aitihasik aur pauranik gathaon se alankrit puratan pragya ka pradesh bihar bhale hi 15 navanbar san 2000 ko vibhakt hokar jharkhand rajya ban gaya par yahan ke kankr-kankar men shankar virajman hain jahan ka chappa-chappa shiv vibhuti se sanprikt hai. prachin kal men is uttara-purva bhartiya bhumi par magdhi, bhojpuri, maithili v angika namak sanskritik khand sthapit rahe jismen ang kshetra men aj bhi shatadhik prakhyat shiv mandir hain inhin men ek hai baba vasuki nath, jo devaghar yatra ke antim parav kshetra ke rup men yugon-yugon se charchit hai. shravan ke dinon men hone vale vishva star par pratishtha prapt purva bharat ki kanvr-yatra ka praranbh ajgaivinath (sultanganj) se hota hai jiska pradhan kendra vaidyanath dham hai par iske bad bhakton ki samast toli jahan anivarya rup se jati hai vahi hai vasukinath. is tarah se shivshankar ke tiryak siddh dham ka antim prasiddh kendra yahi vasukinath hai.
yahan baba bol bam ke nam par hi pure kshetra ko vasukidham kaha jata hai. shivabhakton ki ray men baba vaidyanath tirth divani adalat hai to baba vasukinath faujdari adalat hai, jahan bhakton ke manorthon ki tvarit sunvai hoti hai. dvadash jyotirling men ek shri vasukidham tirth ko dvadash jyotirling men dasven sthan par virajit nageshvar mahadev ke rup me puja ki jati hai. sthan darshan, prachin ullekh v sthan ke pahchan ke uprant yah spasht ho jata hai ki prachin daruk van (aj ka dumka kshetra) men avasthit nageshvar tirth yahi hai jahan shiv ke sath-sath usi bhakti v shraddhabhav se nagraj ki puja ki jati hai. aise nageshvar ka sthan gomti dvarka se 20 kimi. uttara-purva ya haidrabad se avha gram men athva almora ke jageshvar tirth ko bhi nageshvar tirth (nagesh tirtha) ke rup men abhihit kiya jata hai. par nageshvar tirth ke rup men sarvadhik prasiddhi prapt sthal yahi hai
jo jharkhand rajya ke dumka jilantargat jarmundi prakhand men devaghar dumka marg par lagabhag devaghar se 45 kimi. duri par uttara-purva disha men avasthit hai. yahan ranchi, dumka v bhaglpur se bhi bas seva upalabdh hai. jharkhand ki uprajdhani dumka se yah nagar 25 kimi. duri par hai. prachin katha: jankari milti hai ki prachin kal men supriya namak ek vaishya param shivabhakt tha jo ek bar nauka se yatriyon ke sath lanbi duri men ja raha tha tabhi us nauke par atanki rakshas daruk ne akraman kar diya aur sabhi yatriyon ko apne karagrih men dalakar bandi bana liya par bandi hone ke bavjud bhi supriya ne bhagvan shiv ki puja men koi kami nahin ki aur vah dhyanavastha men rah ann jal chorakar shivopasna karta raha.
jab yah bat daruk ko gyat hui to usne supriya ko kaha ki tu itna dhong kyon rach raha hai yahan koi mahadev nahin, sirf hamari sarkar hai, hamare kshetra men hamse hi shadyantra. par iske bad bhi supriya par koi asar nahin hua to krodhavash daruk ne jaise hi talvar uthayi ki sakshat shiv ne prakat ho daruk sahit uske samast ganchron ka vadh kar apne bhakt ki raksha ki aur supriya ke anuny-vinay par vahin usi kshetra men ling ke rup men sada sarvada ke lie pratishthit ho gae. chunki yah pauranik kshetra vasuki nag raj tirth tha atah baba ke sanrakshak pujak vasuki ke nam par hi is mahatejamay ling ka nam vasukinath par gaya. aj bhi is kshetra men namakaran ke sanbandh men ek katha kahi jati hai
ki kaliyug men yah kshetra aranya rup men sthapit ho janshunya ho gaya. vasu namak ek sthaniya vyakti ek bar kandmul ke chakkar men bhumi khod raha tha usi kram men jab uske kulhadi se patthar par chot lagi to patthar se raktadhar bahne lagi. yah dekh vasu atyant bhaybhit hua, tabhi akashvani hui ki yah samanya pashan khand nahin varan mahadev shankar ka divya rup hai, tabhi se us shivling ko vasukinath kaha jane laga. dharm vidvan daru dayal gupt ne ‘shiv mahima’ men yahan ki vishad charcha ki hai. ham ap sabhi jante hain ki bhagvan shankar ke kanth ka har hai sarp khasakar nag aur aj bhi n sirf dumka kshetra men varan sanpurn santhal pargna men sarp pujan ki vishesh paranpra hai tabhi to ganv-ganv men nagchaira, sarp pindi v nag mandir hain aur in sabhi ka pradhan pujan tirth shri vasukinath hi hai
jise jagrit shaiv tirth kaha jata hai. vartaman men ek vishal parkote ke andar hi chandrakup (shivganga) ke nam se prachin jalashay hai jiska jal bhi vasuki nath ko arpit kiya jata hai. mukhya mandir ke charon taraf ganesh, parvati, annapurna, kali, chinnamastika, bagla, tripur bhairvi, kamla, tara, radhakrishn, nandi v kartikey ke vigrah ko dekha ja sakta hai. khule akash ke niche palkalin nandi dekhakar bang kala shaili jivant ho jati hai. devaghar ki bhanti yahan bhi shiv shakti ke devalyon ke shikhar ka bandhan hota hai jise gathbandhan kahte hain. kitne hi laukik-alaukik katha ka sanbandh shri vasukidham tirth se hai. yahan pure shravan kanvriyon ki bhir se vishal mela lag jata hai. vasukinath ek aisa tirth hai
jahan aj bhi asadhya bimari v manovanchit mannaton ke lie mandir parisar men hi dharna diya jata hai aur iske ashanukul parinam milne se bhakton ki astha v vishvas dvigunit ho jati hai. mandir ke as-pas hi kamchlau bajar hai jahan pujan samagri, khane-thahrne ke chote-bare hotal v ghar le jane ke lie prasad sahit kitne hi sajavti v grihopyogi saman milte rahte hain jise log yadgari svarup le jate hain. devaghar v vasuki nath ke bich pede ke lie do sthal prasiddh hain jahan se log pera avashya lete hain.aspas ke darshaniya sthala:
duahkhaharan nath: vasukinath mandir se 4.5 kimi. pahariyon se ghira duahkhaharan nath hai. vivaran hai ki baba ki kripa se tamam tarah ke dukhon ka shaman daman svatah ho jata hai. nimanay shiv: vasukinath se karib 18.5 ki.mi. duri par mayurakshi nadi ke kinare nimanath mahadev ka vishesh dharmik mahatva hai
jahan shravan ke dinon men bara bhari mela laga karta hai.
shumbheshvar nath: vasukinath ke pas devghr-bhaglpur rod par saraiya hat ganv ke koriya rod mor se chah ki.mi. dur van prantar men shumbheshvar nath ka vishal mandir hai. is devalay ki prasiddhi is karan bhi hai ki yahan par daitya shumbh (nishumbh ke bhrata) ne bhagvan shiv ki aradhna kar siddhi prapt ki thi. yahan bhi shivganga ke nam se prachin sarovar hai.
mandrachal parvat: itihas prasiddh mandar parvat jiska upyog samudra manthan men mathani ke rup men kiya gaya, vasukinath se 80 kimi. duri par banka jila ke baunsi kshetra men hai jahan madhusudan tirth puran prasiddh hai. dharmik manyata hai ki vasukinath ne rajju ke rup men yahan apni seva prabhu ke charnon men arpit ki thi. pahari par iske liptne ka ankan aj bhi drashtavya hai.
tributeshvar mahadev: devaghar vasukinath path par devaghar se 18 kimi. dur yah sthan dharmik paryatan ka ek pramukh kendra hai. yahan ka mandir mahimakari hai jo vaidyanath v vasukinath ke madhya ka shaiv tirth hai. vivaran hai ki yahan bhi lankesh ravan ne shiv sadhna aur tapasya ki thi. mayurakshi nadi ka udgam bhi yahin hai. aise marg men avasthit nandan parvat (devaghar se 4 kimi.) bhi ek atyadhunik paryatan kshetra ban gaya hai. kul milakar dharmik sanskar v laukik paranpra men rog mukti ke sath kamnaon ki purti sthal ke rup men vasukidham ki charcha dur-dur tak hai. yahi karan hai ki yahan salane bhar desh-videsh se shiv bhakton ka agaman hota rahta hai jo yahan baba ke shri charnon men natamastak hokar dhanya-dhanya ho jate hain.