pajuno puno vrat  

pajuno puno vrat (06-04-2012) pan. brajkishor sharma brajvasi ‘‘pajuno puno vrat’’ chaitra shukla paksh purnamasi ko karne ka vidhan hai. ismen visheshakar pujan hi karne ki paranpra hai. vrat bhi rahna chahen, to rah sakte hain. is din ‘pajun kumar’ devta ke pujan ko vidhivat us ghar men sanpann kiya jata hai jis ghar men putra utpann hua ho. is din panch ya sat mitti ki matkiyon men hi (karva sahit lakar matkiyon ko) chuna ya khariya se tatha karve ko haldi se rangakar sukhakar ‘pajun kumar’ (yani balk) tatha do mataon (janmadatri v palnhari) ka chitra sabhi par banaven. matkiyon ko charon or tatha karve ko madhya (bich) men rakhakar sabhi patron ko vibhinn pakvanon tatha mithaiyon se bhar den. vidhipurvak ganesh gauryadi navagrahadi pujnoprant, pajun kumar v uski donon mataon ka pujan karen. katha ke samay ek stri katha sunave tatha baki striyan hath men akshat (chavl) lekar katha sunen. katha shravanakar purnata par matkiyon ko hila-hilakar usi sthan par pratyek ko punah sthapit karen. larka pajun kumar ki matki se laddu nikalakar man ki jholi men dalta hai. fir man larke ko laddu pakvan adi deti hai. iske bad ghar ke sabhi logon ko v upasthit janon ko matkiyon ka pakvan v mithai prasad ke rup men vitaran kiya jata hai. prasad dete samay, ‘pujan ke ladua pujne khayen. daur-daur vahi kothari men jayen .. in panktiyon ka jor-jor se uchcharan karte rahen. is prakar savidhi karya ko karne par balkon ko dirghayu ki prapti evan ghar men sukh-shanti bani rahti hai. balkon ka mata ke prati v mata ka balkon ke prati prem bana rahta hai. kumhar ne balak ka nam pajun kumar rakha tatha pajun kumar ki divya alaukik shaktiyon ke karan hi pajun kumar ka pujan kiya jane laga tatha lok men khyati ho gayi. ‘pajuno puno vrat’ vastav men to adharm par dharm, anyay par nyay, kumarg par sanmarg tatha andhkar par prakash ki vijay ka pratik hai. yah jagat ke jivon ko gyan pradan karne vala vrat hai. burai par achchai ke shasan ko darshata hai aur prerna deta hai ki sabhi ko apna-apna karm v chintan shubh rakhna hi shreyaskar hai. iski katha is prakar hai. katha: vasuk raja ki do raniyan thin- sikauli bari aur rupa choti. donon niahsantan. sikauli par sas-nanad ka prem adhik tha aur rupa raja ko bahut priya thi islie vah sas-nanad ki narajgi ki koi chinta nahin karti thi. use putra ki bari lalsa thi. usne ek din burhi striyon se putra-prapti ka upay pucha. burhiyon ne bataya ki santan to sas-nanad ke ashirvad se hi ho sakti hai. par ve to rani se naraj rahti thin, ashirvad to dur raha. burhiyon ke batane par vah gvalin ka vesh banakar sas-nanad ke mahlon men gai aur sir par se dudh ki matkiyan utar kar unke panv chue. unhonne use putravti hone ka ashirvad de diya. rupa garbhavati ho gai. usne sari bat raja ko bata di. raja ne kaha, ‘‘tum chinta n karo, main tumhare mahal men ghantiyan bandhva deta hun. jab tumhen prasv-pira ya koi kasht ho to tum dori khinchna. ghanti bajegi aur main tumhare pas chala aunga. rani ke mahal men ghantiyon ka prabandh ho gaya. ek din rani ne raja ki pariksha leni chahi. rani ne dori khinchi aur ghanti bajne lagi. ghanti bajte hi raja raj-darbar chorakar rani ke mahal men pahunch gaya. jab raja ko rani ke jhuth ka sara rahasya malum ho gaya tab vah naraj hokar laut aya. vivash hokar rupa ko sas-nanad ki sharan men jana para. vahan jakar usne bataya ki mera prasav kal samip hai. sab thik-thak ho jane ka upay bataiye. nanad ne dhairya bandhvate hue kaha, ‘‘jab tumhare pet men dard ho tab tum kone men sir dalakar okhli par baith jana.’’ rupa ne vaisa hi kiya. balak paida hote hi okhli men girakar rone laga. rone ki avaj sunakar sas-nanad daurakar vahan pahunchin. uske sath sikauli rani bhi thi. usne navjat shishu ko ghure par fikva kar okhli men kankr-patthar dal diye. sas-nanad ne rupa ko bataya, ‘‘ari tune to kankr-patthar paida kie hain.’’ raja bhi prasav ka samachar pakar bhaga-bhaga aya, par kankr-patthar dekhakar chakit rah gaya. raja apni man tatha bahan ki chalaki samajh to gaya, par kuch kah n saka. jis din rupa ne bachche ko janm diya tha, us din chaitra shukla purnima thi. usi din ek kumharin ghure par kura dalne ai. rakh men khelte hue bachche ko vah apne ghar le gai. vah bhi niahsantan thi. usne bare lar-pyar se uska paln-poshan kiya. bara hone par kumhar ne use khelne ke lie mitti ka ek ghora bana diya. larka us ghore ko nadi ke kinare le jakar uska munh pani men dubokar kahta- mitti ke ghore pani pi, chen, chen chen. usi jagah raja ke ranivas ki striyan nahane ke lie aya karti thin. ek larke ko aisa karte dekh ek stri ne kaha, ‘‘ai kumhar ke chokre ! tu pagal ho gaya hai kya? kahin mitti ka ghora bhi pani pita hai?’’ larke ne uttar diya, ‘‘main hi pagal nahin hun. yah sara sansar hi pagal hai. kya kabhi raniyon ke garbh se kankr-patthar paida hote hain?’’ larke ki baten sunakar sari striyan samajh gain ki yah ho n ho rupa rani ka hi beta hai. unhonne mahal men lautakar rani sikauli se sab samachar kah sunaya ki uski saut ka larka to kumhar ke ghar men hai. rani ne use marvane ka shadyantra rachaya. vah maile kapde pahanakar kaikeyi ki tarah kop-bhavan men let gai. raja ke puchne par usne kaha, ‘‘jab tak amuk kumhar ka larka maut ke ghat nahin utar diya jaega, main ann jal grahan nahin karungi.’’ raja dvara uska apradh puchne par usne bataya ki vah hamari dasiyon ko chirhata hai. par raja samjhdar tha. raja ne tark diya ki is apradh ke karan uski hatya nahin ki ja sakti hai, rani ke chahne par use is ganv se nikala ja sakat hai. rani man gai. raja ne kumhar ke larke ko ganv se bahar nikal diya. thore dinon ke bad larka achche-achche kapre pahanakar rup badalakar darbar men ane laga. raja use kisi karmachari ka putra samjhta raha aur rajmantri raja ka sanbandhi. parinamtah use kabhi sandeh ki drishti se n dekha gaya. uske acharan se sab prasann tatha santusht the. vah pratidin darbar men baithakar rajkaj ki sari baten dhyan men rakhta tha. ek sal aisa aya ki raja ke rajya men jal nahin barsa. sara rajya akal grast ho gaya. raj-panditon ne raja ko salah di ki yadi raja-rani rath men bail ki tarah kandha dekar chalen tatha chaitra-shukla purnima ko utpann hua dvijatiya balak rath ko hanke tabhi varsha hone ka yog ban sakta hai. yah sunakar kumhar ke balak ne bataya ki mera janm ukt din hi hua tha. main rath bhi hank sakta hun. idhar rath chalane ki taiyariyan hone lagin, udhar balak rupa rani ke pas gaya aur kahne laga, ‘‘yadi tumse koi rath se sanbandhit kam karne ko kahe to tum kahna ki pahle hamari jethani kare tab main karungi. har kam men tum use hi age rakhna.’’ rupa ne balak ki bat svikar kar li. rath chalne ka samay a gaya. ruparani ko jagah lipne ke lie kaha gaya. rupa ne uttar men kaha, ‘‘pahle jethani lipe fir main lipungi.’’ is prakar sikauli rani dvara lipne ke bad rupa ne bhi jagah lip di. isi prakar kandha dene ke samay bhi sikauli rani ko hi pahal karni pari. jab sikauli ne kandha diya, us samay tej dhup thi. rajkumar ne pahle se hi marg men gokhru ke kante bikher chore the. idhar niche panv men to rani ke kante garte, udhar upar se vah kore barsata. use chutkara tabhi mila, jab rath nishchit sima par pahunch gaya. ab rupa rani ki bari thi. uske rath men kandha dete hi asman men badal cha gaye. raste men se gokhru hat gae. ruparani ko jara-sa bhi kasht n hua. rath chalane ka kam pura hote hi varsha hone lagi. sabhi bare prasann hue. tabhi rajkumar ne ruparani ke pas jakar uske charan chue jisse sabne jan liya ki yahi rani ka putra ‘pajun kumar’ hai. raja ne bhi use apna putra janakar gale lagaya. sarvatra anand ki lahar daur ai. pajunkumar sabse milakar ranivas men aya. vah sabse pahle apni dadi ke pas gaya aur kahne laga, ‘‘dadi, ham aye, kya tumhare man bhaye?’’ dadi ne uttar diya, ‘beta nati pote kise bure lagte hain?’’ pajunkumar bola, ‘‘tumne mere man ki bat nahin kahi. tumhari bat bekar aur adhuri hai. main tumhen shap deta hun. tum agle janm men dahlij hoogi.’’ fir vah bua ke pas jakar bola, ‘‘bua ri bua ! ham aye, kya tumhare man bhaye? bua ne bhi dadi ka-sa uttar diya. parinamtah usne bua ko chaika lagane vala mitti ka bartan ho jane ka shap de diya. fir vah apni sauteli sikauli man ke pas jakar bola, ‘‘man ! man ! ham aye, kya tumhare man bhaye?’’ sikauli man ka uttar tha, ‘‘aye so achche aye, jethi ke ho ya lahuri ke, ho to larke hi.’’ rajkumar ne uttar diya, ‘‘tumne bhi mere man ki bat nahin kahi ! tumne to rukhi bat kahi hai. islie tum ghunghuchi banogi. adhi kali aur adhi lal.’’ ant men vah apni asli man ruparani ke pas gaya aur bola, man ! man! ham aye, tumhare man bhaye ya na bhaye?’’ ruparani boli, ‘‘beta, aye-aye ! hamne n pale n pose, n khilaye, n pilaye. ham kya janen, kaise aye?’’ tabhi vah kishor rajkumar navjat shishu ke rup men kehan-kehan karke rone laga. man use god men lekar dudh pilane lagi. raja ko bhi yah samachar mila, raja yah sab dekhakar bara prasann hua. sare rajya men fir se anand cha gaya. badhaiyan bajne lagin. isi din se yah ‘pajuno puno’ pujan v vrat ka prachalan hua hai.