kai bar jivan men aise mor ate hain ki vyakti nahin chahte hue bhi kuch najayaj kar baithta hai aur samay ka badlav use jayaj thahra deta hai. aisi hi ek satya ghatna ka varnan kiya gaya hai is lekh men. dekhte hain aisi ghatnaon ko jyotishiya drishti se. didisha ke vivah ko ek varsh ho chala tha. ab uski sasu man aur man donon hi majak-majak men usse kai bar kah chuki thin ki bahut masti kar li, ab hamen bhi kuch apne nati se masti karne ka mauka do. disha sharma kar rah jati.
disha aur nishith donon ne yahi socha tha ki ek sal khub ghumenge, firenge aur masti karenge aur ek sal ke bad hi apni grihasthi ko age barhayenge. islie donon ne yahi faisla kiya ki ab unhen do se tin ho jana chahie. disha ko bachche vaise bhi bahut priya the. apne vivah se pahle uske bhai ka beta bhi usi ke sath chipka rahta tha aur vah bhi use jijan se pyar karti thi. ab disha ek pyare se bachche ke sapne dekhne lagi aur use laga ki vah shighra hi matritva ka sukh uthane ke lie taiyar ho gayi hai. isi tarah chah mahine bit gaye to disha ko kafi chinta hone lagi aur nishith ko usne apni chinta batai to usne kam ka adhik bojh kahakar bat tal di.
aur uske sath kashmir ghumne ka program bana liya. vahan par das din ki mauj-masti karne ke bad disha kafi khush v shant thi. isi tarah chah mahine aur bit gaye. ab to uski man aur sasu man donon hi prashn bhari drishti se use dekhne lagin aur unhone daektar ke pas jane ki bhi salah de di. disha aur nishith ne jab daektar se salah li to pata chala ki nishith ke shukranu bahut kam hain jisse disha garbh dharan nahin kar pa rahi hai.
disha ko jabaradast dhakka laga. yah bat vah sabko khulakar bhi nahin bata sakti thi. use samajh nahin a raha tha ki vah apni pratikriya kaise dikhae. vah nishith ko bhi pareshan nahin karna chahti thi kyonki kami to donon men se kisi men bhi ho sakti hai. disha ne nishith ko bahut samjhaya ki vah chinta n kare, vahi uske lie sabkuch hai aur use bachchon ki koi jarurat nahin hai. vah sasu aur man donon ko sanbhal legi.
ghar akar usne kisi ko kuch nahin bataya aur vahi kaha ki daektar ne sab kuch thik bataya hai, kam ke tanav ki vajah se hi deri hui hai. aur akele men jakar disha khub roi. use samajh nahin a raha tha ki apna duahkh kisse kahe. isi tarah samay bitne laga. as-paraus men chote bachchon ko dekhakar disha ke dil men shul se chubhne lagte, vah un par apna dher sa pyar lutati aur andar hi andar uska dil rota ki kya vah kabhi apne bachchon ko nahin khila paegi.
apne gam ko bhulane ke lie vah aefis men der tak baithi rahti aur ghar ki bajae use aefis jyada achcha lagne laga. isi dauran uske sahakarmi tanmay se uski achchi dosti ho gai. vah us shahar men naya tha. islie disha use shahar ghumane bhi jati, kabhi kisi mal men ya kisi aitihasik sthal par ghumna donon ko achcha lagta. idhar nishith ki daektar se davai barabar chal rahi thi aur use vishvas tha ki davaiyon ka asar jarur dikhai dega. iske atirikt kitne hi tabij, gande v jyotishiya upchar bhi chal rahe the. ek din achanak disha ko aefis men hi rukna para.
yu.es.besd kampani hone ke karan unhen rat ko kafi der tak kam karna parta tha. tanmay bhi aefis men hi tha aur rat ko ekant men donon hi apni bhavnaon par kabu nahin rakh pae aur disha ne anjane men khud ko tanmay ko saunp diya. kafi dinon tak disha ek apradh bodh se yukt rahi, nishith vaise hi usse jyada kuch puchta nahin tha islie sab kuch purvavat chal raha tha ki achanak ek mahine jab disha ki tabiyat kharab hui aur daektar ne khush khabri sunai to nishith khushi se pagal ho gaya. usne mandir men, ghar men, aefis men sab jagah mithai bantvai aur har jagah se badhai ke sandesh milne lage. disha chahakar bhi usse kuch nahin kah pai.
vah uski khushi ko kayam rakhna chahti thi. use lagne laga, shayad usse jo anjane men ho gaya, vah shayad achche ke lie hi hua hai. use mahabharat ki ghatna yad ho ai jahan maharshi ved vyas ne shantnu ki putra vadhuon ko drishti matra se garbhavati kiya tha. use laga, jab hamare puranon men is kritya ko manyata-prapt thi, to aj kalyug men yah koi pap nahin hai.
isi tarah man ko samjhakar vah chup rahi aur apne ane vale bachche ki khushi men kho gai. samay par disha ne ek putra ko janm diya aur isi bich usne apni naukri badal li aur tanmay se bhi sanbandh nahin rakhe aur n hi use bhanak bhi lagne di. ab disha ka parivar bahut khush tha. achanak kuch varsh bad disha ko akele hi aefis ki taraf se videsh jana para aur vahan par uski dosti aur sanbandh ek aur navyuvak se hue.
disha ab ek bachche se santusht nahin thi. vah ek bachcha aur chahti thi, islie usne bharat ane ka pandrah din ka program banaya taki jab vah videsh se ek sal bad ae to dusre bachche ko bhi nishith ka nam de sake. aiye, dekhen disha ki janm kundli ke grahon ki chal jiske karan uski donon najayaj santan jayaj kahlain. disha ki kundli men lagnesh shukra dasham bhav men ketu ke sath shani aur rahu se drisht hokar sthit hai. shukra ke upar tin papi grahon ki drishti hai jiske karan vah apni ichcha purti ke lie samajik vyavastha se pratikul, sahas bhara kadam uthane se nahin hichkchati.
0 ansh ka saptamesh mangal dvadash bhav men labhesh surya tatha vyayesh budh ke sath yuti bana rahe hain tatha saptam bhav par mangal tatha guru ki drishti hai arthat uske apne pati se bhi achche sanbandh hain, par anyatra sanbandhon se bhi vah labh utha rahi hai. chandra lagn se vichar karen to saptamesh surya ashtam bhav men budh aur mangal ke sath sthit hai jo uske dusre sanbandhon ki taraf ishara karte hain. santan bhav ke svami shani ashtam men baithakar dasham drishti se apne ghar pancham bhav ko purn drishti se dekh rahe hain. man ka karak chandra dashmesh hokar pancham bhav men baithe hain aur santan karak guru sva rashi dhanu men sthit hai arthat bhav, bhavesh, bhav karak tinon ki sthiti santan prapti ke lie anukul hai.
islie usko bachchon se atyadhik prem hai tatha santan prapti men badha hote hue bhi use svayan ke prayas se santan prapt hui. kundli ko gahrai se janche to karm bhav ka svami chandrama pancham bhav men sthit hokar labh bhav ko dekh rahe hain. isi bhav se mitron ka bhi vichar hota hai arthat shani se drisht shukra aur ketu adhishthit rashi ka svami chandra, mitra evan labh bhav ko dekh raha hai. pancham bhav, panchmesh, dasham bhav, dashmesh, lagnesh v ekadash bhav ka sanbandh yahi dikhata hai ki disha ko apne karm kshetra ke mitra se santan sukh ka labh prapt hua aur ismen uska svayan ka nirnay hi mahatvapurn tha.
navansh men lagn men mangal, rahu tatha shukra ki sthiti uski jabaradast nirnay shakti ko bhi dikhati hai aur chunki koi bhi grah guru se drisht nahin hai islie vah samajik dayre ki parvah n karte hue apne anaitik nirnay ko bhi sahi karar deti hai. disha ki kundli men panchmesh shani se pancham men pap grah mangal surya tatha budh tin pap grah sthit hain jo lagn se dvadash aur pancham se ashtam sthiti men baithe hain. isilie disha ki buddhi ne is prakar ka nirnay liya. chunki saptam bhav guru se drisht hai isilie usko apne pati se bhi sahyog mil raha hai aur uski najayaj santan ko jayaj santan ka darja mil raha hai.