samay ka pahla mapdand ank hai, kyonki jivan men jo kuch bhi ghatit hua hai, ho raha hai, ya hoga, use vyakt karne ke lie hamen ankon ka sahara lena parta hai. kisi bhi parinam ka praranbh aur ant ank hi hai.
jivan ka pratyek kshetra ank shastra se bandha hua hai. ank shastra se yah jana ja sakta hai ki aj ka din apke lie kaisa rahega ya kisi mahine ki kaun si tarikh apke lie achchi ya buri rahegi. is tarah ank shastra ka hamare jivan men mahatvapurn sthan hai.
buy detail numerology report
mulank: ank jyotish ka vartaman rup pashchatya sabhyata ki hi den hai, jiske anusar mulank ka adhar janm tarikh hai. tarikh ke ankon ko, ek se adhik ank hone par, jor kar mulank nikala jata hai.
namank: shreshth nam vyakti ki shreshthata ka parichayak hota hai. vastutah vyakti ke nam ka uske charitra, jivan evan karya-kalap par gahra asar parta hai. ek prasiddh pashchatya ank jyotishi ka kathan hai, ‘‘tum apna nam ya apne nam ka pahla akshar mujhe bata do, main tumhara sara charitra tumhare samne kholakar rakh dunga.’‘ is vidvan ke in shabdon men bara gurh rahasya chipa hua hai. sach hai ki ek shreshth nam hi vyakti ki shreshthata ka parichayak hota hai.
bhagyank: bhagyank ke prati sheksapiyar ne apna mat is prakar vyakt kiya hai, ‘‘kuch log janmajat mahan hote hain, kuch apne karmon ke bal par mahanta hasil karte hain aur kuch par mahanta thop di jati hai.’’
bhagyank ka mul adhar janm tithi hai. pashchatya vidvanon ke anusar jivan men mulank utna prabhavshali nahin hota, jitna bhagyank. kuch vidvan bhagyank ko sanyuktank ke nam se bhi pukarte hain.
bhagyank men janm tarikh, janm mas aur janm varsh ke ankon ka yog hota hai.
udahrnarth, yadi kisi vyakti ka janm 22-8-1973 ko hua ho to uska bhagyank is prakar nikala ja sakta hai-
janm tarikh = 22 = 2+2 = 4
janm mas = 8 = 8
janm varsh = 1973 = 1+9+7+3 = 20 = 2+0= 2
janm tarikh, janm mas aur janm varsh ka yog = 4+8+2 = 14 = 4+1 = 5.
is tarah, us vyakti ka bhagyank 5 hoga.
mulank 1: mulank 1 vale log adhikatar sahishnu, sahnshil evan ganbhir hote hain. inke jivan men nirantar utthan-patan hote rahte hain. unka jivan sangharshapurn hota hai. aise logon men netritva ki bhi bhavna prabal hoti hai. ye jis karya ko apne hath men lete hain, use achchi tarah nibhane evan sanpann karne ka samathrya bhi rakhte hain.
nit nae logon se sanpark sthapit karna aise logon ke vyaktitva ki visheshta hoti hai. inka parichay kshetra vistrit hota hai tatha ye navinta ki khoj men lage rahte hain. sharirik rup se aise log hrishtapusht evan svasth hote hain.
is ank se sanbdhit log yadi naukri pesha hon to uchch pad prapt karne ke prati cheshtarat rahte hain. agar ye vyapari hon to din-rat parishram kar vyapari varg men pramukh sthan bana sakte hain. ye nirnay lene men bahut hi chatur hote hain.
ye hamesha samaj aur jivan ke pratyek kshetra men parivartan lane ke prayas men rahte hain. ye ghisi-piti lik par chalne ke abhyast nahin hote. ye apne karya aur apni dhun men hi mast rahte hain. karya ke bich men toka-taki unhen pasand nahin hoti hai. inke vichar maulik hote hain aur kalpanashakti prabal hoti hai.
vishesh: inke lie shubh ratn manikya hai aur surya inke pradhan devta hain.
mulank: mulank 2 se sanbandhit log atyant kalpanashil, bhavuk, sahriday aur sarlchitt hote hain. ye n to adhik samay tak ek hi karya par sthir rah sakte hain aur n hi lanbe samay tak soch sakte hain. inke man men nit nae nae vichar ate rahte hain jinhen sakar dene ke lie ye satat prayasarat rahte hain.
sharirik rup se aise log balvan nahin hote. ye multah buddhijivi hote hain. ye mastishk ke star adhik sabal evan svasth hote hain, kintu atmavishvas ki unmen kami rahti hai, falasvarup ye turant koi nirnay nahin le pate.
saundarya ke prati inki ruchi parishkrit hoti hai. prem aur saundarya ke kshetra men ye maharthi kahe ja sakte hain. dusron ko sammohit karne ki kala men ye pravin hote hain. aprichit se aprichit vyakti ko parichit bana lena inke baen hath ka khel hota hai.
svabhav se shankalu hote hue bhi ye dusron ke hit ka pura khyal rakhte hain. kisi ko sidhe na kahna inke svabhav men nahin hota. dusron ke man ki bat jan lene men ye pravin hote hain. lalit kalaon men inki ruchi janmajat hoti hai.
vishesh: inke lie moti shubh hai aur chandra inke devta hain.
mulank 3: yah sahas, shakti evan dridhta ka ank hai. yah ank shram tatha sangharsh ka parichayak hai. is ank se prabhavit logon ko pag-pag par sangharsh karna parta hai.
svarth bhavna inmen kuch vishesh hi pai jati hai. kam parne par ye virodhi se ghul-mil jate hain aur kam nikal jane par use dur karne men bhi der nahin lagate. vicharon ko vyavasthit rup se abhivyakt karne men ye kushal hote hain. kintu dhan sanchay inke lie kathin hota hai. parishram karke kamane men ye din-rat lage rahte hain, par jo kuch kamate hain, vyay ho jata hai.
is ank ke jatak buddhiman, imandar aur udar hote hain, par koi uncha pad ya pramukh sthan milne par ho jate hain.
mulank tin ke jatak ati mahatvakankshi hote hain. ve shighratishighra unnati ke shikhar par pahunch jana chahte hanai. chota kad, chota kosh evan chota karya inhen pasand nahin hota hai.
vishesh: inke lie pukhraj shubh hai aur inke devta vishnu hain.
mulank: 4 yah mulank visheshtah uthl-puthal se sanbandhit hai. is ank se prabhavit log jivan men shant banakar baithe rahen, yah sanbhav hi nahin hai. ye satat kriyashil rahte hain. inhen pag-pag par bhari badhaon ka samna karna parta hai.
inki bhagyonnati men utar-charhav ate rahte hain. svabhav se ye bare krodhi evan tunkmijaj hote hain. inki ichcha ke pratikul karya hone par ye ape se bahar ho jate hain, lekin jis gati se krodh charhta hai, usi gati se utar bhi jata hai. aise log apni gupt baton ko man men dabakar rakhte hain. inke man men kya yojna hai ya agle kshan ye kya kadam uthane ja rahe hain, iski bhanak tab tak kisi ko nahin hoti, jab tak ye yojna ko kriyanvit n kar len.
is ank se prabhavit logon ke jivan men shatruon ki kami nahin rahti . ye ek shatru ko parast karen to das nae shatru paida ho jate hain. yadyapi inki pith piche shatru shadyantra karte hain, par samne kuch bhi nahin kar pate.
vishesh: inke lie nilam shubh hai aur bhairav inke aradhya dev hain.
mulank 5: mulank 5 ke jatak nai se nai yuktiyon, nae se nae vicharon evan sarvatha nutan tarkon se anupranit rahte hain. ye purnatah kriyashil rahte hain, jhukte nahin, jhukane men vishvas rakhte hain.
dusron ko sammohit karna aise logon ka sabse bara gun hai. kuch hi kshanon ki batchit men ye dusron ko apna bana lete hain.
yatraen inke jivan ka vishesh ang hoti hain, parantu ye apne karya men itne vyast rahte hain ki chah kar bhi yatra ke lie samay nahin nikal pate hain. karya ke prati ekagrata inki dusri visheshta hai. ye jo bhi karya hath men lete hain, use kie bina nahin chorte. aise log apne apko sthiti ke anusar dhal lete hanai aur vibhinn sronton se dhanoparjan karte hain.
vishesh: inki aradhya lakshmi hain aur hira inke lie shubh hai.
mulank 6: yah ek atyant shubh ank hai. isse prabhavit jatak dirghayu, svasth, balvan, hansmukh hote hain. dusron ko sammohit karne ka gun jitna mulank 6 men hota hai, utna anya kisi bhi mulank men nahin hota.
is ank se prabhavit jatak rati krira men chatur hote hain. viprit lingi vyakti ko apni or akarshit karne men ye daksh hote hain. ye shighra hi ghul-mil jane vale hote hain.
ye kalapremi hote hain aur inmen saundarya ke prati akarshan hota hai. avyavastha, gandgi, fuharapan evan asabhyata se inhen chirh hoti hai. inmen suruchipurn evan salikedar kapre pahnne evan ban-thanakar rahne ki pravritti gahri hoti hai. bhautik sukhon men purnatah astha rakhte hue aise vyakti jivan ka sahi anand uthate hain. dhan ka abhav rahte hue bhi ye muktahast se vyay karte hain. janta men shighra hi lokapriya ho jate hain tatha sansarik hote hue bhi hriday se udar evan nitigya hote hain.
vishesh: shubh ratn hira aur shubh var budh aur shukra hain.
mulank 7: mulank 7 sauhardra, sahishnu, evan sahyogi bhavna ka pratik hai. is ank se prabhavit logon men multah tin vishisht gun hote hain- maulikta, svatantra vichar shakti evan vishal vyaktitva.
aise log apni pratibha ke bal par uchch sthan prapt karte hanai. inhen mitron aur sahyogiyon se bharpur pyar milta hai aur jivan men kisi bhi prakar ki koi kami nahin rahti hai. sahsik prakriti ke hone ke karan kuch aisa kar gujrne ko atur rahte hain jo use prasiddh bana de.
vishesh: inke lie lahsuniya shubh hai aur nrisinh inke aradhya hain.
mulank 8: ank jyotish men is ank ko ‘vishvas ka ank’ kaha gaya hai. iska svami shani hai. is ank se prabhavit logon ka vyavhar sahyogpurn hota hai. ye apne mitron aur sahyogiyon ki yatha shakti sahayta karte rahte hain. ye dusron ki raksha dhal banakar karte rahte hain aur vishal vat vriksh ki tarah apni shital chaya se unhen sukh pahunchate rahte hain, parantu jab ye kisi par kruddh hote hain tab prachand rup dharan kar lete hain. inhen fuharapan pasand nahin hota. ashlil ya ganda majak sahan nahin karte. inmen dikhava n ke barabar hota hai. sabal, sajag vyaktitva vale ye log tutte nahin hain. ye andar se sevabhavi hote hain. dusre logon ko har sanbhav prasann rakhna ya unki seva karte rahna inka svabhav hota hai.
vishesh: shubh ratn nilam aur aradhya devta shani hain.
mulank 9: mulank 9 ke log sahsi hote hain. inka sahas kabhi-kabhi itna adhik barh jata hai ki dussahas ka rup dharan kar leta hai. kai bar anarth karva dalta hai, parantu is prakar se ye n to padachyut hote hain aur n hi bhaybhit ye drirh nishchayi evan vir hote hain.
ye chunauti bhare karyon ko karke apna nam amar kar jate hain. ye bahar se kathor, kintu andar se komal hote hain. anushasan ko jivan men sarvopri mante hain aur jo bhi karya shuru karte hain, use pura karke hi chorte hain.
inka pradhan grah mangal hai, jo yuddh ka devta hai. inhen harna pasand nahin hota.
grihasth jivan men nyunadhik rup se vipritta bani rahti hai. aise vyakti yadi apne ap par purn niyantran rakhen to nishchay hi safal evan shreshth ho sakte hanai.
vishesh: shubh ratn munga aur aradhya hanuman ji hain.