bhartiya tirthon ka guru hai pushkar dae. rakesh kumar sinha raja-rajbare ki dharti rajasthan ki pavan bhumi ajmer se 99 ki. mi. ki duri par nag parvat ke us par basa chota-sa kasba pushkar n sirf prakritik saundarya ke karan, varan akshunn dharmik mahatva ke chalte desh-videsh ke sanatan dharmavalambiyon ka sarvapradhan tirth hai. yahi karan hai ki yahan pure varsh dur-desh ke shraddhalu bhakton ka ana-jana laga rahta hai. mahabharat, padmapuran, tirth dipika, tirthank, pushkar mahatmya v kitne hi prachya dharm sahitya men ullikhit pushkar brahma ji ka sarvamanya tirth hai. tirthon ke desh bharat men jahan kashi sarvavishisht yugyugin prachya tirth, prayag tirtharaj, nasik tirthon ki nasika, haridvar sadabhar tirth v gaya ko tirthon ka pran kaha gaya hai, thik usi prakar pushkar ko tirthon ka guru (shri pati) mana jata hai. mahabharat ke vanaparva men pushkar ko mrityulok men sarvadhik priya sthal bataya gaya hai. padmapuran men bhi ullekh hai ki devtaon men jis prakar madhusudan shreshth hain, vaise hi tirthon men pushkar tirth hai. dharmik manyata ke anusar satyug men sabhi tirth, dvapar men kurukshetra aur kaliyug men ganga ji ki bhanti treta yug men pushkar pratishthit raha. shushk banjar pahar, registani mitti aur rajasthan ki lok sanskriti se sarabor bharat ka yah tirth harek bhramnarthiyon ko apni vishishtata ke karan anutha anand pradan karta hai. bhartiya tirthon men pushkar ki ganna kurukshetra, prabhas, ganga aur gaya ke sath ‘‘panch tirthon men ki jati hai jo pashchim disha ka pratinidhitva karta hai. desh ke sapt pradhan aranyon men pushkaranya ki pratishtha prabhavishnu prachya kal se sthapit hai. tirth pushkar ka bhraman darshan v isse jure pauranik katha ke adhyayan se spasht hota hai ki ek bar yugpita brahma ji yagya karne ke lie puri prithvi men sarvoday sthan ki talash men vicharan kar rahe the ki achanak hi unke hath se kamal pushp chut kar dharti par gir gaya, jahan yah gira vahan vishal sarovar ban gaya. yahin sarovar ke chaturdik pushkar tirth hai jahan ka sabse vishisht akarshan shri brahma ji ka akela mandir hai. mukhyatah jyeshth pushkar, madhyam pushkar aur laghu pushkar ke nam se prachlit isi pushkar sarovar se ek nadi bhi niklti hai, jise ‘sarasvati’ kaha jata hai. gyatavya hai ki desh ke pavitra punit panch sarovron men ek hai pushkar, jahan kie gae snan dan ka vishesh fal hai. brahma ji ke bad is sthal men kitne hi punyatmaon ka samy-samay par pardapan hota raha jismen saptarishiyon ka pramukh sthan hai. pushkar tirth ka sabse bara akarshan hai pushkar sarovar. arddhachandra ke akar vale is prakritik sarovar ke chaturdik karib 400 mandir aur 52 ghat bane hain, jinki shobha suryoday v suryast ke samay dekhte hi banti hai. yahan ke ghaton men brahmaghat, gaughat, varahghat, vanshighat, mahadev ghat, indra ghat, chandra ghat, sapt rishi ghat, yagya ghat, mukti ghat, nrisinh ghat, vishram ghat, bhartpur stet ghat, indreshvar ghat, koti tirth ghat, ram ghat, badri ghat v kapalmochan ghat adi pramukh hain. sarovar men snan v tirth ke darshana-pujan ke bad bhaktagan yahan machli, kabutar aur bandar ko kuch n kuch avashya khilate hain, jo yahan ki shobha ko dvigunit karta rahta hai. pushkar tirth ka pradhan mandir shri brahma ji ka mandir hai jo sarovar ke pas hi unchi bhumi par bana hai. mandir tak sangamaramar ki sirhi se hokar jaya jata hai. mandir ke prangan men hi chaidah kalatmak stanbhyukt kalapurn mandap hai. ismen hi garbhagrih men alankrit vastrabhushnon se susajjit brahma ji ki chaturmukhi pratima hai, jinki bayin or gayatri aur dayin or savitri ki murtiya hain. mandir ke bahri kaksh men ek chandi ka kachua darshaniya hai. brahma ji ka yah mandir ratnagiri parvat ki talhti men hai. isi ke shikhar par savitri mandir virajman hai jo takriban 2370 fit ki unchai par hai. dusri or, gayatri mandir parvatasin hai jiski ganna 51 shaktipithon men ki jati hai. yahan se pushkar ka sundar drishya dekha ja sakta hai. pushkar ke anya mandiron men ‘chaihan shasak anna ji (1123 se 1150 i.) dvara nirmit aitihasik varah mandir darshaniya hai, jise 1727 i. men vartaman rup pradan kiya gaya. yahan avasthit shri rang ji mandir dakshin bhartiya shaili men bana hai. vaishnav sanpraday ki ramanuj shakha ke is mandir ka nirman 1844 i. men hua hai. iske atirikt nrisinh dev mandir, apteshvar mahadev mandir, shri balmukanud ashram, shri bihari mandir, ballabhacharya mandir, bhartrihri gufa, gayakund v sati sthan yahan ki shobha barha rahe hain. yahan ka pradhan akarshan hai rajasthan ki jivant sanskriti ko samete kartik purnima ka mahamela, jab yahan desh-videsh se tirthayatri padharte hain. isi samay yahan rajasthan pradesh ke sabse bare purane v prasiddh pashumela ka bhi ayojan hota hai. is kram men yahan ki ‘ut daur’ logon ko vishesh akarshit karti hai. ajmer ke pas hone ke karan yah tirth yatayat ki drishti se sugam hai. sath hi yahan sabhi ke anukul bhojan aur thahrne ki suvidha upalabdh hai. paryatak pushkar ke sath ajmer men khvaja garib navaj ki dargah ko bhi jate hain. aur anya samuday ke log iske alava ajmer men paribhraman ke aur bhi kai sthal hain jo dharmik sanskritik mahatva ke hain.
Kya aapko lekh pasand aaya?
Subscribe