pi. chidanbaram yu. pi. e. sarkar men grihmantri ke pad par virajman hain. anna hajare ke anashan ke samay se hi unke upar kai tarah ke arop lag rahe hain. abhi hal hi men jab hai kort ke samne atanki hamla hua tha us samay bhi unki alochna hui. aiye dekhte hain grah nakshatron ke madhyam se ki chidambaram ke sitare kya kahte hain unke bare men. mamanniya shri palaniappan chidanbaram ji ka janm mithun lagn tatha dhanu rashi men hua lagnesh chaturthesh budh parakramesh surya ke sath buddhaditya yog bana raha hai jis par shani ketu ki drishti bhi hai.
jo nam samman gyan to deta hai sath hi ahankar aham gussa, mitbhashi, lagan, akelapan bhi deta hai unhonne bachapan men sangharsh kiya hai, ve bahut hi svabhimani vyakti hain ve har manne vale vyakti nahin hain. balki lagatar prayatn karne vale vyakti hain. dvitiyesh chandrama ketu ke sath saptam men ashtamesh bhagyesh shani tatha shashthesh labhesh mangal uchch ke rahu se drisht hai. jo dhan ki lalsa ya dhan ke prati adhik ruchi paida karta hai. parivar kutunb ka sukh nahin milne deta. patni se vicharon ki bhinnata aur patni ka svasthya prabhavit karta hai, pet ki shikayat ya pet se sanbandhit rog bhi deta hai.
dvitiya sthan men shukra sthiti ke karan bahut kamjor ho gaya hai arthat samy-samay par dhan ki kami, amdni se adhik kharch ki sanbhavnaen bani rahti hain. bachapan men dhan ki kami mahsus hui hogi parakramesh surya lagnesh chaturthesh ke sath yogkri ban gaya hai jo vyakti ko sajag prayatnashil, nirbhik, uchch, prashasnik kshamata vala vyakti banata hai. sath hi vyakti sunta to sabhi ki hai lekin karta apne man ki hai chaturthesh budh achcha nahin, inke mitra kam aur shatru adhik bante hain. inhen mitron se koi labh nahin milega.
chaturth sthan ka brihaspati dashmesh saptamesh hokar doshi ban gaya hai arthat unhen samay samay par svasthya sanbandhi pareshaniyan jaise- bavasir, akhon ki roshni, najar sanbandhi pareshaniyan hoti rahengani, unhen kamjori, ghabrahat hoti rahegi. panchmesh vyayesh shukra dvitiya sthan men kamjor hain jo vyakti ko chalak, buddhiman, ahankari, viveki banata hai, sath hi uchch shiksha bhi dilata hai. shashtesh labhesh mangal shani rahu ke sath lagn men achcha nahin arthat 1 agast 1982 se 1 agast 1989 tak aepreshan, chot ke yog the. yah kal khand achcha nahin tha. saptamesh dashmesh brihaspati chaithe ghar men kuch kamjor aur doshyukt hai jo danpatya sukh tatha sthirta ke lie achcha nahin ashtamesh bhagyesh shani lagn men achcha hai.
inki janmakundli men sabhi grah sirf panch gharon men mala tatha mahabhagyashali yog ka srijan kar rahe hain. isilie ye vitt mantri tatha grih mantri ke uchch padon ko matra 67 varsh ki umra men prapt kiye. lekin lagn men shani mangal rahu ki sthiti achchi nahin, jo unke nam samman yogyata ko samy-samay par prabhavit karegi svasthya bhi prabhavit hoga. saptam men chandrama ketu ki sthiti achchi nahin, ek rajniti se jure vyakti ke lie yah yog vyakti ko sarvajnik jivan men nahin ane deta hai, vyakti bhir ya do se adhik vyaktiyon ke bich nahin jata, n hin sanbandh banae rakhta hai aur bhir men gaya bhi ya sanbandh banane ki koshish ki bhi to uska prabhav hamesha ulta hi parta hai vyakti janapriya ya lokapriya nahin ban pata hai.
ashtamesh lagn men achcha nahin lekin bhagyesh bhi hone par achcha ban gaya hai. dashmesh brihaspati chaturth sthan men achcha hai lekin yah brihaspati doshi bhi hai jo ab kisi bhi sthiti se achcha nahin hai jo inhen kabhi bhi pad tyagne ke lie majbur kar sakta hai. labhesh shashthesh mangal lagn men rahu shani ke sath achcha nahin jo svasthya danpatya jivan pad pratishtha ko prabhavit karta rahega. vyayesh panchmesh shukra dhan sthan men kamjor sthiti men sthit hai jo dhan kutunb ke lie achcha nahin vinshottari kram men unki brihaspati ki dasha chal rahi hai.
jo 01 agast 2023 tak chalegi jo ki achchi nahin hai. 1 aprail 2012 tak ka samay bahut hi kharab samay hai unhen apna pad manniya nyayalay ke adesh se tyagna par sakta hai, khas karke 10 aktubar 2011 se 30 navanbar 2011 tak man samman ki drishti se samay achcha nahin. 01 agast 2023 tak unhen kai bar apmanit hona par sakta hai. rajnitik jivan bhi prabhavit hoga savdhani rakhen. age bhi samay achcha nahin hai.