vyavharik upay rashmi sharma jyatish shastra men nav grahon ka mahatva atyadhik hai. sabhi grah manav par apna prabhav dalte hain. hamare purva janmon ke krityon ke anurup grah hamari kundli ke vibhinn sthanon men sthit hokar apna achcha ya bura fal dete hain. pratyek manushya apne jivan ko sucharu rup se chalane hetu in grahon ke bure prabhav ko khatm kar achche prabhavon ki kamna karta hai. iske lie vibhinn yantra, mantra v tantron ka prayog bhi karta hai. parantu yadi manushya kuch sadharan upay kare to navagrah shant ho shubh faldayak ho jate hain. surya, chandra, mangal, budh, guru, shukra, shani, rahu v ketu ye nau grah hain.
navagrahon ke atirikt ishvar ko sarvopri mana gaya hai. ishvar ke prati samarpan, bhakti aur aradhna ki bhavna rakhne se navagrah prabhavhin ho jate hain. navagrahon ka mantra jap, upasna aur jahan avashyak ho vahan mahamrityunjay mantra ka jap karne se bhi navagrah shanti ho jati hai. kusangti, kuchintan aur kusahitya ka tyag karke satvik rahn-sahan, satvik bhojan evan satvik vichar apnane se bhi navagrahon ki shanti hoti hai. manushya ke dukhon ka karan uski lalsa hai.
apni anavashyak avashyaktaen kam kar dene se navagrah prabhavhin ho jate hain. nishkam karm karte hue, ishvar par atut vishvas rakhna uska smaran, dhyan evan bhajan karne matra se bhi navagrahon ka kuprabhav khatm ho jata hai. vasnaon se alag rahakar kiye gaye uchit karmon se navagrah prasann hokar saubhagya suchak ho jaya karte hain. man, vani aur kriya se kiye gaye papon ya dushkarmon ke lie ishvar se kshama yachna karne se bhi navagrah shant ho jate hain. irshya v shatruta ko tyagakar v vairagya ko apnate hue man, vachan v karm se ahinsa ka palan karne se bhi navagrahon ki shanti sanbhav hai.
adhyatmik sahitya ka nirantar pathn-pathan bhi navagrahon ki shanti ka achuk upay hai. ishtadev ka dhyan, satsang v bhakti karte hue purn sharnagti ko apnane se bhi navagrahon ka kuprabhav samapt ho jata hai. man v indriyon ke nigrah arthat unhen vash men kar lene se bhi navagrah shant hote hain. ishvar upasna navagrah shanti ka sarvottam upay hai. yadi ap sabhi karya ishvar ko aparn karke karen, apni sabhi gatividhiyan uski ichcha samajhakar karen. kya hoga? ishvar jane, jo hoga vah achcha hoga bhale ke lie hoga aur jaisa bhi hoga mujhe svikar hoga aisa chintan karen. man men yah dharna banaen ki ishvar ki kripa se main pratidin har prakar se achcha banta ja raha hun. isse shakti milegi aur bahut se kasht svatah hi dur ho jaenge. yah bhi sochen aur iska har samay smaran v uchcharan karte rahen- ''main kuch nahin hun, mere pas kuch bhi nahin hai. main kuch bhi nahin kar sakta hun. tu hi sab kuch hai. tum bin kuch nahin hai jivan ko tera hi sahara hai, tu hi palnhar hai.
'' yah ahankar aur moh ko dur karke ishvararpan, atmanivedan v shakti pradan karega. ishvararpan ki bhavna se apne kartavya nibhate rahegen to sukh pane ka marg svatah hi prashast hoga aur navagrah bhi ap par kuprabhav dalne se katrayenge. ap apni kshamataon ko pahchan kar pap, khatrnak bhav, ghrina, bari badha, adhik bolna aur buri bhavna, irshya v asatya ko tyag karke kisi ki alochna n karte hue, samay ke apavyay men bachte hue aj aur abhi apne vishvasniya mitra arthat apne hathon se utsah sahit karya men sanlagn ho jayenge aur sadaiv, sachchai imandari v vinamrata apnayenge to navagrah prabhavhin hokar shant ho jate hain. aise men ap atmavishvasi ban jayenge, vivek v dhairya apke sahyogi honge aur ap sahaj hi apna lakshya pa sakegen. paropkar ki bhavna, sabhi ko prasann dekhne ki ichcha apko ishvar ke karib le jane men saksham hai. aise vyakti par navagrah hamesha kripalu rahte hain.