adhikatar ham jyotishi log janm kundli melapak karte samay samagra vishay par vichar n karke vivah ke lie salah de dete hain. gun milakar salah de dene se vaivahik jivan achcha nahin rahta, gun ke sath-sath grahon ka milan karna bhi avashyak hai. grah milan karte samay achcha svasthya, shalin prabhav, achcha bhagya, samuchit shiksha, pativrata yog, santan sukh, ayu, rog, daridra, vishakanya yog, vyabhcharini yog evan vidhva yog ityadi vishay par vichar karna ati avashyak hai.
sath-sath bhog upbhog, rati sukh, kray shakti ityadi vishay bhi vicharniya hai kyonki dampatya jivan ke lie ye vishay mahatvapurn hain. kai sthan par ye dekhne men aya hai, ki uprokt vishyon ki kami ke karan dampatya jivan men darar utpann hoti hai jiske karan talak ho jate hain. bahuvivah yog kai karnon se hote hen.
shastranusar bahuvivah ke vare men maharshi yagyavalkya smriti men kaha gaya hai- nasht mrite pravrajyite klive ch patite patau. panchasvapatsu narinan patiranyo vidhiyate.. arthat vivah ke vad pati yadi videsh chala jae aur barah varsh tak lautakar n ae, alp samay men mrityu ke vad, sanyasi ho jane par, pati ke napanusak hone ya pati ke durachari hone par, kanya ka vivah kisi anya purush ke sath kiya ja sakta hai.
parantu ajakal jis prakar bahuvivah ho raha hai vah ek khel ki tarah ban gaya hai, karan yah yug gandharva vivah (prem vivah) ki or chala gaya hai. kai log jyotishacharya ke pas jakar aj ke log vivah ka muhurt puchte hain ki fere kab lie jaen? parantu, yug ka prabhav itna hai ki fere lene ka sahi samay baind baja aur nach ganon men vyatit ho jata hai. log sochte hain ki jab kundli achchi tarah se mili ho, to muhurt ki kya upadeyta hai.
lekin jivan ke jorne ka samay agar vishakt ho jaega tab kya madhur dampatya jivan vyatit hoga? anek sanbandh kyon hote hain?: videsh men anek sanbandh aur anek vivah hote hain iska prabhav un desh men svikar nahin kiya gaya hai iska kya karan aur kaun se grahon ka prabhav hai? dekhne men aya hai ki shukra premakarshan evan kam vasna ka karak, chandra man evan stri ka karak hai.
islie videshi vyakti adhikatam gauravarn hote hain aur un deshon men chandra shukra ke karan anek sanbandh aur anek vivah hote hain. hamara jyotish shastra yah kahta hai ki chandra aur shukra ka sanbandh saptamesh ke sath ho evan pap grahon ki drishti ya yuti ho, to anek sanbandh hote hain. chandra, shukra ka vichar ati avashyak hai, prem vivah ka karan shukra hota hai.
karan ki shukra vilas, vasna, ratisukh, pranay, aveg, aindrikanand, vaibhav aur sanpurn dampatya sukh ka pratinidhi grah hai. shukra yadi mangal se sanbandh karta ho ya mangal ki rashi men hokar papakrant ho, to iska parinamasvarup vyakti ki vasna men prakhar uttejna ka samavesh hota hai.
shukra mangal ke sanbandh ko atikamatur yog kaha gaya hai. karan shukra rati-krira evan mangal uttejna ka karak hai. in donon ka sanbandh viprit ling ke prati akarshan utpann karke yaun sanbandh ki or le jata hai. agar shukra evan chandra par rahu ki drishti ho evan kark rashigat mangal ka sanbandh ho jae to vyakti vivahit stri se sanbandh rakhta hai. ek mahila jyotishi lekhika ke anusar yadi lagnesh saptam men ho aur saptamesh lagn men ho, to vyakti ka charitrik patan pradarshit hota hai.
mangal, shukra evan rahu ye tin grah prachur yaun sanbandh evan mithya vivah ka yog hota hai. vah apni premikaon ke unmukt bhog ka nimantran deta hai. yadi kisi kanya ki kundli men saptam sthan par rahu, shukra evan mangal ho, to alp umra men yaun anand ko upbhog karke jivan ko nasht karti hai.
mere vivchar se saptamadhipti ya shukra athva ye donon dvisvabhav rashigat hon ya dvisvabhav navmansh men ho to bhi ek se adhik vivah ya sanbandh hote hain. agar saptam bhav aur saptamesh par rahu ka prabhav ho to ye yog ban jata hai. mere anubhav se vichar karte samay lagn kundli, chandra kundli, surya kundli evan shukra kundli men vichar karne se uchit falit hota hai.
in sab kundli men yadi saptamesh ke sath mangal ka sanbandh ho to anek sanbandhon ka yog hota hai. agar aise yog ke sath-sath yadi shukra 6, 8, 12ven bhav par chala jae aur us par pap grahon ki drishti ho jaye to iska varnan vahin kar sakta hai, jo jiski kundli men ye yog ho yahan praman hoga. fir bhi ek pratyaksh udaharan ek jatak ki kanudli men milta hai.
ismen vichar karna hai ki lagn kundli: saptamesh surya mangal ke sath hai. aur surya mangal par ketu ki drishti hai. chandra kundli: saptamesh budh mangal ke sath hai aur us par bhi ketu ki drishti hai. surya kundli: saptamesh budh ke sath mangal ka hona. shukra kundli: saptamesh chandra par mangal ki drishti ka hona evan lagnesh shani par bhi mangal ki drishti hona evan shukra svayan lagn kundli se dvadash bhav par hai aur us par shani ki bhi drishti hai.
ab lagn kundli ke adhar par panchmesh, budh aur saptamesh surya ka ek sath hona evan mangal ki yuti ke karan vyakti charitrahin evan anek yaunsanbandh banata hai, yah ek pratyaksh udaharan hai. yah vyakti kai bar yaun sanbandh ke karan samaj se kalankit hua aur vivahit stri ko bhi apne pas rakhta hai.
bhishan tvacha rog ke karan iska shukranu nasht ho gaya tatha dae. tatha fijishiyan ke madhyam se jivndan mila hai. daktar ka kahna hai ki isko kabhi bhi santan ki prapti nahin hogi aur jyotish ka bhi yah sutra hai ki panchmesh aur saptamesh ki yuti, santanhinta ka yog hai. tatparya yah hai ki shukra, chandra ka vichar avashyak hai. bahu-vivah kyon hote hain: hastarekha dvara bhi is yeag ka akalan kiya ja sakta hai.
hastarekha mane budh parvat aur kanishthaka ungli ke niche vivah rekha hoti hai. yadi vivah rekha shakhaon men vibhajit ho, ismen ankush ya dvip ho, to ekadhik vivah ki sanbhavna hoti hai. yadi hriday rekha kati-fati ho, shukra parvat dava hua ho, angutha patla aur jhukta n ho, evan ungliyan patli aur ganth jaisi ho, vivah rekha par ankush ya shakhaain hon, to patni ki mrityu ke bad dusri shadi hoti hai. ankush jitne honge utni hi patni hoti hai.
janm kundli men bhi vicharniya yah hai ki:
- yadi saptamesh ashubh grah ke sath chathe, athve evan barhven bhav men baitha ho, evan saptam sthan par pap grahon ki drishti ho, to do vivah ka yog hota hai. sath men kanya ki kundli se bhi yahi vichar karna uchit hoga.
- mangal chathe, athve evan barhven bhav men ho saptamesh dvitiya sthan par ho aur saptam sthan par rahu v surya ki drishti ho, to talak ke bad dusra vivah hota hai.
- yadi kanya ki kundli men chathe bhav men mangal, saptam bhav men rahu, aur ashtam men shani ho, saptamesh nirbal ho to vidhva yog hota hai. do ya tin vivah ke bad dampatya jivan sukhi rahta hai.
- patni sthan aur patni se athvan sthan, ayu sthan (dvitiya sthan) se vichar karna avashyak hai. atah saptamesh aur dvitiyesh yadi shukra ke sath ho ya pap grahon se inka sanbandh ho, evan chathe, athve evan barhven bhav ka svami yadi saptam sthan par ho, to vaivahik jivan andhkaramay hota hai.
- saptam bhav ka karak evan guru ka, shukra yadi chandra se chathe ya athven bhav men ho aur shukra nich ka ho, to bhi bahu vivah ka yog hota hain.
- saptamansh evan trishansh kundli men yadi shukra, mangal ka sanbandh ho evan var kanya ki rashi shatru evan sharashtak ho, sath-sath janm lagn ka svami bhi sharashtak ho, to kisi ek ki mrityu ke bad punah vivah hota hai. lagn aur ashtam sthan ke svami jiska balvan honge vahi jivit rahega.
- chandra kundli men lagnesh, saptamesh ka kisi bhi prakar ka sanbandh hon, aur chandra ya shukra se mangal ka yuti sanbandh ho, to anek striyon se sanbandh rahta hai.
- yadi saptamesh shukra dvisvabhavagat rashi ka ho aur dvisvabhavrashisth rahu ki drishti saptam, saptamesh, shukra ya chandra par ho, to anek bar talak hota hai.
- navmansh kundli men yadi brihaspati svanvmansh (dhanu aur min) ka ho to aur pap kartari yog men ho tatha surya ki drishti saptam sthan par ho, to pati ke talak ke bad punah vivah hota hai.