muhurt ki prasangikta, avashyakta evan upadeyta pan. rajendra sharma ''rajeshvar samay aur grahon ka shubhashubh prabhav jar aur chetan sabhi prakar ke padarthon par parta hai. vahi samay chah rituon ke rup men samne ata hai. prakritik utpaton ka bhi unhin grahon, nakshatron se bahut gahra sanbandh hai. avashyakta hai unke shubhashubh prabhav ke lie unke vibhinn yog sanyog adi ko janne ki. atharva ved jaise hamare adi granthon men bhi shubh kal ke bare men anek nirdesh prapt hote hain jo jivan ke samast pakshon ki shubhta sunishchit karte hain. ''varsh maso dinan lagnan muhurtashcheti panychakam. kalasyangani mukhyani prablanyuttarotaram॥ lagnan dinbhvan hanti muhurtah sarvadushanam. tasmat shuddhi muhurtasya sarva karyeshu shasyate॥'' ''varsh ka dosh shreshth mas har leta hai, mas ka dosh shreshth din harta hai, din ka dosh shreshth lagn v lagn ka dosh shreshth muhurt har leta hai, arthat muhurt shreshth hone par varsh, mas, din v lagn ke samast dosh samapt ho jate hain.''
is sansar men samay ke anurup prayatn karne par hi saflta prapt hoti hai aur samay anukul aur shubh hone par saflta shat-pratishat prapt hoti hai jabki samay pratikul aur ashubh hone se saflta prapt hona asanbhav hota hai. samay ke is shubhashubh prabhav ko ham sabhi mante hain. pratyek avashyak, manglik aur mahatvapurn karyon ke lie shubhashubh samay ka vichar karke anukul samay ka chunav karne ki paddhati ko hi muhurta- vichar ke lie prayog men laya jata hai. hamare bharatavarsh men janm se lekar marnoprant tak kie jane vale solah sanskaron men pratyek karya karne hetu muhurton ka sahara liya jata hai tatha muhurton ka jan-vyavhar se najdik ka sanbandh hai.
adhikanshtah sabhi vyakti anek vyavharik karyon ko muhurt ke anusar hi sanpann karte hain. muhurt vichar ki is paranpra ko keval hindu hi nahin apitu pratyek samuday ke vyakti jaise muslman, parsi, jain, sikkh ityadi sabhi samay ke shubhashubh prabhav ko pahchanne ke lie is bejor paddhati dvara muhurt ka vichar karte hain. bhartiya rishi-muniyon ke dvara samay ko varsh, mas, din, lagn evan muhurt rupi panch bhagon men vitrit kiya gaya hai. uprokt shlokanusar siddhant ko manakar vishesh karya ko sucharu rup se karne hetu shubh samay ke nirnay ki paranpra ka shrignesh hua. isi karan, tithi, var, ,nakshatra, yog, karan, chandmas, suryamas, ayan, grahon ka udyast vichar, surya-chandra grahan evan dainik lagn ke adhar par karya-vishesh hetu shubh muhurt ka chayan kiya jata hai. samay aur grahon ka shubhashubh prabhav jar aur chetan sabhi prakar ke padarthon par parta hai.
bhumandal (prithvi) ka prabandhkiya karya samay ke anurup hota rahta hai. yahan kal (samy) ka prabhav chah rituon ke rup men dikhai deta hai. vayu madal par prakriti aur samy- chakranusar parne vale alg-alag prabhavon ke karan ole girte hain, bijli chamkti hai, bhukanp ate hain, vajrapat hota hai, hava ke prakop se chakravat ate hain, akash men ulkapat aur ati-vrishti se jan-dhan ki hani hoti hai. in sab prakritik utpaton ka grah nakshatron se bahut gahra sanbandh hai. mukhytah suryadi grahon evan nakshatron ka shubhashubh prabhav bhumandal v bhuvasiyon par parta hai. krishn paksh aur shukla paksh ke ujale aur andhere ka prabhav vastu-vishesh, jar-chetan sabhi par parta hai.
samay ke isi shubh-ashubh prabhav se bachne ke lie shubh muhurton ke adhar par karya karne ka prachalan praranbh hua. ham sabhi apni jivn-yatra men anekanek uttaradayitvon ko samay ke kramanusar nirvahn karte hain. in samast uttaradayitvon ke nirvahan ke lie shubh samay ka nirdharan karne ki avashyakta parti hai. ek pauranik akhyan ke anusar yah mana gaya hai, ki pandavon men sahdev muhurta-shastra ke marmagya the. mahabharat yuddh ke purva maharaj dhritrashtra ke kahne par svayan duryodhan ranbhumi men kaurvon ki vijay hetu shubh muhurt niklvane ke lie sahdev ke pas gaye the aur sahdev ne unhen yuddh vijay ka shubh-muhurt bataya tha. jab is bat ka pata bhagvan shrikrishn ko chala to unhonne is muhurt ko talne ke lie v pandvon ki vijay ka shubh- muhurt lane hetu arjun ko moh mukt karne ke lie updesh diya tha.
muhurt ke sanbandh men shriramchrit manas men bhi ullekh prapt hota hai, ki yuddh ke pashchat jab ravan marnasann halat men tha tab bhagvan shriramchandra ne lakshman ko usse tithi, muhurton v kal ka gyan prapt karne hetu uske pas bheja tha. is akhyan se bhi muhurt arthat shubh kshanon ke mahatva ka pata chalta hai. atharvaved men shubh kal men karya praranbh karne ke nirdesh prapt hote hain, taki manav jivan ke samast pakshon par shubhta ka adhik se adhik prabhav par sake. hamare puranon, shastron men anekon aise kai udaharan milte hain, jinse in tathyon ka gyan hota hai. kans ke vadh hetu bhagvan shrikrishn dvara uchit samay ki pratiksha karna in tathyon ki pushti karta hai
aj ke is vigyan ke samay men vaigyanik gan bhi kisi prayog ko sanpann karne hetu uchit samay ki pratiksha karte hain. rajneta, mantrigan bhi nirvachan ke samay namankan hetu, shapath grahan hetu shubh muhurt ka ashray lete hain. acharya varahmihir bhi is muhurt vichar ki anushansa karte hue kahte hain, ki is ek kshan ki apne ap men kitni mahatta hai aur yadi iska sahi upyog kiya jaye to kitna adhik anukul parinam prapt ho sakta hai. ab prashn uthta hai, ki kya shubh muhurt men karya praranbh karke bhagya badla ja sakta hai? yahan yah bata dena avashyak hai, ki aisa sanbhav nahin hai. ham jante hi hain, ki bhagvan shriram ke rajtilak hetu prakand vidvan guru dev vashishth ji ne shubh muhurt ka chayan kiya tha parantu unka rajtilak nahin ho paya tha.
arthat manav dvara sirf karm hi kiya ja sakta hai. thik samay par karya ka hona ya n hona bhi bhagya ki bat hoti hai. kisi karya ko praranbh karne hetu muhurt vishleshan avashyak jarur hai. is par nirbhar rahna galat hai. parantu shubh muhurt ke anusar karya karne se hani ki sanbhavna ko kam kiya ja sakta hai. jivan ko sukhamay banane ke lie adhikanshtah har sanatan dharmalambi dharmik anushthan, tyauhar, samast sanskar, griharanbh, grih pravesh, yatra, vyaparik karya ityadi ke sath-sath apna shubh karya muhurt ke anusar karta hai. is prakar jivan ko sukhamay banana muhurt ka abhipray hai