ek unchi si samudra ki lahar dusri choti lahar se ithlakar boli ki mujhe dekho, main kitni bari aur takatavar hun, aur fir kuch hi kshanon uprant vah samudra ke kinare pare ek patthar se takrai aur shant ho gai. usi ke sath fir dusri lahar ai aur vah bhi patthar se takrakar shant ho gai aur yah kram chalta raha. kya ab us pahli lahar ka punarjanm hoga?
ek talab ke kinare kuch bachche khel rahe the. talab men patthar fenk rahe the jisse kuch bulbule uth rahe the. bulbule uthte aur samapt ho jate fir nae bulbule uthte aur ve bhi samapt ho jate. kya in bulbulon ka janm hoga? kya ye bulbule pahle bhi koi janm le chuke hain?
ek kumhar ne bahut sare khilaune banae. ek guriya bahut sundar thi jise unche dam men ek rais parivar ke bachche ne kharid liya. vah uske hath se chut kar chaknachur ho gai. kya is guriya ka punarjanm hoga?
ek bahut hara bhara maidan tha jismen ghas ki asankhya pattiyan ug rahi thin. ghar banane ke lie sari ghas ko ukhar diya gaya. ghas sukh kar samapt ho gai. kya ghas ki un pattiyon ka punarjanm hoga?
roshni ki chakachaingh men lakhon patange ur rahe the. pratah tak us roshni men sabhi patange apna sharir chor chuke the. kya un patangon ka punarjanm hoga?
manushya ka sharir arbon kharbon koshikaon se nirmit hai. sharir men anek prakar ke jivanu bhi pal rahe hain. pratyek koshika v jivanu apne ap men jivit hai. har kshan koshikaen v jivanu mar rahe hain aur nae paida ho rahe hain. kya in koshikaon v jivanuon ka punarjanm hoga?
yadi dhyan se vichar karen to samudra ki lahar samudra men sama gai, jal jal men vilin ho gaya aur jo dusri lahar uthi, use pahli lahar ka punarjanm kahen to yah tarkasangat nahin lagta. isi prakar se jiv bhi mrityoprant panchmhabhut men vilin ho jata hai aur panchmhabhut ke samudra se arthat is srishti se nae jiv ki utpatti hoti hai. is sharir ka pichle sharir se koi sanbandh hai yah kahna kathin hai.
yadi kahen ki sharir ka vilay to hota hi rahta hai, punarjanm to atm tatva ka hota hai, to iska kya arth hoga jabki atma ek hai aur saman rup se har jagah vidyaman hai. yah jiv ajiv men ek rup se vidyaman hai. yadi jiv ka punarjanm hota hai to har ajiv ka bhi punarjanm hona chahie.
yadi kahen ki punarjanm atma ka n hokar jivatma ka hota hai to kya atma aur jivatma men bhed hai? to kya yah jivatma per paudhon men ya ajiv padarthon men nahin hoti? jiv sarvada ajiv par nirbhar hai aur ajiv men jivan sushupt avastha men vidyaman rahta hai jaise bij ke andar pura vriksh. atah jivatma charachar men ek rup se vidyaman hai. to punarjanm kiska?
sharir ke andar anya jivanu v koshikaen vidyaman hain to kya ek jivatma ke andar bahut sari jivatmaen sthit hain. ek jivatma ke marne se kya un sabki bhi mrityu ho jati hai aur bad men unka bhi punarjanm hota hai? aise anek prashn hain jinka uttar punarjanm ke siddhant ke adhar par dena kathin hai.
also read: janie, kya apki kundli men hain aiees banne ke yog?
multah manushya ka apne jivan se moh use nasht hote hue nahin dekh sakta. use apne jivan ka panchmhabhut men vilin hona jivan ka ant nahin lagta. atah vah janm mrityu ke chakra dvara apni mrityu ke punarjanm ka ahsas karta hai. hamare shastra bhi ise sarvasammati se svikar karte hain kyonki prathmtah jiv ko apna jivan nirarthak n lage evan dusre vah is punarjanm ke bhay ke karan is janm men manmani nahin kare aur apne karmon se dusre janm ko achcha banane men prayasarat rahe.
yadi hamara jivan is sharir tak hi hai to shastra hamen vastuon ka upbhog karne ki anumti kyon nahin dete. kyon shastra tap v tyag ke lie hi prerit karte rahte hain? karan yah hai ki upbhog sharir ko keval kuch samay ke lie hi anand dete hain v upbhog se sharir ki kshamataen kam ho jati hain.
tap v tyag karvi davai ki tarah se hain jo sharir, man v buddhi ko pusht rakhne ke sath sath chir anand dete hain. punarjanm ka siddhant to jivan ki gahraiyon ke prati gahra vishvas banae rakhne ke lie evan is jivan ke mahatva ko barhane ke lie nirupit kiya gaya hai. lekin punarjanm ko hamne itna sach man liya hai ki iske viprit sochna hamen nirarthak lagta hai.
punarjanm ki kathaon ko kya ham asvikar karen jo punarjanm ko siddh karti hain? iske uttar men yahi kahna hai ki bahut si baten is chetan sharir se ham mahsus kar lete hain jo hamne kabhi nahin dekhi hoti hain ya fir ve bhavishya men hone vali hoti hain. anekanek svapn bhi hamen bhavishya ka purvabhas karate hain. vigyan ne bhi mana hai ki bhut ya bhavishya ko dekha ya mahsus kiya ja sakta hai.
jaise ek bachcha bhi bina dekhe ghanti bajne par jan jata hai ki uske pita karya se laute hain. jaise fon ki ghanti bajte hi hamen ahsas ho jata hai ki yah amuk ka fon hai. purvabhas hona chetan sharir ka gunadharm hai jise ham atmarup se samjhne lagte hain. is sharir ke andar jiv tatva ka astitva samajh lena ganesh ji ki pratima ko dudh pilane ke saman hi hai.
anttah punarjanm ke siddhant ka pratipadan jivan ke svarup ko am manushya ko samjhane ke lie hi kiya gaya hai. atma to amar hai aur sarvavyapak hai. jo amar hai uska punarjanm ho hi nahin sakta. sharir jo nashvar hai, panchmhabhut men vilin ho hi jata hai aur dusre sharir ke janm ka pahle sharir se sanbandh tarkasangat nahin hai. keval shastron ke prati hamari shraddha hi punarjanm ke siddhant ko nakarne men avrodhak hai.
ab kahin bhi kabhi bhi bat karen fyuchar point jyotishacharyon se. abhi paramarsh karne ke liye yahan klik karen.