aksar dekhne men ata hai ki mata-pita apne bachchon ke vivah ke samay apni jat-pant, apne khandan, rahn-sahan ke star adi par bahut jor dete hain aur unki koshish yahi hoti hai ki unka damad ya unki bahu apni hi jati se ho taki unke riti rivaj, khan-pan, rahn-sahan adi men samanta ho aur kisi prakar ki pareshani n ho, lekin aj ke is takniki yug men jab pura vishva itna simat chuka hai, to jat-pant ki ye duriyan bemani si lagti hain.
aj ka yuva varg to bas man ke mel ki bat karta hai. unhen samaj ke dayre ya apne parivar ke drishtikon kafi sankuchit lagte hain. unke vichar men apsi pyar aur apsi samanjasya ke samne jat-pant ki divar bahut khokhli hai. ajakal intrnet se anek sanbandh isi tarah ban rahe hain. ab yah jaruri nahin ki sare sanbandh achche hi sabit ho rahe hon ya fir sare bigar hi rahe hon. apvad har jagah hota hai.
mrinal aj bahut khush thi. abhi-abhi amerika se uski bahu jeni ka fon aya tha aur vah usse shiv ratri ke vrat ke bare men puch rahi thi. mrinal ne use vistar se shivji ki katha sunai aur bataya ki vah kis tarah se falahar lekar vrat rakh sakti hai. jeni to shayad nirjal vrat rakhne ki taiyari kar rahi thi. mrinal ke chehre par khushi v santosh ki lahar daur gai thi.
yah vahi jeni hai, jise uske videshi hone ke karan kunal ke parivar ke anya sadasya bahu manne se inkar kar rahe the. kunal aur jeni ke vivah ka sabhi ne virodh kiya tha. yah to jeni ka pyar v uski sabke prati atmiyata hi thi jisne mrinal ka dil jit liya tha. jeni ne sada hi unhen apne mammi papa se jyada adar aur pyar diya, unki jarurton ka bina kahe hi itna khyal rakha jitna ki shayad hi koi bhartiya larki rakh pati.
kunal em. bi. e. karne ke pashchat ek ameriki kanpni men unche pad par kam kar raha tha, jahan par uski dosti apni hi baes jeni se ho gai. jeni use bahut pasand karti thi. uske janmadin par uske lie vah khud bara-sa kek bana kar lai. kunal bhi khud ko uski taraf khincha-sa mahsus karne laga tha. par chunki vah ek rurhivadi brahman parivar se tha, islie koi bhi pahal nahin karna chahta tha. lekin dhire-dhire jeni hindu riti rivajon men dilachaspi lene lagi aur jid karke kunal ke ghar akar uske parivar valon se bhi mili.
usne sabki pasand-napsand ke bare men jana aur puri koshish ki ki vah parivar ke sabhi sadasyon se achchi tarah ghulmil jae aur unke dil men apni jagah bana sake. kunal ke mata-pita v bahan ko jeni uski dost ke rup men to achchi lagi par jab kunal ne vivah ka prastav rakha, to ve ekadam se taiyar nahin hue. ek videshi bahu ko svikar karna itna asan nahin tha. kunal ke mata-pita is bat ko lekar jyada fikramand the ki samaj aur unke rishtedar kya kahenge.
brahman parivar men mans machchi khane vali videshi bahu! bahut jaghansai hogi. lekin donon ke pyar ke age unki ek n chali. jeni ne kuch din unke ghar par rah kar hindi sikhi, unke priya vyanjan banane sikhe aur khud apne hathon se bana kar unhen khilaya. is tarah unke dil jit kar unhen apna bana liya aur unhonne jeni aur kunal ki sagai ke lie han kar di. aur fir donon amerika chale gae.
videsh pahunch kar jeni aur kunal ne rajistri vivah kiya aur fir jeni ke parivar valon ne kunal ko khule dil se apna liya. jeni kunal ki khushi ki khatir shakahari ban gai aur usne bhartiya vyanjan banana sikha tatha sare riti-rivaj v tyauhar bhi bhartiya taur-tarike se manane lagi. bharat men apne sas-sasur v nanad ke sath ghanton bat karne, kunal ki pasand-napsand janne men use bahut maja ata. sasural se dur rahakar bhi jeni apne dayitvon ko bakhubi nibha rahi hai
aur ab kunal ke mata-pita ne bhi use dil se apni bahu svikar kar liya hai, kyonki man ke rishte jyada hi majbut aur khubsurat hoete hain aur duniyadari v samaj ki divaren unke age bahut choti par jati hain. aie, karen kunal aur jeni ki kundliyon ka vivechan. kunal aur jeni ki kundliyon ka milan karen, to kunal ki janm rashi tula aur jeni ki rashi kunbh donon vayutatva hain.
donon ki rashiyon ke vayu tatva hone ke karan donon ke svabhav men visheshtaen saman hain aur donon ke sanbandh bhi madhur hain. donon ke rashi svamiyon men mitrata hone ke karan bhi donon ek dusre ke prati purn rup se samarpit hain tatha satat ek dusre ke sukh dukh men purn sahyog dene ke lie tatpar rahte hain. jeni ka lagnesh guru pancham bhav men apni uchch rashi men trikon bhav men sthit hai jiske karan vah kushagra buddhi, yashasvi tatha saral hriday vali larki hai. vah dusron ke prati samarpit aur unhen purn adar dene vali hai.
dvadash bhav men ketu, mangal, budh, surya v chandra ki sthiti uske videsh se gahre sanbandhon ko bhi darsha rahi hai. panchmesh chandra, saptamesh budh tatha bhagyesh aur navmesh mangal ki dvadash bhav men yuti antarrashtriya prem vivah ki suchak hai. kunal ki janmakundli men bhi panchmesh bhagyesh lagn ke sath ashtam sthan men, saptamesh pancham men aur shani saptam men sthit hai. ye sare yog kisi videshi mahila se prem sanbandh tatha videsh gaman ke suchak hain.
kunal ke dvitiya bhav par lagnesh guru, bhagyesh mangal aur panchmesh chandra ki purn drishti hai, jisse arthik rup se uski sthiti hamesha sudrirh hi rahegi aur vah apne parivar ki arthik sahayta ke lie bhi tatpar rahega. jeni aur kunal ka janm lagn min hai jis karan donon ke achar-vichar v vyavhar men anek samanataen hain. kunal ki janmapatri men lagnesh, panchmesh tatha bhagyesh ki yuti uske uttam acharan, uchch vichar tatha bhakti bhav se bhare hone ka sanket de rahe hain.
pancham bhav se ishvar bhakti, lagn se atma tatha navam bhav se parmatma ka vichar kiya jata hai. shayad inhin shreshth gunon ke karan jeni kunal ki taraf akarshit hui, kyonki jeni ki janmapatri men bhi ishvar bhakti ka pancham bhav uchch rashi ke guru se yukt v mitra rashisth shukra se drisht hai. pancham bhav par kisi bhi pap ka prabhav nahin hai.
pancham bhav prem men saflta ka pratik hai aur jeni ke pancham bhav men guru aur shukra ka prabhav n keval prem men saflta ki garanti de raha hai apitu yah bhi batata hai ki uska prem sanbandh ek atyant kulin parivar v shreshth brahman jati ke sabhya, sushil, sushikshit v susanskrit vyakti se hai. in donon ko sada saflta ke nae sopan hasil hote rahen aur inka prem antarrashtriya vivah ke lie ek misal bane yahi hamari prabhu se prarthana hai.