jyotish shastra ko tin pramukh bhagon men banta gaya hai:
1. ganit (siddhant)
2. jatak (hora)
3. sanhita .
triskandh jyotish shastra chaturlakshamridahavam.
gan jatkan vipra sanhita skandha sankshitam..
ganit men lagnadi, vargadi, bhav spasht, grah spasht ityadi jyotish ganit ki vidhiyan batai gai hain, hora men jatak ke jivan sanbandhi shubhashubh falon ka vivechan kiya jata hai aur sanhita granthon men brahmagupt, bhaskaracharya, aryabhatt, varahmihir adi prachin acharyon ne akashiya vatavaran ke prithvi par parne vale prabhavon ka varnan kiya hai.
jis prakar prithvi par loktantrik rajyon ki sthapna ke lie pradhanmantri evan mantriyon ke chunav hote hain aur alag alag mantriyon ke alag alag vibhag hote hain usi prakar is vishva chakra ko chalane ke lie prati varsh grahon ke ek akashiya kanusil ka gathan kiya jata hai. is akashiya kanusil men raja, mantri, meghesh, rasesh, sasyesh, dhanyesh, nirses, dhanesh, durgesh aur falesh adi 10 padadhikariyon ko niyukt kiya jata hai. ismen mausam vibhag meghesh ke supurd kiya jata hai. iske atirikt mausam vibhag par meghon, nagon, adrra, rohini tatha stambhon ka prabhav bhi parta hai. varsh men mausam ki jankari ke lie nimnalikhit binduon par vichar kiya jata hai.
1. varsh men adrra ke mantri pad
2. adrra pravesh ka samay, tithi, var aur nakshatra yog
3. varsh ke megh
4. varsh men rohini vas
5. varsh ke stambha
6. varsh ke nag aur
7. adrra pravesh kundli
iske bad mausam ki sukshm jankari ke lie trinari chakram, sapt nari chakram, nakshatra sankhya bodhak chakram, varsha avrodhak chakram aur gochar grahon ke yogadi se varsha par vichar kiya jata hai aur tab sthan vishesh ke nirdharan ke lie kurmachakra se vichar kiya jata hai. ab ek-ek bhag par kram se vichar karte hain.
varsh ke bhachakra men jis din surya adrra nakshatra men pravesh karta hai us din jo var hota hai uske svami ko us varsh ka meghesh arthat mausam vibhag ka mantri niyukt kiya jata hai. surya ke adrra nakshatra se lekar svati nakshatra tak surya sanchalan men mansun ke aranbh hone par varsha ka rukh banta hai. is varsh sanvat 2062 men 21-22 jun ki madhya ratri ke bad 3 bajakar 19 minat par surya ne adrra nakshatra men pravesh kiya. us din manglvar, purnima tithi, mula nakshatra aur shukla yog evan dhanu rashi men chandrama tha. atah is varsh mausam ka svami mangal aur sanvat ka raja shani hai aur donon hi krur grah hain. mangal mantri kahin adhik varsha to kahin kam arthat kahin barh to kahin sukhe ki taraf sanket deta hai. purnima tithi men adrra ka pravesh utpadan barhata hai arthat uttam varsha karata hai. yah sari sthiti varsha ke anishchit samay par hone ka sanket deti hai. shukla yog men pravesh krishi utpadan men vriddhikarak hota hai arthat uchit varsha pradan karta hai.
iske alava is varsh nav meghon (avart, sanvart, pushkar, dron, kal, nil, varun, vayu aur veg) men se vayu namak megh ban raha hai. is megh ke ane se badal durgami ho jate hain.
varsh men samudra chakra men rohini ka vas janne ke lie mesh sankranti ke din se ganna karen to ham pate hain ki do nakshatra samudron men, do taton par, ek parvat par aur do sandhi men ate hain. is prakar abhijit sahit 28 nakshatron ko sthapit kiya jata hai aur vahan rohini ka vas gina jata hai.
is varsh rohini ka vas sandhi men hone ke karan vah varsha ke lie avrodhak hai. uski is sthiti se kahin sukha aur kahin khand vrishti hoti hai.
is varsh ke char stanbhon men jal stanbh (chaitra shukla pratipda ko revti nakshatra) 37 pratishat, trin stanbh (vaishakh shukla pratipda ko bharni nakshatra) 21 pratishat, vayu stanbh (jyeshth shukla pratipda ko mrigshira nakshatra) 92 pratishat aur ann (asharh shukla pratipda ko punarvasu nakshatra) 97 pratishat hai. jal stanbh is varsh kam hai jo pani ki kami karvaega. trin stanbh bhi jal stanbh se kam hai lekin vayu stanbh adhik hone se vayu ko adhik andhi, tufan adi men rakhta hai.
is varsh dvadash nagon (sunaghn, nandsari, karkotak, prithushrav, vasuki, takshak, kanbal, ashvatar, hemmali, narendra, vajradasht aur vrish) men se hemmali nag a raha hai jo samuchit vrishti ka evan kahin adhik varsha ka bhi yog bana raha hai - hemmali mahavrishtiah.
avah adi vayu saptak men sanvah namak vayu saptak hai jo adhik vayu veg ka suchak hai.
adrra pravesh kundali par vichar:
jaisa ki upar kaha gaya hai is varsh 21-22 jun 2005 ko bhartiya manak samay ke anusar 3 bajakar 19 minat par surya ne adrra nakshatra men pravesh kiya. is samay ke anusar adrra pravesh kundli is prakar banti hai.
adrra pravesh kundli men vrish lagn hai aur vrish rashi prithvi tatva vali ardh jaliya rashi hai. ismen jaliya ansh keval 50 pratishat hai.
lagnesh shukra jaliya grah dvitiya bhav men agni tatva grah surya ke sath hone ke karan kamjor hai tatha is varsh ke meghesh mangal (agni tatva) se drishtit hai. lagn par ashtamesh aur ekadshesh guru (akash tatva) grah ki bhi drishti hai. adrra pravesh kundli ke charon kendra bhav khali hain. in sabhi yogon ke karan is varsh mansun kuch kamjor hi rahega. bharat ke adhikatar bhagon men mansun samay par nahin pahunch paega. uprokt yogon evan vayu veg ki adhikta ke karan varsha ka kram aniyamit rahega. purvi uttar pradesh evan pashchimi bihar men mansun ka prabhav milajula kar thik hi rahega. bharat ke purvi bhagon asam, tripura, manipur aur meghalay men pahle se kam varsha ke yog hain. pashchimi bangal aur uttari bihar men manusan ki sthiti thik hi rahegi.
dusre bhav men mithun rashi ( vayu tatva vali) kam jaliya ansh vali rashi hai. is bhav men surya (shushk ushna), budh (jaliya gun) aur shukra (jaliya gun) grahon ki sthiti hai aur yah mangal (agni gun) grah se drishtit hai. lagnesh shukra ka svakshetri budh ke sath hone ke karan bharat ke uttar purvi pradesh, purvi asam, tripura, meghalay, nagalaind, purvi uttar pradesh, kashi, ilahabad, uttar bihar, sikkim, bhutan ka uttari pashchimi bhag, uttari bangal, madhya pradesh ka purvi bhag, tibbat, purvi nepal adi kshetron men varsha samay se hogi.
tisre bhav men kark rashi purn jal tatva se yukt (10 pratishat jaliya ansh) hai. shani (shushk shit gun) ki is bhav men sthiti hai aur us par rahu ki purn drishti hai. isse uttari bihar, uttar pradesh ka uttari bhag, pashchimi nepal aur kanpur ke kshetron men mansun thik thak hi rahega. varsha samay se n hone aur ruk-ruk kar hone ke yog hain.
chaithe bhav men sinh rashi (agni tatva) purn nirjaliya rashi hai. lekin chaturthesh ka shubh grahon se sanbandh hone ke karan bharat ke uttari kshetra uttarakhand, pashchimi uttarapradesh, panjab, himachal pradesh aur jammu kashmir men mansun ki sthiti samanya aur samyanukul rahegi.
pancham bhav men kanya rashi (prithvi tatva) kam jaliya ansh vali rashi hai. ismen guru aur ketu ki sthiti bharat ke pashchimottar pradeshon jaise dakshini panjab, uttar pradesh, himachal, uttari rajasthan aur hariyana men varsha samanya to hogi lekin mangal, rahu aur shani ki drishti samay par varsha ane men badha dalegi.
shashth bhav men tula rashi (vayu tatva) kam jaliya ansh vali hai. mangal (agni gun) ki purn drishti hai. bhavesh shukra (jaliya gun) bhi shubhaprad budh ke sath dvitiya bhav men hai, atah dakshini panjab, hariyana, dilli, rajasthan ke madhya bhag aur pashchimi uttar pradesh men mansun thik rahega. parantu mangal grah kahin aniyamitta bhi banae rakhega.
satven bhav men vrishchik rashi jal tatva vali rashi hai. ismen jaliya ansh ek chaithai gina jata hai. bhav men kisi grah ki sthiti nahin hai. bhavesh mangal ekadash bhav men purn jaliya rashi men hai. ise jal gunon vala guru dekh raha hai. atah pashchimi bharat jaise gujrat, dakshini rajasthan evan samudra tatiya kshetron men varsha ke achche yog ke sanket hain. bhavesh mangal ka rahu ke sath sanbandh akashiya bijli ki taraf bhi sanket karta hai.
athven bhav men dhanu rashi agni tatva vali rashi hai. yahan jaliya gun vala grah chandrama sthit hai jo surya, budh aur lagnesh shukra se drishtit hai. atah bharat ke pashchimi-dakshini pradesh maharashtra aur saurashtra tatha dakshin pashchim madhya pradesh men mansun ka kram thik rahega.
nauven bhav men makar rashi prithvi tatva vali rashi hai. bhavesh shani (shushk shit gun) vala, guru se purn drishtit hai. atah andhra pradesh, karnatak, keral adi kshetron men mansun adhik sakriya rahega.
dasham bhav men kunbh rashi (vayu tatva) kam jaliya ansh rashi hai. bhavesh bhi jaliya rashi kark men tisre sthan par sthit hai. atah dakshini bharat ke purvi madhya pradesh aur udisa ke dakshin bhag, purvi andhra pradesh, tamilnadu adi kshetron men bhi mansun adhik sakriya rahega.
ekadash bhav men min rashi jal tatva (purn jaliya ansh) vali rashi hai. ismen agni gun ke mangal aur rahu sthit hain aur is par bhavesh guru ki purn drishti hai. atah jharkhand, bangladesh ke dakshini bhag, andman nikobar aur uttari urisa men bhi mansun ka kram thik hi rahega.
dvadash bhav men mesh rashi agni tatva vali rashi hai aur us par varsh ke raja shani (shushk gun) ki drishti hai. atah uttari gorkhalaind, bangal ityadi kshetron men mansun ke avyavasthit hone aur kabhi sukhe ya varsha ke asamay hone ka yog banta hai.
bharat men mansun surya ke adrra nakshatra se aranbh hota hai aur svati nakshatra tak rahta hai. varsha ritu se pahle surya 25 mai se 6 jun tak rohini nakshatra men rahta hai. in dinon varsha ka hona age varsha ke lie avrodhak mana gaya hai. atah is varsh 26 mai ko uttari bharat men varsha ka hona age lagabhag 50 dinon ke lie varsha ke ane men avrodh utpann karega. 21 jun ko surya adrra nakshatra men pravesh kar raha hai. iska varnan uparyukt adrra pravesh kuundli ke anusar kiya ja chuka hai. 23 jun ko shukra ka kark rashi men pravesh hokar 17 julai tak shani ke sath sanbandh banana bhi varsha ritu men badhak hai. shukra aur shani ka ek rashi men mel kam varsha ka sanket hai. 18 julai ko shukra ka sinh rashi (agni tatva) men pravesh karna bhi varsha ke lie badhak hai. isi din mangal (agni tatva) ka mesh rashi (agni tatva) men pravesh kar shani par drishti dalna bhi varsha ke lie badhak hoga. vayu veg adhik hone ke karan badal chant jaenge. kahin-kahin thori varsha ho sakti hai kyonki likha hai, ‘sinhe shukre chale bhavani, chale pavan n bahe pani’’. 2 agast ko shukra kanya rashi men pravesh kar guru ke sath rashi sanbandh banaega. yah yog varsha ritu ke agaman ka karak hai. 14 agast ko budh grah ka uday hona bhi varsha ritu ke agaman ka sanket deta hai. 16 agast ko surya ke sinh rashi men pravesh se varsha ritu aranbh hogi. kyonki pichle sanvat men paush mas men mula, purvasharha aur uttarasharha nakshatron men bharat men varsha hui thi, islie is varsh surya ke adrra, punarvasu, pushya aur ashlesha nakshatron men varsha badhit rahegi.
ab varsha ka gyan sukshmata se prapt karne ke lie trinari chakra, saptanari chakra aur nakshatra sankhya bodh ka vishleshan prastut hai.
sarvapratham trinari chakra men tin nariyan banai jati hain. sabse upar vali nari ko svarg nari, bich vali ko bhumi nari aur sabse niche vali ko patal nari ka nam diya jata hai aur pratyek nari men svarg, bhumi, patal aur fir patal, bhumi, svarg ke kram se ashvini adi 27 nakshatron ki sthapna ki jati hai. is prakar svarg nari men ashvini, adrra, punarvasu uttarafalgun, hast, jyeshtha, mula, shatbhisha aur purvabhadrapad nakshatra ate hain. bhumi nari men ane vale nakshatra bharni, mrigshira, pushya, purvafalgun, chitra, anuradha, purvasharha, dhanishtha aur uttara bhadrapad hain. patal nari men krittika, rohini, ashlesha, magha, svati, vishakha, uttarasharha, shravan aur revti nakshatra ate hain. in nariyon ke nakshatron men parne vale grahon se varsha ka vichar kiya jata hai. jaise is varsh 21 jun se 16 julai tak surya ka svarg nari men adrra aur punarvasu nakshatron men rahna, guru ka hast nakshatra svarg nari men hast nakshatra men rahna tatha mangal ka bhi svarg nari men rahna yah sari sthiti suvrishti arthat uchit varsha ka yog banati hai.
varsha kahan hogi yah janne ke lie kurm chakra ka prayog kiya jata hai. adrra aur punarvasu nakshatra bharat ki purva disha ko bodhit karte hain tatha hast nakshatra dakshin kshetron men parta hai. atah in kshetron men suuvrishti ki sanbhavna hai. is bich 25 jun ko shani (napunsak grah) ka pushya nakshatra bhumi nari men ana tatha shukra (stri grah) ka bhi bhumi nari men rahna kahin-kahin olavrishti ka yog banata hai. kurm chakra men pushya nakshatra purva disha arthat bharat ke purvi bhagon ki taraf sanket karta hai. fir madhya nari par mangal, guru aur surya tinon purush grahon ka yog 30 agast se 11 sitanbar ke dauran banega. in dinon surya purvafalgun nakshatra par, guru chitra nakshatra par aur mangal bharni nakshatra aur madhya nari men honga. purush grahon ka ek hi nari men hona suvrishti ka sanket deta hai. kurmachakra men purvafalganu nakshatra bharat ke purva dakshin kshetron, chitra dakshin tatha bharni purva uttar ke kshetron men parta hai. fir yahi yog 10 se 23 aktubar ke bich banega. ismen surya chitra nakshatra men, guru bhi chitra nakshatra madhya nari men aur mangal 21 aktubar se punah bharni nakshatra men madhya nari men hoga yah sthiti suvrishti ki suchak hai. chitra nakshatra kurmachakra men bharat ke dakshini kshetron ko bodhit karta hai.
trinari chakra ke atirikt aur adhik sukshmata ke lie sapt nari chakra ka vichar bhi kiya jata hai. sapt nari chakra men 28 nakshatron (abhijit sahit) ko 7 nariyon (chanda, vayu, dahan, saumya, nira, jala aur amrita) men vibhajit kiya jata hai. pratyek nadi men 4 nakshatra hote hain jo is prakar hainah chanda nari men krittika, vishakha, anuradha aur bharni nakshatra, vayu nari men rohini, svati, jyeshtha aur ashvini nakshatra, dahan nari men mrigshira, chitra, mul aur revti, saumya nari men adrra, hast, purvasharha aur uttarabhadrapad, nira nari men punarvasu, uttarafalgun, uttarasharha aur purvabhadrapad, jala nari men pushya, purvafalgun, abhijit aur shatbhisha aur amrita nari men ashlesha, magha, shravan tatha dhanishtha nakshatra ate hain. kisi bhi nari ke nakshatron men do ya do se adhik grah a jaen to us nari ka vedh ho jata hai. us vedh se nari ke yatha nam fal prapt hote hain. 31 agast se 13 sitanbar tak surya ka jala nari men purvafalgun nakshatra men rahna tatha shani ka jala nari men hi pushya men rahna ativrishti ka karak hai. chandrama (jaliya gun) ka bhi 31 agast tatha 1, 3, aur 4 sitanbar ko jaliya nari men hona varsha ka vishesh yog banata hai.
ismen aur sukshmata ke lie nakshatra sangya bodhak par vichar kiya jata hai. ismen 27 nakshatron ko purush, stri aur napunsak ki sangyaon ke rup men gina jata hai. ismen kuch nakshatra surya ke aur kuch chandrama ke mane jate hain. rohini, mrigshira, purva falgun, uttarafalgun, hast, chitra, svati vishakha, anuradha, jyeshtha, mula, shatbhisha aur purvabhadrapad surya nakshatra ke tatha ashvini, bharni, krittika, adrra punarvasu, pushya, ashlesha, magha, purvasharha, uttarasharha, shravan, dhanishtha, uttarabhadrapad aur revti chandrama ke nakshatra hain. jis din surya ke nakshatra mane nchandrama aur chandrama ke nakshatra men surya ho, us din varsha ka yog banta hai.
isko aur sukshmata se janne ke lie nakshatron ki purushadi sangya par vichar kiya jata hai. ashvini, bharni, krittika, rohini, mrigshira, mula, purvasharha uttarasharha, shravan, dhanishtha, shatbhisha, purvabhadrapad, uttarabhadrapad aur revti purush tatha adrra, punarvasu, pushya, ashlesha, magha purvafalgun, uttarafalgun, hast, chitra aur svati stri sangyak nakshatra hain. vishakha, anuradha aur jyeshtha nakshatron ko napunsak sangya di gai hai. surya aur chandrama ke vartaman nakshatra aur unki sangyaon ke adhar par varsha ka anuman kiya jata hai. in donon grahon men se yadi ek stri sangyak nakshatra men ho aur dusra purush sangyak men to varsha hoti hai. donon grah purush sangyak men hon to akash saf rahta hai aur yadi stri sangyak men hon to vayu chalti hai aur badal mandrate hain. ek napunsak sangyak men ho dusra stri ya purush sangyak men to bundabandi hoti hai. donon napunsak sangyak men hon to garmi adhik hoti hai aur vayu chalti hai.
is prakar upar varnit grah yogon aur sthitiyon ka vishleshan kar varsha ka sukshm gyan prapt kiya jata hai.