasth kar diya. pavndev prasann hue aur unhonne punah jagat men vayu sanchar kar diya. brahmaji ne devtaon ko bataya ki yah balak sadharan nahin hai. vah devtaon ka karya karne ke liye hi prakat hua hai. isliye ve sab use vardan den. indra ne kaha - ‘mere vajra ke dvara uski hanu tut gai hai. isliye isko hanuman kaha jaega aur kabhi bhi mera vajra us par asar nahin karega.’ surya ne kaha ki ‘main apna shatansh tej ise deta hun. meri shakti se yah apna rup badal sakega. aur main ise sanpurn shastron ka adhyayan kara dunga.’ varun ne use apne pash se aur jal se nirbhay hone ka var diya. kuber ne bhi hanuman ko var diya tatha vishvakarma ne unhen apne divyastron se avadhya hone ka var diya. brahmaji ne brahmagyan diya aur chirayu karne ke sath hi brahmastra aur brahmapash se bhi mukt kar diya. chalte samay brahmaji ne vayudev se kaha -‘tumhara putra bada hi vir, ichchanusar rup dharan karne vala aur man ke saman tivragami hoga. uski kirti amar hogi aur ram-ravan yuddh men yah ram ka param sahayak hoga. is prakar sare devtaon ne hanuman ko atulit balshali bana diya. bachapan men hanuman bade hi natakhat the. ek to vanar, dusre bachche aur tisre dave taan se pa pt bal.rur ke ash to ve the hi. prayah ve rishiyon ke asan uthakar ped par tang dete, unke kamandal ka jal gira dete, unke vastra fad dalte, kabhi unki god men baithakar khelte aur ekaek unki dadhi nochakar bhag khade hote. unhen koi rok nahin sakta tha. anjna aur kesri ne kai upay kie parantu hanuman rah par nahin ae. ant men rishiyon ne vichar karke yah nishchay kiya ki hanuman ko apne bal ka ghamand hai atah unhen apne bal bhulne ka shap diya jae aur jab tak koi unhen unke bal ka smaran nahin karaega vah bhule rahenge. kesri ne hanuman ko surya ke pas vidyadhyayan ke liye bheja aur vah shighra hi sarvavidya parangat hokar laute. sitaharan ke bad hanuman ne shri ram aur sugriv ki mitrata karai. sita ka pata lagane ke samay jambavant ke yad dilane par unhen apni apar shakti ki punah yad a gai aur unhonne samudra ko langh kar ashok vatika men sita ji ka pata lagaya tatha lanka dahan kiya. unka bal paurush dekhakar sitaji ko bada santosh hua aur unhonne hanumanji ko asht siddhiyon aur nau nidhiyon ke svami hone ka vardan diya. is prakar hanuman ji sarvashaktiman devta bane aur shri ram ki seva men rat rahe. hanuman ji apne bhakton ke sankat kshan men har lete hain. (sankat katai mitai sab pira, jo sumirai hanumat balbira.) vah shivji ke saman apne bhakton par shighra prasann ho jate hain aur unhin ki bhanti apne upaskon ko bhut-pishach ke bhay se mukt rakhte hain. chahe kaise bhi durgam karya hain unki kripa se sugam ho jate hain. unki upasna se sare rogon aur sabhi prakar ke kashton ka nivaran ho jata hai. atulit baldhaman svarn shailabh dehan danuj van krishanun gyaninamagraganyam sakal gun nidhanan vanranamdhishan. raghupti priya bhaktan vatjat namami..