dae. manmohan sinh apni vinamrata, vidvatta evan nishkalush chavi ke lie jane jate hain. mahan yunani darshanik arastu ne kaha tha ki parhe-likhe, achche aur sanbhrant log agar rajniti se dur rahenge to unhen dusht, akulin tatha ayogya logon ke dvara shasit hone ke lie taiyar rahna chahie. yah hamara saubhagya hai, tatha bhartiya jantantra ke lie gaurav ki bat hai ki dae. manmohan sinh sarikhe arthashastri, vidvan aur shikshavid tatha dae.e.pi.je. abdul kalam jaise vaigyanik rajniti men hain aur isi madhyam se kramshah pradhanmantri aur rashtrapti ke pad par sushobhit hain. vastav men, pradhan mantri ke pad par shri sinh ke asin hone se pad ki garima barhi hai.
bhartiya arthavyavastha ke sudrirhikaran men shri sinh ki arthanitiyon ka mahti yogdan raha hai. aie, jyotishiya sandarbh men, evan hastarekha ke madhyam se yah samjhne ka prayatn karen ki sitare kya kahte hain. hastarekha: dae. manmohan sinh ki hatheli adarsh shreni ki hai jo vargakar hatheli ka hi parishkrit rup hoti hai. aisi hatheli vale jatak buddhiman, karmath, adhyavsayi evan parishrami hote hain. sharirik evan mansik donon hi prakar ka shram yathesht matra men karne ki inmen kshamata hoti hai. lanbi evan konik ungliyan hone se vyakti men uchch koti ke chintan evan manan ki bhi kshamata hoti hai. anamika ka jhukav madhyama ki taraf hone tatha tarjani evan anamika ke barabar hone se vyakti apne gyan, karm tatha acharan ke karan prasiddhi pata hai.
sabhi ungliyon ki poren bhi viksit evan apekshakrit kam ubhri aur samanuptik hain jo vyaktitva ke virat evan santulit hone ki parichayak hain. atishay mahatvapurn padon par jane ke lie jin vishesh chijon ko hastarekha shastra men dekha athva parkha jata hai, unmen sabse mahatvapurn sthan lanbi kanishtha ka hota hai jo anamika ki upri por tak pahunch pae. yah budh sanbandhi shubh gunon ke prachurya ka dyotak hota hai. anamika evan kanishtha ke bich khali sthan hone se bhi budh sanbandhi gunon ka vikas jatak men kuch is prakar hota hai, jisse vah vyapar karne, dhanarjan karne ya khyati batorne se jyada maulik chintn-manan evan shodh men samay vyatit karta hai athva vaigyanik hota hai. hatheli ka gulabi rang tatha iska mulayam hona bhagya ki prakhrta evan utkrishtata ka hi samarthan karte hain.
angutha is hatheli ki visheshta ko puri tarah se prakat kar deta hai. lanbi evan pusht pratham por drirh ichchashakti aur kathin paristhitiyon men bhi avichlit rahne ka svabhav pradarshit karti hai. iski koniya uthan aur iska piche ki or mura hona vyakti ko santulit vichardhara ka svami banata hai jo nai aur adhunik baton ko bhi achchi tarah atmasat karta hai tatha apni purani mitti evan sanskriti ka khyal bhi jehan se nahin jane deta hai. tarjani ki tisri por ke madhya tak pahunch jane vala angutha uttam shreni ka mana jata hai. shri sinh ke anguthe ki tinon poren santulit hain. islie aisa samjha ja sakta hai ki inmen ichcha-shakti, tarka-shakti aur prem tatha karuna ka mani-kanchan sanyog hai.
prachin samudrik shastra ke anusar anguthe par upasthit yav-rekha ya pushparekha vyakti ke bhagyashali aur mahan hone ka sanket deti hai. aise jatkon ko yog-kshem ki chinta se kabhi bhi trast nahin hona parta hai. yah rekha kam hi pai jati hai. guru parvat bahut unnat n hokar sadharan hi hai, parantu is par bana trikon ise utkrishtata pradan karta hai. amtaur par rajnetaon men guru parvat ka ubhar kuch jyada hi dekha jata hai jo atyadhik ho jane ke karan uchch mahatvakanksha, netritva karne ki utkat ichcha evan svarth tatha ahankar deta hai. parantu inki hatheli men guru parvat aur us par bana trikon inhen uchch koti ka adhyeta, shodhakarta evan gyani banata hai.
guru, budh, mangal aur surya parvaton ki achchi aur santulit sthiti ke karan dae. manmohan sinh ka nam ek mahan arthashastri tatha profesar ke rup men log jante hain. mangal parvat ka ubhar apni uttam avastha men hai tatha rinatmak aur dhanatmak donon hi mangal apne sthan par yathavat hain. ye vyakti ko svabhavtya nidar banate hain. sarkar ki nitiyon ko badlne ka dabav, adhikanshtah sahyogi partiyon se, rahte hue bhi shri sinh kushltapurvak age barh rahe hain. iska karan inki hatheli men mangal kshetra ka vistrit hona hai. vidarbh ke kisanon ka dukh samjhne vala evan uska nidan sochne vala aisi hi sthiti men koi ho pata hai. hriday rekha aur mastishk rekha ke bich surya parvat ke niche ka ubhar inki vilakshan pratibha ka parichayak hai.
lekin shukra parvat ka apekshakrit daba hona inki jivni shakti men kramshah hras ka dyotak hai aur inki abhiruchi shukra sanbandhi chijon men bahut jyada nahin hai. atah ye sadgi aur sarlta pasand hain aur aram tatha vilasita ke prati inka jhukav naganya hai. jivan rekha ka gol ya vrittakar hona hastarekha shastra ke anusar ek uttam sthiti hai. jivan ke uttarardh men iska jyada gol hona inhen jivan ke uttar bhag men jyada rajyog prapt kara saka. lekin jivan rekha ka uttarottar halka hote jana evan rang badal lena donon svasthya sanbandhi pareshaniyon ka sanket dete hain. atah ane vale samay men inhen svasthya sanbandhi vishesh pareshani se do char hona par sakta hai.
ketu parvat par dvipyukt rekha tatha shukra se uska sanyog donon yakrit sanbandhi vikaron tatha madhumehadi se grast hone ka sanket dete hain. dae. manmohan sinh ki mukhakriti bhi saumyata tatha vidvatta ko prakat karti hai. inke chehre par halki si muskarahat hamesha dekhi ja sakti hai. inki mukhakriti sarlta, vidvatta tatha praurhta ka mila-jula rup hai. unnat bhal vyakti ko prasiddh evan prashast banata hai. bari nak se vyakti prabhavshali hota hai. darhi aur munch agar komal tatha santulit hon to aisi sthiti se bhi uparyukt sari baten satya siddh hoti hain.
ghani bhaunhane ke bare men prachin samudrik shastra men kaha gaya hai ki jin logon ki bhaunhane itni ubhri hon ki ankhane dhansi hui malum parti hon, ve bahut jaldi uttejit nahin ho pate hain. unhen samjhna jara mushkil hota hai. ye log bare gahre hote hain. nishkarshatah hastarekha shastra ke anusar dae. manmohan sinh ka hath vastav men ek adarsh shreni ka hath hai.