liyo pam men prashn kundli  

liyo pam men prashn kundli vinay garg parane samay men am vyakti ki jyotish men jagrukta ke abhav men jatak ki janm tithi aur janm samay ki jankari nahin rahti thi. jiska parinam yah hai ki aj jatkon ko apne jivan ke margadarshan hetu jyotish ka labh lene men pareshani ka samana karna parta hai. arthat jatak apna bhavishya to janna chahta hai, apni samasyaon ka nirakaran jyotish ke madhyam se karna chahta hai par samasya ati hai janm vivaran ki kyonki unke mata-pita ne unke janm vivaran ko surakshit nahin rakha hota. aisi sthiti men jyotishi ko uski samasya samadhan hetu prashn shastra ka sahara lena parta hai. jyotishiyon ke pas iske alava aur koi rasta bhi nahin rah jata hai. prashn shastra bhi jyotish ki hi ek shakha hai. purane samay men bhi log prashn ka uttar janne ke lie jyotishiyon ke pas jate rahe hain. jaise khoi hui vastu vapis milegi ya nahin? kisne churayi hogi, kahan milegi, kab milegi adi-adi. jyotishi log kuch lakshan vichar se tatha kuch prashnavli ki anya vidhiyon se tatha kuch log usi samay ki kundli banakar prashn ka uttar dete the. jismen ve gum hui vastu ka sthan v disha adi ki jankari bhi dete rahe hain. yahi vidhi prashn shastra kahlati hai. aj ke samay men log apne bhavishya ki jankari prashn shastra ke madhyam se bhi kar rahe hain. jaise - main jo vyapar karunga usmen saflta milegi ya nahin? mera vivah kab hoga? amuk vyakti se mera vivah hoga ya nahin? meri naukri kab lagegi? main is sakshatkar (intaravyuh) men safal hounga ya nahin? in sab prashnon ke uttar janne ke lie jis samay jatak jyotishi se prashn puchta hai, us samay aur prashn puche jane vale sthan ke adhar par lagn kundli banayi jati hai. usmen prashna-shastra ke siddhanton ko lagu karke vanchit prashn ka uttar diya jata hai. prashn kundli ke liye, liye jane vale samay tithi aur sthan ko lekar vidvan jyotishiyon ke mat men antar dekha gaya hai. lekin hamen prashn kundli ke nirman ke lie tithi, samay aur sthan bhi usi prakar lena chahie jis prakar kisi jatak ki kundli nirman hetu jatak ki janm tithi samay aur sthan liya jata hai, kyonki prashn ke janm ko bhi jatak ke janm ke samay hi mana jana chahie. is siddhant ke adhar par yadi prashn amerika se fon par pucha ja raha hai aur jyotishi bharat men prashn ka vishleshan kar raha hai to jyotishi dvara prashn kundli nirman hetu amerika ki tithi, samay aur sthan liya jana chahie. iske atirikt prashna-shastra ke anusar ek samay men ek hi prashn ka uttar diya jana chahie aur jo prashn jatak ke lie sabse ganbhir ho aur jiska uttar vastav men jatak janna chahta ho usi prashn ka vichar kiya jana chahie anyatha prashn ke uttar men galti ki sanbhavna ho sakti hai. prashn kundli vishleshan ke liye sarvapratham prashn se sanbandhit grahon evan bhavon ki jankari honi chahie. sanbandhit bhav ka svami karyesh tatha sanbandhit bhav karya bhav kahlata hai. lagn ka svami lagnesh v karyesh ke bich sanbandh dekha jata hai. ismen itthashal yog prashn ka sakaratmak uttar deta hai jabki ishraf yog nakaratmak uttar deta hai. lagnesh, karyesh aur chandra ki sthiti sanbhavit samay ankne men sahayta karte hain. itthashal hetu tej gati vala grah piche aur dhimi gati vala grah age rashi ke kramanusar hona chahie. lekin yadi donon grah vakri hon to sthiti viprit honi chahie. iske alava yadi tej gati vala grah vakri hokar age ho aur tatha dhimi gati vala grah margi hokar piche ho to itthasal aur bhi jaldi hota hai. nishkarshatah hona yah chahie ki lagnesh aur karyesh gochar men bhavishya men milen to itthashal hota hai aur nahin milte hain to ishraf hota hai. iske sath-sath inke bich tajik drishti hona bhi avashyak hai tatha drishti, drishti sima ke antargat honi chahie. prashn shastra ke in sabhi vishleshan ke adhar par liyo pam men prashn kundli ka program taiyar kiya gaya hai. prashn kundli ka program chalane ke liye apko liyo pam ki skrin ke nichle bhag men bayin or 'jyotish' ke sthan par 'prashn shastra' ka chunav karna hota hai tatha mukhay skrin men apko vartaman ya prashn ki tithi, samay aur sthan dena hoga. iske pashchat skrin ke nichle bhag men bich men bane janmakundli ke nishan par klik karna hota hai. iske pashchat ap skrin men sabse upar ki or dayin taraf 'uttara' vale kambo boks par klik karenge. ismen sabse ant men 'prashn chunen' ko klik karna hoga. ab apki skrin par likha hoga 'prashn varga' iske atirikt ap apne prashn se sanbandhit varg ka chunav karenge jaise vyapar, santan pratiyogita, korta/kachahari, matbhed, shiksha, labh, samanya svasthya, ghar, naukri, bhumi, mukdma, hani sanbandhi, khoya/paya, vivah, dhan, karobar, shanti, satta, vyavsay, sanpatti, sanbandh, adar, saflta, yatra, vahan adi. prashn varg chunne ke bad apko pahle se diye gaye prashnon men se apne prashn ka chunav karna hoga. iske lie apko prashn ke baks par klik karna hota hai. ismen apko 15-20 prashnon ki suchi prapt hogi. iske niche apko sanbandhit bhav aur grah likhe huye dikhayi denge jo ki apke chaynit prashn se sanbandhit honge. yadi ap in sanbandhit grah aur bhav men parivartan karna chahte hain to 'bhav' ya grah ke boks par klik karke parivartit kar sakte hain. parivartan karne ke bad 'thik' batan par klik karne se apka kiya hua parivartan surakshit ho jayega. tatha prashn ka uttar dene men sanbandhit grahon evan bhavon ka vishleshan kiya jayega. anyatha 'radda' par klik karne se kanpni dvara taiyar sanbandhit grahon evan bhavon ke vishleshan ke adhar par uttar ayega. prashn chunav ke pashchat ap 'thik' par klik karenge. iske pashchat apke prashn ka saransh apki skrin par hoga. is skrin par apka prashn, sanbandhit bhav grahon ke sath-sath 'karya purn hone ki sanbhavna' tatha 'karya purn hone ka samy' pratishat ke rup men pradarshit hoga. sath hi 'nishkarsha' ke adhar par ap yah jan payenge ki apke prashn ka kya uttar hai tatha karya purn hone ki kya sanbhavna hai. iske atirikt yadi apka prashn ya 'prashn varga' is saftaveyar men nahin hai to ap prashn ismen jor sakte hain. parantu yah tabhi sanbhav hoga jabki ap apne prashn se sanbandhit grahon aur bhavon ko ismen dal denge. ismen adhikatam tin aur nyunatam ek bhav aur ek grah bharna avashyak hota hai. yadi ap uprokt prashn ke uttar ka jyotishiya vishleshan dekhna chahte hain to 'saransh' ki jagah 'vistrit' ka chunav karke ap prashn vishleshan ki vistrit jankari prapt kar sakte hain. is vishleshan men sanbandhit grahon evan bhavon ke bal, yuti, drishti tatha sanbandh adi ki jankari ke sath-sath uprokt varnit 'karya purn hone ki sanbhavna' tatha 'karya purn hone ka samy' ke sath nishkarsh bhi prapt hoga. is prakar liyo pom men prashn kundli dvara prashna-shastra par adharit ap apne vyaktigat ya jatak ke prashn ka uttar purn vishleshan sahit shuddh v sahi-sahi prapt kar sakte hain. vistrit jankari ke liye sanpark karen ya likhen.