nitish ji ka janm bihar ke patna jile ke bakhtiyarpur men 1 march 1951 ko hua tha. inke pita svatantrata senani the. nitish ji ne ilektrikal injiniyaring men digri hasil ki aur kuch samay tak bihar rajya vidyut nigam men kam bhi kiya lekin bad men naukri chorakar puri tarah rajniti men sakriya ho gaye. 1970 ke dashak men jab indira gandhi aur kangres sarkar ki nitiyon ke khilaf pure desh men gussa tha aur jayaprakash narayan ke netritva men bihar ke sath pure desh men andolan chal raha tha tab jayaprakash narayan ke sanpurn kranti ke ahnan par nitish ji bhi is andolan se jur gaye aur je. pi. ke is andolan men kendra ki indira sarkar ko girane men aham bhumika nibhai. nitish ji ne apne rajnaitik jivan ki shuruat janta parti ke karyakatrta ke taur par ki. inka shuruati safar dheron mushkilon se bhara tha. 1977 men jab janta dal apne pure parvan par tha tab nitish babu ko vidhan sabha chunav men har ka munh dekhna para.
bihar ke kurmi samuday ke pramukh neta hone ki vajah se inhen ek bar fir 1980 men vidhan sabha chunav men bhagya ajmane ka mauka diya gaya. lekin is bar bhi har hi inke hisse men ai. lagatar do bar harne ke bad bhi inka atmavishvas nahin tuta. parivar ke dabav ke bavjud ye rajniti ke maidan men date rahe. lagatar kam karte rahe aur in prayason ke karan ek bar fir 1985 men inhonne apna bhagya ajmaya aur is bar vijay shri inke sath rahi. 1987 men inki netritva kshamata ke karan inhen yuva lokadal ka adhyaksh chuna gaya aur is jit ke bad inhonne kabhi piche murakar nahin dekha aur rajniti men inka kad barhta gaya. 1989 men inhen janta dal ka pradesh sachiv chuna gaya aur pahli bar lok sabha chunav larne ka mauka mila. is chunav men inhen jit mili aur sansad ke sath kendra men mantri banne ka mauka bhi mila. 1990 ke kendriya mantrimandal men inhen krishi rajya mantri ka pad prapt hua.
2000 men ye pahli bar bihar ke mukhyamantri bane lekin inka karyakal mahaj sat din chal paya aur sarkar gir gai. atal bihari vajpeyi ki sarkar men inhen fir se 2001 men relmantri bana diya gaya, lekin ye bihar ki rajniti men bhi sakriya rahe aur 2005 men inhen fir se purn bahumat ke sath bihar ka mukhyamantri banne ka mauka mila. inhonne bhajpa ke sath gathbandhan ki sarkar banai aur 2010 men tisri bar bhi apne behtrin kam ki vajah se bihar ke mukhya mantri chune gaye. 2014 ke loksbha chunav men bhajpa ki or se narendra modi ko pradhanmantri ummidvar ghoshit karne par ye endi. e. se bahar ho gae aur lalu yadav ki parti rashtriya janta dal se gathbandhan kar liya. 2014 ke lok sabha chunav men halanki inki parti ki jabardast har hui aur inhonne apne pad se istifa de diya. iske uprant 2015 ka vidhan sabha chunav inhonne rajad ke sath gathbandhan kar lara aur is chunav men bhi inke gathbandhan ko bahumat mila aur ye punah bihar ke mukhyamantri ban gaye.
lekin nitish ji ke vichar lalu ji se kafi bhinn the. majburi men ye sarkar chal rahi thi. pichle kuch samay se nitish ji modi ji ki khilafat karne ki bajay unki nitiyon ka samarthan kar sabko chainka rahe the aur hal hi men 27 julai ko tejasvi yadav v lalu yadav se bigrte sanbandhon ke karan nitish ji ne 20 mahinon tak chali mahagthbandhan ki sarkar se achanak istifa de diya aur turant hi bhajpa ka samarthan prapt kar fir se panchvin bar bihar ke mukhyamantri ban gaye. nitish ji ki gahan kutniti aur rajniti ki sahi samajh unke rajnitik utthan men sada sahayak rahi hai. jyotishiya vishleshn: nitish kumar ji ka lagn mithun hai tatha us par saumya grah guru ki purn drishti hai islie inke svabhav men namrata, saumyata v sahnshilta ka bhav vidyaman hai. inki lagn kundli v chandra kundli donon hi bahut balvan hain. donon lagnon se kendra v trikon bhavon men adhikansh grah sthit hain.
isi balvan grah sthiti ke karan nitish ji apne praranbhik sangharsh ke bavjud lagatar saflta ki sirhiyan charhte chale gaye. inki kundli men panchmesh shukra dasham men mangal ke sath sthit hai aur chalit men rahu bhi hai islie inhonne ilektrikal injiniyaring men digri hasil ki aur fir rajniti ke kshetra men inhen saflta prapt hui. inki kundli men kutumbesh chandra apni nich rashi men chathe bhav men hone se inhonne parivarvad ko barhava nahin diya aur vanshvad ki rajniti se dur rahe. inke putra bhi injiniyar hain kintu rajniti se dur hain. patni manju rani bhi ab is duniya men nahi hain aur kafi pahle hi inka sath chor chuki hain. inki kundli men bhagya, dharm bhav men chaturgrahi yog banne se inke dil men sabhi dharmon ke prati sadbhav tatha sadhu, sant, fakiron ke prati purn astha v sadbhav hai. inki kundli men kuch bahut achche yog ban rahe hain. malavya mahapurush yog - shukra ke dasham men apni uchch rashi men hone se yah yog ban raha hai aur inhen apne rajnaitik jivan men uchch pad pratishtha ki prapti ho rahi hai.
pravrajya yog: navam bhav men char grah hone se is yog ka nirman ho raha hai jiske falasvarup ye svachch prashasnik vyavastha kayam karne ke karan sushasan babu ke nam se bhi jane jate hain. inke upar koi bhrashtachar ke dag nahin hain aur jab bhi inhen kuch apattijanak laga to inhonne apna tyagapatra de diya. budhaditya yog - navam bhav men surya aur budh ki yuti se yah yog ban raha hai aur iske falasvarup inmen tivra buddhi tatha nirnay lene ki kshamata bhi achuk hai. abhi inki shani ki sarhesati chal rahi hai jiski vajah se inke rajnaitik jivan men kuch uthl-puthal bhi hui lekin vijay shri inhin ke sath rahi. aisa dekha gaya hai ki rajnitigyaon ke jivan men sarhesati satta prapti men vishesh sahayak rahti hai. nitish ke rajnaitik jivan men bhi saflta ka agaj 1985 men sarhesati ke samay men hi hua aur uske bad unhonne piche murakar nahin dekha tatha 30 varsh tak ye nirantar apni pahchan banate rahe aur 30 varshon ke pashchat jab aisa lagne laga ki ab unki rajnitik saflta ka surya ast hone vala hai to shani maharaj ne apna 30 varshiya chakkar pura karke fir se sarhesati ke dvara inke rajnaitik kad ko barkrar rakhte hue sabhi ko achanbhit kar diya.
sarhesati ke prabhav se hath se fislti satta majbuti se punah sthapit hui aur vo bhi adhik sashaktikaran ke sath aur inke shatru hath malte rah gae. age bhavishya men agami das varshon tak inhen rajniti men aur adhik unche pad v pratishtha ki purn sanbhavnaen hain. rajniti men saflta ke karak rahu ki mahadsha bhi abhi ek dashak se lanbe samay tak chalegi. 26 aktubar ke bad bhagya bhav men ban rahe chaturgrahi yog par guru v shani ke sanyukt gochriya prabhav se inka vishesh bhagyoday hone ka yog banega. 2029 tak rahu ki mahadsha tak inka rajnitik safar uchch sopan par kayam rahega aur rajniti ke kshetra men ye nit naye mukam hasil karenge.