‘‘jamane ne banai thi jo dayre ki divar man ke armanon ne kar diya use darkinar yah janun tha ya thi khud se bepnah mohabbat ki pa hi liya vo jiski ki thi shiddat se chaht’’ apne jivan men har vyakti vahi karna chahta hai jo use achcha lagta hai aur jo vah banne ke sapne dekhta hai par paristhitiyan sabhi ko anukul nahin miltin. kisi ki arthik sthiti kamjor hoti hai to kisi ki parivarik athva sharirik lekin kitni bhi visham paristhitiyan hane, unko jhel kar aur unmen tap kar jo niklta hai vah vakai kundan ki tarah ho jata hai aur fir vah n keval apne sapne pure kar sakta h apitu samaj men bhi apna vishisht sthan bana leta hai.
hamare samaj men sabhi jagah thard jendar ke logon ko bahut hi upeksha ki drishti se dekha jata hai. chahe aise bachche ka janm kitne bhi rais parivar men hua ho lekin jab ve vastavik jindgi men ate hain to ek kuntha ke shikar ho jate hain aur bahut se log to atmahatya tak kar lete hain. lekin drirh nishchayi vyakti har hal men apne nirdharit lakshya par pahunchne ki kshamata rakhta hai. yah sach kar dikhaya manbi bandhopadhyay ne jiska bachapan ka nam somnath tha. do larkiyon ke bad jab putra somnath ka janm hua to bahut khushiyan manai gain lekin somnath ko bachapan se larkiyon ki tarah kapre pahnna achcha lagta, use khud ko apni bahnon ki tarah larki hone ka hi ahsas hota aur parhai ke sath-sath apni bahnon ke sath dansing klas men jana use achcha lagta tha.
uske pita ko yah sab pasand nahin tha aur ve usko larki hone ka tana bhi marte the. jaise-jaise somnath bara hota gaya use larkiyon ke mukable larke achche lagne lage. larkon ka sath hi use achcha lagta lekin vah apni filing kisi se kah nahin pata tha islie skul men hi vah ek saikiyatrist ke pas gaya aur apni samasya ke bare men bataya to usne use apni bhavnaon ko badlne ke lie kaha aur kaha ki apne ahsas ko hi n ane de ki vah larki jaisa hai varna use atmahatya tak karni par sakti hai.
daektar use nind ki davaiyan de dete the lekin somnath unhen fanek deta tha. isi tarah uska jivan chalta raha. ghar men vah larkiyon ki tarah rahta aur ghar se bahar niklte samay traujar aur shart pahan leta aur mardon jaisa vyavhar use n chahakar bhi karna parta. yah uske lie bahut piradayak tha kyonki uska dilodimag use larki ki tarah vyavhar karne ki prerna deta jabki samaj ki drishti men vah larka tha aur sab log usse larkane jaise vyavhar ki hi apeksha rakhte the. aise men koi vikalp n hone par somnath ne apni parhai jari rakhi. homo seksual hone ke karan use skul aur kaelej men bahut pratarna bhi jhelni pari.
bahut bar use mara-pita bhi gaya aur kai bar usse jabardasti sanbandh bhi banae gaye aur kuch logon ne to uske apartament men ag laga kar use marne ki bhi koshish ki. par somnath ne himmat nahin hari. 1995 men usne transjendars ke lie pahli maigjin ‘ob-manv’ (up manv) nikali. maigjin bhale hi n bikti ho lekin uska prakashan aj bhi hota hai.
chunki somnath parhne likhne men tej tha islie use kaelej men lekcharar ki naukri bhi mil gai. lekin kaelej men bhi uske sath bhedbhav kiya jata tha aur use pareshan kiya jata tha. students yuniyan bhi uske khilaf ho gai thi aur yahan tak ki use kirae ka makan lene men bhi bahut pareshani jhelni pari. 2003-2004 men somnath ne himmat aur paisa donon juta kar seks chenj aepreshan karane ka bara faisla liya.
ismen uske anek aepreshan hue jasmen karib panch lakh rupye ka kharcha aya. lekin sarjari ke bad somnath ab purn rup se mahila ban chuka tha aur isilie usne apna naya nam rakha ‘manbi’ jiska arth hota hai mahila aur vah puri tarah se larki ki tarah sab kam karne ke lie svatantra ho gayi. ab vah larkiyon ki tarah jo chahti kar sakti thi.
chunki use sari pahnna aur bari bindi lagana pasand tha ab vah manbi ban kar apne sare shauk pure karne lagi. lekin mahila banne ke bad bhi 2005 men apni piech.di puri karne ke bad jhar gram men pahli posting ke dauran unhen mel rajistar par sain karne ke lie badhya kiya jata tha aur kaelej prashasan ne kai bar samasya khari ki aur kaha ki jab use naukri somnath banarji ke nam se mili hai
to ve use manbi ke nam se naukri nahin karne denge. par kanunan ve uska kuch nahin bigar sakte the aur ‘‘ab to uchchatam nyayalay ne bhi aitihasik faisla lete hue yah jaruri kar diya hai ki kisi bhi sarkari dastavej men ek kaelam transjendar ke lie bhi rakhna hoga.’’ manbi ne apne anubhvon par ‘endles baendej’ namak upanyas bhi likha jo best selar raha aur aj bhi unke upanyas ki kafi mang hai.
manbi ko vivekanand mahavidyalay men esosiet profesar ke rup men kam karte hue kafi varsh ho gaye the aur kaelej ka mainejment aur vidyarthi uske kam v dedikeshan se bahut prabhavit the islie 26 mai 2015 ko kaelej prashasan ne manbi ko krishna nagar mahila kaelej ka pradhanacharya banane ka faisla liya. bharat hi nahin balki pure vishva men shayad yah pahla mauka hai ki jab kisi trans jendar ko samajik rup se variyata di gai hai. manbi ko prinsipal niyukt kie jane par khushi jahir karte hue rajya ke shiksha mantri ne kaha ki yah faisla kaelej sarvis kamishan ki taraf se liya gaya hai aur in khule vicharon ki ham prashansa karte hain.
manbi bhi apne is mukam par akar bahut khush hai. usne apne jivan men bahut duahkh, pratarna, tane v jillat jheli hai aur ab ijjat, shoharat aur apni pratibha ke adhar par mile ohde ke katrtavya ko vah puri tarah nibhaegi iska use purn vishvas hai aur is bat ko use garva hai ki usne jo chaha tha vah mukam puri garima se prapt kar liya. kolkata men ki gai yah pahal vakai bahut sarahniya hai.
jo yah kahin n kahin is bat ko darshata hai ki dhire-dhire hi sahi hamare desh men jati aur dharm ki beriyan tutti najar a rahi hain. manbi ki kahani shayad desh men faili thard jendar athva transjendar ke prati durbhavna ki mansikta ko badlne men jarur karagar sabit ho sakti hai. ankron ke hisab se bharat men 20 lakh se adhik transjendar hain.
samaj ko yah samjhna bahut jaruri hai ki ve bhi baki logon ki tarah sharir, dil, dimag rakhte hain aur unki bhi vahi jarurte hain jo sabki hoti hain aur unhen bhi vahi adhikar milne chahiye jo samaj baki mahilaon aur purushon ko deta hai. manbi ke janm ka nam somnath tha islie hamne janmakundli somnath ke nam se banai hai aur uska nari janm hua 25/10/2003 ko jab usne apna nam rakha ‘manbi’. pahle ham somnath ki janmakundli ka vishleshan karenge
- janmakundli ka vichar karen to kark lagn ki kundli men tritiyesh aur dvadshesh budh shashth sthan men ketu ke sath baithe hain. saptam bhav kendra men tin-tin pap grahon ki yuti hai. dvitiyesh surya, ashtamesh shani aur dashmesh mangal sabhi pap grah kendra men sthit hain aur bhagyesh guru bhagya sthan men baithakar bhagya ki vriddhi kar rahe hain aur lagnesh chandrama dvadash men rahu ke sath grahan yog bana rahe hain isi karan somnath ko jivan bhar atyant mansik vedna jhelni pari aur chunki lagnadhipti bhi hai islie sharirik vikar bhi diya.
andar bachapan se bahut drirh vicharon vali aur prabal ichchashakti vali mahilaon ke gun the. jo usne chaha vah kar dikhaya. jab parhai ka samay tha to pure josh se parhai ki aur jab paisa kama liya to apne drirh nishchay se ling parivartan bhi kara liya. bhagya sthan men sthit svagrihi guru ki lagn, tritiya v pancham sthan par drishti prabhav se use parhne ki prerna mili aur apni buddhi, vivek aur sujhbujh se hi use aj prisinpal banne men kamyabi prapt hui.
panchmesh v karmesh mangal ke uchch rashisth hone tatha dasham bhav arthat karya bhav par svagrihi drishti (apne bhav par drishti) hone se use sarkari naukri bhi prapt ho gai aur dvitiya bhav (dhan bhav) par mangal v shukra ki drishti se manbi ko paise ki bhi koi taklif nahin hui aur sath hi transjendar hote hue bhi usne ek beta god le liya aur aj apne god lie bete devashish ke sath apna jivan sukhi bana liya hai.
somnath ki kundli men mangal kendra men uchch ka hokar ruchak namak mahapurush yog bhi bana raha hai jiske prabhav se ye bahut sahsi, nidar, karmath aur mahatvakankshi hain. usne jivan men pratikul paristhitiyan hote hue bhi har nahin mani aur apne lakshya ko hasil kar hi liya. navmansh kundli men bhi surya chandrama shukra aur budh ke apne uchch navmansh men hone se jivan men vikat samasyaen hone ke bavjud apni manokamna purn karne ki kshamata prapt ki aur samaj men apne balbute par man, samman aur pratishtha hasil kiya.
ashtamesh shani, mangal aur surya bhi pap, krur grahon ki saptam bhav men yuti aur kisi bhi shubh grah ki drishti ke abhav ke karan inko vaivahik jivan ka sukh prapt nahin ho saka. somnath ne apna ling parivartan 25 aprail 2003 men karaya aur purush se nari ban gaya. islie is din ko vah apne nari janm divas ke rup men manati hai. is din ki kundli ka avlokan karen to lagnesh guru bhagya sthan par baith kar apni svarashi se lagn ko dekh rahe hain aur tritiya bhav sthit bhav karak mangal ko bhi dekh rahe hain.
isi karan uske pashchat usne nirantar pragti ki aur apni shiksha ke bal par itna man-samman prapt kiya. karak grah mangal tritiya bhav men sthit hokar use drirh nishchayi, sahsi aur karmath bana rahe hain. isi tarah labhesh shukra, karmesh budh, bhagyesh surya aur ashtamesh chandra tatha ketu ka ekadash bhav men panchagrahi yog hone se manbi ko dhan-sanpatti, man pratishtha aur achcha labh hoga. lekin is panchagrahi yog se pravajya yog bhi ban raha hai
jisse jivan men vairagya ki bhavna utpann hogi. manbi bhavishya men jivan men purn shanti ke lie adhyatmik jivan ki or bhi kadam barha sakti hai. chanuki yah kundli guru pradhan kundli hai aur guru ke adhipatya ke karan manbi ka jivan shiksha, adhyayan, v adhyapan, samajik karyon men hi vyatit hoga isi ki sanbhavna najar ati hai. kundli men panchmesh mangal aur lagnesh guru ka paraspar drishti sanbandh hone se prabal rajyog ban raha hai jisse inhen bhavishya men sarkari tatha gair sarkari sansthaon se kuch puraskar v avard bhi prapt hone ke yog banenge.