maharashtra ki adhunik rajniti men sharad rav pavar mukhya hiro ki bhumika men hain. inhonne uddhav thakre ko vada kiya ki ve unhen maharashtra ka mukhyamantri banane me sahyog karenge. yah behad jatil karya tha lekin inhonne apni sujh-bujh ka parichay dekar apne mansubon ko anjam tak pahunchaya aur maharashtra ki rajniti men us thakre parivar ko shirsh par pahunchaya jiske pas maharashtra ki sarkar ka rimot kantrol hua karta tha. shivsena ke sansthapak bala saheb thakre maharashtra ke (nadbtvudamak apadahaddh kahe jate the. aj bala saheb thakre ke putra ko king banakar ye maharashtra ki rajniti ke chanakya ke rup me ubhre hain. adhunik maharashtra sarkar ka rimot kantrol inhin ke hath men rahega.
maharashtra ki rajniti men 23 navanbar 2019 ki subah ek aisa siyasi bhuchal aya jise ane vale kai dashkon tak yad rakha jayega. 23 navanbar ko ajit pavar ne apne chacha sharad pavar ka daman chor apne vidhayak sathiyon ke sath bi. je. pi. jvain kar li aur turant hi upmukhyamantri ki shapath bhi le li. abse lagabhag 41 sal pahle 1978 men kuch-kuch isi paristhiti men en. si. pi. ke vartaman pramukh sharad pavar bhi pahli bar mukhyamantri bane the.
julai 1978 men sharad pavar ne kangres yu parti ko torakar janta parti ke sath milakar gathbandhan sarkar banai thi aur 37 sal ki umra men ve sabse yuva mukhyamantri ban gaye the. ab unke bhatije ajit pavar ne unse alag rah pakar kar up mukhyamantri pad ki shapath li. halanki ve apni post ka lutf keval 2 din hi utha pae aur unhonne 25 tarikh ko hi istifa de diya aur vapis pavar khemen men laut gaye aur sharad pavar ke sath hath mila liya.
sharad pavar rajniti ke majhe hue khilari hain ve tin alg-alag samay par maharashtra rajya ke mukhyamantri rah chuke hain.
ek prabhavshali neta ke rup men apni pahchan banane vale sharad pavar kendra sarkar men bhi raksha aur krirshi mantri rah chuke hain. pahle ve kangres parti men the par san 1999 men unhonne apne rajnitik dal neshnlist kangres parti (en. si. pi.) ki sthapna ki rashtriya rajniti aur maharashtra ke kshetriya rajniti men unki gahri pakar hai.
rajniti ke sath-sath ve kriket prashasan se bhi jure hue hain. san 2005 se 2008 tak bhartiya kriket kantrol bord ke adhyaksh aur san 2010 se 2012 tak antarrashtriya kriket kaunsil ke bhi adhyaksh the. jun 2015 men munbai kriket aisosiyeshan ke dubara see adhyaksh banae gae.
rajniti ke dav-pench sharad pavar ji ne maharashtra ke purva mukhyamantri yashvant rav chaihan se sikhe. san 1967 me sharad pavar kangres parti ke tikat par baramti vidhan sabha kshetra se chunakar pahli bar maharashtra vidhan sabha pahunche.
1978 men kangres chorakar janta parti ke sath milakar sarkar banai aur maharashtra ke mukhyamantri banen.
1987 men fir se kangres parti men vapis a gaye 1989 ke lok sabha chunav ke bad jab bhartiya janta parti gathbandhan ne kangres ko kari takkar di to sharad pavar ne 12 nirdaliya vidhaykon se samarthan lekar sarkar banayi aur fir se mukhyamantri banen.
1993 men ek bar fir ve maharashtra ke mukhyamantri bane par un par bhrashtachar aur apradhiyon se mel-jol ke arop lage jisse inki rajnitik sakh bhi giri aur 1995 vidhan sabha chunav ke bad unhen istifa dena para. aur 1996 ke lok sabha chunav tak ve vipaksh ke neta rahe.
1999 men unhonne apni nayi parti en. si. pi. banai. 2004 ke lok sabha chunav ke bad sharad pavar yu. pi. e. gathbandhan sarkar men shamil huye aur krirshi mantri banaye gaye. san 2012 men unhonne 2014 ka chunav n larne ka ailan kiya taki yuva chehro ko mauka mil sake lekin en si. pi. ke adhyaksh ke nate rajniti men apni pakar ko majbut rakha.
rajniti v khel donon men dav pench lagane v bigrti baji ko apne paksh men karne ki kala men ve mahir hain. aiye jane jyotish ke aine se ki kaun se grah sharad pavar ko pavar dene ka karya kar rahe hain. jyotishiya vishleshn: sharad pavar ka janm 12 disanbar 1940 ko subah 7 baje baramti (maharashtra) men hua tha.
inki janmakundli men vrishchik lagn men dashmesh surya ashtamesh se sanyukt hai jiske falasvarup ye safal kutnitigya v safal rajnitigya hain. chandrakundli men guru, shani v chandra ki yuti bhi inhen kutnitigya v safal prashasak banati hai. chandrakundli ka panchmesh, dashmesh hokar janm lagan men buddhi ke karak budh se sanyukt hai tatha pancham bhavasth ketu v panchmesh ka gajkesri yog se sanpann hona inhen prakhar buddhiman banata hai.
chathe ghar (shatru bhav) par panch grahon ka prabhav tatha chathe se chathe ghar men rahu ki sthiti shatrupaksh par bhari parne tatha chunavi dangal men vijyi hone ke lie shreshth yog hai. gyarhven bhav men rahu ki sthiti ke karan inke mitron ki sankhya atyadhik hai aur apne rajnaitik pratidvandiyon ko bhi apna mitra bana lete hain. inke mitra sabhi rajnaitik dalon men hain.
rahu ki shreshth sthiti rajniti ke kshetra men uchch koti ki saflta dilati hai. inka ekadash bhav ka rahu shubh hone ke karan 1978 men rahu ki mahadsha v shukra ki antardasha ke samay uchch rashi ke bhagya bhav men tatha shani ke dasham bhav men gochar ke samay inhen matra 37 varsh ki avastha men maharashtra ka mukhyamantri banne ka gaurav prapt hua.
1984 men inhonne pahli bar lok sabha chunav jita tha, us samay gochriya shani uchcharashisth the tatha guru dasham bhav par drishti dal rahe the.
march 1985 men inke parakram bhav par guru v shani donon ka sanyukt gochriya prabhav tha jabki rahu chathe bhav men gochar kar raha tha. is jabaradast parakram yog ke falasvarup ye vidhan sabha men virodhi dal ke neta chune gae.
farvri 1990 men dhanesh ki mahadsha v ashtamesh ki antardasha men dhan bhav v ashtam bhav par guru v shani ke gochriya prabhav tatha parakram bhav par rahu ke gochar ke samay ye punah maharashtra ke mukhyamantri chune gae.
1995 ke chunavon men yadyapi mukhyamantri ka pad inke hath se nikal gaya parantu virodhi dal ke neta chune gae. is samay guru ki dasha men lagn par shani v guru ka gochriya prabhav tha.
1998 men ye 12vin loksbha men virodhi dal ke neta bane. is samay inki sarhesati chal rahi thi. sarhesati ke samay rajneta ko bari jimmedari milti hai. is samay dasham bhav men rahu gochar kar raha tha tatha gochriya guru ki drishti dasham bhav par thi.
2004 men tatha 2009 men punah inhen yu. pi. e. sarkar men krirshi mantri ka pad prapt hua.
2004 men dasham bhav par guru v shani ka sanyukt gochriya prabhav tha.
2009 men dasham bhav par shani ka gochar chal raha tha.
abhi vartaman samay men lagnasth ashtamesh budh ki dasha chal rahi hai tatha dhan bhav par anek grahon ka gochriya prabhav a raha hai jo inke lie pad pratishtha prapti karak hai. islie uddhav sarkar ka rimot kantrol inke hath men a gaya.
varsh 2020 se 2023 ke madhya inka rajnitik rutba barhega parantu svasthya men yada kada pareshaniyan ati rahengi.