janmakundli ke barah bhav manav jivan ke vibhinn avyvon ko darshate hain. kisi bhav ke fal ka vichar karte samay sarvapratham us bhav aur bhavesh ke bal ka akalan kiya jata hai. jis bhav men uske svami ya shubh grah ki sthiti ho, ya unki drishti parti ho, tab vah bhav balvan hokar shubh faldayak hota hai. iske viprit sthiti men vah bhav nirbal hokar shubh fal nahin deta hai. jab bhav ka svami svochch, mitra ya svarashi men sthit hokar shubh bhavadhiptiyon se sanbandh banata hai tab vah balvan hota hai aur apne svamitva bhav ka uttam fal deta hai. bhavesh ka bali hona bhav ki shubhta barhata hai.
bhav v bhavesh ke sath hi us bhav ke ‘nitya kark’ grah ka bhi ankalan avashyak hota hai. ‘bhav kark’, ‘vastu kark’, ‘yog kark’ v ‘jaimini kark’ sarvatha bhinn hain. maharshi parashar ne pratyek bhav ka ek ‘nitya kark’ nirdharit kiya tha - suryo guruah kujah somo gurubhaumah sitah shaniah. gurunchandrasuto jivo manda´ch bhavkarkaah.. parantu kalantar men rachit jyotish granthon men varnit ‘nitya bhavkark’ is prakar hain- pratham bhav -surya, dvitiya bhav-brihaspati, tritiya bhav-mangal, chaturth bhav - chandra v budh, pancham bhav -brihaspati, shashth bhav -shani v mangal, saptam bhav - shukra, ashtam bhav - shani, navam bhav - surya v brihaspati, dasham bhav - surya, budh, brihaspati v shani, ekadash bhav - brihaspati, dvadash bhav - shani.
faldipika granth (15, 25) ke anusar- tasmin bhave karke bhavnathe viryopete tasya bhavasya sauravyam. arthat, ”jab bhav, bhavesh aur karak tinon balvan hon tab us bhav ka achcha fal vyakti ko prapt hota hai.“ ‘bhav prakash’ granth ke anusar- bhavanti bhavbhaveshkarka balsanyutaah. tada purn falan dvabhyam ekenalp falan vadet.. arthat ” yadi bhav, bhav ka svami tatha bhav ka karak tinon balvan hon tab us bhav ka purn fal kahna chahie, aur yadi tin men se do balvan hon to adha fal kahna chahie, tatha keval ek hi balvan hone par bahut thora fal hota hai. ‘jatak parijat’ granth (a. 2-51) ne prachlit bhav karkon ka vivaran dene ke bad agle shlok (a. 2-52) men kaha hai ki yadi shukra, budh aur brihaspati lagn se kramshah saptam, chaturth aur pancham bhav men haniprad hote hain tatha shani ashtam bhav men shubh fal karta hai.
gyatavya hai ki uprokt grah in bhavon ke karak mane gaye hain. parantu ‘bhavarth ratnakr’ granth ke rachyita shri ramanujacharya ne nimn shlok men sabhi karak grahon ko sanbandhit bhav men hanikarak bataya hai- sarveshu bhav sthaneshu tattd bhavadikarkah. vidyate tasyabhavasya falamasvanlpamudiritay.. arthat, ”sabhi karak grah apne sanbandhit bhav men sthit hone par us bhav ke fal ko bahut kam karte hain.“ uprokt shalok kalantar men ”karko bhav nashay“ namak lokokti ke rup men prachlit ho gaya. isi adhar par brihaspati ka pancham bhav men hona putra abhav ka suchak, shukra ki saptam bhav men sthiti vaivahik sukh ka abhav suchak, tatha chote bhai ke karak mangal grah ka tritiya bhav men sithti chote bhai ke abhav ka suchak kaha jata hai. apvah svarup keval shani grah ka ashtam (ayu) men hona dirghayu deta hai.
‘karko bhav nashay’ ke piche jo hetu hai us par vichar karne se gyat hota hai ki jab kisi bhav ka karak usi bhav men sthit hota hai tab sajhe vishay ke do dyotak (bhav v kark) ikatthe honge aur un par kisi papi grah ka prabhav hone par unke sajhe tathya ki hani hogi. vahin shani grah ki ashtam ayu) bhav men sthiti apni dhimi chal se ayu ko barhayega. anubhav men bhi ata hai ki jab bhav men uska karak shatru rashi men ya ashubh prabhavi hone par hi us bhav ke fal men kami ati hai.
parantu jab koi grah us bhav men sthit ho jiska vah karak hai aur vah svarashi athva mitra rashi men sthit ho va shubh drisht ho tab avashya hi bhav fal ki vriddhi hoti hai. jaise tritiya bhav men mangal yadi svarashi ya mitra rashi men ho aur shubh drisht ho to jatak ka bhai avashya hota hai. isi prakar chaturth bhav men chandrama shubh rashi men shubh drisht hone par mata dirghajivi hoti hai tatha saptam bhav men shubh rashi sthit v drisht shukra vaivahik sukh deta hai. uprokt tathya ko darshati kuch kundliyan prastut hain.
1. purush: 14.9.1938, 23.36, jhansi bhratrikarak mangal tritiya bhav men mitra sinh rashi men bhavesh surya ke sath hai. mangal apni mul trikon rashi se pancham bhav men hai. lagnesh budh tritiya bhav men mitra surya ke sath hai. tritiya bhav sthit grahon par brihaspati ki saptam drishti hai. jatak ke do chote bhai hain. iske viprit shri javahar lal nehru ki kundli dekhiye.
2. 14.11.1889, 23.03 ilahabad bhratrikarak mangal tritiya bhav men apni shatru rashi kanya men sthit hai. mangal apni mul trikon rashi se shashth bhav men sthit hai. us par koi shubh drishti nahin hai. tritiyesh budh par shani aur rahu ki drishti hai aur vah ‘papakartari yog men hai. sarvavidit hai ki nehruji ka chota bhai nahin tha. yah sthiti bhav, bhavesh v bhav karak ki ashubh sthiti ka fal tha.
3. stri: 5.5.1963, 16.40, bhatinda (panjab) jatika ki kanya lagn hai. usmen pakshabali ekadshesh chandrama sthit hai. saptam bhav men pati karak svakshetri brihaspati aur kalatrakarak uchch shukra ki yuti hai tatha un par pakshabali chandrama ki drishti hai. atah shani grah ki saptam bhav par drishti vishesh ashubh n kar pai. jatika ati sundar aur sushil hai, tatha saubhagyashali jivan vyatit kar rahi hai. iske viprit british rajkumari dayna ki kundli ka avlokan kijie.
4. 1.7.1961, 17.00, landan (yu.ke.) kundli men kalatrakarak shukra saptam bhav men svakshetri hai jisse unka british rajghrane men vivah hua. parantu shukra par nich v vakri tatha shani pirit brihaspati ki drishti hai. shukra se chaturth kendra men mangal aur rahu sthit hain. jisse unki kamukta men vriddhi hui aur unke kai vyaktiyon se tathakthit sanbandh bane aur apne pati se talak hua. yah sab kalatrakarak shukra par dushprabhav ke karan hua.
5. shri lal bahadur shastri, purva pradhanmantri 2.10.1904, 11.42, varansi putrakarak brihaspati pancham bhav men mitra rashi mesh men sthit hai. panchmesh mangal pancham se pancham (navm) bhav men apni mitra sinh rashi men hai tatha us par brihaspati ki drishti hai. pancham bhav par svakshetri shukra ki bhi drishti hai. sabhi jante hain ki unke do putra the.
6. purush: 27.5.1967, 14.45, lakhnau kundli men mata ka karak chaturth bhav men sthit hai. chandrama par mangal, shani aur rahu ki drishti hai. parantu chandrama pakshabali hai tatha shukra se drisht hai. chandrama ka uchch brihaspati se rashi vinimay hai. is prakar chandrama balvan hai. chandrama se ashtam (ayu) bhav men uchch brihaspati ne bhi mata ko dirghayu banaya, yadyapi unka svasthya achcha nahin hai. chandrama par shubh prabhav ke karan ‘karko bhav nashay’ nishprabhavi raha. is sanbandh men acharya mantreshvar ke vichar prastut hain.
‘faldipika’ granth (15.17) men unhonne sarvamanya bhav karko ka ullekh kiya hai tatha shlok 15-25 men kaha hai ki bhav ka shubh fal pane ke liye bhav, bhavesh v bhav karak ko balvan hona chahie. parantu shlok 15.26 men svayan ka vichar n dete hue kaha hai: dharme suryah shitgurbandhubhave shaurya bhaumah panchme devamantri. kame shukrashchashtame bhanuputrah kuryattasya kleshmityahuranye.. arthat, ”anya acharyon ka mat hai ki navam bhav men surya, chaturth men chandrama, tritiya bhav men mangal, pancham bhav men brihaspati, saptam bhav men shukra tatha ashtam bhav men shani, in bhavon ke lie kashtakari hote hain. shlok ke ant men ‘kleshbhityahuranye’ ka prayog unki ‘karkobhavnashay’ se sahmti nahin darshata.
acharya kalidas ne bhi apne granth ‘uttarakalamrit’ (adhyay 4.12) men bhav ke shubh fal prapti ke lie bhav, bhavesh v bhavkarak ka balvan hona avashyak bataya hai. inke bal ankalan v apsi sanbandh ke bare men margadarshan karte hue unhonne kaha haiah bhavanan falkarkashch vimukha naisargikashchay yadbhaveshanvitmanshpavpi tatha tadbhavatkarkau. yadyatkarkrashigo shubhakhagast tatfaladhvansakastattatkarak bhavyogvshtah svalpan falan karyet.. arthat, ”yadi kisi bhav ke svami tatha us bhav ke karak men naisargik shatruta ho, athva kisi bhav tatha uske karak ki un grahon se shatruta ho, jo ki bhaveshadhishthit rashi taia navansh ke svami hain, to us bhav ki hani hoti hai. isi prakar jis bhav ke karak ki rashi men pap grah ho, us bhav ke fal ki hani hoti hai.
aise hi jis bhav tatha uske karak se pap grah ki yuti ho tab bhi us bhav ka fal bahut alp ho jata hai. udahrnarth navam bhav pita ka hai tatha surya navam bhav ka karak hai. mithun lagn men navmesh shani hota hai jo karak surya ka vairi hai. atah mithun lagn men surya ki navam bhav men sthiti ashubh faldayak hogi. vibhinn jyotish granthon par adharit uprokt vivchen yah darshata hai ki ‘karko bhav nashay’ purn satya nahin hai. keval uske adhar par faladesh karna sahi nahin hoga. bhav v bhavesh ki tarah bhav karak ke bal ka shastrokt purn ankalan karne ke uprant hi kisi bhav ka faladesh kahna chahie.