vyapar dukan ya vyavsay ki bikri barhane ke liye shukravar ko panch gomti chakra lal vastra men bandh kar apni dukan ki chaikhat se bandh dena chahiye, dhan labh hone lagega. shanivar se shuru kar sat din rojana darvaje par safed sarson rakhni chahiye. bikri barh jati hai. yadi vyapar thik n chal raha ho to apne vyaparik sthal ke darvaje ke bahar ki or donon taraf gehun ka ek-ek mutthi ata dal den aur aisa 43 din lagatar karen. vyapar thik chalne lagta hai. kisi anya safal vyapari ke yahan se shanivar ko koi lohe ki vastu apne yahan lekar ayen. apne vyapar sthal par kahin bhi ek haldi ka svastik banayen, us par thode se kale sabut urad rakhen aur uske upar vah lohe ki vastu rakh den. vyapar ke chalne ke yog bhi banne lagenge. yadi kisi karobar men koi nuksan ho raha ho ya jhagde vala mahaul ho to apne vajan ke barabar kachcha koyla bahte pani men bahana chahiye. avashya labh milta hai. yadi vyavsay men karmachari chor kar chale jate hon to kisi shanivar ko raste men pari hui koi kil lekar bhains ke mutra se dho len aur apne vyavsay sthal par gar den. karmachari sthir ho jayenge. naukri intaravyu men saflta hetu besan se bani pili mithai 43 dinon tak pita ko den.
kisi sarkari shikshan sansthan men 43 dinon tak do mutthi saunf dan karen. yadi naukri men pramoshan nahin ho raha ho to pratyek guruvar mandir men pili vastuon ka dan dena shuru kar dena chahiye aur roj subah ghas par nange panv chalna chahiye. shighra pramoshan hota hai. yadi naukri santosh janak n chal raha ho to 43 din tak lagatar tin kele kisi dharmik sthal par den. mathe par 43 din tak kesar ya haldi ka tilak karen. yadi naukri men baes ya sahyogiyon se nahin ban rahi ho to janm mah men janmadin se pahle 10 sadhuon ko khana khilayen tatha har virvar ko gay ko kela khilayen. yadi naukri jane ka khatra ho ya transafar rukvana ho to 5 gram ek hi dali vala surma lekar shanivar ke din use kisi viran jagah par gar dena chahiye. garne vala aujar bhi vahin chor dena chahiye. aisa do shanivar lagatar karne se avashya labh rahta hai. svasthya yadi koi vyakti raktachap ya dipreshan se pareshan hai to use ravivar ki rat ko 325 gram dudh sirhane rakhakar so jana chahiye. somvar subah us dudh ko kikar ya pipal ki jar men dal dena chahiye. aisa 5 ravivar lagatar karne se aram malta hai. yadi kisi rogi ka bukhar, dava lene ke bavjud bhi utar n raha ho to ek ak ke paudhe ki jar ko kisi kapde men bandh kar use rogi ke kan ke sath bandh dena chahiye.
dhire- dhire bukhar utar jata hai. lagatar bukhar rahne par ichchanusar chini, chaval, dudh v petha lekar use rogi ke upar se var kar kisi dharmik sthal par langar adi ke liye dan kar dena chahiye. bukhar utrne lagta hai. yadi tayfaid se vyakti pareshan ho to pratidin nariyal pani pina chahiye. rog thik hone lagta hai. kisi vayask vyakti ke lanbe bimar hone par uske shayanakaksh men palang ke pas sendha namak kisi kanch ki katori men rakh dena chahiye. dava ka asar teji se hone lagega. najar dosh yadi kisi vyakti ko najar lag gai ho to namak, rai, lahsun, pyaj ke sukhe chilke v sukhi lal mirch ko angaron par dalakar us ag ko rogi ke upar se sat bar ghumane se buri najar ka dosh mitta hai. shanivar ke din hanuman mandir men hanuman ji ki aradhna kar unke kandhe par se sindur lakar rogi ke mathe par lagane se bhi buri najar ka prabhav kam hota hai. rogi yadi pan men gulab ki sat pankhuriyan rakhakar isht dev ka nam lekar khaye to buri najar ka prabhav dur hone lagta hai. lal mirch, ajvain v pile sarson ko mitti ke bartan men jalakar uski dhuni rogi ko dene se bhi kisi prakar ki najar thik ho jati hai.
kiye karaye ka utarne hetu manglvar ki rat ko palak ki ek guchchi sir ke pas rakhen. agli subah use gay ko khila den. 3 manglvar aisa karen. shanivar ke din kachcha dudh rogi ke upar se sat bar var kar kutte ko pila dene se buri najar ka prabhav dur hota hai. yadi najar dosh ke karan kisi bachche ka vikas ruk gaya ho to fitkri evan sarson ko bachche par se sat bar var kar chulhe par jhonk dene se najar utar jati hai. subah, dopahar v sham din men tin bar karne se ek hi din men najar dosh dur hota hai. ghar v vahan najar dosh yadi ghar ko buri najar se bachana ho to mukhya dvar ki chaikhat par kale dhage se pili kauri bandhakar latkane se samast upri badhaon se mukti milti hai. yadi apko lagta hai ki apke ghar ko kisi ne kuch kar diya hai jis karan se ghar par kuch n kuch apda ati rahti hai to ek nariyal ko kale kapde men silakar ghar ke bahar latka dena chahiye. yadi apke ghar par kisi tarah ka upri saya hai ya bimari ghar se bahar nahin niklti to mahine men do bar kisi bhi din ghar men upla jalakar loban v gugal ki dhuni dene se upri hava se bachav rahta hai aur bimariyan ghar nahin atin. yadi naye vahan men aksar garbri ho jati hai ya bar-bar durghatana hoti hai ya vahan par kharcha adhik ho raha ho to bhi vahan par kale dhage se pili kauri bandhne se vahan ko lagi buri najar hat jati hai aur pareshani kam hone lagti hai.
bhagya vriddhi kisi tale ki dukan par shukravar ko jayen aur ek stil ka tala kharid len. dhyan rahe ki tala band hona chahiye khula nahin. tala sahi hai ya nahin yah janchne ke liye bhi n kholen. us tale ko ek dibbe men rakhen aur shukravar ki rat ko apne bistar ke pas rakh kar so jayen. shanivar subah naha-dhokar us dibbe ko kisi mandir men bina kuch bole rakh ayen. vishvas rakhen ki jab koi us tale ko kholega to apki kismat ka tala khul jayega aur apke kam banne lagenge. tarjani anguli men sone v pital se bani anguthi pahnen, isse bhi bhagyavriddhi hoti hai. dhan vriddhi yadi dhan sanbandhit kasht adhik ho rahe hon to kisi bhi mandir men kele ke do nar v mada paudhe lagane chahiye aur unki dekhbhal karni chahiye. jab ve paudhe fal dene lagenge to dhan sanbandhit kasht svatah hi samapt ho jate hain. yadi ay se adhik vyay ho ya bachat n ho rahi ho to dhyan den ki ghar par dudh ya chay ublte samay gire nahin varna anavashyak kharch hone lagta hai. yadi dhan tikta n ho to pratyek shanivar ko kale kutte ko tel se chupri roti khilani chahiye. tatpashchat bhagvan se apni manokamna kahni chahiye. dhan tikne lagega. arthik samriddhi hetu apne khane men se kuch hissa rojana gay, kaua, bandar v kutte ko dalna chahiye.
nadi men bahti machliyon ko ate ki choti-choti goliyan dalen. subah uthakar yadi ghar ki malkin ek lota pani ghar ke mukhya dvar par dalti hai to ghar men lakshmi ke ane ke dvar khul jate hain. kharch kam karne hetu subh-subah mithe biskut pakshiyon ko dalne chahiye. shatru pira yadi koi shatru apko pareshan kar tanav de raha ho to manglvar ko hanuman mandir men sham ke samay lal rang ki mithai ya momabatti banten v mandir ki chat par lal rang ki dhvaja lagayen. yadi kisi shatru se pareshan hon to sabut urad ke 38 dane v chaval ke 40 dane milakar kisi gaddhe men daba den aur upar se ninbu nichor den. aisa karte samay shatru ka nam lete rahen, uska shaman hoga v vah apke viruddh koi kadam nahin uthayega. yadi koi vyakti bagair kisi karan se apko pareshan kar raha ho to pratahkal shauch kriya ke samay shauchalay men baithe-baithe hi vahin ke pani se us vyakti ka nam farsh par likhen v bahar niklne se purva nam par bayen pair se tin bar thokar maren. apki pareshani samapt hone lagegi. vibhinn jhagron se bachne hetu rat ko sote samay takiye ke pas pani rakhen v subah kisi paudhe men dal den v tandur men paki mithi roti kutte ko dalen.
ghar, dukan yadi koshish karne ke bavjud bhi apko ghar nasib nahin ho pa raha ho to shanivar ke din khule akash ke niche bhumi par subah jivnsathi sang ret se ek ghar banayen. ek chota lal rang ka jhanda us ghar ke upar laga den v ishvar se apne ghar ke liye prarthana karen. yadi kisi vyakti ka makan, dukan ya jamin n bik rahi ho to us vyakti ko shanivar ke din bajar se ginti kar 86 sabut badam chilke sahit kharid kar ghar lane chahiye. agle din ravivar ko subah naha-dhokar bina kuch khaye 2 badam lekar shiv mandir jakar bhagvan shiv ya shivling ke age rakhakar bhagvan se jamin bechne ki prarthana karen aur ek badam vapis ghar lakar kahin alag rakh den. aisa 43 din karna chahiye aur ant men ghar par ikatthe huye 43 badam kisi bahte jal men pravahit kar dena chahiye. sauda jarur ho jata hai. yadi 43 din se pahle hi sauda ho jaye to bhi upay pura karna chahiye.
parivarik klesh yadi ghar men parivarik klesh adhik rahte hon to ghar ke malik ko bahte gande pani men pensil ka sikka v tanbaku 43 din tak dalna chahiye. agar ap ghar men sukh-shanti chahte hain to har ek amavasya ke din ghar ki achchi tarah se safai kar bekar ka saman ghar se nikal dena chahiye aur kachchi lassi ka chinta pure ghar men dekar 5 agarabatti jalani chahiye. mansik shanti hetu khana khane ke bad kuch mitha khakar pani pine se man ko shanti milti hai aur panratishtha bani rahti hai. kisi parivarik karnon se ya anya karnon se bhi yadi tanav adhik hai ya dimag fatne ko ho raha ho to ek jag men pani lekar uske andar char lal mirch ke bij dalakar apne upar se sat bar utara karne ke bad ghar ke bahar sarak par fenk dena chahiye, fauran aram mil jata hai. vibhinn upay sarkar se labh - 4 sukhe nariyal aur 400 gram badam surya grahan ke samay bahte jal men pravahit karen. bandron ko gur khilane se bhi labh milega.
kisi karya ki saflta hetu - nak saf rakhni chahiye. kisi naye karya ko karne se pahle do ghunt pani pine se karya ki saflta asan ho jati hai.
surakshit prasav hetu - dudh v chini se bhare do alg-alag chandi ya tanbe ke patron ko man ke dvara hath lagva kar alg-alag sthanon par rakhen. prasav ke pashchat donon patron ko kisi mandir men dan karen.
sukhi vaivahik jivan hetu - suti dhage ko kesar se pila karen v dayen hath ki kalai men bandhen. kate-fate kapre nahin pahnna chahiye. kapdon ke rang - sharir ke upri bhag men saptah ke dinon ke anusar rang pahnna shubh rahta hai. nichle sharir par pahnne se jivan par bura prabhav parta hai. safed jute pahnne se panvon ko ghayal hone se bachaya ja sakta hai aur ye shodh karya ke liye shubh rahte hain. kale jute pratyek karya ke liye shubh kahe jate hain.
vidya prapti hetu - chaval v chandi ko kuen men dalen. kanyaon ko bayen nak men chandi ki bali dharan karvaen.
kort kes men vijay ke liye - thode se chaval tarikh ke din kort men kahin bhi fenk dena chahiye. apne kes vale rum men hi fekengen to adhik labh hoga. dhyan rahe ki aisa karte samay koi ap ko dekh n raha ho. yadi naukar n tik raha ho ya pareshan kar raha ho to 4 manglvar ko mithi bundi ka prasad mandir men charha kar larkiyon men bant dena chahiye, pareshani dur hone lagegi. yadi bante kam bigar rahe hon ya haradam koi pareshani lagi rahti ho to har manglvar ko mithi bundi ka prasad hanuman ji ke charnon men charha kar garibon men bant dena chahiye. labh hoga.
lal kitab ke upay karne ke lie khas hidayten
1. upay suryoday se suryast ke bich men karna chahie. rat ko sote samay upay n karen. chandra grahan ka upay rat ko kiya ja sakta hai.
2. ek din men keval ek upay hi karen. koi bhi do upay ek din men shuru n karen. ek din men do upay karne se shubh fal nahin milta ya kiya hua upay nishfal ho sakta hai.
3. jo upay jis samay ke lie ho use usi samay tak karen. age vah upay band kar den.
4. kai upay 43 din tak karne hote hain. usmen naga nahin ho yadi koi upay bich men tut jaye to us upay ko naye sire se dubara shuru kar den.
5. varfafal kundli ke upay janmadin ke 43 din ke bhitar shuru kar den.
6. ghar men koi sutak (bachcha janm ho) ya patak (koi mar jae) to 40 din upay nahin karne chahie.
7. yadi kisi karnvansh 43 din vala upay bich men band karna par jaye to jis din upay band karna ho usse ek din pahle thore se chaval kachche dudh men dhokar safed kapre men bandhakar pas rakh len aur jab dubara shuru karna ho to vah chaval chalte pani men baha kar ya kisi bag bagiche men gira kar fir se shuru kar den. aisa karne se upay adhura nahin mana jayega aur pura fal dega.
8. upay shuru karne ke lie kisi khas din, var, sankranti, amavasya ya purnima adi ko vichar n hoga.
9. apka upay apki jagah apke khun ka koi rishtedar bhai-bahan, putra-putri v mata-pita adi bhi kar sakte hain.
10. upayon ke sath-sath jo parhej adi batae gae hain unhane bhi pura mahattva den. jaise-bujurgon ke riti rivajon ko n toren aur sanskar pure karen. mit-sharab ka sevan n karen. chal-chalan thik rakhen. jhuth n bolen. juthan n khaen. niyat men khot n rakhen. par stri/purush se sanbandh n rakhen adi. upay ke sath parhej karne se fal jaldi milta hai. man lijie ap shani ka upay kar rahe hain aur sath-sath mit-sharab ka sevan bhi kar rahe hain to us upay ka fal nahin milega ya kam milega.