karib panch shatabdiyon tak marvar ki rajdhani raha jodhpur jise surya nagri ke nam se bhi jana jata hai aj tak apne aitihasik mahatva aur apni rajvari an-ban-shan ke lie khabron ki surkhiyan batorta raha hai. aj sthiti iske viprit hai, aj yah bolivud ke dabang khan ‘salman khan’ par kale hiran ke shikar ke mamle ke tahat chal rahe mukaddame men faisle ko lekar charcha ka karan bana hua hai. mamla karib 20 sal purana hai. salman par ab tak tin bare kanuni mamle vishesh rup se charchit rahe jismen amrs ekt ka mamla, nashe men logon par gari charhane ka mamla aur kale hiran ke shikar ka mamla hai. age barhne se pahle aiye ek najar salman khan dvara arjit aj tak ki shoharat aur kamyabi par dalte hain-
abdul rashid salim salman khan jinhen aj ham salman khan ke nam se jante hain, bolivud jagat ke mashhur abhineta hone ke sath-sath nirmata, ti.vi. host aur samajsevi hain. 27 disambar 1965 ke din dopahar ke samay, indaur men salim khan ke yahan jab navjat balak ki kilkariyan gunjin to parivar men khushi ki lahar daur gai. salim khan apne samay ke janemane lekhak rahe hain, bolivud ke shirsh lekhkon ki shreni men inka nam gina jata hai. maharashtriyan parivar se ai mata aur jammu-kashmir ke dharatal se ae pita donon ke sanskar, lar-pyar aur do alg-alag kalchar ka mila-jula paln-poshan salman ko mila. ek bhare pure parivar men salman ka janm hua, jismen do bhai, do bahan, ek sauteli man hain. parivar men bare hone ke bavjud salman apne ghar-parivar ki ankhon ke tare rahe.
kahte hain salman ke stail ka jadu inke fains ke sir charhakar bolta hai. ek ke bad ek hit filmen dene vale salman ke har stail ki kaepi unke fains karte rahe hain. fir vah chahe dabang ka chulbul pande ho, ya fir tere nam ka radhe. chote se lekar har bare bainar ke niche salman ne kam kiya hai. jahan ek or kamyabi ne unke hamesha kadam chume hain vahin vivad aur salman ek sikke ke do pahlu rahe hain. ae din inka nam kisi n kisi vivad ke sath jurta hi raha hai. yahan tak ki tin mamlon men ve kanuni taur par bhi fans chuke hain, unke bare men kaha jata hai ki salman kab apna tenpar luj kar den kuch kaha nahin ja sakta . halanki anya donon khanon ko aj bolivud jagat ka dubta hua suraj kaha ja sakta hai. pichle kuch samay se shahrukh khan aur amir khan donon ki koi bari hit film nahin ai hai jabki salman ka jalva aj bhi barkrar hai. salman ekting ke sath-sath chairiti donon ko samay dete hain. tivi ki duniya men bhi unhonne khub nam kamaya hai, big bos aur das ka dam jaise karyakramon ko salman ne sanchalit kiya hai.
ek taraf jahan salman ki filmen aj bhi rikard tor kamai kar rahi hain vahin salman pyar ke mamlon men jyada safal nahin rahe. samy-samay par kisi n kisi ko-stars ke sath unka nam khabron ki hedlains banta hi raha hai. salman men kuch khas baten hain jinke chalte aj bhi ve popular aur safal hain. khabron ke anusar salman ko traijeminal nyuraelajiya namak rog hai, jiske karan bolne tak men inhen dard hota hai. salman duniya ke satven sabse haindasam admi ka sthan prapt kar chuke hain. bolivud hiroj men intrnet par sarch kie jane vale sabse charchit selibriti hain. landan ke tusad sangrahalay men unki vaiks ki murti hai. kamai ke mamle men kai kirtiman sthapit kar chuke hain to vivadon men bhi salman ka koi sani nahin hai.
salman se jure kuch vivad is prakar hain-
ek samay men salman 400 kaidiyon ke jurmane ki rakam bharne ke lie age ae the, salman us samay nahin jante the ki aj jin kaidiyon ki ye madad kar rahe hain ek din unhen bhi kaidi nambar 106 ki pahchan milegi. 5 aprail 2018 ke din jab suraj uga to apne sath ujala aur prakash lekar to avashya aya, kintu sath hi lekar aya salman khan ke lie chinta aur tanav ke badal. is din sare midiya ki najren jodhpur ki adalat ke us kamre par tiki thin, jahan salman khan par pichle 20 sal se vicharadhin kale hiran ke shikar ke mamle ka faisla ana tha. is mamle men n keval unapar hiran ka shikar karne ka mamla chal raha hai apitu avaidh rup se hathiyar rakhne aur istemal karne ke arop lage hue hain. salman par yah mamla koi naya nahin tha, last 20 iyars se is tanav ko salman jhel rahe hain. 5 aprail ko sabhi pramukh akhbaron, chainlon ke patrakar, fotografars yah janne ke lie betab the ki salman ko is mamle men jel milegi ya rihai. salman mamle ke mukhya aropi the, baki sonali bendre, tabbu, saif ali khan aur nilam bhi sahyogi aropi the.
mamle ki tah men jaen to yah mamla 28 sitambar 1998 men suraj barjatya ki film ‘ham sath-sath hain’ ke nirman ke dauran ka hai. kathit rup se is din salman aur sahyogi aropiyon ne chinkara hiran ka shikar kiya. chinkara rajasthan ka rajya pashu ghoshit hai jabki kala hiran durlabh vanya praniyon ki suchi men ata hai. in donon pashuon ko marne ke jurm ke antargat ane par pravdhan ke anusar 6 sal tak ki saja ho sakti hain. isi arop men yah mamla chal raha tha, jiska faisla 5 aprail 2018 ko aya. is mamle men kort ne salman ko 5 sal ki saja ka elan kiya. gauratalab hai ki salman isse pahle bhi is mamle men ab tak 18 dinon tak jodhpur jel men rah chuke hain. sabse pahle 1998 men, fir 2006 men aur fir 2007 men unhen jel men rahna para.
unapar chal rahe ek anya 2002 varsh ke hit end ran kes men unhen aropon se bari kar diya gaya tha, par yah mamla bhi kafi lambe samay tak chala aur anttah inhen is mamle se rahat mili thi, is mamle men ek vyakti ki mrityu ho gai thi aur panch log inki gari ki chapet men akar ganbhir rup se ghayal ho gae the. is mamle men mili rahat ke khilaf abhi aropi suprim kort men yachika lagane ka kah rahe hain. 2002 se salman ko korta-kachahari ke mamlon ne aisa pareshan kiya hai ki inke din ka chain aur raton ki nind gayab ho gai hai. 1998 se grahon ne kis prakar ki karavat li ki unki pareshaniyan khatm hone ka nam nahin le rahi hain, aiye iska vishleshan inki janmakundli se karte hain-
kundli vishleshn
mesh lagn, kumbh rashi men salman ka janm hua. lagnesh mangal uchchasth, ayesh shani ay bhav men apni mulatrikon rashi men sthit hai. mangal ki is sthiti ne inhen dabang aur aveshyukt banaya, yahi vajah hai ki ye kabhi bhi apa kho dete hain. shani inke lie ay, labh, kamyabi, saflta aur unnati ke grah to hain parantu shani inke lie ashubh bhav ekadash ke svami hokar, ashubh bhav men sthit hain, badhkesh bhi hain aur shukra inke lie prabal markesh hain. markesh shukra ka lagnesh ke sath kariyar bhav men ek sath hona, vah bhi 10 anshon se kam antar se inke lie glaimar jagat men femas aur manoranjan nagri men saflta ka karak bana. inki kundli men sabse achchi bat hai ki bhagya bhav se bhagyesh guru ka sidha sanbadh ban raha hai, panchmesh surya apne se pancham men sthit hain, dhan aur saflta ke paksh se yah ati shubh yog hai. parantu shani aur mangal do ashubh grahon ka pancham bhav se drishti sanbandh banana inhen bar-bar prem sanbandhon men asflta deta hai. rahu ka vani bhav men hona inhen bayanbaji ke karan vivadon men lata raha hai. dhan yogon aur rajyogon se bhari inki kundli inhen saflta to de rahi hai sath hi vivad bhi inke tanav ka karan ban rahe hain. yah to bat hui inki kundli men ban rahe yogon ki, aiye ab bat karen 1998 se shuru hue kanuni mamlon ki-
1998 sitambar, jis samay inapar kale hiran ke shikar ka mamla hai, us samay in par guru-chandra-shani ki dasha prabhavi thi. mahadshanath guru bhagyesh aur vyayesh hain, tisre bhav men vakri avastha men bhi hain. mahadshanath guru aur antardashanath chandra donon 1 ansh ke sath sthit hain aur guru ki chandra par drishti bhi hai. pratyantardashanath shani v chandra ek sath hain. is tarah inki mansik shanti bhang hui. ghatna ke samay guru gochar men vakri avastha men the, rahu-ketu aksh men, chatha bhav pirit tha. lagn bhav par shani ka gochar lagn ko pirit kar raha tha. mangl-rahu ek sath the, lagn, lagnesh donon kamjor the. isi mamle ka faisla 5 aprail 2018 ko aya.
28 sitambar 2002 men jab hit end ran kes men inhen kort kachhri ka samna karna para, thik isi ke as-pas inki shani ki mahadsha shuru hui. shani ayesh hone ke karan inke lie labhkari grah to sabit hue parantu shani ka badhkesh hona, chandra ke sath yuti men hona aur dasham drishti se shashthesh budh se sanbandh hona, inke lie baithe bithae pareshaniyon ka karan bana. budh inke lie korta-kes, kachhri bhav se jure grah hain, kasht aur tanav, badhaon ke lie prasiddh ashtam bhav men ketu ke sath hain. chathe bhavesh ka ashtam bhav men hona, viprit raj yog to bana raha hai sath hi shashthesh ka rahu/ketu aksh men ana ae din kanuni pachron men bhi inhen dal raha hai.
vartaman men shani/rahu/shukra ki dasha chal rahi hai. jaisa ki upar charcha ki gai, shani badhkesh, rahu marak bhav men sthit hone ke karan markesh aur shukra svayan markesh hain. 5 v 6 aprail ki rat salman khan ko jodhpur jel men gujarni pari, is samay inhen jo nambar mila vah 106 tha. ane vale samay men jamanat milne men pareshani jarur hui, fir bhi 7 tarikh ko dopahar bad inhen jamanat mil hi gai. parantu mamla abhi khatm nahin hua hai. shani mahadsha 2021 tak rahegi, tab tak kanuni mamle inki pareshaniyan barhate rahenge. is samay gochar men shani vakri avastha men hai. guru bhi vakri hai aur shashthesh budh bhi vakri hai. sabhi grah sitambar 2018 tak margi ho jayenge, tab tak sthiti kuch niyantran men rahegi. parantu inhen antim rahat is kes se 2019 tak hi milne ke asar ban rahe hain. iske bad ane vali mahadshaen bhi korta-kachahari se juri hi a rahi hain atah savdhani rakhni samjhdari hogi.