kriket ki bat ho aur sachin tendulakar ka nam n ae aisa kaise ho sakta hai, ji han ‘‘sachin ramesh tendulkr’’. sachin ne kriket jagat men saflta ke jo kirtiman sthapit kiye, uske piche unke athak parishram ka hath tha jo ki matra 11 varsh ki choti si ayu se praranbh hua tha. jis umra men bachche doston ke sath khel-kud men maje lete hain, us umra men sachin tenis bael se baiting ki praiktis karte the. aiye jante hain sachin ki kundli se unke vyaktitva v khel jivan ko--
sachin ka janm lagn hai kanya. lagnesh budh baithe hain saptam bhav men apni nichasth rashi min men. budh apne hi nakshatra v apne hi upanakshatra men bhi hain. budh saptam bhav se lagn ko purn drishti dvara bal pradan kar rahe hain. sath hi budh nich bhang rajyog bhi bana rahe hain. ‘‘niche yastasya niyochchabheshau dvavel ev va kendrasthashchechchakravarti bhupah syadbhupavanditah..
faldipika, saptam adhyay, 30 shlok yadi koi grah nichasth ho to us grah ka uchch nath v nichnath donon athva koi ek bhi yadi lagn se kendra men ho to nichbhang rajyog hota hai. budh svayan apni kanya rashi men uchch ka hota hai. arthat budh ka uchchanath svayan budh hi hua. yahan budh saptam bhav men lagn se kendra men baithakar atyuttam nich bhang rajyog bana rahe hain.
lagn aur lagnesh ki shubh sthiti jatak ki saflta ko svatah hi nirdharit kar deti hai jo ki sachin ki kundli men dikh raha hai. lagn par brihaspati bhi pancham bhav se purn drishti dalakar shubhta barha rahe hain. sachin ke karmesh bhi budh hain. lagnesh ki hi bhanti karmesh bhi balvan hai. kriket ke prati sachin ka lagav bachapan se hi tha. kintu unhen is kshetra men age barhane ka shrey jata hai unke bare bhai ajit tendulakar ko.
bare bhai ke lie ham dekhte hain ekadash bhav ko. ekadshesh chandrama baithe hain chaturth bhav men dhanu rashi men. chandrama surya ke nakshatra aur surya ke hi up nakshatra men hai. surya apni uchch rashi men hai aur shadbal men sarvadhik bali hai. chaturth bhav se chandrama dasham bhav ko purn drishti se dekh rahe hain. svatah hi spasht hai ki unke karmakshetra ko sanvarne men unke bare bhai ka vishisht yogdan raha. ekadash bhav ke karak hote hain brihaspati. brihaspati sukhesh v saptamesh bhi hain.
brihaspati chandrama ke nakshatra v shani ke upanakshatra men hain sath hi pancham bhav men nichasth rashi makar men virajman hain sath hi nichbhang rajyog nirmit kar rahe hain. jaisa ki pahle budh ke nichbhang rajyog men ham bata chuke hain ki yadi nichasth grah ka uchchanath v nichnath donon athva koi ek bhi lagn se kendra men hota hai to nichbhang rajyog hota hai usi prakar sachin ki kundli men guru ke uchchanath chandrama lagn se chaturth arthat kendra bhav men baithakar nichbhang rajyog nirmit kar rahe hain.
kahte hain guru ke bina gyan nahin hota hai. khelna ek kala hai aur is kala men nikhar guru ke bina sanbhav nahin hai. sachin ke khel ke hunar ko tarashne ka kam kiya unke guru shri ramakant achrekar ji ne. sachin ki kundli men guru grah brihaspati atyant shubh sthiti men hai. brihaspati, chaturth v pancham ke svami hokar pancham trikon
bhav men parakramesh mangal se yut hokar apne uchchanath chandrama v nichnath shani ke nakshatra men vidyaman hai. pancham bhav se brihaspati ki purn drishti lagn, bhagya bhav v labh bhav par par rahi hai. brihaspati parakramesh mangal se yut hai. mangal shakti v urja ke pratik hain. mangal svayan apne hi nakshatra v brihaspati ke upanakshatra men hokar uchchasth hai. is karan mangal v brihaspati ka atyant ghanishth sanbandh bana hua hai. kriket keval sharir se khela jane vala khel nahin hai.
ismen dimag ka bhi bharpur upyog hota hai. donon ke talmel se hi sachin ne kriket ki barikiyon men maharat hasil ki. brihaspati pancham bhav men baithakar panchmesh shani ko bhi purn drishti dvara prabhavit kar rahe hain. kahne ka tatparya yah hai ki guru ke shishya to kai hote hain kintu guru ki shiksha ko dil v dimag se atmasat karne ki yogyata sachin jaise shishya men hi ho sakti hai. grahon ki sthiti ke sath hi ham bat karte hain mahadshaon ki.
kisi bhi jatak ko uski kundli ke shubh grahon ka fal us grah ki dasha/ antardasha men hi prapt hota hai jabki gochriya sanyojan bhi anukul ho. sachin ka janm hua surya ki mahadsha men jo lagabhag 5 varsh chali. uske bad praranbh hui chandrama ki mahadsha. chandrama dasham bhav par purn drishti dal rahe hain. yahi karan hai ki bachapan se hi sachin ki ruchi kriket ki or hui aur ise hi unhonne apna karmakshetra banane ka faisla liya.
chandrama ke ekadshesh hone ke prabhavavash hi unhen apne bare bhai ka purn sahyog mila. sachin keval 11 varsh ke the tabhi unke bare bhai ke prayas ke karan sachin ko guru shri ramakanat achrekar ji ke varadhast ke niche apne hunar ko nikharne ka avasar prapt ho gaya. chandrama ke bad praranbh hui mangal ki mahadsha jo 7 varsh chali. in sat varshon men sachin ne ji tor mehanat ki.
unki kundli men mangal pancham bhav men uchchasth rashi makar men baithe hain. mangal shakti v urja pradata grah hain. fir jab mangal makar ke hon to kya kahna? mangal labh bhav, ashtam bhav v dvadash bhav ko purn drishti pradan kar rahe hain. kahte hain ashtam bhav gahrai ka bhav hai. kisi bhi vishay ki gahan samajh v uska chintan ashtam bhav ka adhikar kshetra hai. yahi karan hai ki sachin ne kriket ki barikiyan keval sikhi hi nahin balki unhen jiya bhi. apne khel ko unhonne gaurvpurn unchai pradan ki.
mangal ki mahadsha ke bad praranbh hui rahu ki mahadsha. rahu ki mahadsha ke praranbh hote hi shuru hua sachin ki safltaon ka vah svarnim safar jise koi bhul nahin sakta. rahu chaturth bhav men labhesh chandrama se yut hokar sthit hain tatha dasham bhav ko purn drishti pradan kar rahe hain. rahu dhanesh shukra v labhesh chandrama ke nakshatra v upanakshatra men baithakar nichbhang rajyog bhi bana rahe hain. rahu mithun rashi men uchch ke hote hain.
rahu ke uchchanath budh saptam bhav men arthat lagn se kendra men baithe hain jis karan rahu ka nich bhang ho gaya hai. 18 varsh ki rahu ki mahadsha men sachin ko vah sab kuch mila jiski har vyakti ki chah hoti hai. ab tak antarrashtriya kriket men unki pakar ban chuki thi. unka prem parvan charha aur parivarik sahmti se unka vivah bhi ho gaya. sachin ke lagnesh baithe hain saptam bhav men. saptamesh brihaspati pancham men hai. panchmesh shani navamasth hai aur saptamesh brihaspati dvara purnatah drisht hai.
saptamesh brihaspati ki purn drishti lagn par bhi hai. lagn, pancham, saptam, navam ka yah sanbandh nishchit hi prem vivah ka dyotak hai. pancham bhav, lagn v panchmesh sabhi par santan karak brihaspati ka shubh prabhav hai jis karan unhen santan sukh bhi prapt hua. isi dasha men unhen anek puraskar bhi prapt hue. rahu shukra ke nakshatra aur chandrama ke upanakshatra men hain. shukra v chandra ne dhanesh aur labhesh hone ka shubh fal pradan kiya. sath hi shukra markesh v chandrama shashth se shashthesh bhi hain. is karan sachin ko kai ganbhir choton ka samna bhi karna para. 2013 men sachin ne ai. pi. el. se bahar hone ki ghoshna ki.
anginat choton ke karan ab unka man v sharir donon ne hi khel jivan se sannyas ki or prerit kiya. apna 200van test khelakar aur jitakar unhonne apne kriket jivan se sannyas le liya. sachin ki kundli adbhut hai. char grahon ka nichbhang rajyog samanyatya drishtigochar nahin hota hai. mangal v surya uchch ke, chandra v shani mitra rashi tatha shukra sam rashi men hain. in nav grahon ke shubh prabhavavash hi ve madhyavargiya parivar men janm lekar bhi apni ishvar pradatt khel pratibha ko nikharne men safal hue tatha desh aur duniya ke lie misal bane hain.