koi vastu kho gai hai vah milegi athva nahin? yadi koi prashnakarta panch pakshi visheshagya se kisi khoi hui vastu ke bare men puchta hai to vyakti ke janmapakshi ke gatividhi ke anusar is prashn ka satik uttar diya ja sakta hai. yadi prashn karte vakt janm pakshi khane ki gatividhi men sanlagn ho to vastu ghar men hi kahin n kahin hai. thik se khojne par uske mil jane ki sanbhavna hai. yadi prashn puchte vakt janmapakshi ghumne ki gatividhi men ho to vah vastu kisi ke dvara chura li gai hai tatha vah kafi dur le jai ja chuki hai. yadi prashn ke samay janmapakshi shasan karne ki gatividhi men sanlagn ho to vastu ke parosi ke ghar men hone ki sanbhavna hai. kintu yahan yah bat dhyan men rakhna avashyak hai ki parosi ke ghar ap vah vastu svayan bhul ae hain n ki parosi ne chori ki hai. yadi prashn ke samay janmapakshi sone ki gatividhi kar raha ho to vastu ko ghar ae kisi agantuk ne chura liya hai tatha vah apne sath lekar gaya hai. yadi prashn ke samay janm pakshi marne ki gatividhi men shamil hai to jis kisi bhi chij ki hani hui hai chahe vah dhan ho athva svarn vah kabhi vapas nahin milega. man lijie ki vah sada ke lie apke pas se chala gaya tatha yah hani sthai rup se ho gai.
janm pakshi ki gatividhi ke anusar prashn ke uttar man lijie ki prashn kisi chij ke khone athva chori hone ka hi hai to yadi janm pakshi shasan karne ki gatividhi men sanlagn hai to vibhinn pakshiyon ke fal nimn prakar se honge:
1. yadi janm pakshi giddh hai to jo koi bhi vastu khoi ya chori hui hai vah kisi ghar ae agantuk ne li hai kintu vah mil jaega.
2. yadi janm pakshi ullu hai to vastu kisi yuva kanya ke hath men par gai hai tatha koshish karne se vastu mil jaegi.
3. yadi janmapakshi kaua hai to vastu kisi yuva kunvare vyakti ke hath lagi hai tatha vah baramad ho jaegi.
4. yadi janmapakshi murga hai to vastu kisi talab athva nadi ke kinare hai tatha uski baramdgi men sandeh hai.
5. yadi janmapakshi mor hai to vastu ko kahin jamin ke andar gar diya gaya hai tatha uski baramdgi mushkil hai.
janm pakshi ke anusar prashn ke uttar yadi uparyukt prashn ke uttar janmapakshi ke anusar diye jayen to nimnankit uttar ki sanbhavna hai:
1. yadi janmapakshi giddh hai to kisi purush ne us vastu ko churaya hai.
2. yadi janmapakshi ullu hai to kisi mahila ne us vastu ko churaya hai.
3. yadi janm pakshi kaua hai to vah vastu pani rakhne ki jagah par athva kahin jal srot ke nikat le jaya gaya hai.
4. yadi janmapakshi murga hai to vastu ko kahin jamin ke niche gar diya gaya hai ya kuen men fenk diya gaya hai.
5. yadi janmapakshi mayur hai to vastu ko ghar ke andar athva bagiche men kahin gar diya gaya hai tatha uski baramdgi mushkil hai.
garbh kal men bachche ke janm se sanbandhit prashn ke uttar yadi yah prashn kiya jay ki mahila ko hone vala bachcha larka hoga athva larki to iska uttar janmapakshi ki gatividhi ke anusar nimn prakar se hoga: yadi prashn ke samay janmapakshi shasan karne ki gatividhi athva khane ki gatividhi men sanlagn ho to hone vala bachcha larka hoga. yadi prashn karte samay janmapakshi ghumne athva sone ki gatividhi men sanlagn ho to kanya ka janm hoga. kintu yadi prashn karte samay janmapakshi marne ki gatividhi men sanlagn ho to hone vala bachcha kinnar hoga.
kisi prashn ka uttar han ya n men dena
1. yadi prashn puche jane ke samay janmapakshi khane ki gatividhi men sanlagn ho to us prashn ka uttar sakaratmak arthat han men hoga.
2. yadi prashn puche jane ke samay janmapakshi ghumne ki gatividhi men sanlagn ho to yatra par gaya vyakti shighra lautega athva kisi naye atithi ka agaman hoga.
3. yadi prashn puche jane ke samay janmapakshi shasan karne ki gatividhi men sanlagn ho to us prashn ka uttar sakaratmak arthat han men hoga. iske atirikt jatak ko dhan evan gahne, jevar ki prapti hogi.
4. yadi prashn puche jane ke samay janmapakshi sone ki gatividhi men sanlagn ho to bimar vyakti thik nahin hoga tatha kuch buri khabar sunne ko milegi.
5. yadi prashn puche jane ke samay janmapakshi marne ki gatividhi men sanlagn ho to us prashn ka uttar bilkul nakaratmak arthat n men hoga.
kaise janen ki prashn bhut, vartaman athva bhavishya se sanbandhit hai? prashn puchte vakt yadi janmapakshi ullu athva mayur ho to prashn bhut kal se sanbandhit hai. yadi janmapakshi murga hai to prashn vartaman se sanbandhit hai. yadi janmapakshi giddh athva kaua hai to prashn bhavishya se sanbandhit hai. yatra par gaye vyakti se sanbandhit prashn yadi janmapakshi giddh hai to vyakti yatra se vapas laut raha hai. yadi janmapakshi ullu hai to vyakti vapas lautakar ganv ki sima men pravesh kar chuka hai. yadi janmapakshi kaua hai to vyakti turant ghar pahunchne vala hai. yadi janmapakshi murga hai to vyakti ghar pahunch chuka hai. yadi janmapakshi mayur hai to vyakti 15 minat ke andar ghar pahunch jayega. prashn ka uttar kitne din men pura ho jayega? yadi janmapakshi murga hai to ichcha purti men char din ka samay lagega. yadi janmapakshi giddh hai to ichcha purti men panch din ka samay lagega. yadi janmapakshi kaua hai to ichcha purti men tin din ka samay lagega. yadi janmapakshi mayur hai to ichcha purti men ek din ka samay lagega. yadi janmapakshi ullu hai to ichcha purti men tin din ka samay lagega. durghatana men sharir ka kaun sa ang prabhavit hua hai? yadi janmapakshi khane ki gatividhi men sanlagn hai to sir ka hissa durghatana men prabhavit hua hai.
yadi janmapakshi sone ki gatividhi men sanlagn hai to sir evan chehre ka hissa durghatana men prabhavit hua hai. yadi janmapakshi shasan karne ki gatividhi men sanlagn hai to chati ka hissa durghatana men prabhavit hua hai. yadi janmapakshi ghumne ki gatividhi men sanlagn hai to pair ka hissa durghatana men prabhavit hua hai. yadi janmapakshi marne ki gatividhi men sanlagn hai to kulha evan piche ka bhag durghatana men prabhavit hua hai. chori karke chor kitna dur gaya hai? yadi janmapakshi kaua hai to chor kafi dur chala gaya hai. yadi janmapakshi ullu hai to chor dur chala gaya hai. yadi janmapakshi murga hai to chor najdik hi hai. yadi janmapakshi mayur hai to chor bilkul pas men hai. yadi janmapakshi giddh hai to chor itna dur chala gaya hai ki use pakrna sanbhav nahin hai. chor ki umra kitni hai? yadi janmapakshi giddh hai to chor koi burha vyakti hai. yadi janmapakshi ullu hai to chor koi yuva vyakti hai. yadi janmapakshi kaua hai to chor koi praurh vyakti hai. yadi janmapakshi murga hai to chor koi nata evan madhya ayu ka vyakti hai. yadi janmapakshi mayur hai to chori men do log shamil hain evan donon vriddh hain.