prachin granthon men nakshatra gyan ko hi jyotish shastra kaha gaya hai falit jyotish ki sukshmata tak pahunchne ke lie nakshatron ka gyan hona avashyak hai. jiv jis nakshatra men janm leta hai usmen usi nakshatra ke tatvon ki pradhanta hoti hai. jis tarah bhachakra ko 12 bhagon men bant kar pratyek bhag ko rashi kaha gaya hai, thik usi tarah jab bhachakra ko 27 bhagon men banta gaya to pratyek bhag ko nakshatra kaha gaya. nakshatra rashi se bhinn nahin mana gaya balki yah rashi ka hi ek man hai. rashi ka pratyek bhag 30 anshon ka hota hai aur nakshatra ka pratyek bhag 13°20sh anshon ka hota hai.
ek rashi men sava do nakshatra hote hain. fal kathan ki gahraiyon tak pahunchne ke lie hamare maharshiyon ne rashi ko age vibhakt kar nakshatra ko samjhana uchit samjha. in 27 nakshatron ke nam v kram is prakar hai:
1. ashvini,
2. bharni,
3. krittika,
4. rohini,
5. mrigshira,
6. adrra,
7. punarvasu,
8. pushya,
9. ashlesha,
10. magha,
11. pu.falguni,
12. u.falguni,
13. hast,
14. chitra,
15. svati,
16. vishakha,
17. anuradha,
18. jyeshtha,
19. mul,
20. purvasharha,
21. uttarasharha,
22. shravan,
23. dhanishtha,
24. shatbhisha,
25. pu. bhadrapad,
26. u. bhadrapad,
27. revti janm kundli vishleshan aur fal kathan men inhin 27 nakshatron ka hi prayog kiya jata hai lekin shubhashubh muhurton ko nirdharit karm men 28 nakshatron ko liya jata hai.
28van nakshatra abhijit hai uttarasharha nakshatra ke chaturth charan ki 53 kala 20 vikla tak rahta hai. dusre shabdon men makar rashi ke 6 anshon 40 kala aur 20 vikla tak rahta hai. namakaran, vivah shadi adi muhurton men yah nakshatra ati sahayak hota hai. rashi ki tarah 27 nakshatron ke bhi svami grah hote hain jo is prakar hai ashvani, magha aur mul nakshatron ke svami ketu hai. bharni, purva falguni, purvasharha ka shukra, krittika, uttara falguni aur uttarasharha ka surya, rohini, hast aur shravan ka chandra, mrigshira, chitra aur dhanishtha ka mangal, adrra, svati aur shatbhisha ka rahu, punarvasu, vishakha aur purva bhadrapad ka guru, pushya, anuradha aur uttara bhadrapad ka shani aur ashlesha, jyeshtha aur revti ka budh svami grah hota hai. in sabhi 27 nakshatron ko age fir char charnon men vibhakt kiya gaya hai jisse purn bhachakra ke 108 bhag ho gae. islie lagabhag sabhi dharmon men 108 mankon ki mala jap ke lie banai jati hai.
ek mala ka jap brahmand ka ek chakra lagane ke barabar mana gaya hai. jis tarah nakshatron ke svami grah nirdharit kie gae hain usi tarah nakshatra ke pratyek charan ka bhi svami grah nirdharit kiya gaya hai. jo is prakar hai: 1 se 12 tak ke charnon ke svami kramshah mangal, shukra, budh, chandra, surya, budh, shukra, mangal, guru, shani, shani aur guru hai. is prakar isi kram se 13 se 24, 25 se 36, 37 se 48, 49 se 60, 61 se 72, 73 se 84, 85 se 96, 97 se 108 charnon ke svami grah hai. inhin nakshatron ke svami grah aur nakshatra charnon ke svami grah se hi fal kathan ki gahraiyon ko jana jata hai. pratyek grah jo khagol men najar ata hai kisi n kisi rashi, nakshatra aur nakshatra charan par hi hota hai. janm samay jatak ki kundli men kaun sa grah kis rashi nakshatra, nakshatra charan par hota hai usi par jatak ka purn jivan adharit hota hai. jatak ka janm nakshatra jatak ki kundli men chandra ki sthiti anusar mana gaya hai.
chandra kyonki prithvi ke sabse nikat hai islie chandra ka prabhav jatak par adhik mana gaya hai. islie chandra jis nakshatra ya nakshatra charan par sthit rahta hai vahi jatak ka janm nakshatra charan mana jata hai. jatak ke janm nakshatra ke adhar par hi jatak ka namakaran kiya jata hai. chandra nakshatra ke adhar par hi vinshottari dasha nikali jati hai. nakshatra ka sanbandh chandra se to vishesh rup se hota hi hai lekin iske atirikt pratyek grah aur bhav ka bhi nakshatron se sanbandh hota hai. har grah kisi n kisi nakshatra charan men hota hi hai. islie grah nakshatra ke anusar hi apna prabhav jatak ke jivan par dalte hain. isi tarah lagn arthat pratham bhav se lekar dvadash bhav tak. sabhi bhav kisi n kisi nakshatra aur nakshatra charan par hi udit hote hain usi nakshatra anusar hi jatak ko un bhavon ke fal prapt hote hain. jatak ke jivan ke jis pahlu ko janna ho uska sanbandh jis bhav se ho, sarvapratham use jan lena avashyak hai. pratyek bhav men jo nakshatra janm sam udit hota hai. jatak ko us bhav ka fal us nakshatra ke anusar hi milta hai. fir us bhav men baithe grah ka fal bhi usi ke anusar prapt hota hai. yadi grah nakshatra, bhav nakshatra ek hi ho to fal ati uttam hota hai, bhinn hone par fal men nyunta a jati hai. isitarah yadi ek ya ek se adhik grah ek hi bhav men ek hi nakshatra par baithe hon to jatak ko us bhav ka uttar fal prapt hota hai. ismen bhi yah dekhna avashyak hai ki bhav men sthit grah shubh kitne hain aur ashubh kitne kyonki nakshatra ke anusar grahon ki shubhashubhta badal jati hai. yadi shubh grahon ka palra bhari hoga to fal ati uttam hoga.
udaharan ke taur par man lo kisi jatak ke vyavsay ko janna hai vyavsay ka sanbandh dasham bhav se hota hai. ham bhav men jo nakshatra janm ke samay udit hota hai jatak ka vyavsay us nakshatra aur charan ke svamiyon par nirbhar karta hai. yadi dasham bhav men udit nakshatra v nakshatra charan svamiyon ka sanbandh lagn men udit nakshatra aur nakshatra svami se maitri sanbandh ho, to jatak vyavsay men uchch sthan prapt karega anyatha nyun sthan. iske atirikt bhav men baithe grah, grah ke nakshatra evan nakshatra charan ke svamiyon ka sanbandh bhi maitri hona chahie. yadi koi grah dasham bhav men sthit nahin hai to dasham bhav par parne vali grahon ki drishti ka mulyankan karna chahie. yadi dasham bhav men koi grah sthit nahin ho aur n hi dasham bhav par kisi grah ki drishti ho to vyavsay dasham bhav men udit rashi nakshatra v nakshatra charan ke svamiyon ke anusar hi hoga. jaise man lo kisi ki kundli men dasham bhav par kunbh rashi rahu nakshatra aur shani ka charan hai to jatak ko vyavsay men vishesh saflta prapt hogi. kyonki rashi svami shani nakshatra svami rahu, charan svami shani tinon men apsi maitri sanbandh hai. isi tarah se kisi bhi bhav se sanbandhi jankari prapt ki ja sakti hai. do jurva bachchon men isi karan antar hota hai. kyonki bhavon ke nakshatra charan badal jate hain. jaise man len ki jatak janm kanya rashi ke 15 anshon par hua. 15 ansh par hast nakshatra ka dusra charan hota hai.
hast nakshatra kanya rashi ke 10 anshon se shuru hokar uske 23 ansh 20 kala tak rahta hai. hast nakshatra ke charon charnon ke svami grah kramshah mangal, shukra, budh evan chandra arthat hast nakshatra ke pratham charan men janme jatak par rashi svami budh aur nakshatra svami chandra aur charan svami mangal ka dvitiya charan men janme jatak par rashi svami budh nakshatra svami chandra aur charan svami shukra ka, isi tarah tisre charan men budh chandra aur budh, chaturth men budh chandra, chandra ka samavesh prabhav rahega. jisse pratyek charan par janmen jatkon ke svabhav men antar bana rahega yah antar charan svami ke bhed ke karan hota hai. jyotish ke panch angon men se ek ang nakshatra ka fal kathan ke atirikt nakshatra var-vadhu milan men bhi vishesh rup se sahayak hota hai. ashtakut milan men tara, yoni, gan aur nari milan nakshatra par hi adharit hoti hai. inke kul ank 21 hote hain. jabki ashtakut 36 ankon ka hota hai. vaise to kundli milan men pratyek kut apna vishesh mahatva rakhta hai. lekin yoni, gan aur nari bahut hi mahatvapuurn kut hote hain. jinka milan ati avashyak hai. yah milan nakshatra par hi adharit hai. gandmul nakshatron ka bhi janam samay vishesh vichar kiya jata hai.
vidvanon ka manna hai ki gandmul nakshatra men janm lene vale jatak apne mata-pita ke lie kashtakari hote hain. ye nakshatra chah hai jo ashvini, magha, mul, ashlesha, jyeshtha aur revti namon se jane jate hen. in nakshatron ka fal charnanusar evan janm samyanusar bhinna-bhinn hota hai. jaise gandmul nakshatra ka jatak yadi din men janma ho to pita ke lie, ratri men janma mata ke lie, pratahkal ya sayankal men janma ho to apne lie anishtakari hota hai. bare hokar gandmul men janmen bhagyashali, uchch padon par karyarat pratishthit evan dhanvan hote dekh gae hain. muhurton men bhi nakshatron ka vishesh sthan hai lagabhag sabhi muhurt nakshatron par hi adharit hai. vaise to jyotish ke panchon angon se muhurt nikale jate hain lekin panchon men se nakshatra ka sthan sarvottam hai. abhijit nakshatra ya abhijit muhurt men sabhi karya kie ja sakte hain yadi koi aur muhurt n ban raha ho.