vivah ke vishay men vichar karne ke lie jatak ki janmakundli ke saptam bhav ka vishleshan karte hain. jab vivah sanpann hota hai to uske kutunb men vriddhi hoti hai atah jatak ke dvitiya bhav ka bhi vishleshan karte hain. kyonki jatak ka vivah hota hai, atah lagn par vichar karte hain. vivah se sukh ki bhavna juri hoti hai atah chaturth, yani sukh bhav ka vishleshan bhi karna chahie. vivah hone se ek bari ichcha ki purti hoti hai. ichcha ka bhav ekadash bhav hai, us par bhi vichar kiya jana chahie. is prakar kisi jatak ka vivah sanpann hone men jatak ke, saptam bhav ke sath-sath, 1-2-4-9-11 bhav bhi vivah ke lie kafi mahatvapurn hain. vivah hoga, ya nahin ?: iska uttar janne ke lie niche likhe kuch yogon par vichar karenge, jo vivah n hone ke yogon men shamil hain:
- jis vyakti ki kundli men saptam bhav, saptamesh evan shukra pap grahon se yukt ho, dvitiyesh trik sthan men ho, uska vivah nahin hota hai.
- saptamesh evan shukra nirbal, ya astagat ho tatha saptam bhav men shani evan rahu ho, to vivah nahin hota hai. kintu aise vyakti ka kisi n kisi ke sath yaun sanbandh avashya rahta hai.
- lagn, dvitiya evan saptam, in tinon sthanon men pap grah hon, unapar shubh grahon ki drishti n ho, to vyakti vidhivat vivah nahin karta hai.
- surya, chandrama evan shukra tinon ek navansh men tatha trik sthan men hane, to vyakti vivah nahin karta, kintu vah vyabhichari hota hai. not: ukt yogon ka vichar karte samay yah dhyan rakhna chahie ki yogkarak grahon par kisi shubh grah ki drisht to nahin hai, kyonki in yogon ko banane vale grahon par shubh grahon ki drishti hone se ye yog prabhavhin ho jate hain tatha is sthiti men vivah hone ki sanbhavna ban jati hai. gochar ke anusar jatak ka vivah kab hoga ?: vivah kal ka nirdharan karne men gochar paribhraman ka sahyog sarvadhik mahatvapurn mana jata hai. vivahkarak gochriya paribhraman ke samay vivah ka yog evan dasha n hone par bhi prem sanbandhon ki anek sanbhavnaen hoti hain. yadi is samay vivah ka yog bhi ho evan dasha bhi ho, to vivah nishchit rup se ho jata hai. vivahkarak dasha evan gochriya paribhraman ki paraspar tulna men gochriya paribhraman ko adhik faldayi mana gaya hai. gochar ke anusar nimn likhit sthitiyon men jatak ka vivah hota hai:
- lagnesh evan saptamesh, in donon grahon ko spasht kar, inki rashi evan kala adi ka yog kar lena chahie. is yogtulya rashi par jab gochriya bhraman se guru ata hai, tab jatak ka vivah hota hai.
- chandrama evan saptamesh, in donon ko spasht kar, inki rashi adi ka yog kar lena chahie. is yogtulya rashi ansh par gochriya guru ke ane par vivah hota hai.
- shukra se trikon men, ya lagn, athva saptam bhav men gochriya guru ke jane par vivah hota hai.
- saptamesh jis rashi evan navmansh men ho, un donon men se jo balvan ho, usse trikon men guru ane par vivah hota hai.
- janm lagn, tritiya, saptam evan ekadash bhav men gochriya kram se guru ke ane par vivah yogya avastha men ho jata hai. is prakar vivah ka samay ka nirnay karte samay, sarvapratham vivah men badhak yogon ka dhyan rakhte hue, yah nishchay karna chahie ki vyakti ka vivah kis avastha men hoga. balyavastha, yuvavastha, ya vriddhavastha men hoga, yah nirnay mukhyatah yogon ke adhar par hi karna chahie. iske pashchat us avastha men vivah ke karak ki dasha ka vichar karna chahie tatha ant men gochriya kram se guru ka sanchar dekh kar vivah ke samay ka nirdharan kar sakte hain. kya dusra vivah hoga ?: jis jatak ki kundli men, chahe vah stri ho, ya purush, nimn likhit yogon men se koi ek yog para ho, uske jivan men do vivah hote hain:
- saptamesh nich rashi men ho tatha saptam sthan men pap grah ho, to vyakti ka jivan men do bar vivah hota hai.
- saptamesh, ya dvitiyesh nirbal hon tatha unapar pap prabhav ho, to us vyakti ka vivah do bar hota hai. kya pahli patni ke rahte hue dusra vivah hoga?: ek patni ke jivit rahte hue dusre vivah ke yog nimn likhit hai:
- dvitiyesh evan saptamesh, ye donon grah shubh grahon se yut, ya drisht hon, to is yog men paida hone vale jatak ki do jivit patniyan hoti hain.
- saptam sthan men mangal, shukra, ya apni mitra rashi men chandrama tatha ashtam sthan men lagnesh hone par, is yog ke prabhavavash, vyakti ki do jivit patniyan hoti hain. jatak ke vivah yog sanbandhi niyam:
- yadi janmapatrika men shukra svagrihi, ya kanya rashi men ho, to vivah yog banta hai.
- yadi janmapatrika men saptamesh lagnasth ho, ya saptamesh, shubh grah se yukt ho kar, labh sthan men sthit ho, to vivah yog banta hai. - yadi janmapatrika men dvitiyesh aur saptamesh 1, 4, 5, 7, 9, 10 bhav men hon, to vivah yog banta hai.
- yadi janmapatrika men lagnesh lagnasth ho, ya saptam bhav men ho, saptamesh, ya lagnesh dvitiya bhav men ho, to vivah yog banta hai.
- yadi janmapatrika men mangal evan surya ke navansh men budh, guru gaye hon, ya saptam bhav men guru ka navansh ho, to vivah yog banta hai.
- yadi janpatrika men saptam aur dvitiya bhav par shubh grahon ki drishti ho tatha dvitiyesh aur saptamesh shubh rashi men hon, to vivah yog banta hai.
- yadi janmapatrika men lagnesh karm sthan men ho aur balvan budh se yukt ho tatha saptamesh aur chandrama tritiya bhav men hon, to vivah yog banta hai.
- yadi janmapitraka men guru apne mitra ke navansh men ho, to vivah yog banta hai.
- janmapatrika men saptam bhav men chandrama, ya shukra, athva donon ke rahne se vivah yog banta hai.
- yadi janmapatrika men saptam bhav men shubh grah ho, ya saptamesh, shubh grah se yukt ho kar, 2, ya 7, ya 8 men ho, to vivah yog banta hai.
- yadi janmapatrika men ashtamesh pahle, ya satven bhav men ho tatha lagnesh lagn men ho, ya chathe bhav men ho, saptamesh shubh grah se yukt, ya nich rashi men gaya ho evan shukra nich, shatru aur astagat rashi ka ho, to vivah ka yog banta hai. vivah ki ayu ke nirdharan sanbandhi niyam:
- saptamesh shubh grah ki rashi men ho, shukra svagrahi, ya uchch rashi men ho, to 5ven, ya 9ven varsh men vivah ka yog hota hai.
- saptam bhav men surya ho aur saptamesh shukra ke sath ho, to prayah 7ven, ya 11ven varsh men vivah ka yog hota hai.
- shukra dvitiya bhav men aur saptamesh 11ven men ho, to 10ven, ya 16ven varsh men vivah ka yog hota hai.
- shukra lagn se kanedra men ho, lagnesh shani ki rashi men ho, to 11ven varsh men vivah ka yog hota hai.
- lagn se kendra men shukra aur shukra se 7ven men shani ho, to 12ven, ya 19ven varsh men vivah ka yog hota hai.
- chandrama se 7ven shukra aur shukra se 7ven men shani ho, to 18ven varsh men vivah ka yog hota hai.
- dvitiyesh 11ven aur lagnesh 10ven men ho, to 15ven varsh men vivah hota hai.
- dvitiyesh 11ven bhav men aur labhesh dvitiya bhav men ho, to 13ven varsh men vivah ka yog hota hai.
- ashtam bhav se 7ven shukra aur ashtamesh mangal se yukt ho, to 22ven, ya 27ven varsh men vivah hota hai.
- lagnesh yadi saptamesh ke navmansh men ho aur saptamesh 12ven bhav men ho, to 23ven, ya 26ven varsh men vivah hota hai.
- yadi ashtamesh saptam bhav men, lagn ke navmansh men, shukra se yut ho, to 25, ya 33 varsh men vivah hota hai.
- navam bhav se 9ven men shukra ho, un donon men se kisi ek men rahu ho, to 31, ya 33 varsh men vivah hota hai.
- bhagya bhav se 7ven shukra aur shukra se 7 ven saptamesh ho, to 30, ya 27 varsh men vivah hota hai. saptam bhav se sanbandhit fal vichar:
- yadi saptamesh apni rashi, ya uchch men ho, to us jatak ke lie stri ka sukh purn hota hai.
- saptamesh yadi chathe, athven, barhven sthan men ho, to uski stri rogi hoti hai. parantu saptamesh yadi apni uchch rashi men, ya svagrihi ho to dosh nahin hota hai.
- kahin bhi saptamesh pap grahon se yukt ho, to stri mrityu ka karak hoti hai.
- saptam bhav men shukra ho, to jatak ati kamatur hota hai.
- saptamesh shubh grah se yukt aur balvan ho, to jatak dhani, mani aur sukhi hota hai. iske viprit yadi saptamesh nich, ya shatru rashi men ho, to jatak ki stri rogi hoti hai aur uski bahut si striyan hoti hain.
- saptamesh shani, ya shukra ki rashi men ho, usapar shubh grah ki drishti ho, to jatak bahut striyon vala hota hai. yadi saptamesh apne uchch men ho, to nishchay hi bahut si striyon vala hota hai.
- saptam bhav men surya ho, to stri bandhya hoti hai. saptam bhav men chandrama ho, to patni rashi ke svabhav sadrish svabhav vali hoti hai. saptam bhav men mangal ho, to rajasvala aur bandhya stri ka sang hota hai. guru saptam bhav men ho, to brahmani, garbhini ka sang hota hai. shani, rahu, ya ketu saptam bhav men ho, to nich jati, ya rajasvala ka sang hota hai.
- yadi barhven, satven bhav men pap grah, panchvanen men pap grah ho, to jatak stri ke bas men hota hai.
- saptam bhav, ya saptamesh mangal, budh ho, to stri veshya, ya parpurushgamini hoti hai.
- saptamesh apne uchch men ho, saptam men shubh grah ho, lagnesh, bali ho kar, saptam men ho, to uski stri sab sadgunon se sanpann, putra-pautradi se yukt hoti hai.
- saptam bhav, ya saptamesh pap grah se yukt ho tatha nirbal ho, to stri ka nash hota hai.
- saptamesh, nirbal ho kar, 6, 8, 12 bhav, ya nich bhav men ho, to bhi stri ka nash hota hai.
- saptam bhav men chandrama aur saptamesh 12 ven bhav men ho, strikarak nirbal ho, to us manushya ko stri ka sukh nahin milta hai.t